
ᓯᕗᓕᖅᑎᐅᓂᕐᒥᑦ ᐱᓕᒻᒪᑦᓴᐅᑎᓂᑦ ᐃᓕᓐᓂᐊᕐᓂᖅ (LIT)
(ᔪᓚᐃ - ᐋᒐᓯ)
ᓯᕗᓕᖅᑎᐅᓂᕐᒥᑦ ᐱᓕᒻᒪᑦᓴᐅᑎᓂᑦ ᐃᓕᓐᓂᐊᕈᑎ ᐱᓇᓱᐊᕈᓯᕐᓂᑦ ᐱᖓᓱᓂᑦ ᐊᑐᖅᑕᐅᕙᑦᑐᖅ ᐃᓕᓐᓂᐊᕈᑎᐅᔪᓐᓇᐸᑦᑐᖅ ᒪᒃᑯᑦᑐᓄᑦ ᐃᒻᒥᓂᒃ ᐱᔪᓐᓇᕐᓂᖏᓐᓂᑦ ᖃᓄᑐᐃᓐᓇᖅ ᐊᒻᒪᓗᑦᑕᐅᖅ ᓯᕗᓕᖅᑎᐅᓂᕐᒥᑦ ᐱᓕᒻᒪᓴᖅᑎᑕᐅᕙᑦᑐᑎᒃ ᖃᐅᑕᒫᑦ ᐃᓅᓯᖏᒍᑦ ᐃᑲᔫᑎᑦᓴᓂᑦ ᐊᒻᒪᓗ ᐊᓯᖏᓐᓂᑦ. ᓱᓇᓂᑦ ᐊᔾᔨᒌᓐᖏᑦᑐᓂᑦ ᐃᓕᓐᓂᐊᖅᑎᑕᐅᔪᓐᓇᐸᑦᑐᑦ ᐃᖅᑲᓇᐃᔮᑦᓴᕐᓯᐅᓂᒃᑯᑦ, ᓂᕿᑦᑎᐊᕙᓕᕆᓂᒃᑯᑦ, ᐃᓅᓯᒃᑯᑦ ᐊᑦᓱᕉᓴᓕᖅᐸᑕ ᖃᓄᐃᓕᐅᕈᓐᓇᓂᒃᑯᑦ, ᐊᒻᒪ ᐅᓂᒃᑳᓕᐅᕐᓂᒃᑯᑦ ᐃᒻᒥᓂᒃ ᐱᔾᔪᑎᓕᓐᓂᑦ ᐃᓕᓐᓂᐊᓂᒃᑯᑦ, ᐃᖅᑲᓇᐃᔮᖃᓚᐅᕐᓯᒪᓂᒃᑯᑦ ᓱᓇᓂᒃ. ᑖᑦᓱᒥᖓ ᐃᓕᓐᓂᐊᖅᑐᑦ ᐱᓕᒻᒪᓴᖅᑎᑕᐅᕙᒻᒥᔪᑦ ᐃᖅᑲᓇᐃᔭᕐᕕᓐᓃᑎᑕᐅᕙᑦᑐᑎᒃ ᐊᐅᔭᒃᑯᑦ ᐅᓪᓗᒃᑯᑦ ᑭᐱᖕᖑᐃᔭᕐᕕᓐᓂ. ᒪᒃᑯᑦᑐᑦ ᐱᔭᕇᖅᑐᑦ ᐃᓕᓐᓂᐊᕈᑎᓂᑦ ᐱᑎᑕᐅᕙᑦᑐᑦ ᐸᐃᑉᐹᓂᑦ ᐱᔭᕇᕈᑎᓂᑦ ᒪᑯᓂᖓᓗ: ᑭᓕᖅᑐᓂᑦ ᒪᑦᑐᓯᑦᓰᓂᕐᒥᑦ/ᐊᓂᖅᑎᕆᔪᓐᓇᐃ-ᓕᔪᓂᑦ ᐃᑲᔫᑎᓂᑦ, ᕼᐃ ᕙᐃᒥᑦ ᐊᒻᒪᓗ ᐃᖅᑲᓇᐃᔭᕐᕕᓐᓂ ᐃᓗᓯᓕᕆᓂᕐᒥᑦ ᐊᒻᒪᓗ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ, ᓂᕿᓕᕆᓂᕐᒥᑦ, ᐊᒻᒪᓗ ᐊᓯᖏᓐᓂᑦ. ᓯᕗᓕᖅᑎᐅᓂᕐᒥᑦ ᐱᓕᒻᒪᑦᓴᐅᑎ ᐃᓕᓐᓂᐊᖅᑕᐅᔪᓐᓇᖅᑐᑦ ᒪᒃᑯᑦᑐᓛᓄᑦ ᐊᕐᕌᒍᓕᓐᓄᑦ 12-ᓂᑦ 16-ᓄᑦ.
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ, ᔭᓇᕗᕐ ᒫᕐᑎᓐ 979-5604 ᐅᕝᕙᓘᓐᓃᑦ ᐅᕗᖓ j.martin@city.iqaluit.nu.ca
ᓯᕿᓐᖑᔭᖏᑦ ᐊᒻᒪᓗ ᐅᓪᓗᕐᓯᐅᑎᖏᑦ ᓇᓗᓇᐃᖅᑕᐅᓛᑐᐃᓐᓇᖅᑐᑦ.
ᐳᐃᔾᔪᕋᕐᕕᒻᒥ ᓯᕗᓕᖅᑎᐅᓂᕐᒥᑦ ᐱᓕᒻᒪᓴᕐᓂᖅ
(ᔮᓐᓄᐊᕆ 23, 24, 25; ᕕᕝᕗᐊᕆ 6, 7, 8, 12-ᒥᑦ – 22-ᒧᑦ, 2015)
ᓄᑖᒥ ᐳᐃᔾᔪᕋᕐᕕᑦᓴᒥ ᓯᕗᓕᖅᑎᐅᓂᕐᒥᑦ ᐱᓕᒻᒪᓴᕐᓂᖅ ᑐᕌᖓᔪᖅ ᒪᒃᑯᑦᑐᓄᑦ ᐳᐃᔾᔪᕋᕐᕕᒻᒥ ᐅᐊᑦᓯᔨᐅᔪᒪᔪᓂᑦ ᐳᐃᔾᔪᕋᖅᑎᓂᑦ ᐃᖃᓗᓐᓂ ᐳᐃᔾᔪᕋᕐᕕᑦᓴᒥ. ᒪᒃᑯᑦᑐᐃᑦ 16-ᓂᑦ ᐊᖏᔪᑦᑎᓄᑦ ᐊᕐᕌᒍᖃᕆᐊᓕᑦ ᐱᓕᒻᒪᑦᓴᕈᒪᔪᑦ. ᐱᓕᒻᒪᓴᖅᑎᑕᐅᓛᕐᒥᔪᑦ ᐋᑐᕚᒨᕐᓗᑎᒃ, ᐋᓐᑎᐅᕆᐅᒧᑦ ᕕᕝᕗᐊᕆ 12-ᒥᑦ 22-ᒧᑦ, 2015 ᐱᔭᕇᕆᐊᖅᑐᕐᓗᑎᒃ ᑲᓐᓄᔭᐅᔭᒥᑦ ᐅᔭᒥᑖᕈᑎᒥᑦ ᐱᓕᒻᒪᑦᓴᐅᑎᒥᑦ.
ᐊᑭᖓ: $300
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᔨᐅᕆᒥ ᑎᐱᑭ
ᒪᒃᑯᑦᑐᒃᑯᕕᒃ
ᒪᒃᑯᑦᑐᒃᑯᕕᒻᒥ ᐃᖃᓗᓐᓂ ᒪᒃᑯᑦᑐᓄᑦ ᐅᐸᑦᑕᐅᔪᓐᓇᐸᑦᑐᖅ ᐃᓚᒋᔭᐅᔪᒪᔪᓄᑦ ᐊᒥᓱᓂ ᐅᐸᑐᐃᓐᓇᖅᑐᓄᑦ ᐊᒻᒪᓗ ᐅᐸᓗᖓᐃᔭᕐᓯᒪᔪᓄᑦ ᖃᓄᐃᓕᐅᕈᑎᓄᑦ. ᒪᒃᑯᑦᑐᑦ ᑐᒐᖅᐸᑦᑐᑦ, ᓵᒥ ᑕᓇᔅᐸᑦᑐᑦ (ᐅᕿᑦᑐᑦᓴᔭᕈᓗᒻᒥᑦ ᐊᕐᓴᒥᑦ ᐱᖕᖑᐊᖃᖅᐸᑦᑐᑦ) ᐊᕐᓴᒥᑦ ᐱᖕᖑᐊᖃᖅᐸᑦᑐᑦ (ᓵᑯᕐ), ᓂᔾᔭᐅᑎᓂᑦ ᓈᓚᒍᓐᓇᐸᑦᑐᑦ, ᖃᕋᑕᐅᔭᓕᕆᕙᑦᑐᑦ, ᒪᒃᑯᑦᑑᖃᑎᖏᓐᓃᐸᑦᑐᑦ, ᐊᒻᒪᓗ ᐊᓯᕈᓘᔭᖏᓐᓂᑦ ᖃᓄᐃᓕᐅᖅᐸᑦᑐᑦ. ᐊᒥᓱᓂᑦ ᐱᓇᓱᐊᕈᓯᑦ ᓄᖕᖑᖏᓐᓂ ᖃᓄᐃᓕᐅᖅᑎᑕᐅᕙᒻᒥᔪᑦ, ᓲᕐᓗ ᐃᓄᐃᑦ ᐱᖕᖑᐊᕈᓯᖏᓐᓂᑦ ᐱᖕᖑᐊᐸᑦᑐᑦ, ᕼᐋᑭᖅᐸᑦᑐᑦ, ᑕᕐᕆᔭᖅᐸᑦᑐᑦ ᐊᒻᒪᓗ ᒧᒥᖅᐸᑦᑐᑦ. ᖃᐅᔨᒋᐊᕐᕕᑦᓴᖅ, ᐊᑐᖅᑕᐅᓗᐊᖅᐸᖏᑦᑐᓂᑦ ᖃᓄᐃᓕᐅᕈᑎᓂᑦ ᖃᓄᐃᓕᐅᖅᑐᖃᕐᓂᐊᖅᐸᑦ ᖃᐅᔨᒋᐊᕐᕕᑦᓴᖅ ᐊᒻᒪᓗ ᐃᑲᕐᕋᖏᓐᓂᑦ here. (ᐅᓇ ᓇᕿᓪᓗᒍ).
ᐃᖃᓗᓐᓂ ᓯᐊᕐᕆᔭᐅᑎᓄᑦ ᐊᑦᓴᓗᐊᓕᓐᓄᑦ ᐱᖕᖑᐊᕐᕕᒃ
ᑖᓐᓇᓕ ᐱᐅᔪᐊᓗᒃ ᐱᖕᖑᐊᕐᕕᒃ ᓯᐊᕐᕆᔭᐅᑎᓄ ᐊᑦᓴᓗᐊᓕᓐᓄᑦ ᐊᒻᒪᓗ ᐊᑦᓴᓗᐊᓕᓐᓄᑦ ᐊᓐᓂᑭᑦᑐᓛᕐᓇᖅᑐᓂ, ᐊᕐᕌᒍᑕᒫᖅ ᒪᐃᒥᓂᑦ ᐋᑦᑑᐸᒧᑦ ᑰᓕᕐᕕᒻᒥ. ᓯᐊᕐᕆᔮᕐᕕᒃ ᐱᖕᖑᐊᕈᑎᓕᒃ ᓱᓪᓗᓕᐸᐅᔮᓗᒻᒥᑦ ᖁᐱᓯᒪᔪᒥᑦ, 12 ᕖᑦᓂᑦ ᑕᑭᓂᓕᒻᒥᑦ ᓱᓪᓗᓕᐅᑉ ᐃᓚᒥᓂᖓᓂᑦ, ᖁᕝᕙᐸᓪᓕᐊᔪᒥᑦ, ᒪᓂᕋᖅᑐᒥᑦ, ᑎᒍᒥᐊᕐᕕᓐᓂᑦ ᐊᒻᒪᓗ ᓱᓇᑐᐃᓐᓇᑦᓯᐊᓂᑦ ᐊᓐᓂᑭᑦᑐᓛᖅᑎᓄᑦ ᓴᓇᔭᐅᓯᒪᔪᓄᑦ ᐱᒋᐅᖅᐸᓪᓕᐊᔪᓄᓪᓗ ᐊᒻᒪᓗᑦᑕᐅᖅ ᐱᓕᒻᒪᑦᓴᕐᓯᐊᕐᓯᒪᔪᓄᑦ ᐱᖕᖑᐊᕈᒪᕙᑦᑐᓄᑦ ᐊᓯᒥᓂᒃ ᐱᒃᑲᐅᓂᕐᓴᐅᓇᓱᑦᑐᑎᒃ. ᐊᓐᓂᑭᑦᑐᓛᖅᑎᑦ ᓂᕆᐅᒋᔭᖃᕈᓐᓇᖅᑐᑦ ᐊᓯᒥᓂᒃ ᓵᓚᑦᓴᕋᓲᑎᓂᑦ, ᓯᕋᓯᒪᔪᓂᑦ ᓂᕆᓂᑦ, ᐊᓐᓂᑭᑦᑐᓛᕐᓂᕐᒥᑦ ᐱᓕᒻᒪᑦᓴᐅᑎᓂᑦ ᐃᓕᓐᓂᐊᕈᓐᓇᐸᑦᑐᑦ ᐊᒻᒪᓗ ᐊᓯᖏᓐᓂᑦ ᐊᑐᖅᑕᐅᓗᐊᖅᐸᖏᑦᑐᓂᑦ ᖃᓄᐃᓕᐅᖅᐸᑦᑐᑎᒃ ᐱᖕᖑᐊᕐᕕᐅᓂᖓ ᑕᐃᑲᓂ. ᓯᐊᕐᕆᔮᕐᕕᒃ ᐊᑐᖅᑕᐅᔪᓐᓇᐸᒻᒥᔪᖅ ᓇᓪᓕᐅᑎᔨᐊᓕᓐᓄᑦ ᐊᒻᒪᓗ ᐊᑐᖅᑕᐅᓗᐊᖅᐸᖏᑦᑐᓂᑦ ᖃᓄᐃᓕᐅᕈᑎᓄᑦ.