ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 2017-31 ᐊᑦᓴᓗᐊᓕᓐᓄᑦ ᓯᐊᕐᕆᔭᐅᑎᓄᑦ ᐱᓐᖑᐊᕐᕕᒻᒥ ᐱᓕᕆᔨ
ᐊᐅᔭᒃᑯᑦ ᐃᓕᓐᓂᐊᖅᑎᒧᑦ ᐃᖅᑲᓇᐃᔮᑦᓴᖅ
ᐊᑦᓴᓗᐊᓕᓐᓄᑦ ᓯᐊᕐᕆᔭᐅᑎᓄᑦ ᐱᓐᖑᐊᕐᕕᒻᒥ ᐱᓕᕆᔨ
ᐃᖅᑲᓇᐃᔮᑦᓴᐅᑉ ᓱᓇᐅᓂᖓ:
ᑎᓕᒐᕆᓗᓂᐅᒃ ᓯᐊᕐᕆᔭᐅᑎᓄᑦ ᐱᓐᖑᐊᕐᕕᐅᑉ ᑲᒪᔨᖓᑕ, ᐃᑲᔪᖅᑎᐅᓂᐊᖅᑐᖅ ᖃᐅᑕᒫᕐᑐᖅᓯᐅᑎᓂ ᓯᐊᕐᕆᔮᕐᕕᒻᒥᑦ ᐊᐅᓚᔾᔪᑎᒍᑦ. ᖃᐅᔨᓴᖅᐸᓂᐊᖅᑐᖅ ᓯᐊᕐᕆᔭᐅᑎᓄᑦ ᐱᓐᖑᐊᕐᕕᒻᒨᐸᓐᓂᐊᖅᑐᑦ ᐊᑦᑕᓇᖅᑐᒦᓕᓐᖏᒃᑲᓗᐊᕐᒪᖔᑕ ᒪᓕᒐᕐᓂᑦ ᐊᑐᖅᑎᑦᓯᕙᓪᓗᓂ, ᑐᐊᕕᕐᓇᖅᑐᓂᑦ ᖃᐅᔨᒋᐊᖅᐸᓪᓗᓂ ᐊᒻᒪᓗ ᐊᑦᑕᓇᑦᑕᐃᓕᒪᑎᑦᓯᕙᓪᓗᓂ ᐊᕙᑎᓐᓃᑦᑐᓂᑦ. ᐱᓕᕆᖃᑎᖃᕈᓐᓇᑦᓯᐊᕆᐊᓕᒃ ᒪᒃᑯᑦᑐᓂᑦ ᐃᓐᓇᓂᓪᓗ. ᐅᓐᓄᒃᑯᑦ ᐊᒻᒪᓗ ᐱᓇᓱᐊᕈᓰᑦ ᓄᓐᖑᖏᓐᓂ ᐃᖅᑲᓇᐃᔭᕈᓐᓇᕆᐊᓕᒃ.
ᐱᓕᕆᐊᑦᓴᖏᑦ ᐊᒻᒪᓗ ᑲᒪᒋᔭᕆᐊᓕᖏᑦ:
- ᐃᑲᔪᖅᐸᓪᓗᓂ ᐱᓐᖑᐊᕐᕕᒻᒥ ᖃᐅᔨᓴᖃᑕᐅᕙᓪᓗᓂ ᓯᐊᕐᕆᔮᖅᑐᓂᑦ ᐊᒻᒪᓗ ᐊᓐᓂᑭᑦᑐᓛᖅᑐᓂᑦ
- ᐊᑐᖅᑎᑦᓯᕙᓪᓗᓂ ᐊᑦᑕᓇᑦᑕᐃᓕᒪᐅᑎᓂᑦ ᐊᑐᐊᒐᕐᓂᑦ ᐊᒻᒪᓗ ᒪᓕᒋᐊᓕᓐᓂᑦ.
- ᐃᑲᔪᖅᐸᓪᓗᒋᑦ ᐊᑐᖅᑐᐊᕈᒪᕙᓐᓂᐊᖅᑐᑦ ᐱᓐᖑᐊᕈᑎᓂᑦ ᑭᒃᑯᑐᐃᓐᓇᐃᑦ.
- ᖃᐅᔨᒪᓇᓱᐊᖅᐸᓪᓗᓂ ᐱᓐᖑᐊᕐᕖᑦ ᐊᒻᒪᓗ ᓱᓇᒃᑯᑖᑦ ᐊᑐᖅᑕᐅᑦᓯᐊᓕᕋᓗᐊᕐᒪᖔᑕ ᐊᒻᒪᓗ ᑲᒪᒋᔭᐅᑦᓯᐊᓕᕋᓗᐊᕐᒪᖔᑕ ᐱᓐᖑᐊᖅᑐᓄᑦ.
- ᐱᓕᕆᔾᔪᑎᓂᑦ ᑎᑎᕋᕐᐸᓪᓗᓂ ᖃᓄᐃᓕᐅᕈᑎᒥᓂᕐᓂᒃ
- ᓴᓗᒻᒪᕐᓴᐃᖃᑕᐅᕙᓪᓗᓂ ᐱᓐᖑᐊᕐᕕᒻᒥᑦ
- ᓱᕈᓯᕐᓄᑦ ᑕᑯᓐᓇᖅᑕᐅᓂᖓ ᖃᓄᖅ ᐱᐅᔫᑎᓇᓱᐊᖅᐸᓪᓗᓂᐅᒃ ᐊᒻᒪᓗ ᓯᕗᓕᖅᑎᐅᓂᒃᑯᑦ ᐱᓕᕆᑦᓯᐊᕋᓱᑉᐸᓪᓗᓂ ᐊᔪᕆᕐᓯᐅᓯᓐᓈᕈᑎᒋᓕᓂᐅᒃ ᖃᓄᐃᓕᐅᕆᐊᖃᕐᓂᕐᒥᑦ.
- ᓴᖅᑭᔮᖅᑎᑦᓯᓇᓱᐊᖅᐸᓪᓗᓂ ᐊᑦᑕᓇᓐᖏᑦᑐᓂᑦ, ᖁᕕᐊᓇᖅᑐᓂᑦ ᓱᕈᓰᑦ ᐊᕙᑎᖏᓐᓂ.
- ᐃᑲᔪᖅᐸᓪᓗᓂ ᐊᔾᔨᒌᓐᖏᑦᑐᓂ ᖃᓄᐃᓕᐅᕈᑎᓂ ᐊᑐᖅᑕᐅᓗᐊᖅᐸᖏᑦᑐᓂᑦ.
ᐃᓕᓪᓕᐊᕐᓯᒪᖁᒥᓇᖅᑐᑦ, ᐱᓕᕆᐊᕆᔪᓐᓇᕐᓗᒋᑦ ᐊᒻᒪᓗ ᖃᐅᔨᒪᑦᓯᐊᕐᓗᒋᑦ:
- ᐱᓕᕆᓯᒪᓚᐅᕐᓯᒪᒋᐊᓕᒃ ᒪᒃᑯᑦᑐᓄᑦ ᐅᐸᑦᑕᐅᕙᑦᑐᓂ ᐱᓐᖑᐊᖅᑐᓕᕆᓂᕐᒥᑦ, (ᐃᒻᒪᖄ ᐃᓕᓐᓂᐊᕇᕋᐃᒻᒪᑕ ᐱᓕᕆᐊᑦᓴᓂ, ᑭᐱᓐᖑᐃᔭᕐᕕᓐᓂ, ᐱᓐᖑᐊᖅᑐᓂᑦ ᖃᐅᔨᓴᖅᑎᐅᓂᕐᒥ)
- ᐊᑦᓴᓗᐊᓕᓐᓂᑦ ᓯᐊᕐᕆᔭᐅᑎᓂᑦ ᐊᑐᖃᑦᑕᓚᐅᕐᓯᒪᒋᐊᓕᒃ ᐊᓐᓂᑭᑦᑐᓛᓂᓪᓘᓐᓃᑦ
- ᑐᓴᐅᒪᖃᑎᖃᕈᓐᓇᑦᓯᐊᕆᐊᓕᒃ ᑐᑭᓯᓇᑦᓯᐊᕐᓗᓂ
- ᐱᔨᑦᓯᕋᖅᑎᐅᓚᐅᕐᓯᒪᒋᐊᓕᒃ ᐃᖅᑲᓇᐃᔭᐅᑎᒍᑦ
- ᐋᓐᓂᖅᑐᓂᑦ ᐊᒻᒪᓗ ᐊᓂᕐᓵᕈᓐᓇᐃᓪᓕᖅᑲᔪᓂᑦ ᐃᑲᔪᕈᓐᓇᓂᕐᒥᑦ ᐃᓕᓐᓂᐊᕐᓯᒪᔭᕆᐊᓕᒃ
- ᐃᓄᑦᑎᑑᕈᓐᓇᕈᓂ ᐱᕙᓪᓕᐊᑎᔪᒻᒪᕆᐅᒐᔭᖅᑐᖅ ᐱᓇᓱᐊᕈᑎᒥᒍᑦ
ᖃᓄᐃᑦᑑᓂᖓ ᐃᖅᑲᓇᐃᔮᔅᓴᖅ ᐱᔾᔪᑎᒋᓪᓗᒍ ᐱᕋᔭᓚᐅᖅᓯᒪᖏᓐᓂᖏᓐᓄᑦ ᖃᐅᔨᒋᐊᖅᑕᐅᒋᐊᖃᓂᐊᖅᑐᑦ ᐊᒻᒪ ᐊᑦᑕᓇᕈᑎᐅᔪᓐᓇᖅᑐᓂᑦ ᐊᒻᒪᓗ ᐳᕙᓪᓘᑎᖃᓐᖏᒃᑲᓗᐊᕐᒪᖔᑕ.
ᐃᑲᕐᕋᕐᓯᐅᑎᖓ ᐊᑭᓕᕐᓱᖅᑕᐅᓂᒃᑯᑦ ᐃᖅᑲᓇᐃᔮᑦᓴᒧᑦ $23.69 ᐊᒻᒪᓗ 6-ᐳᓴᓂᑦ ᕿᑲᖅᑐᖅᓯᐅᑎᓂᑦ.
ᐃᖅᑲᓇᐃᔮᖅᑖᕋᓱᐊᕈᑎᑦᓴᐃᑦ ᐅᕗᖓ ᐊᐅᓪᓚᖅᑎᒐᑦᓴᖅ:
ᓈᓴᐅᑎ # 2017-31
ᐃᖅᑲᓇᐃᔭᖅᑎᓕᕆᓂᕐᒥᑦ ᐃᖅᑲᓇᐃᔭᕐᕕᒃ
ᓄᓇᓕᐸᐅᔭᐃᑦ ᐃᖃᓗᐃᑦ
ᑎᑎᖅᑲᒃᑯᕕᖓ 460, ᐃᖃᓗᐃᑦ, ᓄᓇᕗᑦ X0A 0H0
ᓱᑲᑦᑐᒃᑰᕈᑎᖓ 867-979-5210
hr@city.iqaluit.nu.ca
ᐊᐱᕐᓱᖅᑕᐅᔪᒪᔪᑦ ᑭᓯᐊᓂ ᖃᐅᔨᒃᑲᖅᑕᐅᒐᔭᖅᑐᑦ.
ᓄᓇᓕᐸᐅᔭᐃᑦ ᐃᖃᓗᐃᑦ ᐊᑐᕈᓐᓇᖅᑐᑦ ᐃᖅᑲᓇᐃᔭᖅᑎᑖᕈᑎᓂᑦ ᐊᑐᐊᒐᕐᒥᓂᒃ ᐱᓪᓗᒋᑦ ᐃᖅᑲᓇᐃᔭᖅᑎᐅᓯᓐᓇᖅᑐᑦ ᐃᖅᑲᓇᐃᔮᖅᑖᕋᓱᐊᖅᑐᑦ.
ᒪᓕᓪᓗᒋᑦ ᑎᑎᕋᕐᓯᒪᔪᑦ 23-ᒥ ᓄᓇᕗᑦ ᓄᓇᖃᖅᑳᕐᓯᒪᔪᑦ ᐊᖏᖃᑎᒌᒍᑎᖓᓂ, ᓯᕗᓪᓕᐅᔾᔭᐅᕙᓐᓂᐊᖅᑐᑦ ᓄᓇᕗᑦᒥ ᓄᓇᖃᖅᑳᕐᓯᒪᔪᓂᑦ ᒪᓕᑦᓯᐊᖅᑐᓂᑦ ᐊᑐᐊᒐᕐᓂᑦ.
