ᓱᓕ ᐋᖅᑭᒌᕐᓯᒪᖕᖏᓱᖓᖅᑐᒥᑦ ᐃᖅᑲᓇᐃᔭᖅᑎᓄᑦ ᐋᔩᕈᑎᐅᓯᒪᔪᒥᑦ ᐊᖏᕈᑎᑖᑲᐃᓐᓇᖅᑐᑦ

ᓱᓕ ᐋᖅᑭᒌᕐᓯᒪᖕᖏᓱᖓᖅᑐᒥᑦ ᐃᖅᑲᓇᐃᔭᖅᑎᓄᑦ ᐋᔩᕈᑎᐅᓯᒪᔪᒥᑦ ᐊᖏᕈᑎᑖᑲᐃᓐᓇᖅᑐᑦ
ᑏᓰᐱᕆ 14, 2017 (ᐃᖃᓗᐃᑦ, ᓄᓇᕗᑦ) ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖓᑦ ᐊᒻᒪ ᔫᓐᓂᐊᓐᑯᑦ ᑭᒡᒐᖅᑐᐃᔪᑦ ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖁᑎᖏᓐᓂᑦ, ᑭᒃᑯᑐᐃᓐᓇᐃᑦ ᐱᔨᑦᓯᕋᖅᑏᑦ ᑲᑐᔾᔨᖃᑎᒌᖏᑦ ᑲᓇᑕᒥ (PSAC), ᐊᖏᕈᑎᑖᑲᐃᓐᓇᖅᑐᑦ ᓱᓕ ᐋᖅᑭᒋᐊᕐᓯᒪᖕᖏᓱᖓᖅᑐᒥᑦ ᐊᑐᖅᑕᐅᓂᐊᖅᑐᒥᑦ ᐃᖅᑲᓇᐃᔭᖅᑎᓄᑦ ᐊᖏᕈᑎᑦᓴᒥᑦ. “ᖁᕕᐊᒋᑦᓯᐊᖅᑕᒃᑲᓕ ᓄᓇᓕᐸᐅᔭᒃᑯᑦ ᐊᒻᒪ ᔫᓐᓂᐊᓐᑯᑦ ᐊᖏᖃᑎᒌᒍᓐᓇᓚᐅᕐᒪᑕ ᓈᒻᒪᑦᑐᒥᑦ ᐊᒻᒪ ᐊᔾᔨᒌᑎᑦᓯᔪᒥᑦ ᑭᒃᑯᑐᐃᓐᓇᕐᓂᑦ, ᐊᒻᒪ ᑕᑯᑦᓴᐅᑎᑦᓯᔾᔪᑎᐅᓗᓂ ᐊᐅᓚᑕᐅᑦᓯᐊᕐᓂᖏᓐᓂᑦ ᑭᒃᑯᑐᐃᓐᓇᕐᓂᑦ ᐱᓕᕆᔾᔪᑎᑖᖑᕙᑦᑐᑦ,” ᐅᖃᖅᑐᖅ ᑎᒥᐅᔪᒥ ᐊᐅᓚᑦᓯᔨᒻᒪᕆᐅᔪᖅ ᒧᕼᐋᒧᑦ ᕼᐊᓵᓐ. “ᐅᓇ ᐊᖏᕈᑎ ᑐᓴᕈᒥᓇᑦᓯᐊᕐᓂᐊᖅᑐᖅ ᐃᖅᑲᓇᐃᔭᖅᑎᑐᐃᓐᓇᐅᖏᑦᑐᓄᑦ ᐊᑐᖅᑐᒻᒪᕆᐊᓗᓐᓂᑦ ᐱᔨᑦᓯᕋᖅᐸᑦᑐᓄᑦ ᑭᓯᐊᓂᑦᑕᐅᖅ ᓄᓇᓕᕐᓂᒥᐅᑕᓄᑦᑕᐅᖅ,” ᐅᖃᖅᑐᖅ ᔮᒃ ᐳᕌᓴ, ᓄᓇᕘᑉ ᐃᓚᖓᓂ ᔫᓐᓂᐊᓐᓕᕆᔨᓄᑦ ᐊᖏᔪᖅᑳᒧᑦ ᑐᓪᓕᐅᔪᖅ - ᑭᒃᑯᑐᐃᓐᓇᐃᑦ ᐱᔨᑦᓯᕋᖅᑏᑦ ᑲᑐᔾᔨᖃᑎᒌᖏᑦ ᑲᓇᑕᒥ. “ᑕᑯᑦᓴᐅᓯᐊᖅᑐᖅ, ᐊᖏᔪᐊᓗᒻᒥᑦ ᐱᓕᕆᔪᓐᓇᖅᑐᒍᑦ ᑲᑐᔾᔨᖃᑎᒌᓪᓗᑕ ᐱᓕᕆᔪᕕᓂᐅᒐᐃᒐᑦᑕ.” ᐊᖏᕈᑎᒌᒍᑎᑦᓴᖅ ᐊᕐᕌᒍᓄᑦ ᑎᓴᒪᓄᑦ ᑲᑎᒪᔨᓅᕆᐊᓕᒃ ᑕᐃᒃᑯᓄᖓ ᓈᒻᒪᒋᔭᐅᔭᕆᐊᖃᕐᒥᒻᒪᑦ, ᐊᒻᒪ ᔫᓐᓂᐊᓕᕆᔩᑦ ᑭᒡᒐᖅᑐᐃᔨᖏᓐᓅᖅᑕᐅᒋᐊᖃᕋᔭᖅᑐᓂ ᐊᖏᖅᑕᐅᔭᕆᐊᖃᕐᒥᒻᒪᑦ ᑕᐃᒃᑯᓇᖕᖓᑦ.