ᓯᑎᒃᑯᑦ ᐱᑎᑦᓯᕗᑦ ᐊᖏᕈᑎᒥᑦ ᓴᓇᔭᑦᓴᒧᑦ ᓴᓇᒋᐊᕈᑎᑦᓴᓂᑦ ᑭᓈᓗᒥᓂᕐᓂᒃ ᓴᓗᒻᒪᕐᓴᐃᕕᑦᓴᒥᑦ

ᓯᑎᒃᑯᑦ ᐱᑎᑦᓯᕗᑦ ᐊᖏᕈᑎᒥᑦ ᓴᓇᔭᑦᓴᒧᑦ ᓴᓇᒋᐊᕈᑎᑦᓴᓂᑦ ᑭᓈᓗᒥᓂᕐᓂᒃ ᓴᓗᒻᒪᕐᓴᐃᕕᑦᓴᒥᑦ
ᒪᐃ 24, 2018 (ᐃᖃᓗᐃᑦ, ᓄᓇᕗᑦ) - ᒪᐃᔭ ᕆᐊᑦᕘᕐᓐ ᐊᒻᒪ ᑲᑎᒪᔩᑦ ᖁᕕᐊᒋᓪᓗᒍ ᑐᓴᖅᑎᑦᓯᔪᒪᓕᕆᕗᑦ ᑯᑦᓕᒃ ᓴᓇᔩᑦ ᓕᒥᑕᑦ ᐱᑎᑕᐅᓚᐅᕐᒪᑕ $18.85 ᒥᓕᐊᓂᑦ ᐊᑭᖃᖅᑐᒥᑦ ᓴᓇᒋᐊᕈᑎᑦᓴᓂᒃ ᑭᓈᓗᒥᓂᕐᓂᒃ ᓴᓗᒻᒪᕐᓴᐃᕕᒻᒥᑦ. ᑕᒪᓐᓇ ᐃᓚᒋᕙᐅᒃ ᐊᑭᓕᕆᐊᓕᐅᑉ ᐱᓕᕆᐊᑦᓴᓕᒫᒧᑦ $26.5 ᒥᓕᐊᓐᕌᖅᑐᒧᑦ, ᐊᓯᖏᑦ ᑮᓇᐅᔭᐃᔭᐅᑎᐅᔪᑦ ᒪᑯᓄᖓ ᖃᓄᐃᓕᖓᓂᐊᕐᓂᖓᓄᑦ ᐋᖅᑭᓱᐃᔨᓄᑦ, ᖃᐅᔨᒪᔨᑕᓄᑦ ᓴᓇᒋᐊᓕᓐᓂᑦ ᐱᓕᕆᐊᓄᑦ ᐊᒻᒪ ᐱᓕᕆᐊᑦᓴᒥᑦ ᐊᐅᓚᑦᓯᔾᔪᑎᓄᑦ.
ᑭᓈᓗᒥᓃᑦ ᐃᒥᕈᔪᐃᑦ ᐃᒪᒥᓂᐅᕗᑦ ᒥᓪᓗᐊᖅᑕᐅᕙᑦᑐᑦ ᐊᖏᕐᕋᓂᒃ ᐅᕝᕙᓘᓐᓃᑦ ᓇᒻᒥᓂᖃᖅᑎᓂᑦ ᓯᑎᒃᑯᑦ ᑭᓈᓗᓕᕆᔾᔪᑎᖏᓐᓂᑦ. ᐃᒥᕈᔫᓂᖓ ᓴᓗᒻᒪᓴᖅᑕᐅᒋᐊᖃᕐᒪᑦ ᖁᐱᕐᕈᕋᓛᖏᑦ ᐅᕝᕙᓘᓐᓃᑦ ᐅᓗᕆᐊᓇᖅᑐᑦ ᐃᓚᐅᕈᑎᒥᓃᑦ ᓱᓇᑐᐃᓐᓇᕐᓄᑦ ᓱᕈᐃᖁᓇᒋᑦ ᐃᒪᐅᑉ/ᓄᓇᐅᑉ ᐊᕙᑎᐊᓂᑦ ᑕᕆᐅᕐᒨᖅᑕᐅᓕᖅᐸᑦ. ᓴᓗᒻᒪᓴᖅᑕᐅᒋᐊᖃᖅᑐᖅ ᐃᒥᕈᔫᓂᖓ ᒪᓕᒐᖏᑎᒍᑦ ᓄᓇᕘᑉ ᒐᕙᒪᒃᑯᖏᑕ, ᐊᒻᒪ ᓇᓗᓇᐃᔭᐃᑎᐅᓗᓂ ᒪᓕᓐᓂᑎᓐᓂᑦ ᓄᓇᒥᑦ ᐊᕙᑎᓕᕆᓂᕐᒧᑦ ᒪᓕᒐᕐᓂᑦ.
“ᓴᓇᒋᐊᖅᑕᐅᓂᖓ ᓴᓗᒻᒪᕐᓴᐃᕕᑦᑎᓐᓂᑦ ᒪᓕᓕᕐᓂᐊᖅᑐᖅ ᒪᓕᒐᕐᓂᑦ ᒫᓐᓇ ᐊᑐᖅᑕᐅᕙᑦᑐᓂᑦ, ᐊᒻᒪ ᓇᓗᓇᐃᕐᓯᔾᔪᑎᐅᓂᐊᖅᑐᑎᒃ ᓯᑎᒃᑯᑦ ᒪᓕᑦᓯᐊᕐᓂᖏᓐᓂᑦ ᒪᓕᒋᐊᓕᓐᓂᑦ ᐃᒪᓕᕆᔾᔪᑎᒍᑦ ᓚᐃᓴᒃᑯᑦ ᑎᑎᕋᕐᓯᒪᔪᓂᑦ” ᐅᖃᖅᑐᖅ ᒪᐃᔭ ᕆᐊᑦᕘᕐᓐ.
ᐱᒋᐊᕐᕕᑦᓴᖃᖅᑎᑕᐅᔪᑦ ᔪᓂ 1, 2018, ᐊᒻᒪ ᑕᖅᑭᓄᑦ 20 ᓴᓇᔭᐅᒋᐊᖃᖅᑐᓂ, ᐱᓕᕆᐊᑦᓴᒃᑯᑦ ᓴᓇᓂᐊᖅᑐᑦ ᓴᓇᒋᐊᓕᓐᓂᑦ, ᓴᓇᒋᐊᕆᐊᓕᓐᓂᑦ ᐊᒻᒪ ᐱᐅᓯᑎᑕᐅᒋᐊᕐᓗᓂ ᐱᓕᕆᔾᔪᑎᖏᒍᑦ ᓴᓗᒻᒪᕐᓴᐃᕕᐅᑉ ᐱᓕᕆᔾᔪᑎᖏᑦ ᐊᒻᒪᑦᑕᐅᖅ ᐃᓚᔭᐅᓗᓂ ᑐᓪᓕᐊᓂ ᓴᓗᒻᒪᕐᓴᐃᕕᑦᓴᒥᑦ.
ᓯᑎᒃᑯᑦ ᐱᓕᕆᖃᑎᖃᓚᐅᖅᑐᑦ ᒐᕙᒪᖏᓐᓂᑦ ᑲᓇᑕᐅᑉ ᐊᒻᒪ ᓄᓇᕘᑉ. 75 ᐳᓴᖏᑦ ᐱᓕᕆᔾᔪᑎᑦᓴᑦ ᐱᓕᕆᐊᑦᓴᒥᑦ, ᐅᖃᐅᓯᐅᒋᐊᖕᖓᓚᐅᕐᓯᒪᔪᑦ ᓰᑏᐱᕆ 2016, ᐊᑭᓕᖅᑕᐅᓂᐊᖅᑐᑦ ᒐᕙᒪᒃᑯᖏᓐᓂᑦ ᑲᓇᑕᐅᑉ ᐊᖅᑯᑎᖃᕐᓗᑎᒃ ᓴᓗᒪᔪᑦ ᐃᒥᖅ ᐊᒻᒪ ᐃᒥᕈᔪᓐᓂᑦ ᐱᓕᕆᔾᔪᑎᑦᓴᓂᑦ ᑲᓇᑕᐅᑉ ᒐᕙᒪᒃᑯᖏᑕ ᐊᑐᐃᓐᓇᐅᑎᑕᖏᓐᓂᑦ. ᐱᓕᕆᔾᔪᑎᑦᓴᑦ ᓯᕗᓪᓕᐹᕐᓯᐅᑎᐅᓂᐊᖅᑐᑦ ᑮᓇᐅᔭᐃᔭᕐᓂᖅ ᑲᓇᑕᒥ, ᑲᓇᑕᐅᑉ ᒐᕙᒪᒃᑯᖏᑕ ᐸᕐᓇᐅᑎᖓᓃᖕᖔᕐᓯᒪᔪᑦ $120 ᐱᓕᐊᓐᖑᔪᓂᑦ ᐃᑲᔫᑎᑦᓴᐅᔪᓂᑦ ᑭᒃᑯᑐᐃᓐᓇᕐᓄᑦ ᒪᑭᒪᔾᔪᑎᓕᕆᔾᔪᑎᑦᓴᓂᑦ ᐱᓕᕆᔾᔪᑎᑦᓴᒃᑯᑦ ᑲᓇᑕᒥ ᓇᒥᑐᐃᓐᓇᖅ ᐊᕐᕌᒍᓂ ᖁᓕᓂ (10) ᓯᕗᓂᑦᑎᓐᓂ. ᓄᓇᓕᐸᐅᔭᐃᑦ ᐃᖃᓗᐃᑦ ᐃᑲᔫᑎᖃᕐᓂᐊᖅᑐᑦ ᐊᓯᖏᓐᓂᑦ ᐱᓕᕆᔾᔪᑎᑦᓴᓂᑦ.
-30-
ᓯᑎᒃᑯᑦ ᐃᖅᑲᓇᐃᔭᖅᑎᖏᑦ ᐱᔨᑦᓯᕋᐅᑎᖃᑦᓯᐊᖁᓪᓗᒋᑦ ᓄᓇᓕᕐᓂᒥᐅᑕᓂᑦ, ᐅᕙᑦᑎᓐᓄᑦ ᐅᖃᐅᓯᖃᕈᓐᓇᖅᑐᓯ ᖃᓄᑐᐃᓐᓇᖅ ᐃᓱᒫᓘᑎᓂᓪᓘᓐᓃᑦ ᐱᔾᔪᑎᒋᓪᓗᒋᑦ ᐱᔨᑦᓯᕋᕈᑎᕗᑦ ᐱᓕᕆᐊᑦᓴᕗᓪᓘᓐᓃᑦ. ᐅᖄᓚᕕᐅᔪᓐᓇᖅᑐᑦ ᓯᑎᒃᑯᑦ ᐊᓪᓚᕝᕕᖏᑦ, 979-5600, ᓇᒡᒋᔾᔭᐅᒥᑦ ᑕᓪᓕᒥᕐᒧᑦ, ᒪᑐᐃᖅᐸᑦᑐᖅ ᐅᓪᓛᒃᑯᑦ 9-ᒨᕋᐃᒻᒪᑦ 5-ᒨᕋᓱᓐᓂᖓᓂ ᓯᕿᖕᖑᔭᖅ ᐅᓐᓄᓴᒃᑯᑦ, (ᖁᓛᓂ 12-ᒥ ᒪᑐᓯᒪᕙᑦᑐᖅ), ᐅᕝᕙᓘᓐᓃᑦ ᐅᕗᖕᖓᕐᓗᓯ ᖃᐅᔨᒋᐊᕆᑦᓯ ᐅᕙᑦᑎᓐᓂᑦ ᐃᑭᐊᖅᑭᕕᑦᑎᓐᓃᑦᑐᒧᑦ, ᐅᕙᓂ http//:www.city.iqaluit.nu.ca/contact-us , ᐊᒻᒪ ᐱᔭᕇᖅᑕᐅᓗᑎᒃ ᑎᑎᕋᕆᐊᓖᑦ ᖃᕋᑕᐅᔭᒃᑯᑦ ᐱᔭᑦᓴᐅᔪᓂᑦ ᑕᑕᑎᕆᐊᓕᓐᓂᑦ.