ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᖃᒧᑕᐅᔭᓂᒃ ᐊᒻᒪ ᐱᓲᑎᑲᓪᓚᓐᓂᒃ ᐱᖓᓱᓕᓐᓂᒃ ᑎᓴᒪᓕᓐᓂᓪᓗ ᐊᑐᖅᐸᓐᓂᖅ ᓄᓇᓕᐅᑉ ᐊᑐᕆᐊᖏᓐᓂ
ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖓᑦ ᐃᖅᑲᐃᑎᑦᓯᒍᒪᓕᕆᕗᑦ ᓄᓇᓕᕐᒥᐅᑕᓂᑦ ᐊᐅᓚᑦᑎᓂᐅᔪᖅ ᖃᒧᑕᐅᔭᓂᑦ ᐊᒻᒪ ᓄᓇᒃᑰᔫᓂᑦ ᓇᒧᑐᐃᓐᓇᖅ ᐊᑐᖅᑕᐅᔪᓐᓇᖅᑐᓂᑦ ᐱᓲᑎᑲᓪᓚᓐᓂᑦ ᐃᓗᐊᓂ ᓄᓇᓕᐅᑉ ᐊᒻᒪ ᐊᑐᕆᐊᓂ ᐱᓯᒪᑦᑎᒋᐊᖃᖅᐸᒻᒪᑕ ᒫᓐᓇᓂᓴᕐᓂᒃ ᓇᓗᓇᐃᒃᑯᑎᓂᑦ ᑎᑎᖅᑲᓂᑦ ᐊᒻᒪ ᓇᓪᓕᐅᒃᑯᒫᖃᕐᓗᑎᒃ.
ᐊᑎᓕᕈᑏᑦ ᓇᓗᓇᐃᔭᐃᑏᑦ ᖃᒧᑕᐅᔭᓄᑦ ᐊᑐᐃᓐᓇᐅᔪᑦ ᓄᓇᓕᐸᐅᔭᐃᑦ ᐃᖃᓗᐃᑦ ᐊᓪᓚᕝᕕᖏᓐᓂ ᐊᑭᖃᖅᑐᑎᒃ $25-ᓂᑦ ᐊᕐᕌᒍᑕᒫᖅ ᐊᑭᓕᕆᐊᖃᖅᐸᑦᑐᒥᑦ.
ᓇᓗᓇᐃᔭᐃᑏᑦ ᐱᓲᑎᑲᓪᓚᓐᓄᑦ ᐱᔭᐅᔪᓐᓇᖅᑐᑦ ᐊᐅᓚᐅᑎᓕᓐᓂᑦ ᓄᓇᒃᑰᔫᓂᑦ ᐊᑎᓕᐅᕐᕕᒻᒥᑦ ᐊᒻᒪ ᐊᑐᐃᓐᓇᐅᔪᑦ ᒐᕙᒪᒃᑯᑦ ᓄᓇᕗᒻᒥ ᐊᐅᓚᐅᑎᓕᓐᓂᑦ ᓄᓇᒃᑰᔫᓕᕆᔨᓂᑦ ᐃᖃᓗᓐᓂ.
ᓇᓗᓇᐃᒃᑯᑎᖃᕆᐊᖃᕐᒥᔪᖅ ᓇᓪᓕᐅᒃᑯᒫᖃᕐᓂᕐᒥᑦ ᓈᓴᐅᑎᖃᕐᕕᒻᒥᑦ ᓴᕕᕋᔭᒥᑦ ᐱᔪᒪᓂᐊᖅᑐᑦ ᐅᕝᕙᓘᓐᓃᑦ ᓄᑖᕈᖅᑎᑦᓯᓇᓱᐊᖅᑐᑦ ᐊᑐᖅᐸᑦᓴᒥᓂᒃ ᓈᓴᐅᑎᖃᕐᕕᒻᒥᑦ ᐊᒻᒪ ᐊᐅᓚᑦᑎᔪᓐᓇᕈᒪᔪᑦ ᖃᒧᑕᐅᔭᒥᑦ ᓄᓇᓕᐅᑉ ᐊᑐᕆᐊᖏᓐᓂ.
ᐊᐅᓚᑦᑎᔨᐅᔪᑦ ᖃᒧᑕᐅᔭᓂᑦ ᐊᒻᒪ ᐱᓲᑎᑲᓪᓚᓐᓂᑦ ᒪᓕᒋᐊᓖᑦ ᐃᓘᓐᓇᖏᓐᓂᑦ ᐊᑐᕆᐊᒃᑯᑦ ᐃᖏᕐᕋᕙᑦᑐᓄᑦ ᒪᓕᒐᕐᓂᑦ ᐊᒻᒪ ᒪᓕᑉᐸᓪᓗᑎᒃ ᐃᓘᓐᓇᖏᓐᓂᑦ ᐊᑐᕆᐊᓂ ᒪᓕᒐᕐᓂᑦ ᑎᑎᕋᕐᓯᒪᔪᓂᑦ. ᐱᖃᓯᐅᔾᔭᐅᔪᑦ ᐊᓯᖃᕈᓐᓇᕆᓪᓗᑎᓪᓗ ᒪᓕᓐᓂᖅ ᖃᓄᑎᒋ ᓄᓇᒃᑰᔫᑦ ᐃᖏᕐᕋᑎᒋᔪᓐᓇᖅᑕᖏᓐᓂᑦ, ᓄᖅᑲᖁᔨᔾᔪᑎᓂᑦ ᐊᒻᒪ ᐅᔾᔨᕈᓱᖁᔨᔾᔪᑎᓂᑦ ᓇᓗᓇᐃᒃᑯᑎᓂᑦ ᑎᑎᖅᑲᓂᑦ ᐊᒻᒪ ᐊᑐᕆᐊᑉ ᑕᓕᖅᐱᐊᓂᐅᔫᒥᔪᖅ ᐃᖏᕐᕋᕙᓪᓗᑎᒃ ᐊᔪᕐᓇᖏᑉᐸᑦ.
ᖃᒧᑕᐅᔭᐃᑦ ᐊᒻᒪ ᓄᓇᒃᑰᔫᓄᑦ ᓇᒧᑐᐃᓐᓇᖅ ᐃᖏᕐᕋᔾᔪᑏᓄᑦ ᐱᓲᑎᑲᓪᓚᐃᑦ ᐊᑐᖅᑕᐅᕙᑦᑐᑦ ᐃᓕᖅᑯᓯᕆᔭᓂᑦ ᐊᑐᖅᑐᓄᑦ ᐊᑎᓕᐅᕆᒋᐊᑐᖕᖏᑦᑐᑦ ᐊᒻᒪ ᓇᓪᓕᐅᒃᑯᒫᖃᕐᓗᑎᒃ, ᑭᓯᐊᓂ ᐊᐅᓚᑦᑎᔨᐅᔪᖅ ᐱᓕᕆᐊᖃᕆᐊᓕᒃ ᐃᓕᖅᑯᓯᓕᕆᔪᒥᑦ ᐊᒻᒪ ᓄᓇᒥ ᓯᑯᒥᓘᓐᓃᑦ ᓇᓕᐊᓐᓄᕋᐅᑎᖃᖅᐸᑦᑐᓂ ᑐᕌᓪᓗᐊᕋᓱᑉᐸᓪᓗᒍ ᐅᐸᑦᑕᓂ ᓴᖑᐃᔭᓗᐊᖏᓪᓗᓂ ᐊᔪᕐᓇᖏᑉᐸᑦ.
ᖃᒧᑕᐅᔭᐃᑦ ᐊᒻᒪ ᓄᓇᒃᑰᔫᓄᑦ ᓇᒧᑐᐃᓐᓇᖅ ᐃᖏᕐᕋᔾᔪᑏᓄᑦ ᐱᓲᑎᑲᓪᓚᐃᑦ ᐊᐅᓚᑦᑎᔪᑦ ᐊᑐᐃᓐᓇᖁᔭᐅᒐᓗᐊᑦ ᓇᓗᓇᐃᖅᑕᐅᓯᒪᔪᓂᑦ ᖃᒧᑕᐃᔭᓄᑦ ᐊᒻᒪ ᐱᓲᑎᑲᓪᓚᓐᓄᑦ ᐊᖅᑯᑎᓂᑦ ᐃᓗᐊᓂ ᓄᓇᓕᐅᑉ ᑭᒃᑯᑐᐃᓐᓇᕐᓂᑦ ᐊᑦᑕᓇᖅᑐᒦᖁᓇᒋᑦ.
ᐊᐅᓚᑦᑎᔨᐅᔪᑦ ᐱᓲᑎᑲᓪᓚᓐᓂᑦ, ᐱᔨᑦᓯᕋᐅᑎᓂᑦ ᓄᓇᒃᑰᔫᓂᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᓂᑦ ᐱᓲᑎᑲᓪᓚᓐᓂᑦ ᐊᒻᒪ ᐱᖕᖑᐊᕈᑎᓂᑦ ᐊᑐᕆᐊᒃᑰᖏᑦᑐᖅ ᐊᑐᖅᑕᐅᔪᓐᓇᖅᑐᓂᑦ ᓄᓇᒃᑰᔫᓂᑦ ᐊᑐᖅᐸᓂᐊᖅᑐᑦ ᐊᑐᕆᐊᖃᖁᔭᐅᔪᓂᑦ ᐊᒻᒪ ᓈᒻᒪᒋᔭᐅᔪᓂᑦ ᒪᓕᒐᑎᒍᑦ ᑎᓯᔪᓂᑦ ᓇᓴᕐᓂᑦ ᐋᓐᓂᔭᐃᒃᑯᑎᑦᓴᓂᑦ ᐊᐅᓚᑦᑎᓂᕐᒥᓂ ᓄᓇᒃᑰᔫᒥᑦ ᐃᓗᐊᓂ ᓄᓇᓕᐅᑉ ᒪᓕᓪᓗᒋᑦ ᓄᓇᓕᐸᐅᔭᐃᑦ ᐃᖃᓗᐃᑦ ᐊᑐᕆᐊᒃᑯᑦ ᐃᖏᕐᕋᔪᓄᑦ ᐊᑦᑕᓇᖅᑐᒦᑦᑕᐃᓕᒪᓂᕐᒥᑦ ᒪᓕᒐᕋᓛᖅ #894 ᐊᒻᒪ ᑎᑎᕋᒻᒪᓂᖏᓐᓄᑦ ᐊᓯᔾᔨᐅᑎᐅᔪᑦ.
ᖃᓄᐃᑦᑐᑐᐃᓐᓇᖅ ᓄᓇᒃᑰᔫᑦ ᓇᒧᑐᐃᓐᓇᖅ ᐊᑐᖅᑕᐅᔪᓐᓇᖅᑐᑦ ᐃᑦᓯᕙᐅᑕᖏᒍᑦ ᕿᓗᐊᖃᕈᑎᒃ, ᐊᐅᓚᑦᑎᔪᖅ ᕿᓗᐊᕐᓯᒪᕙᒋᐊᓕᒃ ᒪᓕᓪᓗᒋᑦ ᒪᓕᒐᖏᑦ ᐱᓯᒪᔪᑦ ᓄᓇᒃᑰᔫᒥᑦ ᓴᓇᔪᕕᓂᕐᓂᒃ.
ᐊᐱᖅᑯᑎᐅᒐᔪᑦᑐᑦ
ᐊᐱᖅᑯᑦ: ᖃᑦᑎᓂᒃ ᐊᕐᕌᒍᖃᕆᐊᖃᖅᐸ ᐊᐅᓚᑦᑎᓂᐊᕐᓗᓂ ᓄᓇᒃᑰᔫᒥᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᒥᑦ ᐱᓲᑎᑲᓪᓚᒻᒥᑦ?
ᑭᐅᔾᔪᑦ: ᑭᓇᑐᐃᓐᓇᖅ ᐊᕐᕌᒍᓕᒃ ᑐᖔᓂ 14 ᐊᐅᓚᑦᑎᒋᐊᖃᖏᓯᐊᖅᑐᖅ ᓄᓇᒃᑰᔫᒥᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᑦᓴᒥᑦ ᐱᓲᑎᑲᓪᓚᒻᒥᑦ ᐃᓚᒋᔭᐅᖏᑐᐊᕈᓂ ᐃᓐᓇᕐᒧᑦ.
ᐊᐱᖅᑯᑦ: ᑎᓯᔪᒥᑦ ᐋᓐᓂᔭᐃᒃᑯᑎᒥᑦ ᓇᓴᕐᓯᒪᒋᐊᖃᖅᑯᖓ ᐊᐅᓚᑦᑎᓂᐊᕈᒪ ᓄᓇᒃᑰᔫᒥᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᑦᓴᒥᑦ ᐱᓲᑎᑲᓪᓚᒻᒥᑦ?
ᑭᐅᔾᔪᑦ: ᐄᖕ, ᑎᓯᔪᑦ ᐋᓐᓂᔭᐃᒃᑯᑏᑦ ᓇᓴᐃᑦ ᐊᑐᖅᑕᐅᖏᓐᓇᕆᐊᓕᐅᔪᑦ ᐊᐅᓚᑦᑎᔾᔪᑎᐅᔪᖅ ᐊᑐᖕᖏᒃᑯᓂ ᖃᒧᑕᐅᔭᒥᑦ ᐱᓲᑎᑲᓪᓚᒥᓪᓘᓐᓃᑦ ᐃᓕᖅᑯᓯᕐᒥᓄᑦ ᐊᒻᒪ ᓄᓇᒥ ᓯᑯᒥᓘᓐᓃᑦ ᓇᓕᐊᓐᓄᕋᐅᑎᒋᖕᖏᑐᐊᕈᓂᐅᒃ.
ᐊᐱᖅᑯᑦ: ᐊᐅᓚᑦᑎᔪᖅ ᓄᓇᒃᑰᔫᒥᑦ ᐱᓲᑎᑲᓪᓚᒻᒥᑦ ᐃᖏᕐᕋᓯᖅᑳᕆᐊᖃᖅᐸᑉᐸ ᐃᑳᕐᓂᐊᕈᓂ ᐊᑐᕆᐊᕐᒥᑦ ᐱᓲᑎᑲᓪᓚᓐᓄᑦ ᐃᑳᕐᕕᓐᓂ?
ᑭᐅᔾᔪᑦ: ᐋᒡᒐ, ᐊᐅᓚᑦᑎᔪᖅ ᓄᓇᒃᑰᔫᒥᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᒥᑦ ᐱᓲᑎᑲᓪᓚᒻᒥᑦ ᐃᓗᐊᓃᒍᓂ ᓄᓇᓕᐸᐅᔭᐃᑦ ᓄᖅᑲᕆᐊᓕᒃ ᐃᑳᓚᐅᖏᓂᕐᒥᓂ ᐊᖅᑯᑎᒻᒪᕆᒻᒥᑦ ᐊᒻᒪ ᐃᑳᕐᓂᐊᖅᑐᓂ ᑭᓯᐊᓂ ᐊᑦᑕᓇᕈᓐᓃᖅᐸᑦ ᐃᑳᕆᐊᑦᓴᖅ.
ᐃᖃᓗᒻᒥᐅᑕᐃᑦ ᑐᑭᓯᒋᐊᒃᑲᓐᓂᕈᒪᔪᑦ ᒪᓕᒐᕐᓂᑦ ᓄᓇᒃᑰᔫᒥᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᒥᑦ ᐱᓲᑎᑲᓪᓚᓐᓄᑦ ᐊᒻᒪ ᖃᒧᑕᐅᔭᓄᑦ ᐅᑯᓂᖓ ᖃᐅᔨᒋᐊᕈᓐᓇᖅᑐᑦ ᒪᓕᒐᕐᓂᑦ:
ᓄᓇᓕᐸᐅᔭᐃᑦ ᐃᖃᓗᐃᑦ ᒪᓕᒐᕋᓛᖁᑎᖏᑦ
- ᓄᓇᒃᑰᔫᓄᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᓄᑦ ᐱᓲᑎᑲᓪᓚᓐᓄᑦ ᒪᓕᒐᕋᓛᖅ 557
- ᓄᓇᒃᑰᔫᓄᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᓄᑦ ᐱᓲᑎᑲᓪᓚᓐᓄᑦ ᒪᓕᒐᕋᓛᑉ ᑎᑎᕋᕐᓯᒪᓂᖏᓐᓂᑦ ᐊᓯᔾᔨᐅᑎ 798
- ᐊᑐᕆᐊᒃᑯᑦ ᐃᖏᕐᕋᔪᓄᑦ ᐊᑦᑕᓇᖅᑐᒦᑦᑕᐃᓕᒪᓂᕐᒥᑦ ᒪᓕᒐᕋᓛᖅ 894
ᓄᓇᕗᒻᒥ ᒪᓕᒐᑦ
- ᓄᓇᒃᑰᔫᓄᑦ ᓇᒧᑐᐃᓐᓇᖅ ᐃᖏᕐᕋᔾᔪᑎᓄᑦ ᐱᓲᑎᑲᓪᓚᓐᓄᑦ ᒪᓕᒐᖅ, NSNWT (NU) 1988, CA-3
##
ᑐᑭᓯᒋᐊᒃᑲᓐᓂᕐᕕᑦᓴᖅ, ᐅᑯᐊ ᖃᐅᔨᒋᐊᕐᓗᒋᑦ:
ᓄᓇᓕᓐᓂ ᒪᓕᒐᕋᓛᓕᕆᔨᒃᑯᑦ
867-979-5670
municipalenforcement@iqaluit.ca
