ᓂᐅᕕᐊᔅᓴᖃᑲᐃᓐᓇᕐᓂᐅᔪᖅ ᐅᒥᐊᒃᑯᕕᒻᒥ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ

ᓂᐅᕕᐊᔅᓴᖃᑲᐃᓐᓇᕐᓂᐅᔪᖅ ᐅᒥᐊᒃᑯᕕᒻᒥ

ᔪᓚᐃ 30, 2025 − ᐃᖃᓗᐃᑦ, ᓄᓇᕗᑦ

 

ᓄᓇᓕᐸᐅᔭᖓᑦ ᐃᖃᓗᐃᑦ ᖁᕕᐊᓱᑦᑐᑦ ᖃᐃᖅᑯᓗᒋᑦ ᓴᓇᖑᐊᖅᑏᑦ, ᐊᒡᒐᖏᓐᓄᑦ ᓴᓇᖃᑦᑕᖅᑐᑦ, ᐊᒻᒪ ᓇᒻᒥᓂᖃᖅᑎᐅᔪᑦ ᐃᓚᒋᔭᐅᓗᑎ ᓂᐅᕕᐊᔅᓴᖃᑲᐃᓐᓇᓂᕐᒧᑦ ᐅᒥᐊᒃᑯᕕᒻᒥ ᓇᒑᔾᔭᐅ, ᐋᒡᒌᓯ 11, ᐱᒋᐊᕐᓗᓂ 11:00 ᐅᓪᓛᒃᑯᑦ ᑎᑭᓗᒍ 3:00 ᐅᓐᓄᓴᒃᑯᑦ.

ᑖᓐᓇ ᐊᔾᔨᐅᖏᑦᑐᖅ ᖃᓄᐃᓘᕐᓂᐅᔪᖅ ᐊᑕᐅᑦᑎᒃᑰᖃᑎᒋᓂᐊᖅᑕᖓ ᑎᑭᓐᓂᖓᓄᑦ Silver Endeavour ᐳᓚᕋᖅᑎᓄᑦ ᐅᒥᐊᕐᔪᐊᖅ. ᓂᐅᕕᐊᔅᓴᖃᕐᓂᐅᔪᖅ ᑕᑯᔅᓴᐅᑎᑦᑎᕕᔅᓴᑦᑎᐊᕙᐅᔪᖅ ᐊᒻᒪ ᓂᐅᕕᐊᖑᑎᑦᑎᓗᓂ ᐊᒡᒐᓄᑦ ᓴᓇᔭᐅᓯᒪᔪᓂᑦ ᓯᓚᕐᔪᐊᒥ ᐳᓚᕋᖅᑎᓄᑦ ᐊᒻᒪ ᐃᑲᔪᕐᓗᒋᑦ ᓄᓇᓕᒻᒥ ᓴᓇᖑᐊᖅᑏᑦ.

ᑖᓐᓇ ᖃᓄᐃᓘᕐᓂᐅᔪᖅ ᓂᐅᕕᐊᔅᓴᖃᓂᐊᖅᑐᑦ ᓯᓚᓗᒃᑲᓗᐊᕈᓂ ᐅᕝᕙᓘᓐᓃᑦ ᓯᕿᓐᓂᕋᓗᐊᕈᓂ – ᐊᖏᔪᑦ ᑐᐲᑦ ᐊᑐᐃᓐᓇᐅᓂᐊᖅᑐᑦ ᓂᐅᕕᐊᔅᓴᖃᖅᑎᓄᑦ ᐊᒻᒪ ᓂᐅᕕᖃᑦᑕᖅᑐᓄᑦ ᓂᐅᕕᐊᔅᓴᖃᕐᓂᐅᔪᖅ ᑲᔪᓯᒍᓐᓇᓂᐊᕐᖓᑦ ᓯᓚᖓ ᖃᓄᐃᓕᖓᑐᐃᓐᓇᕋᓗᐊᖅᑎᓪᓗᒍ.

ᓂᐅᕕᐊᔅᓴᖃᕐᓂᐅᔪᖅ ᒪᑐᐃᖓᒻᒥᔪᖅ ᑭᒃᑯᑐᐃᓐᓇᕐᓄᑦ, ᐊᒻᒪ ᑭᒃᑯᓕᒫᑦ ᑐᓐᖓᓱᑦᑎᑕᐅᔪᑦ ᕿᒥᕐᕈᒋᐊᑐᕐᓗᑎ, ᓂᐅᕕᕐᓗᑎ, ᐊᒻᒪ ᖁᕕᐊᒋᓗᒋᑦ ᓴᓇᔭᐅᓯᒪᔪᑦ ᓴᓇᖑᐊᖅᑎᓄᑦ ᐊᒻᒪ ᓴᓇᖃᑦᑕᖅᑐᓄᑦ.

ᐃᓚᒋᔭᐅᖃᑕᐅᔪᒪᕖᑦ?
ᐊᑎᓕᐅᕐᓗᑎᑦ ᑕᑕᑎᕐᓗᒍ ᖃᕋᓴᐅᔭᒃᑯᑦ ᑕᑕᑎᕆᐊᓕᒃ (ᑐᕌᕈᑎᖓ ᐊᑖᓂ), ᐅᕝᕙᓘᓐᓃᑦ ᖃᐅᔨᒋᐊᕐᕕᒋᓗᒍ ᓄᓇᓕᐸᐅᔭᒃᑯᑦ ᐱᕙᓪᓕᐊᔪᓕᕆᓂᒻᒥ ᐃᖃᓇᐃᔭᖅᑎ, ᑖᒥᓂᒃ ᒐᖕᔭᐃᑦ, ᐅᕙᓂ 979-5607 ᐅᕝᕙᓘᓐᓃᑦ d.gagne@iqaluit.ca

ᓂᐅᕕᐊᔅᓴᖃᖅᑐᓄᑦ ᐃᓂᐅᔪᑦ ᐊᑐᐃᓐᓇᐅᔪᑦ ᖃᐃᖅᑳᖅᑐᓄᑦ, ᐱᔨᑦᑎᖅᑕᐅᖄᖅᑐᓄᑦ – ᐊᑎᓕᐅᖅᓴᕋᐃᖁᔭᐅᔪᑦ.

ᐱᒻᒪᕆᐅᔪᖅ ᑐᓴᕋᔅᓴᖅ ᓂᐅᕕᐊᔅᓴᖃᖅᑐᓄᑦ:
ᐃᓚᖏᑦ ᓂᐅᕕᐊᔅᓴᐃᑦ – ᓲᕐᓗ ᓇᑦᑎᓃᖔᖅᑐᑦ ᐊᒻᒪ ᑑᒑᑦ ᐅᕝᕙᓘᓐᓃᑦ ᕿᓚᓗᒐᐃᑦ ᓴᐅᓂᖏᓐᓂ ᓴᓇᖑᐊᖅᑕᐅᓯᒪᔪᑦ – ᐱᒡᒐᓴᕈᓐᓇᖅᑐᑦ ᐅᕝᕙᓘᓐᓃᑦ ᐱᒧᓐᓇᖅᑎᑕᐅᖏᓪᓗᑎ ᐊᓯᖏᓐᓄ ᓄᓇᓕᕐᔪᐊᒨᖅᑕᐅᓗᑎ.
ᓂᐅᕕᐊᔅᓴᐃᑦ ᓲᕐᓗ ᓇᔾᔪᓂᑦ ᐊᒻᒪ ᓴᓇᖑᐊᒐᔅᓴᓂ ᐅᔭᕋᓐᓂᑦ ᐊᖏᖅᑕᐅᒐᔪᑦᑐᑦ, ᐱᓗᐊᖅᑐᒥᑦ ᓂᐅᕕᖅᑐᑦ ᓇᓕᖅᑲᖅᑖᕈᑎ ᓂᐅᕕᕐᓂᖏᓐᓄᑦ. ᓂᐅᕕᖃᑦᑕᖅᑐᑦ ᖃᐅᔨᒪᑎᓐᓂᐊᖅᑲᓯ ᑖᒃᑯᓂᖓ ᒪᓕᒐᖏᓐᓂ ᓂᐅᕕᐊᖑᑎᑦᑎᓪᓗᓯ.

ᓇᓗᒍᕕᑦ ᓴᓇᖑᐊᖅᓯᒪᔭᐃᑦ ᐅᕝᕙᓘᓐᓃᑦ ᓴᓇᓯᒪᔭᐃᑦ ᐱᐅᒻᒪᖔᖅ ᓂᐅᕕᐊᔅᓴᖃᓂᕐᒧᑦ, ᖃᐅᔨᒋᐊᕐᕕᒋᓗᒍ ᐱᕙᓪᓕᐊᔪᓕᕆᓂᒻᒥ ᐃᖃᓇᐃᔭᖅᑎ ᐃᑲᔪᖅᑕᐅᓗᑎ.

ᖃᐃᖅᑯᔭᕗᑦ ᑭᒃᑯᓕᒫᑦ ᐅᒥᐊᒃᑯᕕᒻᒨᕐᓗᑎ ᐅᕙᓂ ᐋᒡᒌᓯ 11 ᖁᕕᐊᒋᓗᒍ ᓂᐅᕕᐊᔅᓴᖃᕐᓂᐅᔪᖅ ᐊᒻᒪᒪ ᐃᑲᔪᕐᓗᒋᑦ ᓄᓇᓕᒻᒥ ᓴᓇᖑᐊᖅᑎᕗᑦ.

 

##

 

ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:

ᔩᐅᑉ ᕙᕐᓂ

ᐊᖏᔪᖅᑳᖅ ᑐᓴᐅᒪᔪᓕᕆᔨᒃᑯᓐᓄᑦ ᐊᒻᒪ ᐊᑭᓕᕐᓱᐃᔨᓄᑦ ᐱᔨᖅᑎᕋᐅᑎ

ᓄᓇᓕᐸᐅᔭᐃᑦ ᐃᖃᓗᐃᑦ

867-979-5619 | G.Byrne@iqaluit.ca