ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᓴᐃᒪᑎᒥᒃ ᖁᒻᒧᐊᑦᓯᓂᐊᖅᑐᑦ ᐃᑲᔪᕐᓱᐃᔾᔪᑎᐅᔪᒥᒃ ᐳᕋᐃᑦᑯᑦ (Pride) ᑕᖅᑭᖓᓂᒃ
ᔪᓂ 6, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᓴᐃᒻᒪᑎᓕᕐᓯᓛᖅᑐᑦ ᓄᓇᓕᐸᐅᔭᒃᑯᑦ ᐊᓪᓚᕝᕕᖏᑕ ᓴᓂᐊᓂ ᔪᓂ 6-ᒥᒃ ᔪᓂ 19-ᒧᓄᑦ ᖁᒻᒧᐊᑦᑎᑕᐅᓯᒪᓂᐊᖅᑐᓂ ᐃᓕᑕᕆᔭᐅᓯᒪᖁᓪᓗᒍ ᐳᕋᐃᑦ ᑕᖅᑭᖓᑦ. ᐅᓇ ᐊᕐᕌᒍᑕᒫᕐᓯᐅᑎᐅᔪᖅ ᐱᖅᑯᓯᐅᓯᒪᓕᖅᑐᖅ ᑕᑯᑦᓴᐅᑎᑦᓯᔾᔪᑎᐅᕙᑦᑐᖅ ᓄᓇᓕᐸᐅᔭᒃᑯᑦ ᐱᖃᓯᐅᔾᔨᒍᒪᕙᓐᓂᖏᓐᓄᑦ ᐱᖃᓯᐅᔾᔭᐅᖁᕙᑦᑐᒋᓪᓗ ᐊᒻᒪ ᐃᑲᔪᕐᓱᖅᑕᐅᕙᓪᓗᑎᒃ ᐅᑯᐊ ᖃᓄᑐᐃᓐᓇᖅ ᐱᐅᓯᖃᖅᐸᑦᑐᑦ ᑕᐃᔭᐅᔪᑦ 2SLGBTQIA+ ᓄᓇᓕᕐᒥᐅᖃᑎᒋᔭᕗᑦ.
ᔪᓂᑕᒫᖅ, ᓄᓇᓕᐅᔪᑦ ᑲᓇᑕᒥ ᓇᒥᑐᐃᓐᓇᖅ ᐃᓕᑕᕐᓯᓂᖃᖅᐸᒻᒪᑕ ᐳᕋᐃᑦ ᑕᖅᑭᖓᓂᒃ ᑕᑯᑦᓴᐅᑎᑦᓯᕙᑦᑐᑎᒃ ᐃᓄᖁᑎᖏᓐᓂᒃ ᐊᒻᒪ ᐃᓂᒋᔭᐅᔪᓂᒃ. ᐃᖃᓗᓐᓂ, ᓇᓪᓕᐅᓂᕐᓯᐅᕈᑎᐅᒍᓐᓇᐸᑦᑐᖅ ᐊᔾᔨᒌᖏᑐᐃᓐᓇᐅᓂᑦᑎᓐᓂᒃ ᓄᓇᓕᐸᐅᔭᐅᑉ ᐃᓗᐊᓂ ᐊᒻᒪ ᑕᑯᑦᓴᐅᑎᑦᓯᔾᔪᑎᐅᕙᑦᑐᓂ ᐃᑲᔪᕐᓱᖅᑕᐅᕙᓐᓂᖏᓐᓄᑦ ᑐᖕᖓᓇᕐᓂᒃᑯᑦ ᐊᒻᒪ ᐃᓚᓕᐅᔾᔨᓯᒪᒍᓐᓇᓂᒃᑯᑦ ᓄᓇᓕᕐᒥᐅᑕᐅᓗᑕ.
ᖁᒻᒧᐊᑎᑕᐅᓂᖓ ᐳᕋᐃᒃᑯᑦ ᓴᐃᒻᒪᑎᖓ ᐃᓚᒋᔭᐅᔪᖅ ᓄᓇᓕᐸᐅᔭᒃᑯᑦ ᖃᓄᖅ ᐃᓚᓕᐅᔾᔭᐅᓯᒪᕙᓐᓂᖏᓐᓄᑦ ᓄᓇᓕᕐᒥᐅᑕᓄᑦ ᐊᒻᒪ ᑲᑐᔾᔨᖃᑎᒌᖑᔪᓄᑦ ᑕᑯᑦᓴᐅᑎᑦᓯᓂᒃᑯᑦ ᑲᑐᔾᔨᖃᑎᒌᒍᓐᓇᓂᑦᑎᓐᓂᒃ ᖃᓄᑐᐃᓐᓇᖅ, ᐊᒻᒪ ᐃᓂᓕᐅᕆᓂᒃᑯᑦ ᐊᑦᑐᐊᖃᑎᒌᓐᓂᕐᒥᒃ, ᓇᓪᓕᐅᓂᕐᓯᐅᖃᑎᒌᓐᓂᕐᒥᒃ, ᐊᒻᒪ ᓄᓇᖅᑲᑎᒌᓐᓂᕐᒥᒃ.
ᓄᓇᓕᐸᐅᔭᒃᑯᑦ ᐊᔭᐅᖅᑐᐃᔪᑦ ᐃᓘᓐᓇᑎᓐᓂᒃ ᐱᖃᑕᐅᖁᔭᐅᓗᑕ ᐳᕋᐃᒃᑯᑦ ᑕᖅᑭᖓᓄᑦ ᑐᑭᖃᑦᓯᐊᑐᒃᑯᑦ ᑖᒃᑯᓄᖓ, ᐃᓚᒋᔭᐅᖃᑦᑕᓂᒃᑰᒐᓗᐊᖅᐸᑦ ᓄᓇᓕᓐᓂ ᖃᓄᐃᓕᐅᕈᑎᐅᔪᓄᑦ, ᐃᑲᔪᕐᓱᐃᓂᒃᑯᑦ ᐱᖃᓐᓂᕆᔭᓂᒃ ᐊᒻᒪ ᐃᓚᒋᔭᓂᒃ, ᐅᓂᒃᑳᖃᑎᒌᑉᐸᓪᓗᓂ, ᐅᕝᕙᓘᓐᓃᑦ ᖃᐅᑕᒫᑦᓯᐊᖅ ᑭᒃᑯᑐᐃᓐᓇᕐᓂᒃ ᐱᖃᓯᐅᔾᔨᖃᑦᑕᖅᑕ ᐊᒻᒪ ᐃᑉᐱᒍᓱᑦᓯᐊᐸᓪᓗᑕ ᐊᓯᑦᑕ ᐃᑉᐱᒋᔭᖏᓐᓂᒃ ᖃᐅᑕᒫ ᐃᓅᓯᑎᒍᑦ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᐅᓇ ᖃᐅᔨᒋᐊᕐᓗᒍ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | G.Byrne@iqaluit.ca
