ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᓄᓇᓕᓐᓂ ᓴᓗᒻᒪᕐᓴᐃᓂᖅ 2025: ᓴᓗᒪᓂᕐᓴᐃᑦ ᐱᕕᑐᓂᖏᑦ, ᑲᑐᔾᔨᖃᑎᒌᓐᓂᒃᑯᑦ ᓴᖕᖏᓂᖃᕐᓂᕐᓴᐅᓕᖅᑐᖅ ᓄᓇᓕᐅᔪᖅ
ᔪᓂ 18, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᐊᑦᓱᑲᓪᓚᐅᔪᖅ ᖁᔭᓕᑦᓯᐊᖅᑐᑦ ᐃᓘᓐᓇᑦᓯᐊᓯᓐᓄᑦ ᓄᓇᓕᕐᒥᐅᑕᐅᔪᓂᒃ, ᓇᖕᒥᓂᖃᖅᑎᐅᔪᓂᒃ, ᐊᒻᒪ ᓄᓇᓕᕐᒥᐅᑕᐃᑦ ᑲᑎᖕᖓᕙᑦᑐᑦ ᐱᖃᑕᐅᓚᐅᖅᑐᑦ 2025 ᓄᓇᓕᓐᓂ ᓴᓗᒻᒪᕐᓴᐃᓂᕐᒧᑦ ᑕᓪᓕᕐᒥᐅᓚᐅᖅᑐᒥ, ᔪᓂ 13. ᐱᓕᕆᖃᑕᐅᓚᐅᕐᓂᓯᓐᓄᑦ ᓄᐊᑦᑎᓚᐅᖅᑐᒍᑦ 315 ᐴᓴᓂᒃ ᓴᓂᕐᓂᒃ ᐊᒻᒪ 35 ᑭᑉᐹᕆᑦᑐᓂᒃ ᒦᑕᓂᒃ ᐊᖏᔫᑎᓂᒃ ᓴᓂᕐᓂᒃ ᓄᐊᑦᓯᓚᐅᕐᒥᔪᒍᑦ. ᐊᖏᔪᑲᓪᓚᐅᔪᑦ ᓴᓃᑦ ᓄᐊᑕᐅᓚᐅᖅᑐᑦ ᓄᓇᓕᑦᑕ ᐃᓗᐊᓃᖔᕐᓯᒪᓚᐅᕋᓗᐊᖅᑎᓪᓗᒋᑦ, ᐊᒥᓱᐊᓘᓚᐅᖅᑐᑦ ᐱᖃᑕᐅᓚᐅᖅᑐᑦ ᐊᒻᒪ ᑲᑐᔾᔨᓪᓗᑎᒃ ᖃᓄᖅᑑᖃᑎᒌᓚᐅᖅᑐᑦ ᓴᖅᑭᔮᕈᑎᐅᓕᓚᐅᕐᒥᔪᑦ ᐃᑉᐱᒍᓱᖃᑦᑕᕆᐊᖃᓕᕐᓂᑎᓐᓄᑦ ᑲᑐᔾᔨᕙᑦᑕᑎᓐᓂᒃ ᐃᓂᐅᔪᓂᒃ ᓄᓇᓕᑦᑕ ᐃᓗᐊᓃᑦᑐᓂᒃ.
ᐅᓇ ᐊᕐᕌᒍᑕᒫᑦᓯᐅᑎᐅᔪᖅ ᖃᓄᐃᓕᐅᕈᑎᐅᕙᑦᑐᖅ ᑭᒡᒐᖅᑐᐃᔾᔪᑎᐅᕙᑦᑐᖅ ᐊᖏᓂᕐᓴᒥᒃ ᓄᐊᑦᓯᓂᑐᐃᓐᓇᐅᖏᑦᑐᒥᒃ ᓴᓂᕐᓂᒃ; ᓴᖅᑭᔮᕈᑎᒋᔪᓐᓇᓕᖅᐸᑦᑕᕗᑦ ᐅᐱᒍᓱᓐᓂᑎᓐᓂᒃ ᓇᒥᒥᐅᑕᐅᓂᖅᑎᓐᓂᒃ. ᓴᓗᒪᓂᕐᓴᐅᑎᓪᓗᒋᑦ ᓄᓇᓕᐸᐅᔭᐃᑦ ᐃᑲᔪᕐᓱᐃᔾᔪᑎᐅᔪᓐᓇᕐᒪᑕ ᐃᓗᓯᑎᒍᑦ, ᓴᐳᒻᒥᑦᓯᔾᔪᑎᐅᓗᑎᒃ ᐆᒪᔪᓂᒃ ᓂᕐᔪᑎᓂᒃ, ᐊᒻᒪ ᑭᒃᑯᑐᐃᓐᓇᕐᓄᑦ ᑭᐱᖕᖑᐃᔭᕐᕕᐅᒍᓐᓇᖅᑐᓂᒃ ᐃᓂᓕᐅᕈᓐᓇᖅᑐᑎᒃ. ᓇᔪᒐᖃᕐᕕᕕᑦ ᐊᑐᕆᐊᖓᓂᒃ ᓴᓗᒻᒪᕐᓴᐃᓐᓂᕋᓗᐊᕈᕕᑦ, ᐱᖃᑎᖃᕐᓂᕈᕕᑦ ᐱᖃᓐᓂᕆᔭᓐᓂᒃ ᒥᕐᖑᐃᓯᕐᕕᒻᒥ, ᐅᕝᕙᓘᓐᓃᑦ ᐃᑲᔪᖃᑕᐅᓐᓂᕈᕕᑦ ᐱᓕᕆᖃᑎᒋᕙᑦᑕᓯᓐᓄᑦ, ᖃᓄᐃᓕᐅᕈᑎᒋᓚᐅᖅᑕᑎᑦ ᐊᑦᑐᐃᓪᓚᕆᓚᐅᖅᑐᑦ ᑕᑯᑦᓴᒥᒃ.
ᑲᔪᓯᑦᓯᐊᕐᓂᕆᔭᖓ ᓄᓇᓕᓐᓂᒃ ᓴᓗᒻᒪᕐᓴᐃᓂᐅᑉ ᐊᔪᕐᓇᕋᔭᓚᐅᖅᑐᖅ ᐱᖕᖏᑉᐸᑕ ᐃᑲᔪᕐᓱᐃᔾᔪᑎᒋᓚᐅᖅᑕᖏᑦ ᐊᑦᓱᑲᓪᓚᐅᔪᖅ ᐊᑭᓕᕐᓱᐃᔨᒋᓚᐅᖅᑕᑦᑕ. ᖁᔭᒋᑦᓯᐊᖅᑕᕗᑦ ᐅᑯᐊ ᐱᔨᑦᓯᕋᖅᑎᐅᔪᑦ ᓄᓇᑦᑎᓐᓂ (C and K Services) ᐋᓯᑦ ᐊᑐᐃᓐᓇᐅᑎᑦᓯᓚᐅᕐᒪᑕ ᓴᓂᒃᑯᕕᑦᓴᓂᒃ ᐴᑦᓴᓂᒃ ᐊᒻᒪ ᐊᒡᒑᓂᒃ, ᐊᒻᒪ ᖃᖓᑕᓲᓕᕆᔨᒃᑯᑦ (Canadian North) ᑐᓂᕐᕈᑎᖃᓚᐅᕐᒪᑕ ᐅᑎᐅᑎᒌᒥᒃ ᖃᖓᑦᑕᐅᑎᑦᓴᒥᒃ ᐃᖃᓗᓐᓂᒃ ᐋᑐᕚᒧᑦ ᐅᑎᒧᓪᓗ ᐱᔾᔪᓯᐊᕆᔭᐅᓂᐊᖅᑐᓂ. ᖁᔭᓐᓇᒦᕐᒥᔭᕗᑦ ᐅᖅᓱᖅᑯᑦ (Uqsuq Corporation), ᐅᐊᓴᐅᑎᓕᐅᖅᑎᒃᑯᑦ (Uasau Soap), ᐃᓪᓗᐊᓗᓕᕆᔨᒃᑯᑦ ᑐᔪᕐᒥᕕᒻᒥᒃ (Frobisher Inn), ᓄᐊᖦᒫᑦ ᓂᐅᕕᕐᕕᒃ (NorthMart), ᑳᐱᑖᕐᕕᒃ (Tim Hortons), ᓴᓪᓗᒥᓂᐅᑉ ᓂᐅᕕᕐᕕᒥᓂᖓ (Arctic Ventures Marketplace), ᐊᒻᒪ ᓄᓇᕐᔪᐊᕐᒥ ᐆᒪᔪᓕᕆᔾᔪᑎᓂᒃ ᑮᓇᐅᔭᖃᖅᑎᑦᓯᔩᑦ (World Wildlife Fund) ᐱᒻᒪᕆᐅᔪᓂᒃ ᑐᓂᕐᕈᑎᖃᓚᐅᕐᓂᖏᓐᓄᑦ. ᐅᓇ ᑲᑐᔾᔨᖃᑎᒌᓐᓂᒃᑯᑦ ᐃᑲᔪᕐᓱᐃᔾᔪᑎᐅᓚᐅᖅᑐᖅ ᖃᓄᐃᓕᐅᕈᑎᐅᔪᒥᒃ ᐊᔪᕐᓇᖏᔾᔪᑎᐅᓚᐅᖅᑐᖅ, ᑭᓯᐊᓂᑦᑕᐅᖅ ᓇᓗᓇᐃᔭᐃᔾᔪᑎᐅᓚᐅᖅᑐᖅ ᐅᐱᒋᔭᖃᕐᓂᑎᓐᓂᒃ ᓄᓇᓕᐸᐅᔭᑦᑎᓐᓂᒃ ᐊᒻᒪ ᖃᓄᖅ ᐊᑑᑎᖃᑦᓯᐊᑎᑦᓯᕙᓐᓂᑎᓐᓂᒃ ᑲᑐᔾᔨᖃᑎᒌᓐᓂᕐᒥᒃ ᓄᓇᓕᕐᒥᐅᖃᑎᒌᓐᓂᑎᓐᓂᒃ.
ᐃᓘᓐᓇᑦᓯᐊᖏᓐᓄᑦ ᐱᖃᑕᐅᓚᐅᖅᑐᓄᑦ, ᓄᓇᓕᕐᒥᐅᑕᐃᑦ ᓯᕋᓯᒪᔪᓂᒃ ᓂᕆᑎᑕᐅᑎᓪᓗᒋᑦ ᓂᕆᖃᑕᐅᓚᐅᖅᑐᑦ, ᐅᕝᕙᓘᓐᓃᑦ ᐱᔾᔪᓯᐊᖃᑕᐅᒐᓱᐊᓚᐅᖅᑐᑦ, ᖁᔭᓐᓇᒦᒃ. ᐃᓚᒋᔭᐅᓚᐅᕐᓂᓯ ᐱᓪᓗᒍ ᐃᑲᔫᑎᒻᒪᕆᐅᓚᐅᖅᑐᖅ ᑲᑎᑎᑦᓯᓂᒃᑯᑦ ᑭᒃᑯᑐᐃᓐᓇᑦᓯᐊᓂᒃ ᐊᒻᒪ ᑕᑯᑦᓴᐅᑎᑦᓯᔪᓐᓇᓂᖅᑎᓐᓂᒃ ᖃᓄᖅ ᐱᔪᓐᓇᓂᖅᑎᓐᓂᒃ ᐱᓕᕆᖃᑎᒌᑦᑎᓪᓗᑕ ᓄᓇᓕᐅᓗᑕ.
ᑕᒪᓐᓇ ᓴᓗᒻᒪᕐᓴᐃᓂᐅᔪᖅ ᑲᔪᓯᔭᐅᖁᓪᓗᒍ, ᓄᓇᓕᐸᐅᔭᒃᑯᑦ ᓄᓇᓕᐅᑉ ᐃᓗᐊᓂᒃ ᓴᓗᒻᒪᕐᓴᐃᓂᕐᒥᒃ ᐊᔾᔨᓕᐅᕈᑎᒍᑦ ᐊᔾᔨᓕᐅᖅᐸᑦᑐᓂᒃ ᐱᔾᔪᓯᐊᕋᓱᐊᕈᑎᒥᒃ ᖃᓄᐃᓕᐅᕈᑎᖃᖅᑎᑦᓯᓂᐊᖅᑐᑦ ᐊᒥᒨᖏᑦᑐᓂᒃ ᐱᓇᓱᐊᕈᓯᕐᓂ ᐊᒡᒋᖅᑐᓂ. ᐱᔾᔪᓯᐊᕋᓱᓐᓂᐅᓛᖅᑐᖅ ᐊᔭᐅᕐᓱᐃᔾᔪᑎᐅᓛᕈᒪᓪᓗᓂ ᓴᓗᒻᒪᕐᓴᐃᖏᓐᓇᐸᓪᓗᑎᒃ ᓄᓇᓕᕐᒥᐅᑕᐃᑦ ᐊᐅᔭᐅᓂᐊᖅᑐᖅ ᐊᒻᒪ ᑕᑯᑦᓴᐅᑎᑦᓯᓗᑎᒃ ᐱᓕᕆᐊᖑᔪᒻᒪᕆᐅᓯᒪᔪᓂᒃ ᓇᔪᒐᖃᕐᕕᑦᑕ ᐊᕙᑎᖏᓐᓂᒃ. ᖃᐅᔨᓴᖅᐸᒋᑦᓯ ᓇᓗᓇᐃᔭᐃᒃᑲᓐᓂᓛᕐᒥᒐᑦᑕ ᖃᓄᖅ ᐱᖃᑕᐅᒍᓐᓇᓛᕐᓂᓯᓐᓄᑦ.
ᑲᔪᓯᓚᐅᖅᑕ ᐅᐱᒍᓱᖃᑦᑕᓂᕐᒥᒃ ᐊᕙᑎᑦᑎᓐᓂᒃ ᐊᒻᒪ ᐱᓕᕆᖃᑎᒌᖏᓐᓇᐸᓪᓗᑕ ᐃᖃᓗᐃᑦ ᓴᓗᒪᓂᕐᓴᐅᖁᓪᓗᒍ ᐊᒻᒪ ᓴᖕᖏᓂᖃᕐᓂᕐᓴᐅᖁᓪᓗᒍ ᑲᑐᔾᔨᖃᑎᒌᓐᓂᒃᑯᑦ. ᐃᓘᓐᓇᑎᒃ ᖃᓄᖅᑑᕈᑎᐅᕙᑦᑐᑦ ᐱᕙᓪᓕᐅᑎᔪᐃᓐᓇᐅᕙᒻᒪᑕ ᐊᒻᒪ ᑐᓂᕐᕈᑎᒋᕙᑦᑕᓯ ᑕᒪᐅᓇ ᐱᕙᓪᓕᐅᑎᔪᒻᒪᕆᐅᕙᑦᑐᑦ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᐅᓇ ᖃᐅᔨᒋᐊᕐᓗᒍ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | G.Byrne@iqaluit.ca
