ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᐱᕙᓪᓕᐊᔪᓂᑦ ᑐᓴᕋᑦᓴᑦ
ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖓᑦ ᐱᑎᑕᐅᓛᖅᑐᑦ $5 ᒥᓕᐊᓂᑦ ᒐᕙᒪᒃᑯᖏᓐᓂᑦ ᑲᓇᑕᐅᑉ ᑐᐊᕕᕐᓂᒃᑯᑦ ᐃᓪᓗᓕᐅᕈᑎᑦᓴᓂᑦ ᐱᒋᐊᖅᑎᑕᐅᓯᒪᔪᒥᑦ ᓄᑖᓂᑦ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ
ᐋᒐᓯ 4, 2021 - ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖓᑦ ᐱᑎᑕᐅᓛᖅᑐᑦ $5 ᒥᓕᐊᓂᑦ ᑮᓇᐅᔭᓂᑦ ᒐᕙᒪᒃᑯᖏᓐᓂᑦ ᑲᓇᑕᐅᑉ ᐊᖅᑯᑎᒋᓗᒋᑦ ᓄᓇᓕᐸᐅᔭᓄᑦ ᑐᐊᕕᕐᓂᒃᑯᑦ ᐃᓪᓗᓕᐅᕈᑎᑦᓴᓂᑦ ᐱᒋᐊᖅᑎᑕᐅᓯᒪᔪᒥᑦ ᑲᓇᑕᒥ ᐃᓪᓗᑖᕈᑎᑦᓴᓂᑦ ᐊᑐᖅᑐᐊᑎᑦᑎᔨᓂᑦ ᐊᒻᒪ ᐃᓪᓗᓕᕆᓂᕐᒥᑦ ᑯᐊᐳᕇᓴᒃᑯᖏᓐᓂᑦ. ᑖᒃᑯᐊ ᓄᑖᑦ ᑮᓇᐅᔭᐃᑦ ᓴᓇᔾᔪᑎᐅᔪᓐᓇᕋᔭᖅᑐᑦ 9-ᓂᑦ ᓄᑖᓂᑦ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᐃᓪᓗᑦᓴᓂᑦ ᐃᖃᓗᓐᓂ.
ᐃᑉᐸᑦᓴᖅ, ᒪᐃᔭᐅᑉ ᑐᓪᓕᐊ ᔮᓇᑦ ᐳᕉᔅᑐ ᐃᓚᒋᔭᐅᖅᑲᐅᔪᖅ ᐅᖃᐅᓯᐅᑎᓪᓗᒋᑦ ᒪᓕᒐᓕᐅᖅᑎᒻᒪᕆᒻᒧᑦ ᐋᒪᑦ ᕼᐊᓴᓐ, ᒥᓂᔅᑕᐅᔪᖅ ᐃᓚᒌᓄᑦ, ᓱᕈᓯᕐᓄᑦ ᐊᒻᒪ ᐃᓄᓕᕆᓂᒃᑯᑦ ᐱᕙᓪᓕᐊᑎᑦᑎᓂᕐᒥᑦ ᐊᒻᒪ ᒥᓂᔅᑕᐅᔪᖅ ᐃᑉᐱᒍᓱᑦᑎᐅᓗᓂ ᑲᓇᑕᒥ ᐃᓪᓗᑖᕈᑎᑦᓴᓂᑦ ᐊᑐᖅᑐᐊᑎᑦᑎᔨᓂᑦ ᐊᒻᒪ ᐃᓪᓗᓕᕆᓂᕐᒥᑦ ᑯᐊᐳᕇᓴᒃᑯᖏᓐᓂᑦ, ᒪᓕᒐᓕᐅᖅᑎ ᐃᓕᓴᐱ ᓯᐅᑎᐊᐱᒃ, ᒐᕙᒪᓕᕆᕕᒻᒥ ᓯᕗᓕᖅᑎ, ᒥᓂᔅᑕ ᐃᓚᒌᓂᑦ ᐱᔨᑦᓯᕋᐅᑎᓕᕆᓂᕐᒥᑦ, ᒥᓂᔅᑕ ᐃᑉᐱᒍᓱᑦᑎᐅᓗᓂ ᖃᓄᐃᓕᖓᓕᕐᓂᖏᓐᓂᑦ ᐊᕐᓇᐃᑦ, ᒥᓂᔅᑕ ᐃᑉᐱᒍᓱᑦᑎᐅᓗᓂ ᐊᖏᕐᕋᖃᖕᖏᑦᑐᓕᕆᓂᕐᒥᑦ, ᒥᓂᔅᑕ ᐃᑉᐱᒍᓱᑦᑎᐅᓗᓂ ᐊᓯᖏᓐᓂᑦ ᓄᓇᓕᓐᓃᖔᖅᐸᑦᑐᓂᑦ ᐊᒻᒪ ᒥᓂᔅᑕ ᐃᑉᐱᒍᓱᑦᑎᐅᓗᓂ ᐊᔪᕐᓴᓂᕐᒥᑦ ᒥᑭᓪᓕᑎᕆᓇᓱᐊᕐᓂᕐᒥᑦ.
ᓄᓇᓕᐸᐅᔭᐃᑦ ᐱᒋᐊᕐᓯᒪᓕᖅᑐᑦ ᐱᓕᕆᖃᑎᖃᕐᓂᕐᒥᑦ ᓄᓇᓕᓐᓂ ᑲᑐᔾᔨᖃᑎᑦᓴᒥᓂᒃ ᐊᒻᒪ ᐱᓕᕆᖃᑎᒌᓛᖅᑐᑎᒃ ᐱᔭᕇᕋᓱᓐᓂᕐᒥᑦ ᐱᓕᕆᐊᑦᓴᒥᑦ ᐊᑐᐃᓐᓇᐅᒋᐊᓕᒻᒥᑦ ᐋᒐᓯ 31, 2021 ᖃᐅᔨᓴᖅᑕᐅᔪᑦᓴᐅᓗᓂ ᐊᒻᒪ ᑲᔪᓯᑎᑕᐅᓗᓂ ᑲᓇᑕᒥ ᐃᓪᓗᑖᕈᑎᑦᓴᓂᑦ ᐊᑐᖅᑐᐊᑎᑦᑎᔨᓂᑦ ᐊᒻᒪ ᐃᓪᓗᓕᕆᓂᕐᒥᑦ ᑯᐊᐳᕇᓴᒃᑯᖏᓐᓂᑦ. ᑲᔪᓯᑎᑕᐅᒍᓂ, ᐱᓕᕆᐊᑦᓴᓕᕆᒋᐊᕋᔭᖅᑐᑦ ᑏᓰᐱᕆ 31, 2021.
ᑮᓇᐅᔭᖃᖅᑎᑦᑎᔨᐅᔪᑦ ᐊᑐᖅᑕᐅᖁᔭᖏᓐᓂᑦ ᐊᑐᕐᓂᐊᕈᑎᒃ, ᐱᓕᕆᐊᑦᓴᑎᒍᑦ ᐃᓪᓗᓕᐊᖑᓂᐊᖅᑐᑦ ᐃᓄᖃᕆᐊᖃᖅᑎᑕᐅᓯᒪᔪᑦ ᐃᓗᖏᓐᓂ 18 ᑕᖅᑮᑦ ᐅᓪᓗᕐᓯᐅᑎᒍᑦ ᐱᒋᐊᓕᑦᓴᖅ ᐱᒋᐊᕐᕕᖓᓂᑦ ᐅᓪᓗᖓᓂᑦ ᐱᒋᐊᕐᓯᒪᔪᓂᑦ.
“ᑲᓇᑕᒥ ᐃᓪᓗᑖᕈᑎᑦᓴᓂᑦ ᐊᑐᖅᑐᐊᑎᑦᑎᔨᓂᑦ ᐊᒻᒪ ᐃᓪᓗᓕᕆᓂᕐᒥᑦ ᑯᐊᐳᕇᓴᒃᑯᖏᓐᓂᑦ ᐃᓪᓗᓕᐅᕈᑎᑦᓴᐃᑦ ᑮᓇᐅᔭᐃᑦ $5 ᒥᓕᐊᓐᖑᔪᑦ ᐊᖏᓂᕐᓴᓂᑦ ᓴᖅᑮᓂᐊᖅᑐᑦ ᐃᑲᔫᑎᑐᐃᓐᓇᐅᖏᑦᑐᓂᑦ 9-ᓂᑦ ᓄᑖᓂᑦ ᓇᔪᒐᑦᓴᓂᑦ ᐃᖃᓗᓐᓂ,” ᐅᖃᖅᑐᖅ ᒪᐃᔭ ᐱᐅᓪ. “ᑖᓐᓇ ᐃᓪᓗᓕᕆᓂᒃᑯᑦ ᐱᓕᕆᐊᑦᓴᐅᓂᐊᖅᑐᖅ ᓱᕋᐃᔾᔪᑎᐅᓂᐊᖅᑐᖅ ᐃᓗᖏᓐᓂ ᒐᕙᒪᓕᕆᔨᐅᔪᑦ ᐊᕝᕕᐊᕈᑎᐅᔪᓐᓇᖅᑐᓂᑦ ᐊᒻᒪ ᓇᓗᓇᐃᔭᐃᔾᔪᑎᐅᓗᓂ ᑲᑐᔾᔨᖃᑎᒌᓐᓂᒃᑯᑦ ᐱᓕᕆᐊᑦᓴᐅᔪᖅ ᐆᑦᑑᑎᐅᔪᓐᓇᑦᑎᐊᕋᔭᕐᒪᑦ ᐋᖅᑭᒍᑎᑦᓴᓕᐅᕐᓂᒃᑯᑦ ᐃᓪᓗᓕᕆᓂᒃᑯᑦ ᐊᑐᖅᑕᐅᔪᒥᑦ ᓄᓇᕗᒻᒥ. ᑭᓯᐊᓂ ᑲᑐᔾᔨᖃᑎᒌᓐᓂᒃᑯᑦ ᐱᓕᕆᖃᑎᒌᑉᐸᓪᓗᑕ ᐊᒻᒪ ᐱᒋᐊᖅᑎᑦᑎᕙᓪᓗᑕ ᓄᓇᓕᓐᓂ ᐋᖅᑭᒍᑎᐅᔪᓂᑦ ᐋᖅᑮᔪᓐᓇᕐᓂᐊᖅᑐᒍᑦ ᐃᓪᓗᓕᕆᓂᒃᑯᑦ ᐊᑐᖅᑕᐅᔪᒥᑦ.”
“ᐱᔪᓐᓇᐅᑎᐅᔪᖅ ᐃᓪᓗᖃᕆᐊᖃᕐᓂᒃᑯᑦ ᐊᑐᖅᑐᒻᒪᕆᐅᔪᖅ ᐃᓗᓯᓕᕆᓂᒃᑯᑦ, ᐊᑦᑕᓇᑦᑕᐃᓕᒪᔪᓕᕆᓂᒃᑯᑦ ᐊᒻᒪ ᖃᓄᐃᒋᐊᖃᖕᖏᓂᒃᑯᑦ ᐃᖃᓗᒻᒥᐅᑎᒍᑦ,” ᐅᖅᑲᖅᑐᖅ ᒪᐃᔭᐅᑉ ᑐᓪᓕᐊ ᐳᕉᔅᑐ. “ᑕᒪᒃᑯᐊ ᖃᓄᖅᑑᕈᑎᐅᕙᑦᑐᑦ ᐊᓪᓗᕆᐊᕈᑎᑦᑎᐊᕙᐅᕗᑦ ᐊᑯᓂᐅᔪᒥᑦ ᒪᑭᒪᔾᔪᑎᑦᓴᒃᑯᑦ ᐋᖅᑯᒍᑎᑦᓴᐅᓗᑎᒃ ᐊᒻᒪ ᑐᑭᓕᐊᖃᑎᖃᑦᑎᐊᖅᑐᑎᓪᓗ ᐱᓕᕆᐊᖑᐃᓐᓇᖅᑐᓄᑦ ᓄᓇᓕᐸᐅᔭᒃᑯᑦ ᐱᓕᕆᔨᖏᑕ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᐃᓪᓗᓕᕆᔾᔪᑎᖏᓐᓂᑦ.”
ᒪᐃᔭ ᐱᐅᓪ ᐱᒋᐊᖅᑎᑦᑎᓚᐅᕐᓯᒪᔪᖅ ᒪᐃᔭᐅᑉ ᐱᓕᕆᔨᖏᓐᓂᑦ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᐃᓪᓗᓕᕆᓂᕐᒥᑦ ᔪᓂ 1, 2020 ᓇᓗᓇᐃᔭᖁᓪᓗᒋᑦ ᐊᒻᒪ ᐊᐅᓚᔾᔭᐃᒋᐊᖁᓪᓗᒋᑦ ᐊᖏᓪᓕᕚᓪᓕᕈᑎᐅᔪᓐᓇᖅᑐᓂᑦ ᖃᓄᐃᑦᑑᓂᖏᓐᓂᑦ ᐃᓪᓗᓕᕆᓂᒃᑯᑦ ᓇᓖᕌᕈᑎᑦᓴᐅᔪᓐᓇᖅᑐᑦ, ᓱᓇᒃᑯᑖᖃᖅᑎᑦᑎᔪᓐᓇᖅᑐᑦ ᐊᒻᒪ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᓄᓇᓕᐸᐅᔭᐃᑦ ᐃᖃᓗᓐᓂ. ᓄᓇᓕᐸᐅᔭᒃᑯᑦ ᐊᒻᒪ ᒪᐃᔭᐃᑉ ᐱᓕᕆᔨᖏᑦ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᐃᓪᓗᓕᕆᓂᕐᒥᑦ ᑲᔪᓯᔾᔪᑎᖃᕈᒪᑦᑎᐊᑐᐃᓐᓇᖅᑐᑦ ᐱᓕᕆᐊᖑᔪᓂᑦ ᑲᑐᔾᔨᖃᑎᒌᑦᑐᓄᑦ ᓇᓗᓇᐃᔭᐃᓂᒃᑯᑦ ᐊᒻᒪ ᐊᐅᓚᔾᔭᐃᒋᐊᖅᑎᑦᑎᓂᒃᑯᑦ ᐃᓚᒋᐊᕈᑎᐅᓂᐊᖅᑐᓂᑦ ᖃᓄᐃᑦᑑᓂᖏᓐᓂᑦ ᐃᓪᓗᓕᕆᓂᒃᑯᑦ ᓇᓖᕌᕈᑎᑦᓴᐅᔪᓐᓇᖅᑐᑦ, ᓱᓇᒃᑯᑖᖃᖅᑎᑦᑎᔪᓐᓇᖅᑐᑦ ᐊᒻᒪ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᓄᓇᓕᖃᕈᒪᓂᐊᕐᓗᓂ ᓄᓇᓕᐸᐅᔭᐃᑦ ᐃᖃᓗᓐᓂ.
ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᐊᒻᒪ ᐃᖅᑲᓇᐃᔭᖅᑎᖏᑦ ᖁᔭᓐᓇᒦᖅᑐᑦ ᒐᕙᒪᒃᑯᖏᓐᓂᑦ ᑲᓇᑕᐅᑉ ᐃᓕᑕᕐᓯᔪᓐᓇᕐᓂᖏᓐᓂᑦ ᐃᖃᓗᓐᓂ ᓇᓖᕌᕈᑎᖃᖏᓐᓂᖏᓐᓂᑦ ᐃᑲᔪᕐᓱᐃᔾᔪᑎᑦᓴᐅᔪᓐᓇᖅᑐᓂᑦ ᑭᒃᑯᑐᐃᓐᓇᕐᓂᑦ ᐊᑐᖅᐸᑦᑐᓂᑦ ᐊᒻᒪ ᐊᑐᑐᐃᓐᓇᕆᐊᓕᓐᓂᑦ ᐊᖏᕐᕋᖃᖏᓂᕐᒥᑦ, ᓇᔪᒐᕐᓂ ᐃᓄᒋᐊᓗᐊᕐᓂᕐᒥᑦ ᐊᒻᒪ ᐃᓪᓗᖃᖏᓂᒃᑯᑦ ᐊᑐᖅᑕᐅᕙᑦᑐᒥᑦ ᐱᓕᐅᒥᑎᑕᐅᓯᒪᔪᓂᑦ ᓄᕙᕐᔪᐊᕐᓇᖅ ᑰᕕᑦ-19-ᒧᑦ. ᐃᑲᔪᕐᓱᐃᔾᔪᑎᐅᔪᑦ ᐃᓪᓗᖃᕆᐊᖃᕐᓂᕐᒥᑦ ᐱᒋᐊᖅᑎᑕᐅᓯᒪᔪᒃᑯᑦ ᑮᓇᐅᔭᐃᑦ ᐃᓚᒋᐊᕈᑎᐅᔪᓐᓇᓂᐊᖅᑐᑦ ᐊᑭᓕᕐᓱᖅᑕᐅᔪᓐᓇᖅᑐᓂᑦ ᐃᓪᓗᓕᐊᖑᔪᓐᓇᖅᑐᓂᑦ ᐊᑕᐅᓰᓂᑦ ᐃᓚᒌᓂᑦ ᐃᓛᒃᑰᑕᕐᓗᒋᑦ ᐊᒻᒪ ᓄᑖᓂᑦ ᓴᖅᑮᔾᔪᑎᐅᓗᑎᒃ ᓇᓖᕌᕈᑎᑦᓴᓂᑦ ᐃᓚᒋᐊᒃᑲᓐᓂᓛᖁᓪᓗᒋᑦ ᐃᓪᓗᓕᐊᖑᔪᓐᓇᕋᔭᖅᑐᑦ ᓯᕗᓂᑦᑎᓐᓂ.
ᑐᑭᓯᐊᒃᑲᓐᓂᕈᒪᒍᕕᑦ:
ᓖᓴ ᒥᓗᓴᕝᔨᕕᒃ
ᑐᓴᐅᒪᖃᑎᒋᓐᓂᕐᒧᑦ ᐊᒻᒪᓗ ᐱᔨᔅᓯᖅᑕᐅᕙᒃᑐᓄᑦ ᐱᔨᔅᓯᕈᑎᒥ ᐊᐅᓚᑦᑎᔨ
L.Milosavljevic@iqaluit.ca | 867-979-5607
