ᑲᓇᑕᐅᑉ ᐸᓖᓯᖏᑦ – (867) 979-1111
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – (867) 979 - 4422
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – (867) 979-5300ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᑐᓴᕋᑦᓴᖅ ᐃᒥᓕᕆᔪᖅ − ᓇᖕᒥᓂᖃᖅᑏᑦ
ᐋᑦᑑᐸ 21, 2021 − ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᐃᑦ ᐃᖃᓗᐃᑦ ᖃᐅᔨᒪᖁᔨᓕᕐᒥᔪᑦ ᓇᖕᒥᓂᖃᖅᑎᐅᔪᓂᑦ ᐱᒋᐊᕐᓗᑎᒃ ᑎᓴᒻᒥᕐᒥ, ᐋᑦᑑᐸ 21, 2021, ᓄᓇᓕᐸᐅᔭᐃᑦ ᐃᖃᓗᐃᑦ ᐱᒋᐊᓛᕐᒪᑕ ᐃᒻᒪᐃᖃᑦᑕᓂᕐᒥᑦ ᑰᒻᒥᑦ ᐃᒥᖅᑖᒥᓂᕐᒥᒃ ᓇᖕᒥᓂᖃᖅᑎᓄᑦ. ᓇᖕᒥᓂᖃᖅᑎᐅᔪᑦ ᐅᖄᓚᒋᐊᓖᑦ ᐃᒥᓕᕆᔪᓄᑦ ᐅᕗᖓ 867-979-5603, ᐊᑎᓕᐅᕈᒪᒍᑎᒃ ᓇᖕᒥᓂᖃᕐᕕᒥᓂᒃ ᐃᒻᒪᑦᑕᐅᓂᐊᕐᒪᑕ.
ᐃᒻᒪᑦᑕᐅᖃᑎᓂᐊᖅᑐᑦ ᐃᑲᕐᕋᐃᑦ ᐊᑯᓐᓂᖏᓐᓂ ᐱᒋᐊᕐᓗᑎᒃ ᐅᓪᓛᒃᑯᑦ 8-ᒥ 11-ᒧᓄᑦ ᐅᓪᓗᒃᑯᑦ, ᓇᒡᒋᔾᔭᐅᒥᑦ ᑕᓪᓕᒥᕐᒧᑦ.
ᐅᓪᓛᒃᑯᑦ 8:00-ᒥᕈᔪ ᐃᑉᐸᒃᓴᖅ ᐅᓪᓛᒃᑯᑦ, ᐃᖃᓗᐃᑦ ᑐᐊᕕᕐᓇᖅᑐᓕᕆᔨᒃᑯᑦ ᐊᑲᐅᓯᓴᕐᕕᖕᒨᕆᐊᖃᓚᐅᖅᑐᑦ ᐃᑭᑦᑐᖃᖅᑎᓪᓗᒍ - ᐃᒡᓗᕐᔪᐊᖅ 503. 20 ᖃᑦᑎᕆᔭᖅᑐᓚᐅᖅᑐᑦ.
ᖃᑦᑎᕆᔩᑦ ᓇᓂᓯᓚᐅᖅᑐᑦ ᐃᒡᓗᕐᔪᐊᑉ ᓯᓚᑖᓂ ᐃᑭᑦᑐᒥᒃ, ᑭᓯᐊᓂ, ᒥᑭᑦᑐᒥᒃ ᓱᕋᑦᑐᖃᓚᐅᖅᑐᖅ ᐃᒐᓛᖕᒐ ᐊᒻᒪᓗ ᐃᓚᖕᒐ ᓯᓚᑖᒍ. ᐃᑭᑦᑐᖅ ᖃᒥᑕᐅᑲᐅᖅᑐᓚᐅᖅᑐᖅ ᖃᓄᐃᓕᔪᖃᕐᓇᓂᓗ. ᐋᓐᓂᖅᑐᖃᓚᐅᖖᒋᑦᑐᖅ ᐃᖅᑲᓇᐃᔭᖅᑎᒥᒃ ᑭᓇᑐᐃᓐᓇᕐᒥᒡᓘᓐᓃᑦ.
ᐃᖃᓗᐃᑦ ᑐᐊᕕᕐᓇᖅᑐᓕᕆᔨᒃᑯᑦ ᖁᔭᓕᕗᑦ ᓄᓇᓕᖕᓂᑦ ᐃᖕᒋᕐᕋᔪᐃᑦ ᐅᓪᓛᒃᑯᑦ, ᐊᑦᑕᕐᓇᖕᒋᑦᑐᓐᓄᑦ ᐊᕝᕖᕆᐊᕈᓐᓇᓚᐅᕐᒪᑕ ᐃᖕᒋᕐᕋᔪᑦ ᐅᐸᒍᑎᑲᐅᖅᑐᕈᓐᓇᓚᐅᕐᒪᑕ ᐃᑭᑦᑐᒧᑦ.
ᓄᓇᓕᐸᐅᔭᐃᑦ ᐃᖃᓗᐃᑦ ᖃᐅᔨᒪᖁᔨᓕᕆᕗᑦ ᓄᓇᓕᕐᒥᐅᑕᓂᑦ ᐃᒥᓕᕆᔾᔪᑎᓂᑦ ᑯᕕᑎᑦᑎᕙᓪᓕᐊᓕᕐᒪᑕ.
ᓄᓇᓕᕐᒥᐅᑕᐃᑦ ᓱᓕ ᓇᐃᒪᖃᑦᑕᓂᐊᔾᔭᖕᖒᕆᔭᐅᔪᑦ ᐅᕐᓱᐊᓗᑦᓱᓂᕐᒥᒃ ᐱᓇᓱᐊᕈᓯᑦᑎᓐᓂ. ᐃᓚᖏᑦ ᓄᓇᓕᕐᒥᐅᑕᐃᑦ ᖃᐅᔨᓂᐊᖅᑐᑦᓴᐅᕗᑦ ᑎᐱᖃᕐᓂᕐᓴᐅᓕᕐᓂᖓᓂᑦ ᒫᓐᓇ − ᑕᒪᓐᓇᓕ ᓂᕆᐅᓇᖅᑐᖅ ᑯᕕᑎᑕᐅᕙᓪᓕᐊᓂᖏᑦ ᐱᓪᓗᒍ.
ᓇᒡᒋᔾᔭᐅᒥ, ᐋᑦᑑᐸ 25-ᒥ, 2021 ᑐᓴᖅᑎᑦᑎᑲᓐᓂᓛᖅᑐᒍᑦ ᖃᓄᐃᓕᖓᓕᕐᒪᖔᑕ ᑯᕕᑎᑦᑎᕙᓪᓕᐊᔪᑦ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᐃᖅᑲᓇᐃᔭᕐᓇᐅᑎᓪᓗᒍ ᐅᓇ:
ᔭᕗᕆ ᐴᕐᓐ
ᓄᓇᓕᐸᐅᔭᐃᑦ ᐃᖃᓗᐃᑦ ᐊᑐᐃᓐᓇᐅᑎᑦᑎᓂᐊᖅᑐᑦ ᓱᓕ ᐃᒥᖅᑕᐅᔪᓐᓇᖅᑐᒥᒃ ᐃᒥᕐᒥᒃ ᐴᕐᓯᒪᓯᓐᓇᖅᑐᓂᑦ ᓄᓇᓕᕐᒥᐅᑕᓄᑦ ᐱᖓᑦᓯᕐᒥ, ᐋᑦᑑᐸ 20, ᑎᓴᒻᒥᕐᒥ, ᐋᑦᑑᐸ 21, ᐊᒻᒪ ᑕᓪᓕᒥᕐᒥ, ᐋᑦᑑᐸ 22, 2021.
- ᓇᑲᓱᒃ ᐃᓕᓐᓂᐊᕐᕕᐅᑉ ᓴᓂᐊᓂ, ᐅᓐᓄᓴᒃᑯᑦ 5-ᒥᓂᒃ ᐅᓐᓄᒧᑦ 8-ᒧᓄᑦ ᑕᐅᓇᓃᒐᔭᖅᑐᑦ
- ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᖕᖑᐊᕐᕕᐊᓘᑉ ᓴᓂᐊᓂ, ᐅᓐᓄᓴᒃᑯᑦ 5-ᒥᓂᒃ ᐅᓐᓄᒧᑦ 8-ᒧᓄᑦ ᑕᐅᓇᓃᒐᔭᖅᑐᑦ
ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᐅᐃᒍᐃᕗᑦ ᐅᓪᓗᖏᓐᓂᑦ ᑐᐊᕕᕐᓇᖅᑐᒦᓕᕐᓂᕐᒥᑦ ᓄᓇᓕᓐᓂ ᐱᔾᔪᑎᒋᓪᓗᒍ ᐃᒥᒃᑯᑦ ᐊᑲᐅᖏᓕᐅᕈᑎᐅᔪᑦ ᐱᒋᐊᕐᓗᒍ ᐅᓐᓄᐊᒃᑯᑦ 12-ᒨᖅᐸᑦ ᐱᖓᑦᓯᕐᒥ, ᐋᑦᑑᐸ 20, 2021.
ᓄᓇᓕᐸᐅᔭᐃᑦ ᑲᑎᒪᔨᖏᑦ ᑲᑎᒪᑎᓪᓗᒋᑦ ᓇᒡᒋᔾᔭᐅᓕᖅᑭᕐᒥ, ᐋᑦᑑᐸ 19, ᑲᑎᒪᔩᑦ ᑲᔪᓯᑎᑦᑎᓚᐅᖅᑐᑦ ᐅᐃᒍᔭᐅᓂᖓᓂᑦ ᑐᐊᕕᕐᓇᖅᑐᒦᓕᕐᓂᕐᒥᑦ ᓄᓇᓕᓐᓂ. ᑎᒥᐅᔪᒥᑦ ᐊᐅᓚᑦᑎᔨᒻᒪᕆᐅᔪᖅ ᓱᓕ ᐱᓕᕆᔨᐅᓂᐊᖅᑐᖅ ᓄᓇᓕᓐᓂ ᐊᐅᓚᑦᑎᔾᔪᑎᓂᑦ ᑐᑭᒧᐊᑦᑎᑦᑎᔨᐅᓂᕐᒥᑦ.
ᑐᐊᕕᕐᓇᖅᑐᒦᓕᕐᓂᕐᒥᑦ ᓄᓇᓕᓐᓂ ᐊᑐᖅᑎᓪᓗᒋᑦ, ᑐᐊᕕᕐᓇᖅᑐᑕᖃᖅᑎᓪᓗᒍ ᐱᓕᕆᔾᔪᑎᑦᓴᓂᑦ ᒪᓕᒐᑎᒍᑦ ᓄᓇᓕᐸᐅᔭᒃᑯᓐᓂᑦ ᐅᑯᓂᖓ ᐊᑐᕈᓐᓇᑎᑦᓯᔾᔪᑎᐅᔪᓐᓇᕐᒪᑦ “ᖃᓄᐃᑐᐃᓐᓇᖅ ᐱᓕᕆᖁᔭᐅᓗᑎᒃ ᐊᒻᒪ ᐊᑐᖅᐸᓪᓗᑎᒃ ᐱᓕᕆᔾᔪᑎᑦᓴᓂᑦ ᓄᓇᓕᓐᓂ ᑯᐊᐳᕇᓴᐅᔪᓄᑦ ᐱᓕᕆᐊᖑᒋᐊᖃᖅᑐᕆᔭᖏᓐᓂᑦ”.
ᑭᒡᒐᖅᑐᐃᓗᑎᒃ ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖓᓐᓂᑦ ᐊᒻᒪ ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᓐᓂᑦ, ᒪᐃᔭ ᑭᐊᓂ ᐱᐅᓪ ᓇᓪᓕᒍᓱᓐᓂᕐᒥᓂᒃ ᐃᓅᔪᓐᓃᕋᑖᖅᑎᓪᓗᒍ ᐃᖃᓗᓐᓂ ᓄᓇᖃᖃᑕᐅᓚᐅᖅᑐᖅ ᐊᑯᓂ, ᒫᒍᓚ ᒑᕐᓄᕐᒥᑦ.
“ᕿᑦᓵᖃᑕᐅᕗᒍᑦ ᑐᓴᕆᐊᑦᓴᖅ ᐃᓅᔪᓐᓃᕐᓂᖓᓂᑦ ᒥᓯᓯ ᒑᕐᓄᕐ, ᐊᑯᓂᐊᓗᒃ ᐃᖃᓗᓐᓂᒥᐅᑕᐅᖃᑕᐅᓚᐅᖅᑐᖅ, ᐊᒻᒪ ᐃᑲᔪᖅᑎᐅᖃᑕᐅᔪᒻᒪᕆᐅᓚᐅᖅᑐᓂ ᓄᓇᑦᑎᓐᓂ,” ᐅᖃᖅᑐᖅ ᒪᐃᔭ ᐱᐅᓪ. “ᓇᓪᓕᒋᕙᕗᑦ ᐃᓚᑯᓗᖏᑦ, ᐱᖃᓐᓂᕆᓚᐅᖅᑕᖏᑦ. ᒫᒍᓚ ᐊᔾᔨᐅᓚᐅᖏᑦᑐᖅ ᐃᓅᖃᑕᐅᓗᓂ, ᐊᒻᒪ ᐳᐃᒍᖅᑕᐅᓚᐅᕐᓯᒪᔾᔮᒐᓂ ᓄᓇᑦᑎᓐᓂ.”
ᒫᒍᓚ ᒑᕐᓄᕐ ᕿᒪᐃᔪᖅ ᐅᐃᒥᓂᒃ, ᒪᐃᑯᓪ, ᐸᓂᖏᓐᓂᑦ ᐋᓐ, ᐹᑦ, ᐊᒻᒪ ᓲᓴᓐ, ᐃᕐᓂᓂ ᑭᒻ, ᐊᒻᒪᑦᑕᐅᖅ ᐃᕐᖑᑕᓂ, ᐊᒻᒪ ᐃᓗᐱᕈᖏᓐᓂᑦ.
ᐴᕐᓯᒪᓯᓐᓇᖅᑐᓂᑦ ᐃᒥᕐᒥᒃ ᐊᐃᑦᓯᕕᑦᓴᐅᑎᑕᐅᔪᑦ ᐊᑐᖅᑕᐅᓇᓱᐊᕐᓯᒪᔪᑦ ᓄᓇᓕᕐᒥᐅᑕᓂᑦ ᐃᒥᕋᑦᓴᐅᔪᓂᑦ ᐃᒥᖃᖁᓪᓗᒋᑦ; ᓇᖕᒥᓂᖃᖅᑎᐅᔪᑦ ᐅᐸᒍᓐᓇᓯᐊᖅᑐᑦ ᐃᒥᖅᑕᕕᑦᓴᓄᑦ ᓴᓂᐊᓃᑦᑐᒧᑦ ᐅᖃᓕᒫᒐᖃᕐᕕᐅᑉ, ᐃᒥᖅᑕᕈᒪᒍᑎᒃ ᓇᖕᒥᓂᕆᔭᕐᒥᓄᑦ ᐊᑦᑐᐊᔪᓄᑦ.
ᒫᓐᓇᐅᔪᕐᓕ, ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖓᑦ ᐊᐱᕆᓕᖅᐳᑦ ᓄᓇᓕᓐᓂ ᓇᖕᒥᓂᖃᖅᑎᓂᑦ ᐊᒻᒪ ᑲᑐᔾᔨᖃᑎᒌᓕᓐᓂᑦ ᐃᖕᒥᓂᒃ ᐃᒥᖅᑕᖁᓪᓗᒋᑦ ᐃᒥᖅᑕᕕᒻᒥᑦ (ᐅᖃᓕᒫᒐᖃᕐᕕᐅᑉ ᓴᓂᐊᓂᑦ) ᐃᒥᕆᐊᖃᖏᓂᕐᒥᑦ ᓄᓇᓕᓐᓂ ᐃᒥᕐᒥᒃ ᐊᑐᖅᑕᐅᓂᖓᓂ.
ᐊᐱᖅᑯᑎᓖᑦ ᐃᓱᒫᓗᑎᓖᓪᓘᓐᓃᑦ ᐊᑦᑐᐊᔪᓂᑦ ᓄᐊᑦᑎᓂᕐᒧᑦ ᐊᒻᒪ ᐱᑎᑦᑎᕙᓐᓂᕐᒧᑦ ᐃᒥᖅᑕᐅᔪᓐᓇᖅᑐᒥᑦ ᐃᒥᕐᒥᒃ, ᐊᑏ ᖃᐅᔨᒋᐊᓚᐅᕆᑦᑎ ᐃᒥᓕᕆᔪᒧᑦ ᐅᖄᓚᕕᑦᓴᒧᑦ ᐅᕗᖓ 979-5603.
##
ᑲᑎᒪᔾᔪᑎᑦᓴᑦ ᐊᑐᐃᓐᓇᐅᓛᖅᑐᑦ 48 ᐃᑲᕐᕋᐃᑦ ᓯᕗᓂᐊᒍᑦ ᐅᓪᓗᖓᑕ ᐅᕙᓂ: https://www.iqaluit.ca/city-council-documents
ᐃᖃᓗᐃᑦ ᓄᓇᓕᐸᐅᔭᒃᑯᑦ ᐊᑐᐃᓐᓇᖃᒃᑲᓐᓂᓕᖅᑐᑦ ᐃᒥᕐᓂᑦ ᐃᒥᒃᑯᕕᖕᒦᑦᑐᓂᑦ ᓄᓇᓕᖕᓄᑦ ᐱᒋᐊᕐᓗᓂ ᓇᒡᒐᔾᔭᐅ ᐊᒃᑑᕙ 18-ᒥ ᐊᒻᒪᓗ ᐊᐃᑉᐱᖅ ᐊᒃᑑᕙ 19, 2021-ᒥ.
- ᓇᑲᓱᒃ ᐃᓕᓐᓂᐊᕐᕕᐅᑉ ᓴᓂᐊᓂ, 4:30-ᒥ ᐅᓐᓄᓴᒃᑯᑦ 7:30-ᒧ ᐅᓐᓄᒃᑯᑦ
- ᐊᓐᓂᑭᑦᑐᕐᕕᐅᑉ ᓴᓂᐊᓂ, 4:30-ᒥ ᐅᓐᓄᓴᒃᑯᑦ 7:30-ᒧ ᐅᓐᓄᒃᑯᑦ
ᐃᒡᓗᒥᐅᖃᑎᒌᑦ ᑭᒡᓕᖃᖅᑎᑕᐅᓂᐊᖅᑐᑦ ᐃᒥᕐᓂᑦ ᑐᓂᓯᐅᖅᑲᐃᑎᓪᓗᒋᑦ. ᐃᒥᖅ ᐊᑐᖅᑕᐅᖁᔭᐅᕗᑦ ᐃᒥᖅᑕᐅᓂᐊᕐᓗᓂ ᑭᓯᐊᓂ.
ᓄᓇᓕᖕᒥᐅᑦ ᐃᖅᑲᐅᒪᖁᔭᐅᕗᑦ ᒪᑐᐊᖅᓯᒪᓗᑎᑦ, ᐊᒻᒪᓗ ᖃᓂᒋᔭᖁᓗᐊᖅᑕᐃᓕᒪᓗᑎᑦ. ᓱᕈᓰᑦ ᐱᖃᑎᒋᔭᐅᖕᒋᓐᓇᕆᐊᖃᖅᐳᑦ ᐊᒻᒪᓗ ᖃᐅᔨᓴᖅᑕᐅᖕᒋᓐᓇᕐᓗᑎᑦ ᐃᒥᕐᒥᒃ ᐊᐃᒃᓯᖅᑐᖃᖅᑎᓪᓗᒍ ᓄᓇᒃᑰᕈᑎᑕᖃᕋᔪᓐᓂᖕᒐᓄᑦ.