ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᓇᓗᓇᐃᔭᐃᓂᖅ ᓄᓇᓕᕐᒥᐅᖃᑎᒌᒃᑯᑦ ᐅᔾᔨᕆᔭᕆᐊᓕᓐᓂᒃ ᐃᓚᒋᔭᐅᓗᑎᒃ ᓇᑲᓱᒃ ᐃᓕᓐᓂᐊᕐᕕᒻᒥᐅᑕᐃᑦ
ᔪᓂ 17, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᐱᓕᕆᕝᕕᖏᑦ ᖁᔭᓐᓇᒦᕈᒪᓪᓚᕆᑉᐳᑦ ᒍᓚᐃ 4-ᓕᓐᓂᒃ ᐃᓕᓐᓂᐊᖅᑎᓂᒃ ᓇᑲᓱᒃ ᐃᓕᓐᓂᐊᕐᕕᒻᒥ ᐅᕙᑦᑎᓐᓂᒃ ᐱᖃᑎᖃᕈᓐᓇᕐᓯᓚᐅᕐᓂᖏᓐᓄᑦ ᓄᓇᓕᐸᐅᔭᒃᑯᑦ ᐊᓪᓚᕝᕕᖏᓐᓂ ᐊᔾᔨᐅᖏᑦᑐᒥᒃ ᐳᓛᕈᑎᖃᓚᐅᕐᓂᖏᓐᓄᑦ ᑐᕌᒐᖃᖅᑐᑎᒃ ᓄᓇᓕᓐᓂ ᐊᐅᓚᑦᓯᔨᑎᒍᑦ ᐃᓄᓕᕆᔾᔪᑎᓂᒃ.
ᐱᓕᕆᖃᑎᒌᓐᓂᖏᓐᓂ, ᐃᓕᓐᓂᐊᖅᑏᑦ ᐃᓕᓐᓂᐊᖅᑎᑕᐅᓚᐅᖅᑐᑦ ᐊᑑᑎᒋᔭᐅᔪᓂᒃ ᐊᒻᒪ ᐱᓕᕆᐊᑦᓴᖏᓐᓂᒃ ᒪᐃᔭᐅᑉ ᐊᒻᒪ ᓄᓇᓕᐸᐅᔭᒃᑯᑦ ᑲᑎᒪᔨᖏᑕ, ᖃᓄᖅ ᓂᕈᐊᖅᑐᓕᕆᕙᒻᒪᖔᑕ ᐃᖃᓗᓐᓂ, ᐊᒻᒪ ᖃᓄᖅ ᐱᓕᕆᐊᑦᓴᓂᒃ ᐱᓕᕆᔾᔪᑎᖃᖅᐸᓐᓂᖏᓐᓂᒃ ᑲᑎᒪᔩᑦ ᑲᑎᒪᑎᓪᓗᒋᑦ. ᑐᑭᓯᒋᐊᕈᑎᓕᕆᔪᑦ ᑲᑎᒪᑎᑕᐅᔪᑦ ᖃᐅᔨᓴᖅᑎᑕᐅᓚᐅᕐᒥᔪᑦ ᖃᓄᖅ ᐊᔾᔨᒌᖏᔾᔪᑎᖃᕐᓂᖏᓐᓂᒃ ᓄᓇᓕᓐᓂ ᒪᓕᒐᕋᓛᖑᔪᑦ ᐊᒻᒪ ᐊᓯᖏᑦ ᒪᓕᖓᐅᔪᑦ, ᐱᖃᓯᐅᔾᔭᐅᓗᑎᒃ ᖃᓄᖅ ᒪᓕᒐᕋᓛᖅ ᐱᕙᓪᓕᐊᑎᑕᐅᕙᒻᒪᖔᑕ, ᐋᔩᕈᑎᐅᕙᒻᒪᖔᑕ, ᐊᒻᒪ ᑲᔪᓯᑎᑕᐅᕙᒻᒪᖔᑕ ᓄᓇᓕᓐᓂ ᒪᓕᒐᐅᓂᐊᓕᖅᑐᑎᒃ.
ᓄᓇᓕᐸᐅᔭᒃᑯᑦ ᐃᖅᑲᓇᐃᔭᖅᑎᖏᑦ ᖁᕕᐊᒋᔭᖃᓪᓚᕆᓚᐅᖅᑐᑦ ᑕᑯᒋᐊᒥ ᐃᓕᒍᒪᑦᓯᐊᖅᑐᓂᒃ, ᐃᖅᑲᕐᓴᓇᖅᑐᓂᒃ ᐊᐱᕐᓱᖅᐸᓚᐅᕐᓂᖏᓐᓄᑦ, ᐊᒻᒪ ᖃᐅᔨᒍᒪᕙᓚᐅᕐᓂᖏᓐᓄᑦ ᒪᒃᑯᑦᑐᐃᑦ ᐃᓕᓐᓂᐊᖅᑏᑦ. ᑐᓴᐅᒪᒍᒪᓂᕆᓚᐅᖅᑕᖏᑦ ᖃᓄᖅ ᓄᓇᓕᐸᐅᔭᒃᑯᑦ ᐊᐅᓚᑦᓯᕙᒻᒪᖔᑕ ᓇᓗᓇᐃᔭᐃᑎᐅᓚᐅᖅᑐᑦ ᐱᒻᒪᕆᐅᓂᖏᓐᓄᒃ ᓄᓇᓕᕐᒥᐅᑕᓂᒃ ᐃᓕᓐᓂᐊᖅᑎᑕᐅᕙᓐᓂᖏᓐᓄᑦ ᒪᒃᑯᓐᓂᖏᓐᓂ.
ᖁᔭᓕᔾᔪᑎᒋᓪᓗᒍ ᐊᒻᒪ ᐱᔭᕇᕈᑎᐅᓗᓂ, ᐃᓘᓐᓇᑎᒃ ᐱᖃᑕᐅᓚᐅᖅᑐᑦ ᐃᓕᓐᓂᐊᖅᑏᑦ ᐱᑎᑕᐅᓚᐅᖅᑐᑦ ᓇᓗᓇᐃᔭᐃᑎᒥᒃ ᐃᓕᓐᓂᐊᕐᓯᒪᓂᖏᓐᓄᑦ ᓄᓇᓕᓐᓂ ᐊᐅᓚᑦᓯᔩᑦ ᐃᓄᓕᕆᔾᔪᑎᖏᓐᓂᒃ, ᐃᓕᑕᕆᔭᐅᔾᔪᑎᐅᓗᓂ ᐱᓕᕆᖃᑕᐅᓚᐅᕐᓂᖏᓐᓄᑦ ᐊᒻᒪ ᑐᑭᓯᑎᑕᐅᓚᐅᕐᓂᖏᓐᓄᑦ ᖃᓄᖅ ᓄᓇᓕᓐᓂ ᒐᕙᒪᓕᕆᓂᐅᔪᑦ ᐱᔨᑦᓯᕋᐅᑎᐅᕙᒻᒪᖔᑕ ᓄᓇᓕᒻᒥᒃ.
ᓄᓇᓕᐸᐅᔭᒃᑯᑦ ᐃᖃᓗᓐᓂ ᐃᑲᔪᕐᓱᐃᒍᒪᑐᐃᓐᓇᑦᓯᐊᕐᒥᔪᑦᑕᐅᖅ ᒪᒃᑯᑦᑐᓂᒃ ᐃᓕᓐᓂᐊᕈᑎᓂᒃ ᐊᒻᒪ ᐊᔭᐅᖅᑐᐃᓗᑎᒃ ᐱᓕᕆᔾᔪᑎᓂᒃ ᐱᕈᐃᔨᐅᔪᓂᒃ ᐅᔾᔨᕈᓲᑎᓂᒃ ᓱᓇᑐᐃᓐᓇᕐᓂᒃ, ᓯᕗᓕᖅᑎᐅᓂᕐᒥᒃ, ᐊᒻᒪ ᐃᓅᖃᑎᒌᓐᓂᒃᑯᑦ ᐱᓕᕆᐊᖑᒋᐊᖃᖅᐸᑦᑐᓂᒃ ᓯᕗᓂᑦᑎᓐᓂ ᐃᓅᒍᒫᖅᑐᑦ ᐱᔾᔪᑎᐅᓗᑎᒃ. ᖁᔭᓐᓇᒦᖅᑕᕗᑦ ᐃᖅᑲᓇᐃᔭᖅᑎᐅᔪᑦ ᐊᒻᒪ ᐃᓕᓴᐃᔨᐅᔪᑦ ᓇᑲᓱᒃ ᐃᓕᓐᓂᐊᕐᕕᒻᒥ ᐳᓛᕆᐊᕈᓐᓇᑎᑦᓯᓚᐅᕐᓂᖏᓐᓄᑦ ᐊᒻᒪ ᓄᓇᓕᕐᒥᐅᑕᐃᑦ ᐱᖃᑕᐅᖃᑦᑕᖁᔭᐅᔪᑦ ᓄᑲᑉᐱᐊᖑᓂᖏᓐᓂ ᖃᐅᔨᑎᑕᐅᓚᐅᕐᓂᖏᓐᓄᑦ.
ᓯᕗᓂᑦᑎᓐᓂ ᐃᓕᓐᓂᐊᖅᑎᓂᒃ ᑐᖕᖓᓱᑦᑎᑦᓯᖃᑦᑕᕐᓂᐊᖅᑐᒍᑦ ᖃᐃᖃᑦᑕᖁᑐᐃᓐᓇᑦᓯᐊᖅᑐᒋᑦ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᐅᓇ ᖃᐅᔨᒋᐊᕐᓗᒍ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ 867-979-5619 | G.Byrne@iqaluit.ca
