ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᐃᓄᖕᓄᑦ ᑐᓴᕋᑦᓴᖅ
ᓄᓇᓕᐸᐅᔭᒃᑯᑦ ᐅᖃᐅᑎᑦᓴᖏᑦ ᐱᓪᓗᒋᑦ ᐆᒪᔪᓂᒃ ᐊᐅᓚᑦᓯᔾᔪᑎᐅᔪᑦ ᐊᒻᒪ ᓄᓇᓕᕐᒥᐅᑕᐃᑦ ᐊᑦᑕᓇᔾᔭᐃᕐᓯᒪᒋᐊᖃᕐᓂᖏᑦ
ᒪᐃ 22, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᓇᓗᓇᐃᕐᓯᒪᑲᓐᓂᓕᕐᒥᔪᑦ ᐱᓕᕆᐊᖃᕈᒪᕙᓐᓂᖏᓐᓄᑦ ᓄᓇᓕᕐᒥᐅᑕᐃᑦ ᐊᑦᑕᓇᖅᑐᒦᖁᓇᒋᑦ ᐊᒻᒪ ᐃᑉᐱᒍᓱᑦᓯᐊᓂᒃᑯᑦ ᐆᒪᔪᖁᑎᖃᕐᓂᕐᒥᒃ ᑭᐅᔾᔪᑎᒋᓪᓗᒋᑦ ᐃᓱᒫᓘᑎᖃᖅᑐᑦ ᐊᒥᓱᕈᖅᐸᓪᓕᐊᑐᐃᓐᓇᓕᕐᓂᖏᓐᓄᑦ ᐱᔾᔪᑎᖃᖅᑐᑎᒃ ᑕᒫᓂᖅᑭᕙᑦᑐᓂᒃ ᐆᒪᔪᖁᑎᐅᔪᓂᒃ ᓄᓇᓕᑦᑎᓐᓂ.
ᐊᖏᕐᕋᓂ ᐆᒪᔪᐃᑦ, ᐱᓗᐊᖅᑐᒥ ᕿᒻᒥᖁᑎᐅᕙᑦᑐᑦ, ᐊᑦᓱᑲᓪᓚᐅᔪᖅ ᑎᒍᒥᐊᖅᑎᐅᒻᒪᑕ ᐃᓕᖅᑯᓯᑎᒍᑦ ᐊᒻᒪ ᐃᒻᒥᒍᑦ ᐱᒻᒪᕆᒋᔭᐅᕙᑦᑐᑎᒃ ᐅᑭᐅᖅᑕᖅᑐᒥ. ᑭᓯᐊᓂᓕ, ᕿᒻᒦᑦ ᑕᒫᓂᖅᑭᑎᑕᐅᓗᐊᓕᕋᐃᒻᒪᑕ, ᐅᓗᕆᐊᓇᕐᓯᒍᓐᓇᐸᒻᒥᒻᒪᑕ ᐃᒻᒥᓄᑦ, ᓄᓇᓕᕐᒥᐅᑕᓄᑦ, ᐊᒻᒪ ᓂᐅᕐᕈᓯᒪᔪᓄᑦ ᓄᓇᑦᑎᓐᓄᑦ. ᓄᓇᕘᒥ ᓇᒥᑐᐃᓐᓇᖅ ᐊᒻᒪ ᐊᓯᖏᓐᓂ ᐅᑭᐅᖅᑕᖅᑐᒥ ᓄᓇᓕᓐᓂ, ᕿᒻᒦᑦ ᐱᔾᔪᑎᐅᓗᑎᒃ ᐱᕐᕈᓗᐊᕿᕙᓕᕐᒪᑕ ᐊᒥᓱᕈᖅᐸᓪᓕᐊᑐᐃᓐᓇᖅᑐᑎᒃ ᐊᕐᕌᒍᓂ ᐊᓂᒍᖅᐸᓪᓕᐊᔪᓂ. ᐊᑦᓱᑲᓪᓚᒃ ᐃᓚᖏᑦ ᐋᓐᓂᖅᑕᐅᕙᑦᑐᑎᒃ ᐊᒻᒪ ᐃᓚᖏᓐᓂ, ᑐᖂᑦᓯᓯᒪᔪᒻᒪᕆᐅᓗᑎᒃ ᐱᓯᒪᓕᕐᒪᑕ. ᑕᒪᒃᑯᐊ ᐊᑐᖅᑕᐅᓕᕋᐃᒻᒪᑕ ᓄᓇᓕᕐᒥᐅᑕᓂᒃ ᐊᑦᑐᐃᔪᒻᒪᕆᐅᕙᑦᑐᑦ ᐊᒻᒪ ᓇᓗᓇᐃᔭᐃᑎᐅᓕᖅᑐᑎᒃ ᐱᑕᖃᕆᐊᖃᓪᓚᕆᓕᕐᓂᖓᓄᑦ ᐱᕙᓪᓕᐅᑎᑦᓯᐊᖅᑐᓂᒃ ᐆᒪᔪᓂᒃ ᐊᐅᓚᑦᓯᔾᔪᑎᑦᓴᓂᒃ ᐊᒻᒪ ᐱᑦᑕᐃᓕᒪᑎᑦᓯᔾᔪᑎᒍᑦ ᐸᕐᓇᒍᑎᑦᓴᓂᒃ.
ᐱᓕᕆᔾᔪᑎᐅᒍᒪᓪᓗᑎᒃ ᑕᒪᒃᑯᐊ ᐅᓗᕆᐊᓇᓕᖅᑐᑦ ᐊᒻᒪ ᐱᐅᓯᑎᒋᐊᕈᑎᐅᒍᒪᓪᓗᑎᒃ ᑭᒃᑯᑐᐃᓐᓇᐃᑦ ᐊᑦᑕᓇᔾᔭᐃᒃᑯᑎᑦᓴᖏᓐᓂᒃ, ᓄᓇᓕᐸᐅᔭᒃᑯᑦ ᐃᖃᓗᓐᓂ ᓴᖅᑮᓕᓚᐅᖅᑐᑦ ᒪᓕᒐᕋᓛᕐᒥᒃ ᓈᓴᐅᑎᓕᒃ 1018, ᐊᓯᔾᔨᐅᑎᐅᔪᖅ ᐊᑐᖅᑕᐅᕙᑦᑐᑎᒃ ᐊᖏᕐᕋᒥ ᐆᒪᔪᖁᑎᓂᒃ ᐊᐅᓚᑦᓯᔾᔪᑎᐅᔪᒥᒃ ᒪᓕᒐᕋᓛᖅ ᓈᓴᐅᑎᓕᒃ 924. ᒪᓕᒐᕋᓛᖅ ᒪᕐᕈᐊᑎᖅᑐᓂ ᐅᖃᓕᒫᖅᑕᐅᓯᒪᓕᖅᑐᖅ, ᐱᖓᔪᐊᓂᒃ ᐊᒻᒪ ᑭᖑᓪᓕᖅᐹᖓᓂᒃ ᐅᖃᓕᒫᖅᑕᐅᔪᑦᓴᐅᓕᖅᑐᓂ ᔪᓂ 10, 2025.
ᐊᓯᔾᔨᖅᑕᐅᔪᒪᔪᓄᑦ ᐅᑯᐊ ᐱᖃᓯᐅᔾᔭᐅᔪᑦ:
- ᑎᒍᔭᐅᓯᒪᕙᓐᓂᖏᓐᓂᒃ ᖃᓄᑎᒋ ᐃᓚᓐᓇᐃᓗᑎᒃ ᑕᒫᓂᖅᑭᔪᕕᓂᕐᓄᑦ ᐆᒪᔪᓄᑦ 72 ᐃᑲᕐᕋᓂᒃ 24 ᐃᑲᕐᕋᓄᑦ, ᐱᓇᓱᐊᕈᓰᑦ ᓄᖕᖑᖏᓐᓂ ᐊᒻᒪ ᕿᑲᕐᓇᐅᓂᖏᓐᓂ ᐱᓯᒪᔭᐅᕙᓪᓗᑎᒃ 72 ᐃᑲᕐᕋᓄᑦ.
- ᒪᓕᒐᕋᓛᓕᕆᔨᒃᑯᑦ ᐃᓚᔭᐅᓗᑎᒃ ᐱᔪᓐᓇᐅᑎᖃᕐᓂᖏᑦ ᑎᒍᓯᔪᓐᓇᕐᓗᑎᒃ, ᐱᓯᒪᑦᓯᒍᓐᓇᕐᓗᑎᒃ, ᓅᑎᕆᔪᓐᓇᕐᓗᑎᒃ, ᐅᕝᕙᓘᓐᓃᑦ ᑐᖂᑦᓯᒍᓐᓇᕐᓗᑎᒃ ᐆᒪᔪᓂᒃ ᑭᓯᐊᓂ ᐱᓪᓗᐊᑕᒍᑦ, ᐊᓯᕐᕈᖅᕕᖃᕈᓐᓃᓂᖅᐸᑕ ᐊᔾᔨᐅᖏᑦᑐᓂᒃ ᐊᑐᓕᕐᓂᕈᑎᒃ.
- ᐊᑭᓕᕆᐊᓕᐅᔪᑦ ᖃᓄᐃᓕᔾᔪᑎᑦᓴᐅᔪᑦ ᐃᓚᔭᐅᓗᑎᒃ ᓚᐃᓴᖃᖏᓐᓂᖏᓐᓄᑦ ᐆᒪᔪᓄᑦ ᐅᕝᕙᓘᓐᓃᑦ ᑲᒪᒋᔭᐅᓕᖅᑭᖅᑖᕙᑦᑐᓄᑦ.
- ᓴᖕᖓᑎᒃᑲᓐᓂᕆᐊᕐᓗᒍ ᐆᒪᔪᖁᑎᓂᒃ ᓚᐃᓴᑖᕆᐊᖃᕐᓂᐅᔪᖅ. ᐊᑭᖃᖏᒻᒪᑕ ᐊᒻᒪ ᐊᑐᐃᓐᓇᐅᓯᐊᖅᑐᑎᒃ ᒪᓕᒐᕋᓛᓕᕆᔨᒃᑯᑦ ᐊᓪᓚᕝᕕᖓᓐᓂ (ᐃᓪᓗᖅ 1549).
ᒪᑐᐃᖓᑦᓯᐊᖁᓪᓗᒋᑦ ᐱᓕᕆᔾᔪᑎᖏᒍᑦ ᐊᒻᒪ ᐃᓗᓕᕆᕙᑦᑕᖏᓐᓂᒃ ᐱᓕᕆᐊᑦᓴᐃᑦ, ᐅᑯᐊ ᐆᒪᔪᓕᕆᔪᑦ ᐱᓕᕆᔾᔪᑎᐅᓯᒪᔪᑦ ᓈᓴᐅᑎᒍᑦ ᓇᓗᓇᐃᔭᖅᑕᐅᔪᑦ ᐊᕐᕌᒍᑦᑎᓐᓂ ᒫᓐᓇᒧᑦ (ᔮᓐᓄᐊᕆ 1-ᒥᓂᒃ ᒫᓐᓇᒧᑦ, 2025):
- ᑲᑎᑦᑐᒋᑦ ᐆᒪᔪᐃᑦ ᑎᒍᔭᐅᓯᒪᓕᖅᑐᑦ: 47
- ᑲᑎᑦᑐᒋᑦ ᐆᒪᔪᐃᑦ ᐅᑎᖅᑎᑕᐅᓯᒪᔪᑦ ᐃᓄᖏᓐᓄᑦ: 21
- ᑲᑎᑦᑐᒋᑦ ᐆᒪᔪᐃᑦ ᑎᒍᔭᐅᓯᒪᔪᑦ ᒫᓐᓇᒃᑯᑦ: 4
- ᑲᑎᑦᑐᒋᑦ ᐆᒪᔪᐃᑦ ᐱᑖᖑᓯᒪᔪᑦ ᓄᓇᓕᕐᒥᐅᑕᓄᑦ ᑎᒍᔭᐅᓯᒪᓚᐅᖅᑐᑎᒃ: 3
- ᑲᑎᑦᑐᒋᑦ ᐆᒪᔪᐃᑦ ᐊᓪᓚᐃᑦ ᓄᓇᖏᓐᓃᖅᑕᐅᓯᒪᔪᑦ ᓂᒋᕐᒥᐅᑕᓄᑦ: 3
- ᑲᑎᑦᑐᒋᑦ ᐆᒪᔪᐃᑦ ᑐᖁᑕᐅᓯᒪᔪᑦ (ᐱᖃᓯᐅᔾᔭᐅᓗᑎᒃ ᖃᓂᒪᔪᑦ ᐅᕝᕙᓘᓐᓃᑦ ᐋᓐᓂᕐᓯᒪᔪᑦ): 15
- ᑲᑎᑦᑐᒋᑦ ᐆᒪᔪᓂᒃ ᐱᑦᑎᐊᖏᓐᓂᖏᓐᓄᑦ ᐅᖃᐅᓯᐅᓯᒪᔪᑦ: 3
- ᑲᑎᑦᑐᒋᑦ ᕿᒻᒥᓄᑦ ᑮᔭᐅᓯᒪᔪᑦ/ᐹᔭᐅᓯᒪᔪᑦ ᐅᖃᐅᓯᐅᓯᒪᔪᑦ: 2
- ᑲᑎᑦᑐᒋᑦ ᐆᒪᔪᐃᑦ ᐊᐳᖅᑕᐅᓯᒪᔪᑦ ᐊᐅᓚᐅᑎᓕᓐᓄᑦ ᓄᓇᒃᑰᔫᓄᑦ: 1 (ᑐᖁᓪᓗᓂ)
- ᑲᑎᑦᑐᒋᑦ ᐆᒪᔪᓂᒃ ᑐᖁᖓᔪᓂᒃ ᐅᖃᐅᓯᖃᖅᑐᑎᒃ ᐅᖄᓚᓯᒪᔪᑦ: 8
- ᑲᑎᑦᑐᒋᑦ ᐊᖏᕐᕋᒥ ᐆᒪᔪᖁᑎᓂᒃ ᐊᐅᓚᑦᓯᔾᔪᑎᒍᑦ ᒪᓕᒐᕋᓛᑎᒍᑦ ᐊᑭᓖᖁᔨᔾᔪᑎᓂᒃ ᐱᑎᑕᐅᓯᒪᓕᖅᑐᑦ: 13
- ᑲᑎᑦᑐᒋᑦ ᕿᒻᒥᓂᒃ ᓂᕕᖓᑖᓂᒃ ᐱᓯᒪᓕᖅᑐᑦ 2025-ᒥ: 54
ᑕᒪᒃᑯᐊ ᓈᓴᐅᑏᑦ ᑕᑯᑦᓴᐅᑎᑦᓯᔪᑦ ᖃᓄᑎᒋ ᐊᑦᓱᕉᑎᖃᖅᐸᓐᓂᖏᓐᓄᑦ ᐊᒻᒪ ᖃᓄᐃᓕᖓᓂᖓᓄᑦ ᓯᕗᒧᐊᒍᑎᐅᕙᓪᓕᐊᓕᖅᑐᖅ. ᐊᒥᓲᓂᕐᓴᐃᑦ ᑎᒍᔭᐅᓯᒪᔪᑦ ᐆᒪᔪᐃᑦ ᐅᑎᖅᑎᑕᐅᑦᓯᐊᕐᓯᒪᔪᑦ ᐃᓄᖏᓐᓄᑦ, ᓇᓗᓇᐃᔭᐃᔾᔪᑎᐅᓕᖅᑐᑎᒃ ᖃᓄᑎᒋ ᐱᒻᒪᕆᐅᓂᖓᓄᑦ ᐆᒪᔪᐃᑦ ᓇᓗᓇᐃᒃᑯᑎᖃᑦᓯᐊᕆᐊᖃᕐᓂᖏᓐᓄᑦ ᐊᒻᒪ ᑭᒃᑯᑐᐃᓐᓇᐃᑦ ᑲᑐᔾᔨᖃᑎᒌᓐᓂᒃᑯᑦ ᐃᑲᔪᕆᐊᖃᖅᐸᓐᓂᖏᓐᓄᑦ. ᓄᓇᓕᐸᐅᔭᒃᑯᑦ ᐱᒋᐊᖅᑎᑦᓯᓚᐅᕐᒥᔪᑦ ᓄᓇᓕᕐᒥᐅᑕᓄᑦ ᐊᒻᒪ ᓄᓇᓕᐅᑉ ᓯᓚᑖᓂᕐᒥᐅᑕᓄᑦ ᐃᓚᖏᓐᓂᒃ ᐆᒪᔪᖁᑎᑖᖅᐸᓚᐅᖅᑐᑦ ᑕᕝᕘᓇ ᐆᒪᔪᖁᑎᒋᔭᐅᒃᑲᓐᓂᕈᓐᓇᕐᓯᕙᑦᑐᑎᒃ. 54-ᓂᒃ ᕿᒻᒥᓄᑦ ᐆᔭᒥᑦᓴᓂᒃ ᐱᑎᑦᓯᓯᒪᓕᖅᑐᒍᑦ ᒫᓐᓇᒧᑦ ᐊᕐᕌᒍᒥ, ᐃᑉᐱᒍᓱᑦᓯᐊᑉᐸᓕᖅᑐᑦ ᐆᒪᔪᖁᑎᖏᓐᓂᒃ ᑕᑯᑦᓴᐅᔪᖅ ᐊᒥᓱᕈᖅᐸᓪᓕᐊᓕᕐᓂᖏᓐᓄᑦ, ᐊᒻᒪ ᑕᒪᒃᑯᐊ ᖃᓄᖅᑑᕈᑎᐅᔪᑦ ᐊᑑᑎᖃᖅᑐᒻᒪᕆᐅᓂᐊᖅᑐᑦ ᐱᐅᓯᑎᑦᓯᒋᐊᕐᓂᒃᑯᑦ ᑕᒪᓐᓇ ᐱᓪᓗᒍ ᓄᓇᓕᐅᑉ ᐃᓗᐊ ᐊᑦᑕᓇᔾᔭᐃᕐᓯᒪᑦᓯᐊᕐᓂᖓᓄᑦ.
ᓄᓇᓕᐸᐅᔭᒃᑯᑦ ᓇᓗᓇᐃᕆᐊᑲᓂᖅᑐᑦ ᑐᖂᑦᓯᓂᐅᔪᖅ ᐆᒪᔪᓂᒃ ᑭᖑᓕᐹᓪᓚᕆᐅᓂᖓᓄᑦ ᐊᓯᖃᕈᓐᓃᖅᑐᓂᓗ. ᐊᑐᖅᑕᐅᕙᑦᑐᖅ ᑭᓯᐊᓂ ᐃᓘᓐᓇᑦᓯᐊᑎᒃ ᖃᓄᖅᑑᕈᑎᐅᔪᓐᓇᖅᑐᑦ ᐊᑐᖅᑕᐅᓯᒪᓕᖅᑎᓪᓗᒋᑦ ᐅᕝᕙᓘᓐᓃᑦ ᐱᖁᑎᑖᖅᑐᑦᓴᓂᒃ ᓇᓂᓯᔪᓐᓇᐃᓕᑦᓯᐊᕋᐃᒐᑦᑕ, ᐊᒻᒪ ᐅᓗᕆᐊᓇᖅᑐᖃᕐᓂᐅᓴᓕᕐᓂᕋᐃᒻᒪᑦ ᐃᓗᓯᓕᕆᓂᒃᑯᑦ ᐅᕝᕙᓘᓐᓃᑦ ᐊᑦᑕᓇᔾᔭᐃᕐᓯᒪᒋᐊᖃᕐᓂᒃᑯᑦ. ᓄᓇᓕᐸᐅᔭᒃᑯᑦ ᓱᓕ ᐊᑐᕈᒪᑦᓯᐊᑐᐃᓐᓇᖅᑐᑦ ᐱᓕᕆᔾᔪᑎᒍᑦ ᖃᓄᐃᖏᓯᐊᖅᑐᓂᒃ, ᐃᓕᖅᑯᓯᓕᕆᔾᔪᑎᒍᑦ ᑐᓴᐅᒪᑎᑕᐅᔪᓂᒃ ᐆᒪᔪᓕᕆᔾᔪᑎᓂᒃ ᐊᒻᒪ ᑕᐃᒪᖕᖓᓕᒫᖅ ᕿᓃᓐᓇᐅᔭᕐᒪᑕ ᑲᑐᔾᔨᖃᑎᑦᓴᓂᒃ ᐆᒪᔪᓕᕆᔨᓂᒃ ᑲᑐᔾᔨᖃᑎᒌᖑᔪᓂᒃ.
ᓄᓇᓕᕐᒥᐅᑕᐃᑦ ᐃᑲᔪᕐᓱᐃᔪᓐᓇᖅᑐᑦ ᐅᑯᐊ ᐊᑐᖅᐸᓪᓗᒋᑦ:
- ᐊᖏᕐᕋᒥ ᐆᒪᔪᖁᑎᓂᒃ ᐱᑐᑦᓯᓯᒪᑦᓯᐊᐸᓪᓗᑕ ᐊᒻᒪ ᑭᒃᑯᑐᐃᓐᓇᐃᑦ ᐊᑯᓐᓂᖏᓐᓃᖃᑎᒋᓪᓗᒋᑦ ᐊᐅᓚᑦᓯᐊᐸᓪᓗᓯ.
- ᖃᐅᑕᒫᖅ ᖃᐅᔨᓴᖅᐸᓪᓗᒋᑦ ᐃᓪᓗᑦᑕ ᓯᓚᑎᖏᑦ, ᒪᑐᖃᖅᑎᑕᐅᔪᑦ ᐃᓯᕐᕖᑦ/ᐊᓂᕖᑦ, ᐊᒻᒪ ᐱᑑᑕᖏᑦ ᐊᑦᓱᖏᑦᓯᐊᕐᓯᒪᒐᓗᐊᕐᒪᖔᑕ ᖃᐅᔨᓴᖅᐸᓪᓗᑕ ᐲᖁᓇᒋᑦ.
- ᐊᑯᓂᐅᓗᐊᖅᑐᖅ ᕿᒻᒥᓂᒃ ᐱᑐᑦᓯᓯᒪᕙᖏᓪᓗᑕ ᐃᑉᐱᒋᔫᒥᕙᓪᓗᒋᓪᓗ.
- ᑕᒫᓂᖅᑭᔪᑦ ᐅᕝᕙᓘᓐᓃᑦ ᐃᕐᓯᓇᖅᑐᑦ ᐆᒪᔪᐃᑦ ᐅᖃᐅᓯᐅᒍᓐᓇᖅᑐᑦ ᐅᖄᓚᐅᑎᒃᑯᑦ ᐅᕗᖓ 867-979-5650 ᐃᖅᑲᓇᐃᔭᕐᓇᐅᓂᖓᓂ.
ᖁᔭᓐᓇᒦᖑᕗᓯ ᐃᑲᔪᕐᓱᐃᔾᔪᑎᑦᓯᓐᓂᒃ ᑐᕌᒐᖃᑕᐅᓗᓯ ᐅᕙᑦᑎᓐᓄᑦ ᐊᑦᑕᓇᔾᔭᐃᕐᓯᒪᑦᓯᐊᖅᑐᒥᒃ, ᓄᓇᓕᖃᑎᑦᑎᓐᓂᒃ ᐃᑉᐱᒋᖃᑦᑕᐅᑎᕙᓐᓂᕐᒥᒃ, ᐊᒻᒪ ᐱᓕᕆᐊᖃᕈᒪᕙᓐᓂᕐᒥᒃ ᓄᓇᓕᖃᖁᔨᓂᒃᑯᑦ ᐃᓘᓐᓇᑎᓐᓄᑦ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᐅᓇ ᖃᐅᔨᒋᐊᕐᓗᒍ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | G.Byrne@iqaluit.ca
