ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᕼᐋᓗᐄᓐᖑᓕᖅᐸᑦ ᐊᑦᑕᓇᑦᑕᐃᓕᒪᓂᕐᒥᒃ ᐃᖅᑲᐃᑎᑦᓯᔾᔪᑎ
ᐋᒃᑑᐸ 31, 2024 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᐃᖅᑲᐃᑎᑦᓯᒍᒪᓕᕆᕗᑦ ᓄᓇᓕᕐᒥᐅᑕᓂᒃ ᐅᔾᔨᕈᓱᒋᐊᑲᓐᓂᖁᔨᓪᓗᑎᒃ ᐊᑐᕆᐊᒃᑯᑦ ᓇᓕᐊᓐᓄᕋᖅᑎᓪᓗᒋᑦ ᕼᐋᓗᐄᖑᓂᐊᖅᑐᒥ ᐅᓐᓄᒃᑯᑦ, ᑎᓴᒻᒥᕐᒥ, ᐋᒃᑑᐸ 31, 2024.
ᐅᓐᓄᖃᖁᓪᓗᒋᑦ ᐊᑦᑕᓇᔾᔭᐃᕐᓯᒪᑦᓯᐊᖅᑐᒥᒃ ᓱᕈᓰᑦ ᐳᓚᕋᓛᕐᒥᔪᑦ ᐃᖃᓗᓐᓂ ᒪᓕᒐᕋᓛᓕᕆᔨᒃᑯᑦ ᐊᒻᒪ ᐃᖃᓗᓐᓂ ᖃᑦᑎᕆᔨᒃᑯᑦ ᓇᒥᑐᐃᓐᓈᓛᖅᑐᑦ ᑕᐃᑲᓂ ᐅᓐᓅᓕᖅᐸᑦ ᐃᖃᓗᐃᑦ ᐃᓗᐊᓂ. ᐃᑲᔪᕈᓐᓇᓛᖅᑐᑦ ᐃᓚᒌᓂᒃ ᐃᑲᔪᖅᑕᐅᒋᐊᖃᑐᐃᓐᓇᕆᐊᓕᓐᓂᒃ, ᖃᐅᔨᓴᕐᓗᑎᒃ ᐃᓗᐊᓂ ᓄᓇᓕᐅᑉ ᓇᓕᐊᓐᓄᕋᕐᓗᑎᒃ, ᐊᒻᒪ ᓴᖅᑭᔮᕐᓗᑎᒃ ᖃᓄᐃᑦᑐᖃᖁᓇᒍ ᐃᓱᒫᓗᖁᓇᒋᓪᓗ ᐊᓂᐊᕋᓛᖅᑐᑦ.
ᓱᕈᓯᕐᒥᒃ ᖃᓄᐃᑦᑐᖃᓕᕈᓂ ᐳᓚᕋᑦᑐᓂᒃ, ᑕᒪᒃᑯᓄᖓ ᐱᓕᕆᔨᓄᑦ ᐅᐸᒍᓐᓇᑦᓯᐊᓛᖅᑐᑦ ᐃᑲᔪᖅᑕᐅᒋᐊᖃᕈᑎᒃ.
ᐃᓗᓯᓕᕆᓂᒃᑯᑦ ᐊᒻᒪ ᐊᑦᑕᓇᔾᔭᐃᕐᓯᒪᓂᒃᑯᑦ ᐃᑲᔫᑎᑦᓴᑦ:
• ᐆᒪᔪᖁᑎᓯ ᐱᓯᒪᑦᓯᐊᐸᓪᓗᒋᑦ ᐊᒻᒪ ᐃᓯᕐᕕᐅᑉ ᖃᓂᒋᔮᓃᓗᐊᔾᔭᐃᕐᓯᒪᓗᒋᑦ, ᐅᕝᕙᓘᓐᓃᑦ ᓯᓚᒥ ᑐᓂᐅᖅᑲᐃᔪᓐᓇᕐᒥᔪᓯ ᑕᐃᒪᐃᒍᒪᒍᑦᓯ.
• ᖃᐅᒪᖃᕆᐊᓕᓐᓂᒃ ᐸᑎᐅᔭᖕᖑᐊᓂᒃ ᐊᑐᖔᕐᓗᓯ ᐸᑎᐅᔭᓪᓚᕆᐅᖏᑦᑐᓂᒃ ᐊᑦᑕᓇᔾᔭᐃᕐᓯᒪᓗᓯ, ᑲᑉᐱᐊᓱᓐᓇᖅᑐᒥᒃ ᖃᐅᒻᒪᐃᓯᒪᒍᓐᓇᕐᓂᐊᕋᑦᓯ ᖃᒥᓐᓂᐅᓴᖏᑦᑐᒥᒃ.
• ᐃᓪᓗᐃᑦ ᓯᓚᑎᖏᑦ ᐃᓯᕐᕕᖓᓅᕆᐊᑦ, ᑐᕐᓲᑦ, ᐊᒻᒪ ᒪᔪᕋᐅᑏᑦ ᖃᐅᒪᖃᖅᑎᑦᓯᐊᕐᓗᒋᑦ ᐊᒻᒪ ᓱᓇᑐᐃᓐᓇᐃᑦ ᐊᕝᕙᐃᕐᓯᒪᓗᑎᒃ ᓈᕝᕕᐅᓂᐅᓴᔪᓂᒃ.
• ᐃᓐᓇᐃᑦ ᖃᐅᔨᓴᐃᓐᓇᕆᐊᓕᐅᔪᑦ ᐅᖁᒻᒥᐊᒐᓕᒫᑦᓯᐊᓂᒃ ᐅᖁᒻᒥᐊᒐᖅᑕᐅᓚᐅᖏᓐᓂᖏᓐᓂ.
ᕼᐋᓗᐄᖑᓕᖅᐸᑦ ᐃᑲᔫᑎᑦᓴᑦ ᓱᕈᓯᕐᓄᑦ:
• ᐅᖃᐅᑎᕙᓪᓗᒋᑦ ᐊᖏᔪᖅᑳᓯ ᐅᕝᕙᓘᓐᓃᑦ ᖃᐅᔨᓴᖅᑎᓯ ᓇᒦᓐᓂᐊᕐᒪᖔᑦᓯ, ᑭᒃᑯᓐᓂᒃ ᐱᖃᑎᖃᕐᓂᐊᕐᒪᖔᑦᓯ, ᐊᒻᒪ ᖃᖓᒃᑯᑦ ᐊᖏᕐᕋᓂᐊᕐᒪᖔᑦᓯ.
• ᐅᖄᓚᐅᑎᕋᓛᒡᒋᕐᓯᒪᓗᓯ ᑎᒍᒥᐊᒐᕐᒥᒃ, ᐊᑐᐃᓐᓇᖃᕈᑦᓯ, ᐸᕐᓇᐅᑎᓯ ᐊᓯᔾᔨᑳᓚᓂᖅᐸᑕ ᑐᓴᖅᑭᑦᓯᒐᔭᕋᕕᑦ.
• ᒪᓕᑉᐸᓪᓗᒋᑦ ᐱᓱᑉᐸᑦᑐᓄᑦ ᒪᓕᒐᐃᑦ ᐊᑐᕆᐊᕐᓂ: ᖃᐅᔨᓴᖅᐸᓪᓗᓯ ᑕᓕᖅᐱᓐᓄᑦ ᓴᐅᒥᓐᓄᓪᓗ ᐃᑳᓚᐅᖏᓂᕐᓯᓐᓂ ᐊᑐᕆᐊᓂᒃ, ᐱᓱᑉᐸᓪᓗᓯ — ᐅᓪᓚᖏᓪᓗᓯ, ᐊᒻᒪ ᐃᑳᕐᕕᒃᑯᑦ ᑭᓯᐊᓂ ᐃᑳᖅᐸᓪᓗᓯ ᐊᑐᕆᐊᓂᒃ.
• ᐳᓚᕋᑉᐸᓪᓗᓯ ᐃᑳᖃᑦᑕᖏᓪᓗᓯ ᐊᑐᕆᐊᑉ ᐃᓪᓗᐊᓄᑦ ᐃᓱᐊᓅᖅᐸᓪᓗᓯ ᐃᑳᓚᐅᖏᓂᕐᓯᓐᓂ ᐊᑐᕆᐊᒃᑯᑦ ᐃᑳᒐᓚᓗᐊᕐᓂᐊᖏᓇᑦᓯ.
• ᐊᑐᕐᓗᓯ ᑖᓂᖅᑐᓯᐊᖅᑐᓂᒃ, ᖃᐅᒪᓄᑦ ᕿᓪᓕᓲᓂᒃ ᐊᓐᓄᕌᓂᒃ ᑕᑯᑦᓴᐅᑦᓯᐊᖁᓪᓗᓯ ᓄᓇᒃᑰᔫᖅᑐᓄᑦ.
• ᖃᐅᔨᒪᖏᑕᕐᓯᓐᓄᑦ ᐃᓪᓗᖏᓐᓄᑦ ᐃᓯᖅᐸᖏᓪᓗᓯ ᐅᕝᕙᓘᓐᓃᑦ ᓄᓇᒃᑰᔫᖏᓐᓄᑦ ᐳᓚᕋᑦᑎᓪᓗᓯ.
• ᖃᓄᐃᓕᖓᓕᕐᓂᕆᔭᐃᑦ ᐅᕝᕙᓘᓐᓃᑦ ᑭᓇᑐᐃᓐᓇᕐᒧᑦ ᐊᑲᐅᔪᓐᓃᖅᑎᑕᐅᓕᕈᕕᑦ, ᐃᓱᒪᒋᔭᐃᑦ ᑕᑎᒋᑦᓯᐊᐸᓪᓗᒍ. ᕿᒪᓪᓗᒍ ᐊᒻᒪ ᐊᖏᔪᖅᑳᕐᓄᑦ ᐅᖃᐅᓯᕆᓗᒍ ᐅᕝᕙᓘᓐᓃᑦ ᑕᑎᒋᔭᕐᓄᑦ ᐃᓐᓇᕐᒧᑦ, ᐅᕝᕙᓘᓐᓃᑦ ᐃᑲᔪᖅᑕᐅᒍᒪᓗᓯ ᓇᓪᓕᐊᓐᓂᑐᐃᓐᓇᖅ ᐅᑯᓂᖓ "Partners for Safety” ᓄᓇᒃᑰᔫᓕᓐᓄᑦ ᐅᖃᕐᓗᓯ.
ᐊᑦᑕᓇᔾᔭᐃᕐᓯᒪᒋᑦᓯ, ᖁᕕᐊᓱᒋᑦᓯ, ᐊᒻᒪ ᖁᕕᐊᓇᖅᑐᒥᒃ ᕼᐋᓗᐄᓐᓯᐊᕐᓂᐊᖅᑯᓯ!
##
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | g.byrne@iqaluit.ca
