ᓄᓇᓕᐸᐅᔭᖓᑦ ᐃᖃᓗᐃᑦ ᖃᓄᖅ ᐃᓱᒪᓕᐅᖅᐸᒻᒪᖔᑕ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᓄᓇᓕᐸᐅᔭᖓᑦ ᐃᖃᓗᐃᑦ ᖃᓄᖅ ᐃᓱᒪᓕᐅᖅᐸᒻᒪᖔᑕ
ᐋᒡᒌᓯ 7, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᖓᑦ ᐃᖃᓗᐃᑦ ᑐᓂᓯᔪᑦ ᖃᓄᖅ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᐊᐅᓚᓂᖏᑦ ᐊᒻᒪ ᖃᓄᖅ ᐃᓱᒪᓕᐅᖃᑦᑕᕐᓂᖏᓐᓄᑦ ᐋᖅᑭᑎᑦᑎᔪᓂᑦ ᓄᓇᓕᐅᔪᒥᑦ, ᐃᑲᔪᕐᓗᒍ ᑕᑯᔅᓴᐅᑎᐊᓂᕐᒧᑦ, ᑐᓐᖓᕕᒋᔭᔅᓴᐅᓂᖏᓐᓄᑦ, ᐊᒻᒪ ᑭᒃᑯᑐᐃᓐᓇᕐᓄᑦ ᐅᑉᐱᕆᔭᐅᓂᖏᓐᓄᑦ ᓄᓇᓕᒻᒥ ᒐᕙᒪᐅᔪᒥᑦ.

ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᐅᑯᐊᖑᔪᑦ ᒪᐃᔭ ᐊᒻᒪ ᑎᓴᒪᐅᔪᖅᑐᑦ ᑲᑎᒪᔩᑦ. ᑲᑐᑎᓪᓗᑎ, ᐃᓱᒪᓕᐅᖃᑦᑕᖅᑐᑦ ᐊᒥᓱᓂᑦ ᐊᔾᔨᒌᖏᑦᑐᓂᑦ ᐃᓱᒫᓘᑕᐅᔪᓂᑦ, ᐱᒋᐊᖅᑐᑎ ᓄᓇᓕᒻᒧᑦ ᐱᔨᑦᑎᖅᑕᐅᔪᑦ ᐊᒻᒪ ᒪᓕᒐᕋᓛᑦ ᐊᑐᖅᑐᔅᓴᓕᐅᓂᕐᒧᑦ ᐊᒻᒪ ᐊᑯᓂᐅᔪᒧᑦ ᐸᕐᓇᐅᑎᓕᐅᓂᕐᒧᑦ. ᑖᒃᑯᐊ ᐃᓱᒪᓕᐅᕈᑕᐅᕙᑦᑐᑦ ᑲᑎᒪᔩᑦ ᑲᑎᒪᓂᖃᖅᑎᓗᒋᑦ, ᒪᓕᓐᓂᖃᖅᑐᑎ ᓇᓗᓇᐃᖅᓯᒪᑦᑎᐊᖅᑐᓂᑦ ᒪᓕᒐᖏᓐᓂ ᐃᑲᔪᖃᑦᑕᖅᑐᑦᐅᖃᐅᓯᕆᔭᐅᔪᑦ ᐋᖅᑭᔅᓯᒪᑦᑎᐊᖅᑐᑎᑦ ᐊᒻᒪ ᓈᒻᒪᓐᓂᖃᖅᑐᑎᑦ. ᑖᒃᑯᐊ ᒪᓕᒐᖏᑦ ᑐᓐᖓᓂᖃᖅᑐᑦ ᓄᓇᕗᒻᒥ ᒪᓕᒐᖏᓐᓂ, ᓲᕐᓗ ᓄᓇᓕᐸᐅᔭᐃᑦ, ᑕᐅᓐᔅ ᐊᒻᒪ ᕕᓕᔅ ᐱᖁᔭᖅ ᐊᒻᒪ ᓄᓇᓕᐸᐅᔭᒃᑯᑦ ᑲᑎᒪᔨᖏᓐᓄᑦ ᐊᑐᖅᑕᐅᔭᕆᐊᓖᑦ ᒪᓕᒐᕋᓛᖅ.

ᑲᑎᒪᒋᐊᓚᐅᖅᑎᓐᓇᒋᑦ, ᐊᒥᓲᓂᖅᓴᐃᑦ ᑲᑎᒪᔨᐅᖃᑕᐅᔪᑦ ᐅᐸᔅᓯᒪᒋᐊᓖᑦ. ᑖᓐᓇ ᑕᐃᔭᐅᔪᖅ ᓈᒻᒪᓐᓂᖃᖅᑐᑎ ᑲᑎᒪᒍᓐᓇᓂᕐᒧᑦ, ᐊᒻᒪ ᐃᖃᓗᓐᓂ, ᑐᑭᖃᖅᑐᖅ ᖃᑦᑏᓐᓇᐅᓛᕆᔪᓐᓇᖅᑕᖏᑦ ᑕᓪᓕᒪᑦ ᖁᓕᐅᖏᒑᖅᑐᓂᑦ ᑲᑎᒪᔩᑦ ᐅᐸᖃᑕᐅᓯᒪᒋᐊᓖᑦ. ᓈᒻᒪᖏᓐᓂᖃᖅᑎᓪᓗᒋᑦ ᑲᑎᒪᒍᓐᓇᓂᕐᒧᑦ, ᑲᑎᒪᓂᐅᔪᖅ ᓄᖅᑲᖅᑎᑕᐅᔪᖅ ᐅᐊᑦᑎᕈᑲᓂᖅᒨᖅᑕᐅᓪᓗᓂ. ᑖᒃᑯᐊ ᒪᓕᒐᖏᑦ ᓇᓗᓇᐃᖅᓯᑎᐊᖅᑐᑦ ᐃᓱᒪᓕᐅᖅᑕᔪᓂᑦ ᓈᒻᒪᓐᓂᖃᖅᑎᓪᓗᒋᑦ ᐊᒥᓲᓂᖏᑦ ᓂᕈᐊᖅᑕᐅᓯᒪᔪᑦ ᑭᒡᒐᖅᑐᐃᔩᑦ ᐅᐸᔅᓯᒪᓗᑎ ᐊᒻᒪ ᐅᖃᕈᓐᓇᕐᓗᑎ ᐊᒻᒪ ᓂᕈᐊᕐᓗᑎ ᑭᒡᒐᖅᑐᐃᓪᓗᑎ ᓄᓇᓕᒻᒥᐅᑕᓂᑦ.

ᑲᑎᒪᓂᖃᖅᑎᓪᓗᒋᑦ, ᑲᑎᒪᔩᑦ ᓇᓗᓇᐃᖅᓯᕙᑦᑐᑦ ᑐᔅᓯᕋᐅᑎᓂᑦ ᖃᐅᔨᒪᔭᐅᔪᑦ ᐱᖁᔨᕗᖔᕈᑏᑦ. ᑲᑎᒪᔩᑦ ᐅᖃᐅᓯᖃᓕᖅᐸᑦᑐᑦ ᐊᒻᒪ ᑲᑎᒪᔾᔪᑎᖃᖅᑐᑎ ᐊᑐᓂ ᐱᖁᔨᕗᖔᕈᑎᓂᑦ ᓂᕈᐊᓚᐅᖅᑎᓐᓇᒋᑦ. ᑲᑎᒪᔨᓕᒫᑦ ᐅᐸᔅᓯᒪᔭᕆᐊᓖᑦ ᓂᕈᐊᕐᓗᑎ ᑭᓯᐊᓂ ᓇᓗᓇᐃᖅᓯᓯᒪᒍᑎ ᐊᐳᕈᑎᖃᓂᕐᒧᑦ ᖑᓴᖁ ᐊᓂᑲᐃᓐᓇᕆᐊᓖᑦ ᑲᑎᒪᕕᒻᒥ. ᓂᕈᐊᕐᓂᐅᔪᑦ ᐊᔾᔨᒌᖑᑉᐸᑕ, ᐃᔅᓯᕙᐅᑕᖅ ᐃᓱᒪᓕᐅᕈᑎᒧᑦ ᓂᕈᐊᖅᑐᖅ. ᑲᑎᒪᔩᑦ ᑐᓂᓯᔭᕆᐊᓖᑦ ᓇᓗᓇᓂᖅᓴᓂᑦ ᐱᔾᔪᑕᐅᔪᓂᑦ, ᓲᕐᓗ ᒪᓕᒐᕋᓛᒥᑦ ᐊᓯᔾᔨᖅᑐᓂᑦ, ᐱᖓᓱᑦ ᐃᓛᒃᑰᖅᑐᑦ ᐅᖃᓕᒫᖅᑕᐅᓂᖏᓐᓄᑦ ᐊᔾᔨᒌᖏᑦᑐᓂᑦ ᑲᑎᒪᓂᐅᔪᓂᑦ. ᑖᓐᓇ ᐋᖅᑭᑦᑕᐅᓯᒪᓂᖓ ᑐᓂᓯᔪᑦ ᑲᑎᒪᔩᑦ ᕿᒥᕐᕈᒍᖅᑎᐊᕈᓐᓇᕐᓗᑎ ᐱᔾᔪᑕᐅᔪᒥᑦ ᐊᒻᒪ ᐃᓄᓐᓂᑦ ᑐᓴᖅᑎᑦᑎᒍᓇᖃᖅᑎᑦᑎᓗᑎ ᑲᑎᒪᔩᑦ ᑭᖑᓪᓕᖅᐹᒥ ᐃᓱᒪᓕᐅᓚᐅᖅᑎᓐᓇᒋᑦ.

ᐊᑐᖅᑕᐅᕙᑦᑐᖅ ᐱᖃᓯᐅᔾᔨᒻᒥᔪᖅ ᐱᒻᒪᕆᐅᔪᒥᑦ ᐊᑦᑕᓇᐃᖅᓯᒪᑎᑦᑎᓂᕐᒧᑦ ᑲᑎᒪᔩᑦ ᐊᐅᓚᓂᖃᐃᓐᓇᕈᓐᓇᕐᓗᑎ ᐊᔾᔨᐅᖏᑦᑐᓂᑦ ᐅᕝᕙᓘᓐᓃᑦ ᐱᒡᒐᓇᖅᑐᓂᑦ. ᐊᒥᓲᓗᐊᖅᑐᑦ ᑲᑎᒪᔩᑦ ᓄᖅᑲᕈᑎ, ᓈᒻᒪᖏᒍᓐᓇᖅᑐᑦ ᐃᓚᒋᔭᐅᖃᑕᐅᔪᑦ ᑲᑎᒪᓗᑎ ᓈᒻᒪᓐᓂᖃᖅᑐᓂᑦ. ᑖᓐᓇ ᐱᓕᕆᐊᕆᓗᒍ, ᓄᓇᕗᒻᒥ ᒪᓕᒐᓕᐅᕐᕕᒃ ᐊᖏᖅᓯᓚᐅᖅᑐᑦ ᒪᓕᒐᖅ 45 2024−ᒥᑦ, ᐋᖅᑭᒋᐊᖅᓯᔪᑦ ᓄᓇᓕᐸᐅᔭᐃᑦ, ᑕᐅᓐᔅ ᐊᒻᒪ ᕕᓕᔅ ᐱᖁᔭᖅ ᐊᒻᒪ ᕼᐊᒻᒪᓚᓄᑦ ᐱᖁᔭᖅ. ᒪᓕᒐᖅ 45 ᓇᓗᓇᐃᖅᓯᑎᐊᖅᑐᖅ ᑖᒃᑯᐊ ᑲᑎᒪᔩᑦ ᑐᖔᓃᑉᐸᑕ ᑲᑎᒪᔪᓐᓇᓂᕐᒧᑦ, ᐊᒥᐊᒃᑯᖏᑦ ᑲᑎᒪᔩᑦ ᑎᒃᑯᐊᖅᓯᔪᓐᓇᖅᑐᑦ ᓄᑖᓂᑦ ᑲᑎᒪᔨᓂᑦ ᐊᒻᒪ ᐅᑎᖅᑎᑕᐅᓗᑎ ᑲᑎᒪᔩᑦ ᓴᓐᖏᓂᖏᓐᓄᑦ. ᑖᓐᓇ ᒪᓕᑦᑕᐅᔭᕆᐊᓕᒃ ᓴᐳᒻᒥᑦᑎᔪᖅ ᑲᔪᓯᒍᓐᓇᕐᓂᖓᓄᑦ ᓄᓇᓕᒻᒥ ᒐᕙᒪᐅᔪᖅ; ᓇᓗᓇᐃᖅᓯᓪᓗᓂ ᓄᓇᓕᒋᔭᕗᑦ ᐊᐅᓚᓂᖃᐃᓐᓇᕐᓗᓂ ᑲᑎᒪᔨᓄᑦ.

ᓄᓇᓕᐸᐅᔭᖓᑦ ᐃᖃᓗᐃᑦ ᑲᔪᖏᖅᓯᒪᔪᑦ ᐊᐅᓚᑦᑎᓂᕐᒧᑦ ᐊᑐᖅᑕᐅᔪᒥᑦ ᓈᒻᒪᓐᓂᖃᖅᑐᒥᑦ, ᐅᒥᓲᓂᖅᓴᐃᓄᑦ ᐱᔭᐅᔪᒪᔪᓂᑦ, ᐊᒻᒪ ᑭᐅᓂᖃᕐᓗᑎ ᐱᔭᕆᐊᖃᖅᑕᖏᓐᓄᑦ ᓄᓇᓕᒻᒥᐅᑕᓄᑦ. ᑖᒃᑯᐊ ᐊᑐᖅᑕᐅᔭᕆᐊᓖᑦ, ᐃᓛᓐᓂᒃᑯᑦ ᐃᓕᓴᕆᔭᐅᓯᒪᒐᓗᐊᖅᑎᓗᒋᑦ, ᐃᑲᔪᖅᑐᑦ ᐃᓄᓐᓄᑦ ᐃᓱᒪᓕᐅᖅᑕᐅᔪᓂᑦ ᐃᑉᐱᒍᓱᓐᓂᖃᑦᑎᐊᕐᓗᑎ, ᑕᑯᔅᓴᐅᑎᐊᕐᓗᑎ, ᐊᒻᒪ ᒪᓕᒐᖅᑎᒎᖅᑐᓂᑦ.

###

ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:

ᔩᐅᑉ ᕙᕐᓂ
ᐊᖏᔪᖅᑳᖅ ᑐᓴᐅᒪᔪᓕᕆᔨᒃᑯᓐᓄᑦ ᐊᒻᒪ ᐊᑭᓕᕐᓱᐃᔨᓄᑦ ᐱᔨᖅᑎᕋᐅᑎ
ᓄᓇᓕᐸᐅᔭᐃᑦ ᐃᖃᓗᐃᑦ 867-979-5619 | G.Byrne@iqaluit.ca