ᐱᖕᖑᐊᖅᑐᓕᕆᓂᖅ

ᐊᒥᐊᒥᓂᕐᓂᒃ ᑕᐅᕐᓰᓂᐅᑉ ᐅᓪᓗᖓ ᐊᓯᔾᔨᖅᑕᐅᔪᖅ ᓈᑦᓯᐅᖑᔭᓛᕐᓂᐊᒧᑦ, ᐋᒐᓯ 22

ᖃᐅᔨᒪᓂᐊᖅᑯᓯ ᐅᓪᓗᕐᓯᐅᑎᒍᑦ ᐊᓯᔾᔨᖅᑐᖃᕐᓂᖓᓂᑦ ᓯᑎᒃᑯᑦ ᐊᒥᐊᒥᓂᕐᓂᒃ ᑕᐅᕐᓰᓂᐅᔪᖅ ᐊᑐᖅᑕᐅᖓᓛᕐᒪᑦ ᓈᑦᓯᐅᖑᔭᓛᕐᓂᐊᒥ, ᐋᒐᓯ 22, 2020 ᐱᒋᐊᕐᓗᑎᒃ 10−ᒥ ᐅᓪᓛᒃᑯᑦ 3−ᒧᓄᑦ ᐅᓐᓄᓴᒃᑯᑦ ᓯᑎᒃᑯᑦ ᓄᓇᓯᐅᑎᒃᑯᕕᖓᓂ ᓴᓂᐊᓃᑦᑐᒥ ᑮᓇᐅᔭᒃᑯᕕᐅᑉ ᑎᓴᒪᓄᑦ ᐊᑐᕆᐊᓄᑦ ᓴᖑᒋᐊᕐᕖᑦ ᖃᓂᒋᔭᖏᓐᓂ. ᐊᓯᔾᔨᖅᑕᐅᔪᖅ ᐅᓪᓗᖓ ᐊᑐᖅᑕᐅᓂᐊᓚᐅᕋᓗᐊᕐᒪᑦ ᑕᓪᓕᒥᕐᒥ, ᐋᒐᓯ 21.

ᓄᓇᓕᕐᒥᐅᑕᐃᑦ ᑐᖕᖓᓱᑦᑎᐊᓛᖅᑐᑦ ᕿᒪᐃᒋᐊᖅᑐᕐᓗᑎᒃ, ᑕᐅᕐᓰᒋᐊᖅᑐᕐᓗᑎᒃ, ᐅᕝᕙᓘᓐᓃᑦ ᐊᐃᑦᓯᕐᓗᑎᒃ ᐊᒥᐊᕈᑎᓂᑦ ᐊᑐᖅᑕᐅᓕᖅᐸᑦ ᑕᒪᓐᓇ. ᓯᑎᒃᑯᑦ ᐃᖅᑲᓇᐃᔭᖅᑎᖏᑦ ᐊᑦᑕᓇᔾᔭᐃᕐᓯᒪᓗᒋᑦ ᐃᒋᑦᑐᒍᓐᓇᓛᖅᑐᑦ ᐃᓘᓐᓇᖏᓐᓂᑦ ᐊᒥᐊᕈᑎᒥᓂᕐᓂᒃ, ᐊᒥᐊᕈᑎᓂᑦ ᐱᔭᐃᖏᓐᓂᖏᓐᓂᑦ.

ᐳᐃᔾᔪᕋᕐᕕᒃ ᒪᑐᐃᓯᒪᑲᐃᓐᓇᓂᐊᖅᑐᖅ

ᐳᐃᔾᔪᕋᕐᕕᖃᕐᕕᒻᒥ ᐳᐃᔾᔪᕋᕐᕕᒃ ᒪᑐᐃᓯᒪᑎᑕᐅᑲᐃᓐᓇᓂᐊᖅᑐᖅ ᑭᒃᑯᑐᐃᓐᓇᕐᓄᑦ ᐱᒋᐊᕐᓗᑎᒃ ᐅᓐᓄᖓᓂ ᓇᒡᒋᔾᔭᐅᑉ, ᐋᒐᓯ 17 ᐱᓕᕆᔾᔪᑎᖏᑦ ᖃᐅᔨᒋᐊᖅᑕᐅᑲᐃᓐᓇᑎᓪᓗᒋᑦ ᓴᓇᒋᐊᖃᕐᒪᖔᑕ. ᓇᒡᒋᔾᔭᐅᓕᖅᑭᕐᒥ, ᐋᒐᓯ 18 ᐅᓐᓄᓴᒃᑯᑦ 5−ᒨᓚᐅᖏᓱᖓᕐᓂᖓᓂ ᐅᖃᐅᓯᐅᓛᖅᑐᖅ ᒪᑐᐃᒃᑲᓐᓂᓛᕐᒪᖔᖅ ᖃᖓᒃᑯᑦ.

ᒪᑐᐃᓯᒪᑲᐃᓐᓇᕐᓂᐅᔪᖅ ᐊᑦᑐᐃᓂᐅᓴᒻᒪᑦ ᑐᑭᓕᐊᖅᑐᓄᑦ ᐳᐃᔾᔪᕋᕐᕕᒻᒥᑦ ᐊᒻᒪ ᐱᓐᓇᔭᓐᓇᖅᑐᒥᑦ ᐳᐃᔾᔪᕋᕐᕕᒻᒥᑦ. ᐃᖃᐃᓕᓴᕐᕕᒃ, ᐊᓐᓄᕌᕐᕕᖏᑦ ᐊᒻᒪ ᐲᑕ ᓂᕆᕕᒃ ᒪᑐᐃᖓᐃᓐᓇᓂᐊᖅᑐᑦ.

ᐃᖃᓗᐃᑦ ᖃᑦᑎᕆᔨᒃᑯᖏᑦ ᐅᐸᓚᐅᖅᑐᑦ ᐃᓪᓗᕋᓛᒧᑦ ᐃᑯᐊᓚᔪᒧᑦ ᐋᒐᓯ 14

ᐅᓐᓄᐊᒃᑯᑦ ᖁᓛᓃᖔᓕᖅᑎᓪᓗᒍ ᐋᒐᓯ 14−ᒥ, 2020, ᐃᖃᓗᐃᑦ ᖃᑦᑎᕆᔨᒃᑯᖏᑦ ᐅᐸᓚᐅᖅᑐᑦ ᐃᑯᐊᓚᔪᒧᑦ ᓯᔾᔭᒥ.  ᑎᑭᒃᑲᒥᒃ, ᐃᖃᓗᐃᑦ ᖃᑦᑎᕆᔨᒃᑯᖏᑦ ᖁᓕᐅᓚᐅᖅᑐᑦ, ᓇᓂᓯᓚᐅᖅᑐᑦ ᐃᓪᓗᕋᓛᒥᑦ ᐃᑯᐊᓚᔪᒥᑦ ᐊᑕᐅᓯᕐᒥᑦ ᐃᓄᖃᓚᐅᖅᑐᒥᑦ.  ᖃᑦᑎᕆᔨᐅᔪᑦ ᖃᒥᑦᓯᑦᓴᐅᑎᒋᓚᐅᖅᑐᑦ ᐃᑯᐊᓚᔪᒥᑦ ᐊᒻᒪ ᐊᓂᑦᓯᓪᓗᑎᒃ ᐊᑕᐅᓯᕐᒥᑦ ᐊᖑᒻᒥᑦ ᐃᓪᓗᕋᓛᒥᑦ ᐊᒻᒪ ᑲᒪᒋᔭᐅᒋᐊᑦᑕᐅᑎᒋᓚᐅᖅᑐᖅ.  ᓄᓇᒃᑰᔫᖅ ᑐᐊᕕᕐᓇᖅᑐᓄᑦ ᐃᓪᓗᕋᓛᒦᓚᐅᖅᑐᒥᑦ ᕿᑭᖅᑕᓂ ᐋᓐᓂᐊᕕᒻᒨᕈᔾᔨᓕᓚᐅᖅᑐᑦ.  ᑭᓯᐊᓂ ᐅᒡᒍᐊᓇᖅᑐᖅ, ᐋᓐᓂᐊᕕᒻᒦᓕᖅᑐᓂ ᐃᓅᔪᓐᓃᕐᓂᕋᖅᑕᐅᓯᒪᓚᐅᖅᑐᖅ.

ᐸᓖᓯᒃᑯᑦ ᐊᒻᒪ ᐊᓪᓚᕝᕕᖓᑦ ᖃᑦᑎᕆᔨᒻᒪᕆᒃᑯᑦ ᐃᑲᔪᓚᐅᖅᑐᑦ ᐃᑯᐊᓚᔪᒥ ᐊᒻᒪ ᖃᐅᔨᓴᐃᓐᓇᓂᐊᖅᑐᑦ ᖃᓄᐃᓕᓐᓂᕐᒪᖔᖅ.  ᒫᓐᓇᐅᔪᕐᓕ ᖃᓄᖅ ᐃᑭᒋᐊᓯᓐᓂᕐᒪᖔᖅ ᖃᐅᔨᒪᔭᐅᖏᒻᒪᑦ ᖃᐅᔨᓴᖅᑕᐅᕙᓪᓕᐊᔪᖅ.

ᐃᖃᓗᒻᒥᐅᑕᐃᑦ ᓇᒻᒥᓂᖃᐅᑎᖃᕐᓂᕐᒧᑦ ᓚᐃᓴᑖᕆᐊᓖᑦ ᓂᕿᓂᒃ ᐊᑐᐃᓐᓇᕈᖅᓴᖅᓯᒪᔪᓂᒃ ᓂᐅᕕᐊᒃᓴᖃᕐᓂᐊᖅᐸᑕ

ᐅᓄᕐᓂᖅᓴᐃᑦ ᐃᖃᓗᒻᒥᐅᑕᐃᑦ ᖃᕋᓴᐅᔭᒃᑯᑦ ᐳᓛᖅᕕᒃᑯᑦ ᓂᐅᕕᖃᑦᑕᓂᖅᓴᐃᓕᕐᒪᑕ ᐊᒻᒪᓗ ᓂᐅᕕᐊᒃᓴᖃᕐᓂᖅᓴᐅᕙᓕᖅᑐᑎᒃ ᐊᑐᐃᓐᓇᕈᖅᓴᖅᓯᒪᔪᓂᒃ ᓂᕿᓂᒃ, ᓄᓇᓕᐸᐅᔭᒃᑯᑦ ᐃᖅᑲᐃᑎᑦᑎᒋᐊᖅᐳᑦ ᐃᖃᓗᒻᒥᐅᓂᑦ ᓇᒻᒥᓂᖃᐅᑎᖃᕐᓂᕐᒧᑦ ᓚᐃᓴᑖᖅᕆᐊᖃᕐᒪᑕ ᓂᕿᓂᒃ ᓂᐅᕕᐊᒃᓴᖃᕐᓂᐊᖅᑲᑕ ᐊᒻᒪᓗ ᖃᐅᔨᒪᓗᑎᒃ ᐱᒻᒪᕆᐅᓂᖓᓂᑦ ᓂᖀᑦ ᑲᒪᒋᔭᐅᑦᑎᐊᕆᐊᖃᕐᓂᖏᓐᓂᑦ.

ᓄᓇᓕᐸᐅᔭᒃᑯᑦ ᐃᓪᓗᖁᑎᖓ ᓈᓴᐅᑎᓕᒃ 901 ᐊᕐᓇᐃᑦᑑᑉ ᐃᓪᓗᖓᓂ  ᐃᓯᖅᕕᖏᑦ ᓄᑖᕈᕆᐊᖅᑕᐅᓛᖅᑐᑦ ᓴᓇᒋᐊᖅᑕᐅᓗᓂᓗ

ᓄᓇᓕᐸᐅᔭᒃᑯᑦ ᐃᓪᓗᖁᑎᖓ ᓈᓴᐅᑎᓕᒃ 901 ᐊᓇᐃᑦᑑᑉ ᐃᓪᓗᖓᓂ ᓴᓇᒋᐊᖅᑕᐅᓛᕐᒪᑦ 2020 ᐊᒻᒪ 2021-ᒥ ᐃᖃᓗᒻᒥᐅᑕᐃᑦ ᐊᑲᐅᓂᖅᓴᒥᒃ ᐃᓯᖅᕕᖃᖁᓪᓗᒋᑦ ᑭᒃᑯᑐᐃᓐᓇᕐᓄᓪᓗ ᐊᑐᐃᓐᓇᐅᓂᖅᓴᐅᖁᔭᐅᓪᓗᓂ ᒐᕙᒪᕋᓛᖃᖅᕕᐅᔪᖅ.

ᑖᒃᑯᐊ ᓴᓇᒋᐊᑕᐅᔪᑦ ᐊᔪᕈᓐᓃᑎᑦᑎᓂᐊᖅᑐᑦ ᐃᓄᕐᓂᖅᓴᐅᔪᓂᒃ ᐱᒡᒐᖅᑐᓂᒃ ᐱᓕᕆᐊᕆᒋᐊᓕᖏᓐᓂᑦ ᐃᒻᒥᓂᒃ ᐱᔪᓐᓇᖅᓯᑎᑦᑎᓗᑎᒃ ᐊᒻᒪᓗ ᓱᑎᑦᑎᔪᖃᖅᑎᓪᓗᒍ ᑲᑎᒪᔪᖃᖅᑎᓪᓗᒍᓗ ᐅᐸᖃᑕᐅᔪᓐᓇᓕᕐᓗᑎᒃ.

ᐃᓪᓗᕋᓛᓕᐅᖃᑦᑕᕐᓂᖅ ᐊᑐᖅᑐᐊᑕᐅᓐᖏᑐᓂ ᓄᓇᓕᐸᐅᔭᒃᑯᑦ ᓄᓇᖁᑎᖏᓐᓂ ᓄᖅᑲᖅᑎᑕᐅᑲᐃᓐᓇᖅᐳᖅ ᖃᓅᒋᐊᖃᓛᓕᕐᒪᖔᖅ ᖃᐅᔨᒃᑲᐃᒐᓱᐊᕐᓂᖏᓐᓂ

ᓄᓇᓕᐸᐅᔭᒃᑯᑦ ᖃᐅᔨᒐᓱᓐᓂᐊᕐᒪᑕ ᖃᓄᖅ ᐱᕙᓕᐊᑎᑦᑎᔪᓐᓇᕐᒪᖔᑕ ᒪᓕᒐᖅᑎᒍᑦ ᐊᐅᓚᑦᑎᔾᔪᑎᒃᓴᓂᑦ ᐃᓪᓗᕋᓛᓕᐅᕐᓂᐅᕙᑦᑐᓂᒃ ᐊᒻᒪᓗ ᐃᖃᐃᓕᓴᕐᓂᕐᒧᑦ ᑐᕌᖓᔪᓂᒃ ᓴᓇᔭᐅᕙᑦᑐᓂᒃ ᐊᑐᖅᑐᐊᑕᐅᓐᖏᑦᑐᒥ ᓄᓇᓕᐸᐅᔭᒃᑯᑦ ᓄᓇᖁᑎᖓᓂ, ᑲᑎᒪᔩᑦ ᐊᖏᖅᑐᐃᓐᓇᐅᓚᐅᖅᑎᓪᓗᒋᑦ ᐃᓱᒪᓕᐅᕈᑎᐅᔪᒥᒃ ᔪᓚᐃ 28, 2020-ᒥ ᑲᑎᒪᔨᑦ ᑲᑎᒪᑎᓪᓗᒋᑦ. ᑖᓐᓇ ᐋᖅᑭᑦᑕᐅᔪᖅ ᓴᖅᑭᓚᐅᖅᑐᖅ ᐊᑐᓕᖁᔭᓕᐊᖑᔪᔪᒥ ᐸᕐᓇᓂᕐᒧᑦ ᐱᕙᓪᓕᐊᑎᑦᑎᓂᕐᒧᓪᓗ ᑲᑎᒪᔨᕋᓛᑦ ᑲᑎᒪᑐᐃᓐᓇᑎᓪᓗᒋᑦ ᔪᓚᐃ 21, 2020-ᒥ.    

2019 ᐱᖁᑎᓄᑦ ᑖᒃᓰᔭᐃᔭᐅᑎᓂᑦ ᐊᑭᓕᒻᒪᐃᑦᑐᓂᑦ ᐊᑭᓕᑦᓴᓖᑦ ᑎᑎᕋᕐᓯᒪᔪᑦ

ᐃᖃᓗᐃᑦ ᓄᓇᓕᐸᐅᔭᖓ ᓴᖅᑭᖅᓯᓂᐊᓕᕐᒥᒻᒪᑦ ᑎᑎᕋᖅᓯᒪᔪᓂᒃ 2019-ᒥ ᐱᖁᑎᓄᑦ ᑖᒃᓯᓄᑦ ᐊᑭᓕᓐᖐᑦᑐᓖᑦ ᐊᑎᖏᓐᓂᑦ ᑕᐃᒪᐃᒋᐊᖃᖅᑎᑕᐅᒻᒪᑕ ᒪᓕᑦᑐᑎᒃ ᓈᓴᐅᑎᓕᒻᒥᒃ 97 ᐱᖁᑎᓂᒃ ᖃᐅᔨᓴᕐᓂᕐᒧᑦ ᑖᖅᓰᔭᐃᑎᑦᑎᓂᕐᒧᓪᓗ ᐱᖁᔭᕐᔪᐊᕐᒥᒃ. ᑖᒃᑯᐊ ᑎᑎᕋᖅᓯᒪᔪᑦ ᓴᖅᑭᔮᖅᑎᑦᑎᕗᑦ ᐱᖁᑎᓕᓐᓂᑦ ᐃᖃᓗᓐᓂ ᐊᑭᓕᓐᖐᑦᑐᖁᑎᓕᓐᓂᑦ $500 ᐅᖓᑖᓂᑦ. ᑖᒃᑯᐊ ᑎᑎᕋᓯᒪᔪᑦ ᓴᖅᑭᔮᖅᑎᑦᑎᕗᑦ ᓄᑖᕈᕆᐊᖅᑕᒥᓂᐅᔪᓂᒃ ᔪᓚᐃ 15, 2020-ᒥ.

ᐊᑭᓖᔪᓐᓇᖅᑐᑦ ᖃᕋᑕᐅᔭᒃᑯᑦ ᖃᕋᑕᐅᔭᒃᑯᑦ ᑮᓇᐅᔭᒃᑯᕕᓕᕆᔾᔪᑎᒃᑯᑦ ᐅᕝᕙᓘᓐᓃᑦ ᐅᖄᓚᓗᓂ ᐅᕗᖓ 979−5606. ᐊᐱᖅᑯᑎᖃᕐᓂᕈᑦᓯ, ᖃᐅᔨᒋᐊᖅᑕᐅᒍᓐᓇᖅᑐᖅ ᔨᓃᕙ ᓯᔅᓚᑦ ᐅᕗᖓ ᑎᑎᕋᕐᕕᒋᓗᒍ G.chislett@iqaluit.ca.

ᐊᓯᔾᔨᖅᑕᐅᔪᑦ ᖃᑦᑎᐅᓂᕆᕙᑦᑕᖏᑦ ᐊᖏᕐᕋᕆᔭᐅᔪᓄᑦ ᐃᒥᕐᒧᑦ ᑮᓇᐅᔭᖅᑎᒍᑦ ᐃᑲᔫᑎᐅᕙᑦᑐᑦ

ᓄᓇᕗᑦ ᑐᖕᖓᕕᒃᑯᑦ ᑎᒥᖁᑎᖓᑦ ᐊᒻᒪ ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖓᑦ ᐃᓄᐃᑦ ᐊᖏᕐᕋᖏᑕ ᐃᓗᖏᓐᓂᑦ ᓴᓗᒻᒪᕐᓴᐃᑎᓂᑦ ᐱᑎᑦᑎᔪᑦ

ᓄᓇᕗᑦ ᑐᖕᖓᕕᒃᑯᑦ ᑎᒥᖁᑎᖓᑦ ᐊᒻᒪ ᓄᓇᓕᐸᐅᔭᐃᑦ ᐃᖃᓗᐃᑦ ᖁᔭᓐᓇᒦᕈᒪᔪᑦ ᓄᓇᓕᑦᑎᓐᓂ ᑲᑐᔾᔨᖃᑎᒋᕙᑦᑕᖏᓐᓂᑦ ᐱᑎᑦᑎᕙᑦᑐᑎᒃ ᓴᓗᒻᒪᕐᓴᐃᔾᔪᑎᑦᓴᓂᑦ ᐃᓄᐃᑦ ᐃᓚᒌᓄᑦ ᐃᑲᔪᖅᑕᐅᒋᐊᓕᓐᓄᑦ ᓄᕙᕐᔪᐊᕐᓇᖅ−19 ᐊᑐᖅᑕᐅᑎᓪᓗᒍ.

ᐱᖕᖑᐊᖅᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᑲᑎᕐᓱᐃᓚᐅᖅᑐᑦ 1,000−ᓂᑦ ᓴᓗᒻᒪᕐᓴᐃᔾᔪᑎᑦᓴᓂᑦ ᐱᑎᑕᐅᓚᐅᕋᒥᒃ $50,000−ᓂᑦ ᓄᓇᕗᑦ ᑐᖕᖓᕕᒃᑯᓐᓂᑦ. ᓯᑎᒃᑯᑦ ᖁᔭᓐᓇᒦᕐᒥᔪᑦ ᑐᑭᓯᒋᐊᕐᕕᒃ ᓱᓴᐃᔭᑎᒃᑯᓐᓂᑦ, ᖃᔪᖅᑐᕐᕕᒃ ᓄᓇᓕᓐᓂ ᓂᕿᑖᕐᕕᒃ, ᐊᒻᒪ ᒐᕙᒪᒃᑯᑦ ᓄᓇᕗᒻᒥ ᐃᓚᒌᓂᑦ ᐱᔨᑦᓯᕋᖅᑎᖏᓐᓂᑦ ᐱᓕᕆᐊᖃᐃᓐᓇᐅᔭᕐᓂᖏᓐᓂᑦ ᑐᑭᒧᐊᑦᑎᑦᑎᓗᑎᒃ ᐊᒻᒪ ᑐᓂᐅᖅᑲᐃᓗᑎᒃ ᓴᓗᒻᒪᕐᓴᐃᔾᔪᑎᓂᑦ.

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ

ᑰᕈᔪᐃᑦ, ᐃᒪᖅᑕᓖᑦ ᓴᓗᒻᒪᓴᖅᑕᐅᓂᐊᖅᑐᑦ

ᐋᒐᓯ 7, 2020 – ᐃᖃᓗᐃᑦ, ᓄᓇᕗᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖏᑦ ᑲᑐᔾᔨᖃᑎᒌᑦᑐᑎᒃ ᐱᓕᕆᖃᑎᒌᓐᓂᐅᓴᓕᕆᕗᑦ ᑲᔪᖏᕐᓴᐃᒍᒪᓪᓗᑎᒃ ᓄᓇᓕᕐᒥᐅᑕᓂᑦ ᐊᒻᒪ ᓇᖕᒥᓂᖃᖅᑎᐅᔪᓂᑦ ᑰᖁᑎᑦᑎᓐᓂᑦ ᐊᒻᒪ ᐃᒪᓕᖁᑎᑦᑎᓐᓂᑦ ᓴᓗᒪᑎᑦᑎᖁᔭᐅᕙᓪᓗᑎᒃ.  ᐃᖃᓗᐃᑦ ᐃᒪᖃᕐᕕᖏᑦ, ᑰᒐᓛᖏᑦ, ᑰᖏᑦ, ᑕᕆᐅᖓ, ᐊᒻᒪ ᓯᔾᔭᐅᑉ ᐊᕙᑎᖏᑦ ᐱᒻᒪᕆᐅᔪᐃᓐᓇᐅᒻᒪᑕ ᐃᓘᓐᓇᖏᒍᑦ ᖃᓄᐃᒋᐊᖃᖏᔾᔪᑎᖏᒍᑦ, ᐊᑦᑕᓇᔾᔭᐃᕐᓯᒪᒋᐊᖃᕐᓂᖏᒍᑦ ᐊᒻᒪ ᖃᓄᐃᖏᑦᑎᐊᕆᐊᖃᕐᓂᖏᒍᑦ ᓄᓇᓕᑦᑕ.