ᓇᖕᒥᓂᕆᔭᑦ ᑮᓇᐅᔭᓕᐅᕐᕕᑦ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᒪᖃᖏᑲᐃᓐᓇᓂᐊᖅᑐᑦ ᐊᒻᒪ ᐃᒥᕐᒥᒃ ᑎᖅᑎᑎᑦᓯᖃᑦᑕᕆᐊᖃᕐᓂᐊᕐᒪᑕ ᐅᖃᐅᔾᔪᐃᔾᔪᑎ - 4096 ᐃ-ᐱ, 4065 ᐃ-ᐱ.
ᒫᕐᓯ 27, 2025 - ᐃᖃᓗᐃᑦ, ᓄᓇᕗᑦ

ᐅᖃᐅᔾᔭᐅᓕᕆᕗᓯ ᐃᒪᖃᖏᑲᐃᓐᓇᖅᑎᑕᐅᓂᐊᓴᔪᓂᒃ ᑕᓪᓕᕐᒥᖅ, ᒫᕐᓯ 28, ᐱᒋᐊᕐᓗᑎᒃ ᐅᓪᓗᒃᑯᑦ 10-ᒥᒃ 5-ᒧᓄᑦ ᓴᓇᔭᐅᒋᐊᓖᑦ ᓴᓇᔭᐅᑲᐃᓐᓇᓛᕐᒪᑕ ᒪᑭᒪᑎᑦᓯᔾᔪᑎᐅᔪᑦ ᐱᓕᕆᔾᔪᑎᓂᒃ.

ᐅᑯᐊ ᐃᒪᖃᖏᑲᐃᓐᓇᖅᑎᑕᐅᓛᖅᑐᑦ: 4096 ᐃ-ᐱ, 4065 ᐃ-ᐱ.

ᐃᒥᕐᒧᑦ ᐳᓪᓚᖓ ᐊᑦᓯᓪᓕᒐᐃᒻᒪᑦ, ᐊᖏᔪᖅᑳᖓᑦ ᑭᒃᑯᑐᐃᓐᓇᕐᓂᒃ ᐃᓗᓯᓕᕆᔨᒃᑯᑦ ᓄᓇᕘᒥ ᓴᖅᑮᕙᑦᑐᖅ ᐃᒥᕐᒥᒃ ᑎᖅᑎᑎᑦᓯᒋᐊᖃᖅᑐᖃᓕᕋᐃᒻᒪᑦ ᐅᖃᐅᔾᔪᐃᔾᔪᑎᒥᒃ. ᐅᓇ ᐃᒥᖃᖏᑲᐃᓐᓇᖅᑎᑕᐅᓂᐊᖅᑐᓂᒃ ᐃᕝᕕᒃ ᓇᔪᒐᖓᓂᒃ ᐊᑦᑐᐃᒍᓂ, ᐃᒥᕐᒥᒃ ᑎᖅᑎᑎᑦᓯᖃᑦᑕᖁᔭᐅᓂᐊᖅᑐᓯᒃ.

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐊᑐᕆᐊᓕᒫᖅ ᒪᑐᔭᐅᓂᐊᖅᑐᖅ - ᐊᑭᓪᓕᖅ ᐊᑐᕆᐊᖅ
ᒫᕐᓯ 25, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᖃᐅᔨᒪᖁᔨᓕᕆᕗᑦ ᓄᓇᓕᕐᒥᐅᑕᓂᒃ ᐊᑐᕆᐊᓂᒃ ᒪᑐᔭᐅᓯᒪᑲᐃᓐᓇᓛᖅᑐᓂᒃ (ᓄᓇᖕᖑᐊᖅ ᑕᑯᒋᐊᖁᔪᖅ) ᐊᑦᑐᖅᑕᐅᓗᓂ ᐊᑭᓪᓕᖅ ᐊᑐᕆᐊᖅ. ᓄᓇᓕᕐᒥᐅᑕᐃᑦ ᐊᑦᑕᓇᖅᑐᒦᖁᔭᐅᒐᑎᒃ ᒪᑐᔭᐅᓂᐊᖅᑐᑦ ᐊᔾᔨᓕᐅᕆᔪᖃᕐᓂᖓᓂ ᑕᒪᑦᓱᒪ ᐊᕙᑎᐊᓂ.

ᒪᑐᔭᐅᓯᒪᓂᐊᖅᑐᑦ ᐅᕙᖕᖓᑦ ᐱᒋᐊᕐᓗᑎᒃ 4-ᒥ ᐅᓐᓄᓴᒃᑯᑦ 10-ᒧᓄᑦ ᐅᓐᓄᒃᑯᑦ ᐅᕙᓂ ᒫᕐᓯ 26, 2025.

ᓄᓇᓕᕐᒥᐅᑕᐃᑦ, ᓇᖕᒥᓂᖃᖅᑎᐅᔪᑦ ᐊᒻᒪ ᐅᐸᑦᑎᒋᕙᑦᑕᖏᑦ ᓱᓕ ᐱᖁᑎᖃᕐᕕᖏᓐᓅᕈᓐᓇᖅᑎᑕᐅᓂᐊᖅᑐᑦ; ᑭᓯᐊᓂ, ᐃᓛᓐᓂᒃᑯᑦ ᐊᑯᓂᐅᖏᑦᑐᖅ ᐅᑕᖅᑭᑎᑕᐅᕙᓐᓂᐊᑐᑦᓴᐅᔪᑦ, ᐊᔾᔨᓕᐅᕆᔪᑦ ᐱᔭᕇᕋᑐᓐᓂᖏᓐᓂ.

ᓄᓇᒃᑰᔫᒃᑯᑦ ᐱᔨᑦᓯᕋᖅᑎᐅᔪᑦ ᑲᔪᓯᑐᐃᓐᓇᓂᐊᖅᑐᑦ ᐱᔨᑦᓯᕋᐅᑎᒋᕙᑦᑕᒥᓂᒃ ᑕᒪᒃᑯᓇᓂ ᐊᑦᑐᖅᑕᐅᓂᐊᖅᑐᑦ ᐊᕙᑎᖏᓐᓂ.

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᓄᑖᖅ ᐱᖁᑎᓄᑦ ᑖᒃᓰᔭᐃᔭᐅᑎᓂᒃ ᐊᑭᓖᒋᐊᑐᖏᔾᔪᑎᒧᑦ ᐅᐸᓗᖓᐃᔭᐅᑎ
ᒫᕐᓯ 25, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᓴᖅᑮᕙᓕᐊᓕᕐᒥᔪᑦ ᓄᑖᒥᒃ ᐅᐸᓗᖓᐃᔭᐅᑎᑦᓴᒥᒃ ᐱᖁᑎᓄᑦ ᑖᒃᓰᔭᐃᔭᐅᑎᓂᒃ ᐊᑭᓖᖏᔾᔪᑎᑦᓴᓕᕆᔪᒥᒃ ᐊᑐᕈᓐᓇᖅᑐᓄᑦ ᑲᑐᔾᔨᖃᑎᒌᓄᑦ, ᐊᑐᓕᕆᐊᖅᑕᐅᑎᒋᓗᓂ ᒫᓐᓇ. ᑲᑐᔾᔨᑎᒌᖑᔪᑦ ᕿᓂᖅᑐᑦ ᐊᑭᓖᖏᔾᔪᑎᑦᓴᒥᒃ ᑐᑦᓯᕋᐅᑎᓕᐅᕆᐊᖃᖃᑦᑕᕐᓂᐊᓕᖅᑐᑦ ᐊᕐᕌᒍᑕᒫᖅ, ᑎᓴᒪᓂᒃ (4) ᐊᕐᕌᒍᓂᒃ ᐅᑕᖅᑭᒋᐊᖃᖅᐸᓚᐅᕋᓗᐊᕐᒪᑕ. ᐊᑭᓖᖏᔾᔪᑎᑦᓴᑦ ᐊᑐᖅᑕᐅᔪᓐᓇᓂᐊᖅᑐᑦ 100%-ᐳᓴᖏᓐᓄᑦ ᐊᑭᓕᕆᐊᖃᖅᐸᑦᑐᑦ ᐱᖁᑎᓄᑦ ᑖᒃᓰᔭᐃᔭᐅᑎᓄᑦ ᐱᔪᓐᓇᕐᓂᖏᓐᓄᑦ ᐅᑉᐱᖅᑐᓕᕆᕙᑦᑐᓄᑦ ᐊᒻᒪ ᑮᓇᐅᔭᓕᐅᖅᑎᐅᖏᑦᑐᓄᑦ ᑲᑐᔾᔨᖃᑎᒌᓄᑦ, ᐱᖃᓯᐅᔾᔭᐅᒐᑎᒃ ᓇᔪᒐᖃᕐᕕᐅᔪᑦ. ᑲᑎᑦᑐᒋᑦ ᐊᑭᓖᖏᔾᔪᑎᐅᔪᓐᓇᕋᔭᖅᑐᑦ ᐊᕐᕌᒍᑕᒫᖅ ᐊᖏᖅᑕᐅᕙᓪᓗᑎᒃ ᐊᑭᓕᕆᐊᓕᓐᓄᑦ ᑎᑭᒍᓐᓇᖅᑐᓄᑦ ᐃᒪᓐᓇᓄᑦ $300,000.

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐊᑐᕆᐊᓕᒫᖅ ᒪᑐᔭᐅᓂᐊᖅᑐᖅ - ᐸᐅᕐᖓᖅ ᐊᑐᕆᐊᖅ ᐊᒻᒪ ᑏᖕᖑᐊᖅ
ᐊᑐᕆᐊᖅ
ᒫᕐᓯ 24, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᖃᐅᔨᒪᖁᔨᓕᕆᕗᑦ ᓄᓇᓕᕐᒥᐅᑕᓂᒃ ᐊᑐᕆᐊᓂᒃ ᒪᑐᔭᐅᓯᒪᑲᐃᓐᓇᓛᖅᑐᓂᒃ (ᓄᓇᖕᖑᐊᖅ ᑕᑯᒋᐊᖁᔪᖅ) ᐊᑦᑐᖅᑕᐅᓗᓂ ᐸᐅᕐᖓᖅ ᐊᑐᕆᐊᖅ ᐊᒻᒪ ᑏᖕᖑᐊᖅ ᐊᑐᕆᐊᖅ. ᓄᓇᓕᕐᒥᐅᑕᐃᑦ ᐊᑦᑕᓇᖅᑐᒦᖁᔭᐅᒐᑎᒃ ᒪᑐᔭᐅᓂᐊᖅᑐᑦ ᐊᔾᔨᓕᐅᕆᔪᖃᕐᓂᖓᓂ ᑕᒪᑦᓱᒪ ᐊᕙᑎᐊᓂ.

ᒪᑐᔭᐅᓯᒪᓂᐊᖅᑐᑦ ᐅᕙᖕᖓᑦ ᐱᒋᐊᕐᓗᑎᒃ 8-ᒥ ᐅᓪᓛᒃᑯᑦ 6-ᒧᓄᑦ ᐅᓐᓄᓴᒃᑯᑦ ᐅᕙᓂ ᒫᕐᓯ 25, 2025.

ᓄᓇᓕᕐᒥᐅᑕᐃᑦ, ᓇᖕᒥᓂᖃᖅᑎᐅᔪᑦ ᐊᒻᒪ ᐅᐸᑦᑎᒋᕙᑦᑕᖏᑦ ᓱᓕ ᐱᖁᑎᖃᕐᕕᖏᓐᓅᕈᓐᓇᖅᑎᑕᐅᓂᐊᖅᑐᑦ; ᑭᓯᐊᓂ, ᐃᓛᓐᓂᒃᑯᑦ ᐊᑯᓂᐅᖏᑦᑐᖅ ᐅᑕᖅᑭᑎᑕᐅᕙᓐᓂᐊᑐᑦᓴᐅᔪᑦ, ᐊᔾᔨᓕᐅᕆᔪᑦ ᐱᔭᕇᕋᑐᓐᓂᖏᓐᓂ.

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᑭᖑᓪᓕᖅᐹᖅ ᐅᓪᓗᕐᓯᐅᑎᒍᑦ ᓄᑖᓄᑦ ᐱᔨᑦᓯᕋᖅᑕᐅᔪᑦᓴᓂᒃ ᑐᑦᓯᕋᐅᑎᓄᑦ, ᐊᐅᑦᑕᔫᓂᒃ ᑭᖑᕝᕖᒍᒪᔪᓄᑦ ᐊᒻᒪ ᐊᒥᐊᒃᑯᖏᑦ ᖃᑦᓯᐅᓕᕐᓂᖏᓐᓄᑦ ᖃᐅᔨᒋᐊᕐᓂᖅ - ᐃᓄᐃᑦ ᓱᕈᓰᑦ ᓯᕗᓪᓕᐅᒋᐊᖃᕐᓂᖏᓐᓄᑦ ᐱᒋᐊᖅᑎᑕᐅᓯᒪᔪᖅ (ICFI)
ᒫᕐᓯ 24, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᑐᓴᐅᒪᖁᔨᓕᕆᕗᑦ ᓄᓇᓕᕐᒥᐅᑕᓂᒃ ᑭᖑᓪᓕᖅᐹᖑᓛᓕᖅᑐᖅ ᐅᓪᓗᕐᓯᐅᑎᒍᑦ ᐱᑎᑦᓯᒍᒪᔪᓄᑦ ᓄᑖᓂᒃ ᐱᔨᑦᓯᕋᕈᑎᐅᔪᓂᒃ ᑐᑦᓯᕋᐅᑎᓂᒃ ᐊᑐᖅᑕᐅᕙᑦᑐᒧᑦ ᐃᓄᐃᑦ ᓱᕈᓰᑦ ᓯᕗᓪᓕᐅᒋᐊᕐᓂᖏᓐᓄᑦ ᐱᒋᐊᖅᑎᑕᐅᓯᒪᔪᒧᑦ (ICFI) ᐱᖓᑦᓯᖅ, ᒫᕐᓯ 26, 2025.

ᐊᒻᒪᑦᑕᐅᖅ, ᒫᕐᓯ 26, 2025, ᑭᖑᓪᓕᖅᐹᖑᓛᖅᑐᖅ ᐅᓪᓗᕐᓯᐅᑎᒍᑦ ᐱᔨᑦᓯᕋᕈᑎᐅᔪᓄᑦ ᑭᖑᕝᕖᖁᔨᔪᓄᑦ ᐊᓯᐅᓯᒪᓐᓂᕈᑎᒃ ᐊᐅᑦᑕᔫᖁᑎᖏᓐᓂᒃ ᓂᕿᑖᕈᑎᓂᒃ. ᑕᒪᐅᓇ ᐱᕕᖃᑦᓯᐊᕋᔭᖅᑐᑦ ᓂᐅᕕᕐᕕᐅᕙᑦᑐᑦ ᓄᑖᕈᖅᑎᑦᓯᒋᐊᖃᕐᒥᒻᒪᑕ ᓄᑖᓂᒃ ᐊᐅᑦᑕᔫᓂᒃ ᐱᓕᕆᐊᑦᓴᖅ ᐃᓱᓕᓚᐅᖏᓐᓂᖓᓂ.

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᑐᓴᕋᑦᓴᑦ ᐱᔾᔪᑎᒋᓪᓗᒋᑦ ᓄᓇᓕᐸᐅᔭᒃᑯᑦ ᐃᖃᓗᓐᓂ ᐃᓄᐃᑦ ᓱᕈᓰᑦ ᓯᕗᓪᓕᐅᒋᐊᖃᕐᓂᖏᓐᓄᑦ ᐱᒋᐊᖅᑎᑕᐅᓯᒪᔪᖅ (ICFI) ᓂᕿᑖᕈᑎᐅᕙᑦᑐᖅ/ᖁᑦᑕᕕᑦᑖᕈᑎᐅᕙᑦᑐᖅ ᐱᓕᕆᐊᑦᓴᖅ ᐱᓪᓗᒍ
ᒫᕐᓯ 12, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᖁᕕᐊᓲᑎᖃᑦᓯᐊᓕᕆᕗᑦ ᑐᓴᖅᑎᑕᐅᓚᐅᖅᑐᑎᒃ ᒐᕙᒪᒃᑯᑦ ᑲᓇᑕᒧᑦ ᓄᑖᕈᖅᑎᑦᓯᓚᐅᕐᓂᖏᓐᓄᑦ ᐃᓄᐃᑦ ᓱᕈᓰᑦ ᓯᕗᓪᓕᐅᔾᔭᐅᒋᐊᖃᕐᓂᖏᓐᓄᑦ ᐱᒋᐊᖅᑎᑕᐅᓯᒪᔪᒥᒃ (ICFI). ᐅᓇ ᐱᒻᒪᕆᐅᔪᖅ ᐱᓕᕆᐊᑦᓴᖅ ᐊᑑᑎᓕᒻᒪᕆᒃᑯᑦ ᐃᑲᔪᕐᓱᐃᔾᔪᑎᐅᕙᑦᑐᖅ ᐃᓄᐃᑦ ᓱᕈᓯᖏᓐᓄᑦ ᐊᒻᒪ ᐃᓚᒌᓄᑦ, ᐊᒻᒪ ᐃᓕᑕᕆᓯᒪᓪᓗᑎᒍᑦ ᐊᑦᓱᑲᓪᓚᐅᔪᖅ ᐊᑦᑐᐃᓯᒪᓂᖓᓄᑦ ᓄᓇᓕᑦᑎᓐᓂᒃ.

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ

ᑎᑭᐅᑎᓂᖅ ᐊᖏᕐᕋᒧᑦ ᐱᓕᕆᔾᔪᑎ – ᑐᑦᓯᕋᐅᑎᓕᐅᖁᔨᓂᖅ

ᒫᑦᓯ 6, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᐃᑦ ᖁᕕᐊᓱᑦᑐᖅ ᑐᓴᑕᐅᑎᑦᑎᒋᐊᔅᓴᖅ ᑖᒃᑯᐊ ᑎᑭᐅᑎᓂᖅ ᐊᖏᕐᕋᒧᑦ ᐱᓕᕆᖃᑎᒌᖏᑦ ᒫᓐᓇ ᐱᖃᑦᑕᕈᓐᓇᒡᓯᒻᒪᑕ ᑐᔅᓯᕋᐅᑎᓂᒃ ᑮᓇᐅᔭᖃᑦᑎᑕᐅᒍᑎᓂᒃ ᐃᑲᔪᕈᑎᒋᔭᐅᓂᐊᑦᑐᓂᒃ ᐱᓕᕆᐊᒃᓴᓄᑦ ᑐᕌᖓᑎᑕᐅᔪᓄᑦ ᐊᑐᑦᑕᐃᓕᒪᑎᑦᑎᓂᒻᒥᒃ ᐊᒻᒪᓗ ᒥᑭᓂᔅᓴᐅᓕᑦᑎᑦᑎᓂᒻᒥᒃ ᐊᖏᕐᕋᖃᖏᓐᓂᒻᒥᒃ ᐃᖃᓗᓐᓂ 2025-2026 ᑮᓇᐅᔭᓕᕆᓐᓇᐅᑉ ᐊᕐᕌᒍᖏᓐᓄᑦ. ᑲᑎᓗᒋᑦ ᑮᓇᐅᔭᖅ $1,070,000 ᑮᓇᐅᔭᖃᑦᑎᑦᑎᒍᑎᑦ ᐱᒐᔅᓴᐅᓕᒻᒪᑕ ᑕᐃᒃᑯᓄᖓ ᐱᒍᓐᓇᑦᑎᑕᐅᔪᓄᑦ ᐱᓕᕆᓂᐅᔪᓄᑦ ᐅᑯᓇᓃᑦᑐᓄᑦ ᐅᖃᐅᑎᒋᔭᐅᔪᓂ ᐊᒡᒍᑦᑕᐅᓯᒪᔪᓂ: