ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᕿᒻᒥᓄᑦ ᓇᓗᓇᐃᔭᐃᑎᓂᒃ ᐅᔭᒥᑖᖅᐸᑦᑐᑦ ᐊᒥᓱᕈᓕᐅᒥᓯᒪᔪᑦ ᒪᓕᒐᕋᓛᑉ ᑎᑎᕋᕐᓯᒪᓂᖏᓐᓂᒃ ᐅᔾᔨᕈᓱᓕᖅᐸᓪᓕᐊᓂᖏᑦ ᐱᓪᓗᒋᑦ
ᔪᓂ 18, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᒃᑦ ᐃᖃᓗᓐᓂ ᓇᓗᓇᐃᕐᓯᒍᒪᕗᑦ ᒫᓐᓇᒃᑯᑦ ᐊᓯᔾᔨᐅᑎᐅᔪᒥᒃ ᓄᓇᓕᕐᒥᐅᑕᐃᑦ ᐱᓪᓗᒋᑦ ᐱᓕᕆᔾᔪᑎᒍᑦ ᐱᔾᔪᑎᐅᓗᓂ ᑎᑎᕋᖅᑕᐅᒋᐊᓚᐅᖅᑐᖅ ᐆᒪᔪᓂᒃ ᐊᐅᓚᑦᓯᔾᔪᑎ ᒪᓕᒐᕋᓛᖅ. ᐱᓇᓱᐊᕈᓯᕐᓂ ᐊᓂᒍᖅᑐᓂ, ᑕᑯᓯᒪᓕᖅᑐᒍᑦ ᐊᒥᓱᕈᖅᐹᓪᓕᕐᓯᒪᔪᒻᒪᕆᐅᔪᓂᒃ ᕿᒻᒥᓄᑦ ᓇᓗᓇᐃᔭᐃᑎᓂᒃ ᐅᔭᒥᑖᖅᑎᑦᓯᔪᓂᒃ ᐊᑎᓕᐅᖅᑐᓂᒃ - ᐊᒥᓲᓂᕐᓴᒻᒪᕆᐅᓗᑎᒃ ᐆᔭᒥᑖᖅᑎᑦᓯᓯᒪᔪᓂᒃ ᐊᕐᕌᒎᓐᓂ ᒪᕐᕉᓐᓂ ᐊᑐᕋᑖᖅᑕᑎᓐᓂᒃ. ᑕᒪᓐᓇ ᓇᓗᓇᐃᔭᐃᔾᔪᑎᐅᔪᖅ ᐊᒥᓱᐊᓗᐃᑦ ᓄᓇᓕᕐᒥᐅᑕᐃᑦ ᓇᓗᓇᐃᔭᐃᕙᓪᓕᐊᓕᕐᓂᖏᓐᓄᑦ ᐆᒪᔪᖁᑎᖏᓐᓂᒃ, ᐃᑲᔪᕐᓱᐃᓯᓐᓈᖅᑐᑎᒃ ᓇᓗᓇᖏᓂᕐᓴᒃᑯᑦ ᓇᓗᓇᐃᔭᐃᓂᕐᒥᒃ ᐊᒻᒪ ᕿᓚᒥᐅᓂᕐᓴᖅ ᐃᓄᖏᓐᓅᖅᑕᐅᕙᓕᖅᑐᑎᒃ ᐊᓯᐅᔭᐅᓯᒪᔪᑦ ᕿᒻᒥᕆᔭᐅᔪᑦ.
ᒪᕐᕉᓐᓂ ᑕᖅᑮᓐᓂ ᐊᓂᒍᓕᖅᑑᓐᓂᒃ, 173 ᕿᒻᒥᖁᑎᖏᓐᓄᑦ ᐅᔭᒥᑖᖅᑎᑦᓯᓚᐅᖅᑐᑦ. ᑕᑯᓐᓇᖅᑐᒋᑦ ᐊᓯᐊᒍᑦ, 151-ᑐᐃᓐᓇᐃᑦ ᐅᔭᒥᑖᖅᑎᑦᓯᓚᐅᖅᑐᑦ ᐊᕐᕌᒍᓕᒫᖓᓂ 2024. ᒫᓐᓇᒧᓪᓕ 2025-ᒥ, ᑲᑎᑦᑐᒋᑦ ᐅᔭᒥᑖᓚᐅᖅᑐᑦ ᑎᑭᓯᒪᓕᕇᖅᑐᑦ 264-ᓄᑦ, ᐊᑦᓱᑲᓪᓚᐅᔪᖅ ᐊᒥᓱᕈᖅᐹᓪᓕᕐᓯᒪᓂᖏᓐᓄᑦ ᑕᑯᑦᓴᐅᑎᑦᓯᓪᓗᑎᒃ ᓇᓗᓇᐃᔭᐃᓚᐅᖅᑐᓂᒃ ᒪᓕᒐᕋᓛᖅ ᑎᑎᕋᖅᑕᐅᒋᐊᑲᓐᓂᓚᐅᖅᑎᓪᓗᒋᑦ ᐃᓗᓕᖏᑦ.
ᐱᔾᔪᑎᒋᓪᓗᒋᑦ ᐊᒥᓱᕈᕐᓯᒪᓕᕐᓂᖏᑦ ᐊᒻᒪ ᐊᑐᖅᑕᐅᔪᑦ ᑎᑎᖅᑲᓂᐊᕐᕕᑎᒍᑦ ᐊᒻᒪ ᓱᓇᒃᑯᑖᖅᑖᕐᕕᐅᕙᑦᑐᑦ ᕿᖑᕙᕐᓯᒪᕙᓕᕐᓂᖏᑦ ᒫᓐᓇᐅᔪᖅ, ᕿᒻᒥᓄᑦ ᐅᔭᒥᑦᓴᐃᑦ ᓄᖑᐸᓗᑦᓯᒪᑦᓯᐊᓕᖅᑐᑦ. ᓄᓇᓕᐸᐅᔭᒃᑯᑦ ᐊᓪᓚᕝᕕᖏᓐᓂ ᓄᖑᓯᒪᓕᖅᑐᑦ, ᐊᒻᒪ 24-ᑐᐃᓐᓇᐅᓕᖅᑐᑎᒃ ᐃᖃᓗᓐᓂ ᐊᐅᓚᑦᓯᕕᐅᑉ ᑐᖕᖓᕕᖓᓐᓂ. ᑎᑭᓴᐃᓯᒪᒐᓗᐊᖅᑐᒍᑦ ᐊᒻᒪ ᐊᒡᒋᓕᖅᑑᒐᓗᐊᑦ. ᖁᔭᒋᔭᕗᑦ ᐅᑕᖅᑭᑦᓯᐊᐸᒃᑲᑦᓯ ᐊᒻᒪ ᑐᑭᓯᓯᒪᑦᓯᐊᐸᓐᓂᓯ ᐅᑕᖅᑭᑎᓪᓗᑕ ᑎᑭᓵᖑᓯᒪᔪᓂᒃ.
ᐃᓘᓐᓇᑎᒃ ᐅᔭᒥᑖᖑᕙᑦᑐᑦ ᕿᒻᒥᓂᒃ ᐊᑦᑕᓇᖅᑐᒦᔾᔭᐃᒃᑯᑎᐅᕙᒻᒪᑕ ᐱᔭᕆᐊᑭᓐᓂᕐᓴᐅᓗᑎᒃ ᓇᓗᓇᐃᖅᑕᐅᓂᖏᓐᓄᑦ ᐊᒻᒪ ᐃᓄᖏᓐᓅᖅᑕᐅᕙᑦᑐᑎᒃ ᕿᓚᒥᐅᓂᕐᓴᖅ ᐊᓯᐅᔭᐅᓐᓂᕈᑎᒃ. ᑕᒪᓐᓇ ᐊᖏᔪᐊᓘᖏᑦᑐᖅ ᐱᓕᕆᔾᔪᑎᐅᔪᖅ ᐊᖏᔪᑲᓪᓚᒃᑯᑦ ᐱᕙᓪᓕᐅᑎᔾᔪᑎᐅᕙᑦᑐᖅ ᑕᒪᒃᑮᓐᓄᑦ ᐆᒪᔪᖁᑎᓄᑦ ᐊᒻᒪ ᐃᓄᖏᓐᓄᑦ.
ᐊᑐᓚᐅᖅᑕᑎᓐᓂ ᐱᓇᓱᐊᕈᓯᕐᓂ, ᑕᑯᓯᒪᓕᖅᑐᒍᑦ ᐊᒥᓱᕈᖅᐹᓪᓕᕐᓯᒪᓂᖏᓐᓄᑦ ᓄᓇᓕᕐᒥᐅᑕᐃᑦ ᑭᒃᑯᑐᐃᓐᓇᕐᓄᑦ ᓇᓗᓇᐃᔭᐃᖃᑕᐅᑎᓪᓗᒋᑦ ᕿᒻᒥᓕᕆᔪᓂᒃ ᐃᓅᖃᑎᒌᓐᓂᒃ ᑐᓴᐅᒪᑎᑦᓯᕕᓐᓂ, ᖃᓂᒌᑦᑐᓂᒃ ᓇᔪᒐᖃᖅᑎᐅᔪᑦ ᖃᐅᔨᒋᐊᖃᑦᑕᐅᑎᕙᓕᖅᑐᑦ, ᐊᒻᒪ ᐃᓄᖏᓐᓅᕆᓇᓱᐊᕐᓂᕐᓴᐅᕙᓕᖅᑐᑎᒃ ᐆᒪᔪᖁᑎᓂᒃ. ᑕᒪᒃᑯᐊ ᖃᓄᐃᓕᐅᕈᑎᐅᕙᑦᑐᑦ ᑕᑯᑦᓴᒃᑯᑦ ᓇᓗᓇᐃᔭᐃᑎᓪᓚᕆᐅᕙᑦᑐᑦ ᓇᓪᓕᒍᓱᑦᑎᐅᓂᖏᓐᓄᑦ ᐊᒻᒪ ᐃᑉᐱᒍᓱᑦᑎᐅᓂᖏᓐᓄᑦ ᓄᓇᓕᐸᐅᔭᕐᒥᐅᑕᐅᔪᑦ.
ᒫᓐᓇᐅᔪᕐᓕ ᐊᑐᖅᑕᐅᕙᑦᑐᑦ ᑕᑯᓐᓇᖅᑐᒋᑦ ᑭᒡᒐᖅᑐᐃᔾᔪᑎᐅᔪᑦ ᐊᒥᓱᕈᒃᑲᓐᓂᕐᓯᒪᓕᕐᓂᖏᓐᓄᑦ ᕿᒻᒥᓄᑦ ᐅᔭᒥᑖᖁᔨᔪᑦ. ᑕᑯᑦᓴᐅᑎᑦᓯᔪᑦ ᐊᑦᓱᑲᓪᓚᐅᔪᖅ ᓴᖑᑎᑕᐅᓂᖅᑎᓐᓄᑦ ᖃᓄᖅ ᐅᕙᒍᑦ, ᓄᓇᓕᕐᒥᐅᑕᐅᓗᑕ, ᐱᓕᕆᖃᑎᒌᓐᓂᑎᓐᓄᑦ ᐆᒪᔪᖁᑎᖃᕐᓂᒃᑯᑦ ᑕᑯᑦᓴᐅᑎᑦᓯᓪᓗᑕ ᐃᑉᐱᒍᓱᓐᓂᖃᕐᓂᕐᒥᒃ ᐊᒻᒪ ᐅᔾᔨᕈᓱᓐᓂᕐᒥᒃ ᐊᑐᖅᑕᐅᔪᓂᒃ. ᑭᒃᑯᑐᐃᓐᓇᐃᑦ ᐃᖃᓗᓐᓂ ᐱᔭᕆᐊᑭᑦᑐᑯᓗᓐᓂᒃ ᑭᓯᐊᓂ ᐱᒻᒪᕆᐅᔪᓂᒃ ᐱᓕᕆᐊᖃᕐᓂᖏᓐᓄᑦ ᕿᒻᒥᖁᑎᖏᓐᓂᒃ ᐊᑦᑕᓇᖅᑐᒦᖁᔨᒐᑎᒃ ᐊᒻᒪ ᓇᓗᓇᐃᖅᑕᐅᔪᓐᓇᓕᖅᑐᑎᒃ ᑕᕝᕙᓴᐃᓐᓇᐸᓗᒃ.
ᐅᑕᖅᑭᓂᑦᑎᓐᓂ ᓄᑖᓂᒃ ᐆᔭᒥᑦᓴᓂᒃ ᑎᑭᒋᐊᓕᓐᓂᒃ, ᓄᓇᓕᐸᐅᔭᒃᑯᑦ ᓱᓕ ᓇᓗᓇᐃᔭᐃᕙᓐᓂᐊᖅᑐᑦ ᕿᒻᒥᓂᒃ ᑎᒍᔭᐅᔪᓂᒃ ᐃᓅᖃᑎᒌᓐᓂᒃ ᑐᓴᐅᒪᐅᑎᓕᕆᔾᔪᑎᓐᓄᑦ ᐊᒻᒪ ᐃᑭᐊᖅᑭᕕᑦᑎᓐᓄᑦ. ᐊᒻᒪᑦᑕᐅᖅ, ᑎᒍᔭᐅᒪᓂᖏᑦ ᕿᒻᒦᑦ ᐱᓇᓱᐊᕈᓰᑦ ᓄᖕᖑᖏᓐᓂ ᐊᑯᓂᐅᑎᑕᐅᓂᕐᓴᐅᕙᓐᓂᐊᖅᑐᑦ, ᐃᓄᖏᑦ ᐱᓇᓱᐊᕈᓐᓇᕐᓯᖁᓪᓗᒋᑦ ᐆᒪᔪᖁᑎᖏᓐᓂᒃ. ᒫᓐᓇᐅᔪᕐᓕ, ᐆᒪᔪᖁᑎᖃᖅᐸᑦᑐᑦ ᐊᑐᑲᐃᓐᓇᖁᔭᐅᔫᒐᓗᐊᑦ ᓇᓗᓇᐃᔭᐃᑎᑦᓴᓂᒃ ᐊᓯᖏᓐᓂᒃ ᐅᕝᕙᓘᓐᓃᑦ ᑎᑎᕋᕐᓯᒪᔪᓂᒃ ᑐᑭᓯᒋᐊᕈᑎᑦᓴᓂᒃ ᐊᑕᑎᑦᓯᖁᔭᐅᑲᐃᓐᓇᖅᑐᑎᒃ ᕿᒻᒦᑦ ᖁᖓᓯᕈᖏᓐᓄᑦ. ᑕᒪᒃᑯᐊ ᐱᔭᕆᐊᑭᑦᑐᑯᓗᐃᑦ ᐱᓕᕆᐊᑦᓴᑦ ᐊᑦᓱᑲᓪᓚᒃ ᐱᕙᓪᓕᐅᑎᒍᓐᓇᑦᓯᐊᕐᒪᑕᑦᑕᐅᖅ.
ᖁᔭᓐᓇᒦᑦᓯᐊᖅᑕᕗᑦ ᐃᖃᓗᒻᒥᐅᑕᐃᑦ ᑲᔪᓯᑎᑦᓯᕙᓐᓂᓯᓐᓄᑦ ᑲᑐᔾᔨᖃᑎᒌᓐᓂᕐᒥᒃ ᒫᓐᓇᐅᓂᖓᓂ. ᐃᑭᐊᖅᑭᕕᑦᑎᓐᓂᒃ ᖃᐅᔨᓴᖅᐸᒋᑦᓯ ᐊᒻᒪ ᐃᓅᖃᑎᒌᓐᓂᒃ ᑐᓴᐅᒪᐅᑎᓕᕆᕝᕕᓐᓂᒃ ᖃᐅᔨᓴᕐᓗᓯ ᖃᖓᒃᑯᑦ ᕿᒻᒥᓄᑦ ᐅᔭᒥᑦᓴᐃᑦ ᐊᑐᐃᓐᓇᐅᒐᔭᕐᒥᒻᒪᖔᑕ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᐅᓇ ᖃᐅᔨᒋᐊᕐᓗᒍ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | G.Byrne@iqaluit.ca
