ᑲᓇᑕᐅᑉ ᐸᓖᓯᖏᑦ – (867) 979-1111
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – (867) 979 - 4422
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – (867) 979-5300
ᐳᐃᔾᔪᕋᕐᕕᖃᕐᕕᒻᒥ ᐳᐃᔾᔪᕋᕐᕕᒃ ᒪᑐᐃᓯᒪᑎᑕᐅᑲᐃᓐᓇᓂᐊᖅᑐᖅ ᑭᒃᑯᑐᐃᓐᓇᕐᓄᑦ ᐱᒋᐊᕐᓗᑎᒃ ᐅᓐᓄᖓᓂ ᓇᒡᒋᔾᔭᐅᑉ, ᐋᒐᓯ 17 ᐱᓕᕆᔾᔪᑎᖏᑦ ᖃᐅᔨᒋᐊᖅᑕᐅᑲᐃᓐᓇᑎᓪᓗᒋᑦ ᓴᓇᒋᐊᖃᕐᒪᖔᑕ. ᓇᒡᒋᔾᔭᐅᓕᖅᑭᕐᒥ, ᐋᒐᓯ 18 ᐅᓐᓄᓴᒃᑯᑦ 5−ᒨᓚᐅᖏᓱᖓᕐᓂᖓᓂ ᐅᖃᐅᓯᐅᓛᖅᑐᖅ ᒪᑐᐃᒃᑲᓐᓂᓛᕐᒪᖔᖅ ᖃᖓᒃᑯᑦ.
ᒪᑐᐃᓯᒪᑲᐃᓐᓇᕐᓂᐅᔪᖅ ᐊᑦᑐᐃᓂᐅᓴᒻᒪᑦ ᑐᑭᓕᐊᖅᑐᓄᑦ ᐳᐃᔾᔪᕋᕐᕕᒻᒥᑦ ᐊᒻᒪ ᐱᓐᓇᔭᓐᓇᖅᑐᒥᑦ ᐳᐃᔾᔪᕋᕐᕕᒻᒥᑦ. ᐃᖃᐃᓕᓴᕐᕕᒃ, ᐊᓐᓄᕌᕐᕕᖏᑦ ᐊᒻᒪ ᐲᑕ ᓂᕆᕕᒃ ᒪᑐᐃᖓᐃᓐᓇᓂᐊᖅᑐᑦ.
ᐅᓐᓄᐊᒃᑯᑦ ᖁᓛᓃᖔᓕᖅᑎᓪᓗᒍ ᐋᒐᓯ 14−ᒥ, 2020, ᐃᖃᓗᐃᑦ ᖃᑦᑎᕆᔨᒃᑯᖏᑦ ᐅᐸᓚᐅᖅᑐᑦ ᐃᑯᐊᓚᔪᒧᑦ ᓯᔾᔭᒥ. ᑎᑭᒃᑲᒥᒃ, ᐃᖃᓗᐃᑦ ᖃᑦᑎᕆᔨᒃᑯᖏᑦ ᖁᓕᐅᓚᐅᖅᑐᑦ, ᓇᓂᓯᓚᐅᖅᑐᑦ ᐃᓪᓗᕋᓛᒥᑦ ᐃᑯᐊᓚᔪᒥᑦ ᐊᑕᐅᓯᕐᒥᑦ ᐃᓄᖃᓚᐅᖅᑐᒥᑦ. ᖃᑦᑎᕆᔨᐅᔪᑦ ᖃᒥᑦᓯᑦᓴᐅᑎᒋᓚᐅᖅᑐᑦ ᐃᑯᐊᓚᔪᒥᑦ ᐊᒻᒪ ᐊᓂᑦᓯᓪᓗᑎᒃ ᐊᑕᐅᓯᕐᒥᑦ ᐊᖑᒻᒥᑦ ᐃᓪᓗᕋᓛᒥᑦ ᐊᒻᒪ ᑲᒪᒋᔭᐅᒋᐊᑦᑕᐅᑎᒋᓚᐅᖅᑐᖅ. ᓄᓇᒃᑰᔫᖅ ᑐᐊᕕᕐᓇᖅᑐᓄᑦ ᐃᓪᓗᕋᓛᒦᓚᐅᖅᑐᒥᑦ ᕿᑭᖅᑕᓂ ᐋᓐᓂᐊᕕᒻᒨᕈᔾᔨᓕᓚᐅᖅᑐᑦ. ᑭᓯᐊᓂ ᐅᒡᒍᐊᓇᖅᑐᖅ, ᐋᓐᓂᐊᕕᒻᒦᓕᖅᑐᓂ ᐃᓅᔪᓐᓃᕐᓂᕋᖅᑕᐅᓯᒪᓚᐅᖅᑐᖅ.
ᐸᓖᓯᒃᑯᑦ ᐊᒻᒪ ᐊᓪᓚᕝᕕᖓᑦ ᖃᑦᑎᕆᔨᒻᒪᕆᒃᑯᑦ ᐃᑲᔪᓚᐅᖅᑐᑦ ᐃᑯᐊᓚᔪᒥ ᐊᒻᒪ ᖃᐅᔨᓴᐃᓐᓇᓂᐊᖅᑐᑦ ᖃᓄᐃᓕᓐᓂᕐᒪᖔᖅ. ᒫᓐᓇᐅᔪᕐᓕ ᖃᓄᖅ ᐃᑭᒋᐊᓯᓐᓂᕐᒪᖔᖅ ᖃᐅᔨᒪᔭᐅᖏᒻᒪᑦ ᖃᐅᔨᓴᖅᑕᐅᕙᓪᓕᐊᔪᖅ.
ᐅᓄᕐᓂᖅᓴᐃᑦ ᐃᖃᓗᒻᒥᐅᑕᐃᑦ ᖃᕋᓴᐅᔭᒃᑯᑦ ᐳᓛᖅᕕᒃᑯᑦ ᓂᐅᕕᖃᑦᑕᓂᖅᓴᐃᓕᕐᒪᑕ ᐊᒻᒪᓗ ᓂᐅᕕᐊᒃᓴᖃᕐᓂᖅᓴᐅᕙᓕᖅᑐᑎᒃ ᐊᑐᐃᓐᓇᕈᖅᓴᖅᓯᒪᔪᓂᒃ ᓂᕿᓂᒃ, ᓄᓇᓕᐸᐅᔭᒃᑯᑦ ᐃᖅᑲᐃᑎᑦᑎᒋᐊᖅᐳᑦ ᐃᖃᓗᒻᒥᐅᓂᑦ ᓇᒻᒥᓂᖃᐅᑎᖃᕐᓂᕐᒧᑦ ᓚᐃᓴᑖᖅᕆᐊᖃᕐᒪᑕ ᓂᕿᓂᒃ ᓂᐅᕕᐊᒃᓴᖃᕐᓂᐊᖅᑲᑕ ᐊᒻᒪᓗ ᖃᐅᔨᒪᓗᑎᒃ ᐱᒻᒪᕆᐅᓂᖓᓂᑦ ᓂᖀᑦ ᑲᒪᒋᔭᐅᑦᑎᐊᕆᐊᖃᕐᓂᖏᓐᓂᑦ.
ᓄᓇᓕᐸᐅᔭᒃᑯᑦ ᐃᓪᓗᖁᑎᖓ ᓈᓴᐅᑎᓕᒃ 901 ᐊᓇᐃᑦᑑᑉ ᐃᓪᓗᖓᓂ ᓴᓇᒋᐊᖅᑕᐅᓛᕐᒪᑦ 2020 ᐊᒻᒪ 2021-ᒥ ᐃᖃᓗᒻᒥᐅᑕᐃᑦ ᐊᑲᐅᓂᖅᓴᒥᒃ ᐃᓯᖅᕕᖃᖁᓪᓗᒋᑦ ᑭᒃᑯᑐᐃᓐᓇᕐᓄᓪᓗ ᐊᑐᐃᓐᓇᐅᓂᖅᓴᐅᖁᔭᐅᓪᓗᓂ ᒐᕙᒪᕋᓛᖃᖅᕕᐅᔪᖅ.
ᑖᒃᑯᐊ ᓴᓇᒋᐊᑕᐅᔪᑦ ᐊᔪᕈᓐᓃᑎᑦᑎᓂᐊᖅᑐᑦ ᐃᓄᕐᓂᖅᓴᐅᔪᓂᒃ ᐱᒡᒐᖅᑐᓂᒃ ᐱᓕᕆᐊᕆᒋᐊᓕᖏᓐᓂᑦ ᐃᒻᒥᓂᒃ ᐱᔪᓐᓇᖅᓯᑎᑦᑎᓗᑎᒃ ᐊᒻᒪᓗ ᓱᑎᑦᑎᔪᖃᖅᑎᓪᓗᒍ ᑲᑎᒪᔪᖃᖅᑎᓪᓗᒍᓗ ᐅᐸᖃᑕᐅᔪᓐᓇᓕᕐᓗᑎᒃ.
ᓄᓇᓕᐸᐅᔭᒃᑯᑦ ᖃᐅᔨᒐᓱᓐᓂᐊᕐᒪᑕ ᖃᓄᖅ ᐱᕙᓕᐊᑎᑦᑎᔪᓐᓇᕐᒪᖔᑕ ᒪᓕᒐᖅᑎᒍᑦ ᐊᐅᓚᑦᑎᔾᔪᑎᒃᓴᓂᑦ ᐃᓪᓗᕋᓛᓕᐅᕐᓂᐅᕙᑦᑐᓂᒃ ᐊᒻᒪᓗ ᐃᖃᐃᓕᓴᕐᓂᕐᒧᑦ ᑐᕌᖓᔪᓂᒃ ᓴᓇᔭᐅᕙᑦᑐᓂᒃ ᐊᑐᖅᑐᐊᑕᐅᓐᖏᑦᑐᒥ ᓄᓇᓕᐸᐅᔭᒃᑯᑦ ᓄᓇᖁᑎᖓᓂ, ᑲᑎᒪᔩᑦ ᐊᖏᖅᑐᐃᓐᓇᐅᓚᐅᖅᑎᓪᓗᒋᑦ ᐃᓱᒪᓕᐅᕈᑎᐅᔪᒥᒃ ᔪᓚᐃ 28, 2020-ᒥ ᑲᑎᒪᔨᑦ ᑲᑎᒪᑎᓪᓗᒋᑦ. ᑖᓐᓇ ᐋᖅᑭᑦᑕᐅᔪᖅ ᓴᖅᑭᓚᐅᖅᑐᖅ ᐊᑐᓕᖁᔭᓕᐊᖑᔪᔪᒥ ᐸᕐᓇᓂᕐᒧᑦ ᐱᕙᓪᓕᐊᑎᑦᑎᓂᕐᒧᓪᓗ ᑲᑎᒪᔨᕋᓛᑦ ᑲᑎᒪᑐᐃᓐᓇᑎᓪᓗᒋᑦ ᔪᓚᐃ 21, 2020-ᒥ.
ᐃᖃᓗᐃᑦ ᓄᓇᓕᐸᐅᔭᖓ ᓴᖅᑭᖅᓯᓂᐊᓕᕐᒥᒻᒪᑦ ᑎᑎᕋᖅᓯᒪᔪᓂᒃ 2019-ᒥ ᐱᖁᑎᓄᑦ ᑖᒃᓯᓄᑦ ᐊᑭᓕᓐᖐᑦᑐᓖᑦ ᐊᑎᖏᓐᓂᑦ ᑕᐃᒪᐃᒋᐊᖃᖅᑎᑕᐅᒻᒪᑕ ᒪᓕᑦᑐᑎᒃ ᓈᓴᐅᑎᓕᒻᒥᒃ 97 ᐱᖁᑎᓂᒃ ᖃᐅᔨᓴᕐᓂᕐᒧᑦ ᑖᖅᓰᔭᐃᑎᑦᑎᓂᕐᒧᓪᓗ ᐱᖁᔭᕐᔪᐊᕐᒥᒃ. ᑖᒃᑯᐊ ᑎᑎᕋᖅᓯᒪᔪᑦ ᓴᖅᑭᔮᖅᑎᑦᑎᕗᑦ ᐱᖁᑎᓕᓐᓂᑦ ᐃᖃᓗᓐᓂ ᐊᑭᓕᓐᖐᑦᑐᖁᑎᓕᓐᓂᑦ $500 ᐅᖓᑖᓂᑦ. ᑖᒃᑯᐊ ᑎᑎᕋᓯᒪᔪᑦ ᓴᖅᑭᔮᖅᑎᑦᑎᕗᑦ ᓄᑖᕈᕆᐊᖅᑕᒥᓂᐅᔪᓂᒃ ᔪᓚᐃ 15, 2020-ᒥ.
ᐊᑭᓖᔪᓐᓇᖅᑐᑦ ᖃᕋᑕᐅᔭᒃᑯᑦ ᖃᕋᑕᐅᔭᒃᑯᑦ ᑮᓇᐅᔭᒃᑯᕕᓕᕆᔾᔪᑎᒃᑯᑦ ᐅᕝᕙᓘᓐᓃᑦ ᐅᖄᓚᓗᓂ ᐅᕗᖓ 979−5606. ᐊᐱᖅᑯᑎᖃᕐᓂᕈᑦᓯ, ᖃᐅᔨᒋᐊᖅᑕᐅᒍᓐᓇᖅᑐᖅ ᔨᓃᕙ ᓯᔅᓚᑦ ᐅᕗᖓ ᑎᑎᕋᕐᕕᒋᓗᒍ G.chislett@iqaluit.ca.
ᐋᒐᓯ 7, 2020 – ᐃᖃᓗᐃᑦ, ᓄᓇᕗᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖏᑦ ᑲᑐᔾᔨᖃᑎᒌᑦᑐᑎᒃ ᐱᓕᕆᖃᑎᒌᓐᓂᐅᓴᓕᕆᕗᑦ ᑲᔪᖏᕐᓴᐃᒍᒪᓪᓗᑎᒃ ᓄᓇᓕᕐᒥᐅᑕᓂᑦ ᐊᒻᒪ ᓇᖕᒥᓂᖃᖅᑎᐅᔪᓂᑦ ᑰᖁᑎᑦᑎᓐᓂᑦ ᐊᒻᒪ ᐃᒪᓕᖁᑎᑦᑎᓐᓂᑦ ᓴᓗᒪᑎᑦᑎᖁᔭᐅᕙᓪᓗᑎᒃ. ᐃᖃᓗᐃᑦ ᐃᒪᖃᕐᕕᖏᑦ, ᑰᒐᓛᖏᑦ, ᑰᖏᑦ, ᑕᕆᐅᖓ, ᐊᒻᒪ ᓯᔾᔭᐅᑉ ᐊᕙᑎᖏᑦ ᐱᒻᒪᕆᐅᔪᐃᓐᓇᐅᒻᒪᑕ ᐃᓘᓐᓇᖏᒍᑦ ᖃᓄᐃᒋᐊᖃᖏᔾᔪᑎᖏᒍᑦ, ᐊᑦᑕᓇᔾᔭᐃᕐᓯᒪᒋᐊᖃᕐᓂᖏᒍᑦ ᐊᒻᒪ ᖃᓄᐃᖏᑦᑎᐊᕆᐊᖃᕐᓂᖏᒍᑦ ᓄᓇᓕᑦᑕ.
ᓯᑎᒃᑯᑦ ᖁᕕᐃᒋᑦᑎᐊᖅᑐᒍ ᐊᑐᖅᑎᑦᑎᓛᓕᕐᒥᔪᑦ ᐊᒥᐊᕈᑎᓂᑦ ᑕᐅᕐᓰᓂᕐᒥᑦ ᐱᓕᕆᐊᑦᓴᒥᑦ ᐋᒐᓯ 21−ᖑᓕᖅᐸᑦ ᐱᒋᐊᕐᓗᑎᒃ 10−ᒥ ᐅᓪᓛᒃᑯᑦ 3−ᒧᓄᑦ ᐅᓐᓄᓴᒃᑯᑦ ᐅᓇᓯᐅᑎᒃᑯᕕᖓᓐᓂᑦ ᓯᑎᒃᑯᑦ ᑎᓴᒪᓄᑦ ᐊᑐᕆᐊᓄᑦ ᓴᖑᒋᐊᕐᕕᐅᑉ ᓴᓂᐊᓃᑦᑐᒥ.
ᓄᓇᓕᕐᒥᐅᑕᐃᑦ ᑐᖕᖓᓱᑦᑎᐊᓛᖅᑐᑦ ᕿᒪᐃᒋᐊᖅᑐᕐᓗᑎᒃ, ᑕᐅᕐᓰᒋᐊᖅᑐᕐᓗᑎᒃ, ᐅᕝᕙᓘᓐᓃᑦ ᐊᐃᑦᓯᕐᓗᑎᒃ ᐊᒥᐊᕈᑎᓂᑦ ᐊᑐᖅᑕᐅᓕᖅᐸᑦ ᑕᒪᓐᓇ. ᓯᑎᒃᑯᑦ ᐃᖅᑲᓇᐃᔭᖅᑎᖏᑦ ᐊᑦᑕᓇᔾᔭᐃᕐᓯᒪᓗᒋᑦ ᐃᒋᑦᑐᒍᓐᓇᓛᖅᑐᑦ ᐃᓘᓐᓇᖏᓐᓂᑦ ᐊᒥᐊᕈᑎᒥᓂᕐᓂᒃ, ᐊᒥᐊᕈᑎᓂᑦ ᐱᔭᐃᖏᓐᓂᖏᓐᓂᑦ.
ᐱᖃᑕᐅᒍᒪᓛᖅᑐᑦ ᑐᖕᖓᓱᑦᑎᐊᓛᕐᒥᔪᑦ ᑮᓇᐅᔭᒃᑯᑦ ᐃᑲᔫᑎᖃᕈᒪᓐᓂᕈᑎᒃ ᔨᒥ ᕿᓚᕐᐸᖅ ᐃᓱᒪᒋᓪᓗᒍ ᓱᕈᓯᕐᓄᑦ ᐱᖕᖑᐊᖅᑐᓕᕆᔾᔪᑎᑦᓴᓂᑦ ᑮᓇᐅᔭᓄᑦ ᓄᐊᑕᐅᕙᑦᑐᓄᑦ.
ᔪᓚᐃ 13, 2020 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᐃᑦ ᐃᖃᓗᐃᑦ ᐱᖕᖑᐊᖅᑐᓕᕆᔨᒃᑯᖏᒃ ᖁᕕᐊᒋᓪᓗᒍ ᐅᖃᐅᓯᖃᕈᒪᓕᕐᒥᔪᑦ ᐅᑭᐅᒃᑯᑦ ᐱᖕᖑᐊᕐᕕᐊᓘᑉ ᐃᓗᐊᓂ ᐱᖕᖑᐊᕐᕕᒃ ᒪᑐᐃᒃᑲᓐᓂᓛᓕᕐᒥᒻᒪᑦ ᐱᖓᑦᓯᕐᒥ, ᔪᓚᐃ 15.