ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – ᓄᑖᖅ ᓄᓇᓕᕆᔾᔪᑎᓄᑦ ᒪᓕᒐᕋᓛᑦᓴᖅ ᖃᓄᖅ ᐃᓱᒪᒋᔭᐅᒻᒪᖔᖅ ᑐᓴᕐᕕᐅᔪᒪᔪᑦ ᓄᓇᓕᕐᓂᒥᐅᑕᐃᑦ
ᐋᑦᑑᐸ 1, 2018 (ᐃᖃᓗᐃᑦ, ᓄᓇᕗᑦ) - ᓄᓇᓕᐸᐅᔭᐃᑦ ᐃᖃᓗᐃᑦ ᓄᓇᓕᕆᔾᔪᑎᓄᑦ ᒪᓕᒐᕋᓛᖁᑎᖓᑦ, ᐊᑐᓕᖅᑕᐅᓕᓚᐅᕐᓯᒪᔪᖅ 1996-ᖑᑎᓪᓗᒍ, ᑎᑎᕋᕐᓯᒪᔪᖅᑕᓕᒃ ᒪᓕᒐᕐᓂᑦ ᐊᒻᒪ ᐱᓕᕆᔾᔪᑎᖏᓐᓂᑦ ᓄᓇᓕᕆᔾᔪᑎᓄᑦ ᐊᑦᑐᐊᔪᓂᑦ ᓄᓇᓕᓐᓂ ᓄᓇᖁᑎᓄᑦ ᓲᕐᓗ ᓄᓇᖁᑎᑖᕐᓂᖅ, ᑐᓴᐅᒪᑎᑦᓯᔾᔪᑎᓄᑦ, ᐊᑐᖅᑐᐊᕈᑎᓄᑦ ᐊᒻᒪ ᓄᓇᖁᑎᑖᕈᒪᔪᓂᑦ ᑐᑦᓯᕋᐅᑎᓂᑦ.
ᐊᑐᖅᑕᐅᕙᑦᑐᖅ ᒪᓕᒐᕋᓛᖅ ᐊᕐᕌᒍᖃᓗᐊᓕᕐᒪᑦ ᐊᕙᑎᐅᓗᐊᓂᑦ (20) ᐊᒻᒪ ᑎᑎᕋᕐᓯᒪᓂᖏᑦ ᑎᑎᕋᖅᑕᐅᑲᓐᓂᕆᐊᖃᓕᕐᒪᑕ ᐱᑐᖃᐅᓕᕐᒪᑕ ᐃᓚᖏᑦ: ᐊᓯᔾᔨᕐᓯᒪᔪᓂᑦ ᐊᔾᔨᖃᓕᖅᑎᒋᐊᕐᓗᒋᑦ ᐱᓕᕆᔾᔪᑎᐅᕙᑦᑐᓂᑦ; ᐱᐅᓯᑎᒋᐊᕐᓗᒋᑦ ᑐᑭᓕᐊᖃᑎᒌᓐᓂᖏᑦ ᓄᓇᕗᒻᒥ ᒐᕙᒪᒃᑯᓐᓄᑦ ᓄᓇᓕᓐᓂ ᓄᓇᓄᑦ ᓄᓇᓕᕆᔾᔪᑎᓄᑦ ᐊᑐᐊᒐᖁᑎᖏᓐᓂᑦ; ᐅᖃᐅᓯᐅᕙᓪᓗᑎᒃ ᓴᖅᑭᐸᓪᓕᐊᔪᑦ ᐱᒋᐊᖅᑎᑕᐅᓯᒪᔪᑦ ᐱᓕᕆᔾᔪᑎᒍᑦ; ᐊᒻᒪ ᑭᒃᑯᑐᐃᓐᓇᕐᓄᑦ ᑐᑭᓯᓇᕐᓂᕐᓴᐅᓇᓱᐊᓕᕐᓗᑎᒃ.
ᓇᓗᓇᐃᕐᓯᒪᔪᓂᑦ ᐊᓯᔾᔨᕐᓯᒪᒻᒪᑕ ᓄᑖᒥ ᓄᓇᓕᕆᔾᔪᑎᓄᑦ ᒪᓕᒐᕋᓛᒥ ᓄᓇᓕᕐᓂᒥᐅᑕᓄᑦ ᐃᓚᖏᓐᓄᑦ ᑐᓴᐅᒪᔭᐅᒍᒪᑐᐃᓐᓇᕆᐊᓕᓐᓂᑦ:
- ᓄᑖᑦ ᐅᐸᓗᖓᐃᔭᐅᑎᑦᓴᑦ ᐊᑐᖅᑐᐊᓂᕐᒥᑦ ᓄᓇᒥᑦ: ᓄᑖᖅ ᓄᓇᓕᕆᔾᔪᑎᓄᑦ ᒪᓕᒐᕋᓛᖅ ᑎᑎᕋᕐᓯᒪᔪᖅᑕᓕᒃ ᓄᑖᓂᑦ ᒪᓕᒐᕐᓂᑦ ᑐᕌᖓᔪᓂᑦ ᐊᑐᖅᑐᐊᓂᕐᒥᑦ ᓄᑖᓂᑦ ᓄᓇᖁᑎᓂᑦ, ᐱᖃᓯᐅᑎᓗᒋᑦ ᓄᑖᑦ ᐱᔪᓐᓇᕐᓯᓇᓱᐊᕈᑎᑦᓴᑦ ᐊᒻᒪ ᐱᓕᕆᔾᔪᑎᑦᓴᑦ ᓄᓇᖁᑎᓄᑦ ᐊᒧᓯᔾᔪᑎᒍᑦ ᓇᔪᒐᓕᐅᕐᕕᑦᓴᓂᑦ ᓄᓇᖁᑎᓂᑦ.
- ᓄᑖᑦ ᒪᓕᒐᐃᑦ ᐱᕙᓪᓕᐊᑎᑦᓯᓂᕐᒨᖓᔪᑦ ᓄᓇᓕᓐᓂ ᓄᓇᓄᑦ: ᓄᑖᖅ ᓄᓇᓕᕆᔾᔪᑎᓄᑦ ᒪᓕᒐᕋᓛᖅ ᓄᑖᓂᑦ ᐱᕕᖃᐅᑎᐅᔪᓐᓇᖅᑐᓂᑦ ᓴᖅᑮᔪᓐᓇᓂᐊᖅᑐᑦ ᓇᒻᒥᓂᕐᓱᖅᑐᓂᑦ ᓴᓇᔨᓂᑦ ᓴᓇᔪᓐᓇᓕᕐᓗᑎᒃ ᓄᓇᓕᓐᓂ ᓄᓇᓂ.
- ᓄᑖᒥᑦ ᐃᑲᔪᕐᓱᐃᔾᔪᑎᖃᓕᕐᓂᐊᖅᑐᑦ ᓂᐅᕐᕈᑎᖃᕋᓱᑉᐸᖏᑦᑐᑦ ᐃᓪᓗᓕᕆᓂᒃᑯᑦ ᐱᒋᐊᕈᑎᑦᓴᓂᑦ. ᓄᑖᖅ ᓄᓇᓕᕆᔾᔪᑎᓄᑦ ᒪᓕᒐᕋᓛᖅ ᐃᑲᔪᕐᓱᐃᓂᖃᑦᓯᐊᖅᑐᑦ ᑲᑐᔾᔨᖃᑎᒌᓐᓂᒃᑯᑦ ᐃᓪᓗᓕᕆᓂᕐᒥᑦ ᐅᕝᕙᓘᓐᓃᑦ ᐊᓯᐊᒍᑦ ᐃᑲᔪᕐᓱᐃᑎᓕᓐᓂᑦ ᐊᑭᓕᕆᐊᓕᒃᑯᑦ ᐃᓪᓗᓕᕆᓂᒃᑯᑦ ᐱᕙᓪᓕᐊᑎᑦᓯᔾᔪᑎᑦᓴᓂᑦ.
ᑭᒃᑯᑐᐃᓐᓇᕐᓂᑦ ᐃᓱᒪᒋᔭᐅᔪᓂᑦ ᑐᓴᕋᓱᓐᓂᖃᓛᖅᑐᑦ ᓄᑖᖅ ᓄᓇᓕᕆᔾᔪᑎᓄᑦ ᒪᓕᒐᕋᓛᑦᓴᖅ ᐱᔾᔪᑎᐅᓗᓂ ᓇᒡᒋᔾᔭᐅᒥ ᐋᑦᑑᐸ 22, 2018, ᐅᓐᓄᒃᑯᑦ 5:30-ᒥᑦ 9-ᒧᓄᑦ, ᑲᑎᒪᔩᑦ ᑲᑎᒪᕕᖏᓐᓂ ᓯᑎᒃᑯᑦ ᐊᓪᓚᕝᕕᖃᕐᕕᖏᓐᓂ. ᑭᒃᑯᑐᐃᓐᓇᑦᓯᐊᑦ ᑐᖕᖓᓱᑦᑐᑦ ᐅᐸᖁᔭᐅᑦᓯᐊᖅᑐᑦ.
ᓄᓇᓕᕐᓂᒥᐅᑕᐃᑦ ᐃᓱᒪᒋᔭᖏᓐᓂᑦ ᑐᓴᖅᑎᑦᓯᔪᓐᓇᖅᑎᑕᐅᔪᑦ ᐅᑯᐊ ᓇᓪᓕᐊᑐᐃᓐᓇᖅ ᐊᑐᕐᓗᒍ:
- ᓄᓇᓕᕐᓂᒥᐅᑕᐃᑦ ᐃᓚᓕᐅᔾᔭᐅᔪᒪᒍᓐᓇᖅᑐᑦ ᐊᑎᖏᑦ ᑭᒃᑯᑐᐃᓐᓇᕐᓂᑦ ᑐᓴᕋᓱᓐᓂᕐᒥ ᐊᑎᖃᕐᕕᒻᒧᑦ ᖃᐅᔨᒋᐊᕐᓗᒋᑦ ᐅᑯᐊ planning@city.iqaluit.nu.ca
ᐅᕝᕙᓘᓐᓃᑦ ᐅᖄᓚᐅᑎᒃᑯᑦ 867-979-5661 ᓯᕗᓂᐊᒍᑦ ᐅᓐᓄᓴᒃᑯᑦ 4-ᒨᕋᓱᓐᓂᖓᓄᑦ ᐋᑦᑑᐸ 19, 2018; ᐊᒻᒪ
- ᓄᓇᓕᕐᓂᒥᐅᑕᐃᑦ ᑎᑎᕋᕈᓐᓇᖅᑐᑦ ᐃᓱᒪᒋᔭᒥᓂᒃ ᐅᕗᖓ ᐊᐅᓪᓚᑎᓪᓗᒋᑦ ᐃᕐᖐᓇᖅᑕᐅᑎᒃᑯᑦ planning@city.iqaluit.nu.ca ᐅᕝᕙᓘᓐᓃᑦ ᑎᑎᕋᕐᓯᒪᔭᓂ ᐸᔪᒍᑎᒋᓪᓗᒋᑦ ᔭᓇᕗᕐ ᔮᕐᕕᔅ ᐃᓪᓗᒦᑦᑐᖅ 2425 ᓯᕗᓂᐊᒍᑦ ᐅᓐᓄᓴᒃᑯᑦ 4-ᒨᕋᓱᓐᓂᖓᓄᑦ ᐋᑦᑑᐸ 15, 2018.
ᓄᓇᓕᕐᓂᒥᐅᑕᐃᑦ ᖃᕋᑕᐅᔭᓖᑦ ᑕᑯᒋᐊᕈᓐᓇᕐᒥᔪᑦ ᓄᓇᓕᕆᔾᔪᑎᓄᑦ ᒪᓕᒐᕋᓛᑦᓴᒥᑦ ᐊᒻᒪ ᐱᓪᓗᐊᑕᖏᓐᓂᑦ ᐊᓯᔾᔨᐅᑎᐅᔪᑦ ᓯᑎᒃᑯᑦ ᐃᑭᐊᖅᑭᕕᖓᓐᓂ (www.city.iqaluit.nu.ca), ᓄᓇᓕᐸᐅᔭᐃᑦ ᐃᖃᓗᐃᑦ ᐊᓪᓚᕝᕕᖏᓐᓂᑦ, ᐊᒻᒪ ᐸᕐᓇᐅᑎᓕᕆᓂᕐᒥᑦ ᐊᒻᒪ ᐱᕙᓪᓕᐊᑎᑦᓯᓂᕐᒥᑦ ᓴᓇᓂᒃᑯᑦ ᐃᖅᑲᓇᐃᔭᕐᕕᖏᓐᓄᑦ ᐃᓪᓗᒥ 2425.
ᑐᑭᓯᒃᑲᓐᓂᕈᒪᔪᑦ, ᖃᐅᔨᒋᐊᕈᓐᓇᖅᑐᑦ ᓯᑎᒃᑯᓐᓂᑦ ᐅᕗᒐ planning@city.iqaluit.nu.ca ᐅᕝᕙᓘᓐᓃᑦ ᐅᖄᓚᐅᑎᒃᑯᑦ ᐅᕗᖓ 867-979-5661.
