ᓄᓇᓕᐸᐅᔭᐃᑦ ᐃᖃᓗᐃᑦ ᒪᑐᐃᕐᓯᔪᑦ ᖃᕋᑕᐅᔭᒃᑯᑦ ᑐᐊᕕᕐᓇᖅᑐᓂᑦ ᐊᐅᓚᑦᑎᕕᒻᒥᑦ

ᓄᓇᓕᐸᐅᔭᐃᑦ ᐃᖃᓗᐃᑦ ᒪᑐᐃᕐᓯᔪᑦ ᖃᕋᑕᐅᔭᒃᑯᑦ ᑐᐊᕕᕐᓇᖅᑐᓂᑦ ᐊᐅᓚᑦᑎᕕᒻᒥᑦ

ᒪᐃ 5-ᖑᑎᓪᓗᒍ ᐅᓪᓛᒃᑯᑦ 10-ᒨᖅᑎᓪᓗᒍ, ᓄᓇᓕᐸᐅᔭᒃᑯᑦ ᒪᑐᐃᕐᓯᓚᐅᖅᑐᑦ ᖃᕋᑕᐅᔭᒃᑯᑦ ᑐᐊᕕᕐᓇᖅᑐᓂᑦ ᐊᐅᓚᑦᑎᕕᑦᓴᒥᑦ ᐱᓕᕆᕝᕕᐅᓂᐊᖅᑐᒥᑦ ᐱᔾᔪᑎᐅᓗᓂ ᓄᓇᓕᓐᓂ ᓯᐊᒻᒪᐸᓪᓕᐊᔪᖅ ᓄᕙᕐᔪᐊᕐᓇᖅ-19 ᐃᖃᓗᓐᓂ.

ᐃᖃᓗᐃᑦ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᓇᓗᓇᐃᕐᓯᓚᐅᕐᒪᑕ ᑐᐊᕕᕐᓇᖅᑐᒦᓕᕐᓂᕐᒥᓂᒃ ᐱᔾᔪᑎᒋᓪᓗᒍ ᓄᕙᕐᔪᐊᕐᓇᖅ-19 ᐱᒋᐊᖅᑐᑎᒃ 12-ᒥ ᐅᓐᓄᒃᑯᑦ ᓇᒡᒋᔾᔭᐅᓕᖅᑭᐅᑎᓪᓗᒍ, ᒪᐃ 4, 2021. ᐊᑐᖁᔨᔾᔪᑎᐅᔪᖅ ᐊᑐᖅᑕᐅᓂᐊᖅᑐᖅ ᒪᐃ 11-ᒧᓄᑦ, 2021.

ᐅᑯᐊ ᖃᓄᐃᓕᐅᕈᑎᐅᓂᐊᖅᑐᑦ ᓇᓗᓇᐃᔭᖅᑕᐅᓯᒪᔪᑦ ᐱᓕᕆᔨᖏᓐᓄᑦ ᐊᐅᓚᑦᑎᕕᐅᑉ:

ᐃ. ᓄᓇᕗᑦ ᒐᕙᒪᒃᑯᖏᑕ ᑐᓴᕋᑦᓴᖏᑦ ᐅᖃᐅᓯᕆᒋᐊᓚᐸᓪᓗᒋᑦ ᓄᕙᕐᔪᐊᕐᓇᖅ-19 ᐱᓪᓗᒍ ᐊᒻᒪ ᑐᓴᐅᒪᑎᑦᑎᓕᕆᔾᔪᑎᒥᑦ ᐱᓕᕆᔾᔪᑎᓕᐅᕐᓗᑎᒃ ᐅᖃᐅᓯᐅᖃᑦᑕᖁᓪᓗᒋᑦ ᐊᓯᔾᔨᐅᑎᐅᕙᓪᓕᐊᔪᑦ ᐊᑐᖅᑕᐅᕙᑦᑐᓂᑦ;

ᐱ. ᐃᑲᔪᕐᓱᐸᓪᓗᒋᑦ ᓄᓇᓕᓐᓂ ᑲᑐᔾᔨᖃᑎᒌᕈᓘᔭᐃᑦ ᐅᖓᑖᓄᑦ ᐊᑐᖅᑕᐅᕙᑦᑐᑦ ᐃᑲᔪᕐᓱᐃᔾᔪᑎᐅᔪᑦ ᐱᔨᑦᓯᕋᐅᑎᖃᖅᐸᑦᑐᓂᑦ ᐊᑦᑕᓇᖅᑐᒦᓗᐊᕐᓂᖏᓐᓂᑦ ᓄᓇᓕᕐᒥᐅᑕᐅᔪᓂᑦ;

ᑎ. ᐱᓕᕆᖃᑎᒋᓗᒋᑦ ᑲᓇᑕᒥ ᐃᑲᔪᖅᑏᑦ ᐊᐅᐸᖅᑐᒥᑦ ᑲᓚᐃᖕᖑᐊᓖᑦ ᐃᑲᔪᕐᓂᐊᖁᓪᓗᒋᑦ ᐃᖅᑲᓇᐃᔭᕐᕕᓐᓂᑦ ᖃᐅᔨᓴᐅᑎᒍᑦ, ᐅᖅᑯᐃᕕᓐᓂ ᐃᖅᑲᓇᐃᔭᖅᑎᓂᑦ, ᐊᒻᒪ ᐃᓱᒪᓕᕆᔪᓂᑦ ᐃᑲᔪᖅᑎᓂᑦ;

ᑭ. ᐱᓕᕆᖃᑎᒋᕙᓪᓗᒋᑦ ᓄᕙᕐᔪᐊᕐᓇᖅ-19 ᐱᓪᓗᒍ ᒪᓕᒐᕐᓂᑦ ᒪᓕᑦᑎᑦᑎᓇᓱᐊᖅᑏᑦ ᐱᓕᕆᔨᐅᔪᑦ ᐊᒻᒪ ᑕᕝᕙᓴᐃᓐᓇᖅ ᐱᓕᕆᔾᔪᑎᒍᑦ ᐃᑲᔪᕐᓱᕐᓗᒋᑦ ᐊᑐᖅᑎᑦᑎᓇᓱᐊᕐᓂᒃᑯᑦ ᑭᒃᑯᑐᐃᓐᓇᐃᑦ ᐱᓪᓗᒍ ᐃᓗᓯᓕᕆᔾᔪᑎᒍ ᒪᓕᒐᕐᔪᐊᕐᔪᐊᕐᒥᑦ;

ᒋ. ᑎᓕᐅᕋᐃᓗᑎᒃ ᐃᖅᑲᓇᐃᔭᖅᑎᓂᑦ ᐱᓕᕆᐊᖃᖁᓗᒋᑦ ᐊᒻᒪ ᐃᑲᔪᕐᓱᐃᖁᓗᒋᑦ ᓄᓇᓕᓐᓂ ᐱᓕᕆᐊᑦᓴᓂᑦ ᐊᔪᕐᓇᖏᓐᓂᖏᒍᑦ ᐊᒻᒪ ᐊᑐᖅᑕᐅᒋᐊᖃᕐᓂᖏᒍᑦ;

ᒥ. ᐱᖃᑕᐅᓗᑎᒃ ᐊᑑᑎᓕᓐᓂᑦ ᐱᓕᕆᕝᕕᓐᓂᑦ ᖃᐅᔨᓴᕐᓂᒃᑯᑦ;

ᓂ. ᐱᓕᕆᖃᑎᒋᓗᒋᑦ ᑭᐅᐊᐃᐊᐃᒃᑯᑦ ᑐᑭᒧᐊᑦᑎᑦᑎᖃᑎᒋᕙᓪᓗᒋᑦ ᐱᓕᕆᔾᔪᑎᒍᑦ ᖃᓄᖅᑑᕈᑎᓂᑦ;

ᓯ. ᓇᓗᓇᐃᔭᐃᓗᑎᒃ ᐊᒻᒪ ᑎᒃᑯᐊᕆᓗᑎᒃ ᑭᒃᑯᑐᐃᓐᓇᕐᓄᑦ ᐊᒻᒪ ᓇᖕᒥᓂᕆᔭᐅᔪᓂᑦ ᐱᖁᑎᒋᔭᓂᑦ (ᐱᓕᕆᕝᕕᓐᓂᑦ); ᐊᒻᒪ

ᓕ. ᑎᑭᓴᐃᓗᑎᒃ ᑮᓇᕐᓄᑦ ᒪᑐᐊᕐᓂᒃ ᐱᓗᐊᖅᑐᒥ ᓱᕈᑦᓯᓄᑦ ᐊᒻᒪ ᒪᒃᑯᑦᑐᓄᑦ ᑐᓂᐅᖅᑲᖅᑕᐅᔪᑦᓴᓂᑦ.

ᓄᓇᓕᐸᐅᔭᐃᑦ ᐃᖃᓗᐃᑦ ᐱᓕᕆᖃᑎᖃᐃᓐᓇᓯᐊᖅᑐᑦ ᓄᓇᕗᑦ ᒐᕙᒪᒃᑯᖏᑕ ᐋᓐᓂᐊᓇᖕᖏᑦᑐᓕᕆᔨᖏᓐᓂᑦ ᖃᐅᔨᓴᐃᓐᓇᓂᒃᑯᑦ ᐊᒻᒪ ᐱᓕᕆᔾᔪᑎᒍᑦ ᑭᖕᖒᒪᔭᐅᓕᕋᐃᒐᒥᒃ ᐱᔾᔪᑎᒋᓪᓗᒍ ᓄᕙᕐᔪᐊᕐᓇᖅ-19. ᓄᓇᓕᕐᒥᐅᑕᐃᑦ ᐊᖏᔪᖅᑳᖓᑕ ᐋᓐᓂᐊᓇᖕᖏᑦᑐᓕᕆᔨᒃᑯᑦ ᐊᑐᖅᑕᐅᖁᔭᖏᓐᓂᑦ ᐊᑐᖃᑦᑕᖁᔭᐅᕗᑦ ᐱᒻᒪᕆᐅᒻᒪᑦ ᐊᒻᒪ ᒪᓕᑉᐸᓪᓗᑎᒃ ᐃᓘᓐᓇᑦᑎᐊᖏᓐᓂᑦ ᑭᒃᑯᑐᐃᓐᓇᑦᑎᐊᓄᑦ ᐃᓗᓯᓕᕆᔾᔪᑎᐅᔪᓂᑦ ᐊᑐᖅᑕᐅᖁᔭᐅᕙᑦᑐᓂᑦ.

ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖏᓐᓂᑦ ᑐᓴᕋᑦᓴᓂᑦ ᑕᑯᔪᒪᔪᑦ ᐱᔾᔪᑎᒋᓪᓗᒍ ᑐᐊᕕᕐᓇᖅᑐᒦᒍᑎᐅᔪᖅ: https://www.iqaluit.ca/news/iqaluit-declares-state-emergency

ᓄᓇᕗᑦ ᓄᕙᕐᔪᐊᕐᓇᖅ-19 ᐱᓪᓗᒍ ᑐᓴᕋᑦᓴᐃᑦ: https://www.gov.nu.ca/health/information/covid-19-novel-coronavirus

ᑭᒃᑯᑐᐃᓐᓇᕐᓄᑦ ᐃᓗᓯᓕᕆᔾᔪᑎᐅᔪᑦ ᐱᓕᕆᔾᔪᑏᑦ ᐃᖃᓗᓐᓄᑦ ᑎᑭᑦᑐᒍ ᐃᐳᓗ 15, 2021: https://www.gov.nu.ca/sites/default/files/public_health_measures_for_iqa...

 

ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ: 

ᓖᓴ ᒥᓗᓵᕝᔨᕕᒃ 

ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓂᑦ ᐊᐅᓚᑦᑎᔨ ᓄᓇᓕᐸᐅᔭᐃᑦ ᐃᖃᓗᐃᑦ 

L.Milosavljevic@iqaluit.ca 

867-979-5607