ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᓯᓚᑦᑐᓴᕐᕕᐅᑉ ᐅᖓᑖᓂ ᐃᓪᓗᖃᕐᕕᒃ ᐃᖃᓗᓐᓂ ᓯᕗᓪᓕᐹᑦᓯᐊᖅ ᐅᑭᐅᖅᑕᖅᑐᒥ ᐃᓪᓗᖃᕐᕕᓕᐊᖑᓚᐅᖅᑐᓂ ᒪᓕᑦᑐᑎᒃ ᒪᑭᒪᔾᔪᑎᓕᕆᓂᕐᒨᖓᔪᓂᑦ ᐱᕙᓪᓕᐊᓂᒃᑯᑦ ᐊᑐᐊᒐᕐᓂᑦ. ᐱᔾᔪᑎᒋᓪᓗᒍ ᐊᑦᑕᓇᖅᑐᖅ ᓄᓇ, ᐆᒻᒪᖅᑯᑎᓄᑦ ᐊᑭᓕᕆᐊᖃᖅᐸᑦᑐᑦ ᐊᒻᒪᓗ ᓴᓇᔭᐅᔾᔪᑎᓄᑦ ᓱᓇᑐᐃᓐᓇᕐᓂᑦ ᐊᒻᒪᓗ ᐃᓱᒫᓘᑎᐅᕙᑦᑐᑦ ᐱᔾᔪᑎᒋᓪᓗᒍ ᓄᓇᕐᔪᐊᑉ ᓯᓛᑕ ᐊᓯᔾᔨᐸᓪᓕᐊᓂᖓᓄᑦ ᐅᑭᐅᖅᑕᖅᑐᓂ, ᓄᓇᓕᐸᐅᔭᐃᑦ ᐃᖃᓗᐃᑦ ᐊᒻᒪᓗ ᐃᖃᓗᒻᒥᐅᑕᐃᑦ ᐱᕙᓪᓕᐊᑎᑦᓯᒍᒪᓕᓚᐅᖅᑐᑦ ᒪᑭᒪᔾᔪᑎᑦᓴᓂᑦ ᐊᑐᑦᓯᐊᕈᓐᓇᓂᕐᓴᓂᑦ ᓱᓇᑐᐃᓐᓇᕐᓂᑦ. ᓴᓇᓂᖅ ᐃᓪᓗᖃᕐᕕᑦᓴᒥᑦ ᒪᑭᒪᔾᔪᑎᑦᓴᓂᑦ ᐊᑐᑦᓯᐊᕈᓐᓇᓂᕐᓴᓂᑦ ᐃᓪᓗᓕᐅᕐᕕᐅᖃᑦᑕᕋᔭᖅᑐᒥᑦ ᓄᓇᓂ ᐊᒻᒪᓗ ᐃᓪᓗᓕᐅᖅᐸᓪᓗᑎᒃ ᒪᑯᐊ ᐃᓱᒪᒋᓗᒋᑦ:
- ᓄᓇᓕᒻᒥᐅᑕᓄᑦ ᐊᑐᖅᑕᐅᒋᐊᓕᑦ ᐊᒻᒪᓗ ᑐᖕᖓᒋᐊᕐᓗᑎᒃ ᓄᓇᓕᐅᑉ ᐃᓕᖅᑯᓯᒃᑯᑦ ᓇᓗᓇᐃᒃᑯᑕᖓᓄᑦ.
- ᓄᓇᐅᑉ ᐊᕙᑎᐊᓂᑦ ᐃᑉᐱᒍᓱᓐᓂᕐᓴᓂᑦ; ᐊᒻᒪᓗ
- ᐃᑉᐱᒍᓱᓐᓂᕐᓴᓂᑦ ᖃᓄᖅ ᐊᑐᑦᓯᐊᕋᑦᓴᐅᒻᒪᖔᑕ ᓱᓇᑐᐃᓐᓇᐃᑦ ᓲᕐᓗ ᐃᒥᖅ, ᐆᒻᒪᖅᑯᑎᑦ ᐊᒻᒪᓗ ᐅᕐᓱᐊᓗᐃᑦ.
ᑕᑯᓐᓇᖕᖑᐊᒐ ᐱᕙᓪᓕᐊᑎᑦᓯᓂᕐᒥᑦ ᒪᑭᒪᔾᔪᑎᑦᓴᓂᑦ ᐊᑐᑦᓯᐊᕈᓐᓇᓂᕐᓴᓂᑦ ᓴᖅᑭᓚᐅᖅᑐᖅ ᐊᔾᔨᒌᖏᑐᒃᑯᑦ. ᓲᕐᓗ, ᓄᓇᓕᒻᒥᐅᑕᓄᑦ ᐊᑐᖅᑕᐅᒋᐊᓖᑦ ᐊᒻᒪᓗ ᐃᓕᖅᑯᓯᒃᑯᑦ ᐊᔾᔨᐅᖏᓐᓂᖏᑦ ᐅᖃᐅᓯᐅᕙᓚᐅᖅᑐᑦ ᓴᐳᔾᔭᐅᔪᒪᓪᓗᑎᒃ ᓄᓇᒨᕈᑕᐅᕙᑦᑐᑦ ᓲᕐᓗ ᓄᓂᕙᒋᐊᕐᓂᖅ, ᑐᓪᓕᓂᓕᐅᖅᐸᓪᓗᑎᒃ ᐊᒻᒪᓗ ᖃᒧᑕᐅᔭᓄᑦ ᐊᖅᑯᑎᑦᓴᓂᑦ, ᐊᒥᓲᒋᐊᖅᑎᑕᐅᓗᑎᒃ ᐊᑕᐅᓰᓄᑦ ᐃᓚᒌᓄᑦ ᐃᓪᓗᓕᐅᕐᕕᑦᓴᐃᑦ ᐊᒻᒪᓗ ᐊᑭᑐᓗᐊᖅᑎᑕᐅᓇᓱᖕᖏᓪᓗᑎᒃ ᓴᓇᕕᑦᓴᖏᑦ ᐊᖏᓗᐊᖅᑎᑕᐅᕙᖏᓪᓗᑎᒃ, ᐊᑭᖃᖅᑎᑕᐅᓗᑎᒃ ᒪᓕᓪᓗᒋᑦ ᐃᓂᑦᓴᖓᑕ ᖃᓄᐃᑦᑑᓂᖓ ᓄᓇ, ᐱᒋᐊᖅᑎᑦᓯᓗᑎᓪᓗ ᓯᕗᓪᓕᐹᑦᓯᐊᒥᑦ ᑕᐃᒪᐃᑦᑑᖁᔭᐅᔪᓂᑦ ᐊᑐᕐᓂᐊᖅᑐᒥᑦ ᓇᔪᒐᖃᕐᕕᓕᐅᕐᓂᕐᒥᑦ ᐃᖃᓗᓐᓂ, ᑖᓐᓇᓕ ᓴᓇᔭᐅᐸᓪᓕᐊᓕᖅᑐᖅ ᑎᓴᒪᓂᑦ ᓇᔪᒐᖃᕐᕕᖃᖅᑐᓂ. ᑕᒪᓐᓇ ᐃᓱᒪᒋᓪᓗᒍ, ᐊᑐᕆᐊᖓ ᑕᑭᓂᕐᓴᖅ ᐃᓪᓗᖃᕐᕕᑦᓴᐅᑉ ᑐᑭᓕᐊᖓᑎᑕᐅᓂᐊᖅᑐᑦ ᐃᓱᒪᒋᓪᓗᒍ ᓇᑭᑦ ᐊᓄᕌᓗᐊᖅᐸᓐᓂᖓ ᐊᐱᓗᐊᔾᔭᐃᕐᓯᒪᓪᓗᒍ ᐊᐳᑕᐃᔭᐃᔨᓄᑦ ᐊᑭᓖᓗᐊᖃᑦᑕᓛᖏᒻᒪᑕ ᐊᒥᓱᓂᑦ. ᐃᓪᓗᓕᐅᖅᑕᐅᓂᐊᖅᑐᓄᑦ ᒪᓕᒐᓕᐅᓚᐅᕐᒥᔪᑦ. ᐊᓯᖏᓐᓄᑦ ᐃᓚᒋᔭᐅᓗᑎᒃ, ᒪᓕᒐᖃᕐᓂᐊᖅᑐᖅ ᐃᓪᓗᓕᐅᖅᐸᓂᐊᖅᑐᑦ ᐊᑐᖁᔭᐅᓂᐊᕐᒪᑕ ᐃᒥᖅᑐᐸᑦᑐᑦ ᐃᒥᖅᑐᓗᐊᕈᓐᓇᖏᓪᓗᑎᒃ ᓲᕐᓗ ᖁᕝᕕᖏᑦ ᑯᕕᒐᓚᑐᐃᓐᓇᕈᓐᓇᕐᓗᑎᒃ, ᐅᕕᓂᓐᓂᐊᕈᑎᖏᓪᓗ ᐊᒻᒪᓗ ᐆᒻᒪᖅᑯᑎᓂᑦ ᐊᑐᑦᓯᐊᕈᓐᓇᖅᑐᓂᑦ ᓱᓇᒃᑯᑖᖃᐅᕐᓗᑎᒃ. ᑕᕝᕘᓇᓕ ᐱᕙᓪᓕᐊᑎᑕᐅᕙᓐᓂᐊᖅᑐᑦ ᐊᑐᖏᓂᕐᓴᐅᔪᓐᓇᓂᐊᖅᑐᑦ ᓄᓇᓕᓐᓂ ᒪᑭᒪᔾᔪᑎᓂᑦ, ᐅᕐᓱᐊᓗᑦᑕᓗᐊᖏᓪᓗᑎᓗ ᐊᒻᒪᓗ ᐆᒻᒪᖅᑯᑎᓂᑦ, ᐊᒻᒪᓗ ᓄᓇᐅᑉ ᐊᕙᑎᐊᓂᑦ ᓱᕈᐃᑦᑕᐃᓕᒪᓂᕐᓴᐅᓗᑎᒃ. ᐊᒻᒪᓗᑦᑕᐅᖅ, ᓄᓇᖁᑎᖏᑦ ᐊᒥᓲᓂᕐᓴᐃᑦ ᒪᓕᒐᖃᐅᕐᓂᐊᖅᑐᑦ ᓄᓇᖁᑎᓂ ᐃᓪᓗᓕᐊᖑᕙᓐᓂᐊᖅᑐᑦ ᒪᓕᒐᕐᓂᑦ R2000 ᑎᑎᕋᕐᓯᒪᔪᓂᑦ ᒪᓕᒋᐊᖃᕐᓂᐊᖅᑐᑦ.
ᐸᕐᓇᑕᐅᕙᓪᓕᐊᓂᖓᓂ ᐃᓪᓗᖃᕐᕕᑦᓴᖅ ᓄᓇᓕᒻᒥᐅᑕᐃᑦ ᐃᓱᒪᒋᔭᖏᓐᓂᑦ ᐊᐱᕐᓱᖅᑕᐅᕙᓚᐅᖅᑐᑦ. ᒪᐃ 2004-ᒥ, ᑲᑐᔾᔨᖃᑎᖃᖅᑐᑎᒃ ᐃᐊᕝᓰᐃᐊᒻᑯᓐᓂᑦ, ᑲᓇᑕᒥ ᐃᓪᓗᓂᑦ ᐊᑭᓕᑦᓴᖃᖅᑎᑦᓯᔨᓂᑦ, ᐃᓪᓗᓕᕆᔨᕐᔪᐊᑯᓐᓂᑦ, ᐊᒻᒪᓗ ᑲᓇᑕᒥ ᓄᓇᓕᕆᔨᒻᒪᕆᒃᑯᓐᓂᑦ, ᓄᓇᓕᐸᐅᔭᐃᑦ ᐃᖃᓗᐃᑦ ᑐᖕᖓᓱᑦᑎᑦᓯᔨᐅᓚᐅᕐᓯᒪᔪᑦ ᐅᓪᓘᓐᓂᒃ ᒪᕐᕉᓐᓂᒃ ᐋᖅᑭᑦᓱᐃᓪᓗᑎᒃ ᑲᑎᒪᓂᒃᑯᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ, ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖏᑦ, ᒐᕙᒪᓕᕆᔨᑦ, ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐱᓯᒪᔪᑦ, ᓄᓇᓕᓐᓂ ᓴᓇᔨᑦ ᐃᓪᓗᑦᓴᓂᑦ ᐊᒻᒪᓗ ᐊᓯᖏᑦ ᐱᓕᕆᐊᑦᓴᒥᑦ ᐃᑉᐱᒍᓱᖃᑕᐅᔪᑦ, ᐃᓚᒋᔭᐅᓗᑎᒃ ᐃᓐᓇᑐᖃᐃᑦ ᐊᒻᒪᓗ ᑭᒃᑯᑐᐃᓐᓇᐃᑦ, ᐱᐅᓂᖅᐹᒃᑯᑦ ᐱᓕᕆᔾᔪᑎᑦᓴᐅᒐᔭᖅᑐᓂᑦ ᐊᑐᖅᑕᐅᔪᓐᓇᕋᔭᖅᑐᓂᑦ ᐅᑭᐅᖅᑕᖅᑐᒥ ᒪᑭᒪᔪᓐᓇᓯᐊᖅᑐᒥᑦ ᐃᓪᓗᖃᕐᕕᑦᓴᒥᑦ ᐃᖃᓗᓐᓂ. ᖃᐅᔨᓴᖅᐸᓪᓕᐊᓕᖅᑎᓪᓗᒋᑦ ᐃᓄᓕᒫᖅᑎᑦᓯᕙᓚᐅᖅᑐᑦ ᐊᒻᒪᓗ ᑕᑯᑦᓴᐅᑎᑦᓯᓪᓗᑎᒃ ᐃᓪᓗᖃᕐᕕᑦᓴᒥᑦ, ᐊᒻᒪᓗᑦᑕᐅᖅ ᐅᓂᒃᑳᓕᐅᖅᐸᑦᑐᑎᒃ ᐸᕐᓇᐅᑎᓕᕆᓂᕐᒧᑦ ᐊᒻᒪᓗ ᖃᐅᔨᒪᔨᑕᐃᑦ ᓴᓇᓂᒃᑯᑦ ᑲᑎᒪᔨᕋᓛᖏᓐᓄᑦ. ᓯᓚᑦᑐᓴᕐᕕᐅᑉ ᐅᖓᑖᓂ ᐃᓪᓗᖃᕐᕕᒃ ᓴᖅᑮᓯᒪᔪᖅ ᓄᑖᓂᑦ ᐊᑐᖅᑕᐅᓯᒪᔪᓂᑦ ᐆᑦᑑᑎᑦᓴᓂᑦ ᓄᓇᓕᕆᓂᒃᑯᑦ ᐅᑭᐅᖅᑕᖅᑐᒥ. ᐱᒋᐊᖅᑎᑕᐅᓯᒪᔪᖅ ᑕᕐᓴᐅᕗᖅ ᓄᓇᓕᐸᐅᔭᐃᑦ ᓵᖕᖓᒍᓐᓇᕐᓂᖏᓐᓄᑦ ᐊᑦᓱᕉᑎᓂᑦ ᐱᔾᔪᑎᖃᖅᑐᓂᑦ ᐅᑭᐅᖅᑕᖅᑐᒥ ᐸᕐᓇᐅᑎᓕᕆᓂᕐᒥᑦ ᐊᑐᕈᒪᓂᖏᒍᓪᓗ ᒪᑭᒪᔪᓐᓇᓯᐊᖅᑐᓂᑦ ᐱᕙᓪᓕᐊᑎᑦᓯᓂᕐᒥᑦ. ᓄᓇᓕᐸᐅᔭᒃᑯᑦ ᓱᓕ ᑲᔪᓯᓯᒪᐃᓐᓇᖅᑐᑦ ᐱᕙᓪᓕᐊᑎᑦᓯᓂᕐᒥᑦ ᖃᐅᔨᒪᔭᑦᓴᓂᑦ ᒪᑭᒪᔾᔪᑎᓕᕆᓂᕐᒨᖓᔪᓂᑦ ᐊᒻᒪᓗ ᐃᓕᑕᐅᔪᑦ ᐊᑐᖅᑕᐅᑎᑉᐸᓕᕐᓗᒋᑦ ᐊᒻᒪᓗ ᒪᑭᒪᔾᔪᑎᓕᕆᓂᕐᒧᑦ ᒪᓕᒐᓕᐅᕈᑎᒋᕙᓪᓗᒋᑦ ᓯᕗᓂᑦᑎᓐᓂ ᐱᕙᓪᓕᐊᑎᑕᐅᔪᑦᓴᒫᓄᑦ ᐃᖃᓗᓐᓂ, ᐊᒻᒪᓗ ᐃᑲᔫᑎᒋᕙᓪᓗᒋᑦ ᐱᒋᐊᕈᑎᐅᓯᒪᔪᑦ ᐊᓯᖏᑦ ᓄᓇᕘᒥ ᓄᓇᓕᓐᓄᑦ ᐊᒻᒪᓗ ᐅᑭᐅᖅᑕᖅᑐᒥᐅᑕᓄᑦ ᓇᒥᑐᐃᓐᓇᖅ.
ᑐᑭᓯᒋᐊᒃᑲᓐᓂᕈᒪᔪᑦ ᓯᓚᑦᑐᓴᕐᕕᐅᑉ ᐅᖓᑖᓂ ᐃᓪᓗᖃᕐᕕᒻᒥᑦ: ᒪᑭᒪᔪᓐᓇᓯᐊᖅᑐᑦ ᐅᑭᐅᖅᑕᖅᑐᒥ ᐃᓪᓗᖃᕐᕕᒻᒥ
