ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᓄᓇᓕᐸᐅᔭᐃᑦ ᐃᖃᓗᐃᑦ ᐊᑦᓯᓪᓕᒋᐊᕆᔪᑦ ᓴᐃᒻᒪᑎᓂᑦ ᕿᑦᓵᒍᑎᖃᖅᑐᑎᒃ ᐳᕆᑎᔅ ᑲᓚᒻᐱᐊᒥ ᓄᓇᖃᖅᑳᕐᓯᒪᔪᓂᑦ ᐃᓕᓐᓂᐊᕆᐊᖅᑎᑕᐅᓯᒪᓪᓗᑎᒃ ᖃᓄᐃᓕᐅᖅᑕᐅᓯᒪᔪᓂᑦ.
ᓄᓇᓕᐸᐅᔭᐃᑦ ᐃᖃᓗᐃᑦ ᓴᐃᒻᒪᑎᖏᑦ ᐊᑦᓯᓪᓕᒋᐊᖅᑕᐅᖅᑲᐅᔪᑦ ᐅᓪᓗᒥ, ᖃᐅᔨᔭᐅᓚᐅᖅᑎᓪᓗᒋᑦ ᑎᒥᒥᓂᖏᑦ 215 ᓱᕈᓰ ᐃᓂᖓᓂ ᐃᓕᓐᓂᐊᕐᕕᒥᓂᐅᑉ ᓄᓇᖃᖅᑳᕐᓯᒪᔪᓄᑦ ᑳᒻᓘᕐᔅᒥ, ᐳᕆᑎᔅ ᑲᓚᒻᐱᐊᒥ.
ᓴᐃᒻᓴᑎᐅᔪᑦ ᐊᑦᓯᓪᓕᒋᐊᕐᓯᒪᓂᐊᖅᑐᑦ 215-ᓂᑦ ᐃᑲᕐᕋᓂᑦ ᐱᒋᐊᕐᓗᑎᒃ ᒪᐃ 31-ᒥᑦ ᔪᓂ 9-ᒧ ᕿᑦᓵᒍᑎᐅᓗᑎᒃ 215 ᓱᕈᓰᑦ.
ᐅᖃᐅᑎᑦᓴᖓ ᒪᐃᔭ ᑭᐊᓂ ᐱᐅᓪ:
ᐱᒻᒪᕆᐅᕗᖅ ᐳᐃᒍᕐᔭᐃᕐᓯᒪᒋᐊᖃᕐᓂᐅᔪᖅ ᐃᓅᓯᖃᓚᐅᖅᑐᓂᑦ ᑲᑉᐱᐊᓱᑉᐸᓚᐅᖅᑐᓂᑦ, ᓱᕋᑦᑕᐅᓯᒪᔪᓂᑦ ᐊᒻᒪ ᑎᒍᔭᐅᕙᓚᐅᖅᑐᓂᑦ ᓄᓇᖃᖅᑳᕐᓯᒪᔪᓄᑦ ᐃᓕᓐᓂᐊᕐᕕᓐᓂᑦ. ᐊᑦᓯᓪᓕᒋᐊᕐᓯᒪᓗᒋᑦ ᓴᐃᒻᒪᑎᕗᑦ 215-ᓄᑦ ᐃᑲᕐᕋᓄᑦ, ᐅᕝᕙᓘᓐᓃᑦ 9-ᓄᑦ ᐅᓪᓗᓄᑦ, ᑕᑯᑦᓴᐅᑎᑦᑎᕗᖅ ᐃᑉᐱᒍᓱᓐᓂᐅᔪᒥᑦ 215-ᓂᑦ ᐃᓅᓯᐅᓚᐅᖅᑐᓂᑦ ᑎᒍᔭᐅᓚᐅᖅᑐᓂᑦ ᑳᒻᓘᑉᔅᓂᑦ. ᐱᕕᖃᐅᑎᐅᓂᐊᕐᒥᔪᖅ ᕿᑦᓵᒍᑎᖃᕐᓂᕐᒥᑦ ᐊᒻᒪ ᐃᓱᒪᓂᕐᒥᑦ ᐃᓱᒪᓇᖕᖏᑦᑐᐊᓗᓐᓂᑦ ᐱᕋᔭᐅᑕᐅᓯᒪᔪᓂᑦ ᓄᓇᖃᖅᑳᕐᓯᒪᔪᓄᑦ ᐃᓕᓐᓂᐊᕐᕕᓕᕆᔾᔪᑎᒍᑦ ᐊᑐᖅᑕᐅᕙᑦᑐᒥᑦ ᑲᓇᑕᒥ. ᐊᔭᐅᖅᑐᐸᒃᑲ ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᖃᑎᖃᐃᓐᓇᖁᓪᓗᒋᑦ ᓱᓕᔪᕐᓂᐊᖅᑎᒃᑯᓐᓂᑦ ᖃᐅᔨᓴᖅᑎᓂᑦ ᑲᓇᑕᒥᑦ ᖃᓄᐃᒍᑎᐅᓚᐅᖅᑐᑦ ᐱᔾᔪᑎᐅᓗᑎᒃ ᑭᐅᔾᔪᑎᐅᔪᓐᓇᖁᓪᓗᒋᑦ.
ᐅᖃᐅᑎᑦᓴᖏᑦ ᑲᑎᒪᔨ ᕚᓴᑦ:
ᐆᒻᒪᑎᒐ ᐃᑉᐱᓐᓂᐊᕗᖅ ᐃᓘᓐᓇᑦᑎᐊᖏᓐᓂᑦ ᕿᑦᓵᒍᑎᓕᓐᓂᑦ ᐊᒻᒪ ᓱᓕ ᐊᑦᑐᖅᑕᐅᕙᓪᓕᐊᑐᐃᓐᓇᖅᑐᓂᑦ ᐱᕋᔭᒍᑎᐅᔪᒧᑦ ᓄᓇᖃᖅᑳᕐᓯᒪᔪᓄᑦ ᐃᓕᓐᓂᐊᖅᑐᓕᕆᔾᔪᑎᐅᔪᒧᑦ. ᑲᓇᑕᒥᐅᑕᐅᓗᑕ, ᑲᑎᕐᓱᐃᒋᐊᖃᖅᑐᒍᑦ ᖃᓄᖅᑑᕈᑎᑦᑎᓐᓂᑦ ᐊᐅᓚᔾᔭᐃᒋᐊᖁᔨᔾᔪᑎᑦᑎᓐᓂᑦ ᐊᒻᒪ ᐋᖅᑭᒋᐊᕈᑎᑦᓴᖏᓐᓂᑦ ᐃᓘᓐᓇᖏᑕ ᓄᓇᖃᖅᑳᕐᓯᒪᔪᑦ ᐊᑦᑐᖅᑕᐅᓯᒪᔪᑦ ᑕᒪᒃᑯᓄᖓ ᖁᕕᐊᓇᖏᑦᑐᒃᑯᑦ ᖃᓄᐃᓕᐅᕈᑎᐅᓯᒪᔪᓂᑦ.
ᐅᖃᐅᑎᑦᓴᖓ ᒪᐃᔭᐅᑉ ᑐᓪᓕᐊᑕ ᔮᓇᑦ ᐳᕉᔅᑐ:
ᐅᓪᓗᒥ ᐱᒋᐊᖅᐳᒍᑦ 215 ᐃᑲᕐᕋᓂᑦ ᐃᑉᐱᒋᔪᒪᓪᓗᒋᑦ Tk'emlúps Te Secwépemc ᓱᕈᓰᑦ ᓇᓂᔭᐅᓚᐅᖅᑐᑦ ᐃᓗᕕᕐᓯᒪᑎᓪᓗᒋᑦ ᑳᒻᓘᑉᔅ ᐊᓪᓚᓄᑦ ᓄᓇᖃᖅᑳᕐᓯᒪᔪᓄᑦ ᐃᓕᓐᓂᐊᕐᕕᐅᓚᐅᖅᑐᒥ. ᐊᒥᓱᕐᔪᐊᕌᓗᐃᑦ ᓄᓇᖃᖅᑳᕐᓯᒪᔪᑦ ᐃᓚᒌᑦ ᐃᓅᓯᖃᖅᑐᑦ ᐅᕙᑦᓯᐊᕈ ᐃᓚᒋᓚᐅᖅᑕᖏᑕ ᐊᑐᓚᐅᖅᑕᖏᓐᓂᑦ ᐊᑦᑐᖅᑕᐅᓯᒪᓪᓗᑎᒃ ᕿᒪᑦᓯᒪᔭᖏᓐᓄᑦ ᐊᓪᓚᐃᑦ ᓄᓇᖃᖅᑳᕐᓯᒪᔪᑦ ᐃᓕᓐᓂᐊᕆᐊᖅᐸᓚᐅᖅᑐᑦ ᑲᓇᑕᒥ. ᐃᓱᒪᒋᕙᒃᑲ ᑕᐃᒃᑯᐊ ᐊᓐᓇᐅᒪᓯᒪᔪᑦ ᐊᒻᒪ ᐃᓚᒋᔭᕗᑦ. ᑕᐃᒃᑯᐊ ᐊᓯᐅᓯᒪᔭᐃᓐᓇᑦᑎᐊᕗᑦ ᐆᒻᒪᑎᓐᓃᑎᑉᐸᒃᑲ.
ᑐᓴᕋᑦᓴᐃᑦ ᒥᑦᓵᓄᑦ ᐊᐱᖅᑯᑎᑦᓴᖃᕈᑦᓯ, ᖃᐅᔨᒋᐊᕈᓐᓇᕐᑐᓯ ᐆᒧᖓ:
ᓖᓴ ᒥᓗᓵᕝᔨᕕᒃ ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᕐᓂᒥᑦ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ
L.Milosavljevic@iqaluit.ca
867-979-5607
