ᐆᒪᔪᓄᑦ ᐋᓐᓂᐊᖑᔪᖅ ᓯᓂᖅᓯᓇᖅᑐᖅ

ᐆᒪᔪᓄᑦ ᐋᓐᓂᐊᖑᔪᖅ ᓯᓂᖅᓯᓇᖅᑐᖅ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᐃᖅᑲᐃᑎᑦᑎᒍᒪᓕᕆᕗᑦ ᓄᓇᓕᕐᒥᐅᑕᓂᑦ ᐱᔾᔪᑎᒋᓪᓗᒍ ᑭᒃᑯᑐᐃᓐᓇᕐᓂᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐅᖃᐅᓯᕆᓚᐅᖅᑕᖓᓂᑦ ᓅᕖᐱᕆ 16, 2021 ᐱᔾᔪᑎᖃᖅᑐᑎᒃ ᑐᓪᓕᐊᓂᑦ ᑎᕆᒐᓐᓂᐊᖅᑐᖃᖅᑐᒥᓂᐅᓂᖓᓂᑦ ᓯᓂᖅᓯᓯᒪᔪᒥᑦ ᐊᒻᒪ ᑭᖑᓂᐊᒍᑦ ᐊᓂᑎᑕᐅᑦᑕᐃᓕᒪᓂᖏᓐᓂᑦ ᐅᐸᑦᑕᐅᑦᑕᐃᓕᒪᓂᖏᓐᓂᑦ ᕿᒧᑦᓯᐅᑎᐅᕙᑦᑐᑦ ᕿᒻᒦᑦ ᐃᓗᐊᓂ ᐃᖃᓗᐃᑦ.

ᓄᓇᓕᐸᐅᔭᒃᑯᑦ ᐊᔭᐅᖅᑐᐃᕗᑦ ᓄᓇᓕᕐᒥᐅᑕᓕᒫᑦᑎᐊᓂᑦ ᐅᑯᓂᖓ ᐊᑐᖅᑕᐅᖁᔨᓪᓗᑎᒃ:

1. ᑲᐱᔭᐅᑎᓪᓗᒋᑦ ᐆᒪᔪᖁᑎᑎᑦ.
2. ᓯᓚᒥ ᓇᒧᖕᖓᖃᑎᒋᓕᕈᕕᐅᒃ ᕿᒻᒦᑦ, ᑕᓯᒍᐊᕐᓯᒪᕙᓪᓗᒍ ᐊᒻᒪ ᐊᐅᓚᑦᑎᐊᖏᓐᓇᕐᓗᒍ ᑕᒫᓂᖅᑭᑎᑉᐸᖏᓪᓗᒋᑦ ᖃᐅᑕᒫᑦ. ᒪᓕᑦᑐᒋᑦ ᐃᑉᐱᒍᓲᑎᖃᑦᑎᐊᓂᕐᒥᑦ ᐆᒪᔪᖁᑎᓂᑦ ᒪᓕᒐᕋᓛᖅ 796 ᐆᒪᔪᖁᑎᐅᔪᑦ ᑕᓯᒍᐊᕐᓯᒪᐃᓐᓇᕆᐊᓖᑦ ᐊᒻᒪ ᐊᐅᓚᑕᐅᑦᑎᐊᕐᓗᑎᒃ ᑕᒫᓂᖅᑭᑎᑉᐸᖏᓪᓗᒋᑦ.
3. ᐆᒪᔪᖁᑎᑎᑦ ᑕᒫᓂᖅᑭᑎᑉᐸᖏᓪᓗᒋᑦ. ᐆᒪᔪᐃᑦ ᑕᒫᓂᖅᑭᒋᐊᖃᖕᖏᒻᒪᑕ, ᕿᒻᒦᑦ ᑕᒫᓂᖅᑭᑎᑕᐅᔪᑦ ᑎᒍᔭᐅᔪᓐᓇᕐᒪᑕ ᐊᒻᒪ ᐱᓯᒪᔭᐅᓗᑎᒃ, ᐆᒪᔪᖁᑎᓕᐅᔪᑦ ᐊᐃᑦᓯᐸᑦᑐᑦ ᑎᒍᔭᐅᓯᒪᔨᐊᒥᓂᒃ ᐆᒪᔪᖁᑎᒥᓂᒃ ᐊᑭᓖᑎᑕᐅᔪᓐᓇᖅᑐᑦ $75-ᓂᑦ, $20-ᓂᑦ ᖃᐅᑕᒫᑦ ᐸᐃᕆᔭᐅᔾᔪᑎᓂᑦ ᐊᒻᒪ ᓂᕆᑎᑕᐅᕙᓐᓂᖏᓐᓄᑦ ᐊᒻᒪ ᓚᐃᓴᑖᕆᐊᖃᕐᓂᖏᓐᓄᓪᓗ $55-ᓂᑦ ᐆᒪᔪᓄᑦ ᕿᑐᖕᖓᑖᕈᓐᓇᖅᑐᓄᑦ ᐊᒻᒪ $35 ᕿᑐᖕᖓᑖᕈᓐᓇᐃᓕᑎᑕᐅᓯᒪᔪᓄᑦ. (ᓇᓗᓇᐃᒃᑯᑎᖃᕆᐊᓕᒃ ᕿᑐᕐᖓᑖᕈᓐᓇᐃᓕᓯᒪᓂᖏᓐᓂᑦ).
4. ᐅᖃᐅᓯᐅᖏᓐᓇᕆᐊᓖᑦ ᑕᒫᓂᖅᑭᕙᑦᑐᑦ ᐆᒪᔪᐃᑦ.
5. ᐆᒪᔪᖁᑎᒋᔭᐅᖏᑦᑐᓂᑦ ᐅᐸᖃᑦᑕᖏᓪᓗᓯ.

ᒪᓕᑦᑐᒍ ᑐᓴᕋᑦᓴᓕᐊᖑᓯᒪᔪᖅ ᑭᒃᑯᑐᐃᓐᓇᕐᓂᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᑦ ᑮᔭᐅᓐᓂᕈᕕᑦ ᐅᕝᕙᓘᓐᓃᑦ ᕿᓱᑦᑕᐅᓐᓂᕈᕕᑦ ᑎᕆᒐᓐᓂᐊᒧᑦ ᕿᒻᒥᒧᓪᓘᓐᓃᑦ, ᐋᓐᓂᐊᕕᓕᐊᕆᑦ ᐊᒻᒪ ᐅᖃᐅᓯᕆᓗᒍ ᖃᓄᐃᓕᐅᕈᑎᐅᔪᖅ ᑕᕝᕙᓴᐃᓐᓇᖅ. ᐆᒪᔪᒥᑦ ᐱᐅᓯᕐᓗᑦᑑᔮᖅᑐᒥᑦ ᑕᑯᒍᕕᑦ, ᐅᕐᕈᔮᔪᒥᑦ, ᖃᐳᐊᕐᓗᓂ ᖃᓂᖓ, ᑐᐱᖅᑲᔫᔮᕐᓗᓂ ᐅᕝᕙᓘᓐᓃᑦ ᖃᓄᐊᓗᒃ ᓂᐱᖃᓕᕐᓗᓂ, ᐃᑉᐱᒋᖕᖏᓪᓗᒍ ᐆᒪᔪᖅ ᐊᒻᒪ ᐅᖃᐅᓯᕆᓗᒍ ᐆᒪᔪᕐᓂᐊᖅᑎᒧᑦ.

ᐆᒪᔪᐃᑦ ᓯᖏᕐᓯᓯᒪᔪᑦ ᐊᔾᔨᒌᖏᑦᑐᓂᑦ ᓇᓗᓇᐃᒃᑯᑎᖃᕈᓐᓇᖅᑐᑦ, ᐱᖃᓯᐅᑎᓪᓗᒋᑦ ᑲᑉᐱᐊᓱᐊᓂᖅ, ᐃᕐᓯᓈᕿᓂᖅ, ᓄᕚᕿᔪᒻᒪᕆᐅᓗᓂ, ᐄᖅᑲᕈᓐᓇᖏᓪᓗᓂ, ᐅᕐᕈᔮᓗᓂ, ᓄᑭᖃᕈᓐᓃᕐᓗᓂ ᐊᒻᒪ ᓴᔪᑦᑐᒻᒪᕆᐅᓕᕐᓗᓂ. ᐃᕐᓯᓈᕿᒐᔪᑦᑐᑦ, ᑭᓯᐊᓂ ᓯᖏᕐᓯᓯᓯᒪᔪᑦ ᐆᒪᔪᐃᑦ ᐱᐅᓯᕆᖕᖏᑕᒥᓂᒃ ᐊᑐᕈᓐᓇᕐᒥᔪᑦ ᑐᖕᖓᓇᖅᑐᒻᒪᕆᐅᓗᑎᒃ.

ᑕᑯᓐᓂᕈᕕᑦ ᐆᒪᔪᒥᑦ ᑕᒪᒃᑯᓂᖓ ᐱᐅᓯᖃᖅᑎᓪᓗᒍ ᓇᓪᓕᐊᓐᓂᑐᐃᓐᓇᖅ, ᐃᑉᐱᒋᒋᐊᖃᖕᖏᑦᑐᖅ ᐊᒻᒪ ᖃᐅᔨᒃᑲᕐᓗᒋᑦ ᐱᓕᕆᔨᐅᔪᑦ ᑕᒪᒃᑯᓂᖓ.

ᐅᖃᐅᓯᖃᕈᒪᒍᕕᑦ ᐆᒪᔪᒥᑦ ᑕᒫᓂᖅᑭᔪᒥᑦ, ᖃᐅᔨᒋᐊᖁᔪᐃᑦ ᓄᓇᓕᐸᐅᔭᒃᑯᑦ ᑐᐊᕕᕐᓇᖅᑐᓂᑦ ᑭᐅᔨᖏᑦ ᐅᕗᖓ 979-5650.

ᐅᖃᐅᓯᖃᕈᒪᓂᐊᕐᓗᓂ ᐆᒪᔪᓂᑦ ᓄᓇᒥᐅᑕᓂᑦ ᐃᓗᐊᓂ ᓄᓇᓕᐅᑉ, ᖃᐅᔨᒃᑲᕆᐊᓖᑦ ᓄᓇᓕᓐᓂ ᐊᕙᑎᓕᕆᔨᒃᑯᑦ ᐅᕗᖓ 867-975-1163 ᐅᕝᕙᓘᓐᓃᑦ ᐃᖅᑲᓇᐃᔭᕐᓇᐃᑦ ᐃᑲᕐᕋᐃᑦ ᓯᓚᑖᓂ ᓄᓇᓕᐸᐅᔭᒃᑯᑦ ᑐᐊᕕᕐᓇᖅᑐᓂᑦ ᑭᐅᔨᖏᑦ ᐅᖄᓚᕕᒋᖁᔪᑦ.

##

ᑐᑭᓯᒋᐊᒃᑲᓐᓂᕐᕕᑦᓴᖅ ᐅᓪᓗᒃᑯᑦ ᐃᖅᑲᓇᐃᔭᕐᓇᐅᑎᓪᓗᒍ ᐅᓇ:

ᐊᓕᒃᓯ ᑳᒧᕋᓐ
ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᖅᑎᓂᑦ ᐊᐅᓚᑦᑎᔨ 
867-979-5607 | a.cameron@iqaluit.ca