ᒪᓕᒐᕋᓛᓂᒃ ᐊᑐᓕᖅᑎᑦᓯᓇᓱᐊᕐᓂᖅ ᐊᒻᒪ ᑭᒃᑯᑐᐃᓐᓇᕐᓄᑦ ᐃᑉᐱᒋᔭᐅᔭᕆᐊᓖᑦ

ᑭᒃᑯᑐᐃᓐᓇᖕᓄᑦ ᑐᓴᕋᑦᓴᖅ
ᒪᓕᒐᕋᓛᓂᒃ ᐊᑐᓕᖅᑎᑦᓯᓇᓱᐊᕐᓂᖅ ᐊᒻᒪ ᑭᒃᑯᑐᐃᓐᓇᕐᓄᑦ ᐃᑉᐱᒋᔭᐅᔭᕆᐊᓖᑦ
ᓰᑏᐱᕆ 2, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᑐᓴᐅᒪᖁᔨᓕᕆᕗᑦ ᓄᓇᓕᕐᒥᐅᑕᓂᒃ ᖃᓄᖅ ᓄᓇᓕᓐᓂ ᒪᓕᒐᕋᓛᓕᐊᖑᕙᑦᑐᑦ ᐊᑐᖅᑎᑕᐅᓇᓱᐊᖅᐸᓐᓂᖏᓐᓄᑦ ᓄᓇᑦᑎᓐᓂ.

ᓄᓇᓕᓐᓂ ᒪᓕᒐᕋᓛᑦ ᓄᓇᓕᓐᓂ ᒪᓕᒐᐅᔪᑦ ᐃᑲᔪᖅᐸᑦᑐᑎᒃ ᓄᓇᓕᐸᐅᔭᑦᑎᓐᓂᒃ ᐊᑦᑕᓇᔾᔭᐃᕐᓯᒪᖁᓪᓗᒍ, ᐅᐸᓗᖓᐃᕐᓯᒪᑦᓯᐊᖁᓪᓗᒍ, ᐊᒻᒪ ᐃᑉᐱᒍᓱᑦᓯᐊᖃᑦᑕᕆᐊᖃᕐᓂᑎᓐᓂᒃ ᑭᒃᑯᑐᐃᓐᓇᕐᓂᒃ. ᑕᒪᒃᑯᐊ ᒪᓕᒐᕋᓛᓕᐊᖑᕙᑦᑐᑦ ᐊᔾᔨᒌᖏᑦᑐᓂᒃ ᐱᔾᔪᑎᖃᖅᐸᑦᑐᑦ, ᐱᖃᓯᐅᔾᔭᐅᓗᑎᒃ ᐊᑐᕆᐊᒃᑰᐸᑦᑐᓂᒃ ᐊᑦᑕᓇᖅᑐᒦᑎᑦᓯᑦᑕᐃᓕᒪᓂᒃᑯᑦ, ᐆᒪᔪᓂᒃ ᐊᐅᓚᑦᓯᔾᔪᑎᒃᑯᑦ, ᓂᐱᖃᓗᐊᖅᑐᓂᒃ ᐊᑲᐅᖏᓕᐅᕈᑎᓕᓐᓂᒃ ᑕᑯᓂᐊᖅᐸᑦᑐᑎᒃ, ᐊᒻᒪ ᐱᖁᑎᖃᖅᑎᐅᔪᑦ ᒪᓕᒃᑲᓗᐊᕐᒪᖔᑕ ᐱᔾᔪᓯᐅᔪᓂᒃ. ᐆᑦᑑᑎᐅᒍᓐᓇᖅᑐᑦ ᐱᖃᓯᐅᔾᔭᐅᔪᑦ ᐊᑐᕆᐊᒃᑯᑦ ᖃᓄᑎᒋ ᓱᒃᑲᓂᖃᕐᓗᑎᒃ ᐃᖏᕐᕋᒍᓐᓇᕐᓂᖏᓐᓄᑦ, ᓂᐱᖃᓗᐊᕆᐊᖃᖏᑦᑐᓂ ᐃᑲᕐᕋᓂ ᐅᓐᓄᐊᒃᑯᑦ ᐃᑲᕐᕋᓂ ᐱᒋᐊᖅᐸᑦᑐᓂᒃ ᐅᓐᓄᒃᑯᑦ 10-ᒨᖅᑎᓪᓗᒍ ᐅᓪᓛᒧᓄᑦ 7-ᒧᓄᑦ, ᖃᐅᔨᓴᖅᐸᑦᑐᑦ ᕿᒻᒦᑦ ᐱᑐᑦᓯᒪᒐᓗᐊᕐᒪᖔᑕ ᐊᒻᒪ ᐅᔭᒥᖃᕋᓗᐊᕐᒪᖔᑕ ᓇᓗᓇᐃᒃᑯᑎᓂᒃ, ᐅᕝᕙᓘᓐᓃᑦ ᓇᓗᓇᐃᔭᐃᓂᖅ ᓄᓇᒃᑰᔫᑦ ᓇᓪᓕᐅᒃᑯᒫᓕᖅᑕᐅᓯᒪᑦᓯᐊᕋᓗᐊᕐᒪᖔᑕ.

ᐃᖃᓗᐃᑦ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᒪᓕᒐᕋᓛᓕᐅᖅᐸᑦᑐᑦ ᐱᓕᕆᔾᔪᑎᒍᑦ ᑭᒃᑯᑐᐃᓐᓇᐃᑦ ᑕᕝᕙᐅᑎᓪᓗᒋᑦ ᐅᐸᓗᖓᐃᔭᐅᑎᒃᑯᑦ. ᒪᓕᒐᕋᓛᓕᐊᖑᔪᒪᔪᑦ ᐊᑐᓕᖅᑎᑕᐅᓚᐅᖏᓐᓂᖏᓐᓂ ᐅᖃᓕᒫᖅᑕᐅᒋᐊᖃᖅᐸᑦᑐᑦ ᐊᑕᐅᓯᐊᕋᑎᒃ ᐊᒻᒪ ᑲᔪᓯᑎᑕᐅᒋᐊᖃᖅᐸᑦᑐᑎᒃ ᑲᑎᒪᔨᓂᒃ ᒪᓕᒐᕈᓚᐅᖏᓐᓂᖏᓐᓂ. ᑲᑎᒪᔨᓄᑦ ᐃᓚᒋᔭᐅᔪᑦ ᓂᕈᐊᖅᑕᐅᕙᑦᑐᑦ ᓄᓇᓕᕐᒥᐅᑕᓄᑦ ᐊᒻᒪ ᐱᓕᕆᔨᐅᓗᑎᒃ ᒪᓕᒐᕋᓛᓕᐅᑐᐃᓐᓇᕋᑎᒃ ᑭᓯᐊᓂᑦᑕᐅᖅ ᖃᐅᔨᓴᖅᐸᑦᑐᑦ ᑕᐃᒫᑦᓯᐊᖅ ᐊᑐᖅᑕᐅᕙᒃᑲᓗᐊᕐᒪᖔᑕ. ᑕᒪᐅᓇ ᓇᓗᓇᐃᕈᑎᐅᕙᑦᑐᑦ ᑭᒃᑯᑐᐃᓐᓇᕐᓄᑦ ᑕᑯᔭᐅᓯᒪᓂᖏᓐᓄᑦ ᐊᒻᒪ ᑭᐅᔾᔪᑎᐅᔪᓐᓇᕐᓂᖏᓐᓄᑦ ᖃᓄᖅ ᐱᓕᕆᔾᔪᑎᐅᕙᓐᓂᖏᒍᑦ ᐱᓕᕆᔾᔪᑎᒍᑦ.

ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᒪᓕᒐᓕᐅᖅᑎᐅᑎᓪᓗᒋᑦ ᑲᔪᓯᑎᑦᓯᕙᑦᑐᑎᒃ ᒪᓕᒐᕋᓛᑦᓴᓂᒃ, ᓄᓇᓕᐸᐅᔭᒃᑯᑦ ᐱᓕᕆᔨᖏᑦ, ᐱᖃᓯᐅᔾᔭᐅᓗᑎᒃ ᐃᖅᑲᓇᐃᔭᖅᑎᐅᔪᑦ ᓲᕐᓗ ᓄᓇᓕᓐᓂ ᒪᓕᒐᕋᓛᓂᒃ ᐊᑐᓕᖅᑎᑦᓯᓇᓱᐊᖅᑏᑦ, ᐱᓕᕆᐊᖃᖅᐸᑦᑐᑦ ᐊᒻᒪ ᐊᐅᓚᑦᓯᕙᑦᑐᑎᒃ ᖃᐅᑕᒫᖅᑐᖅᓯᐅᑎᓂᒃ ᐊᐅᓚᑦᓯᔾᔪᑎᓂᒃ. ᑕᒪᒃᑯᐊ ᑲᒪᔨᐅᕙᑦᑐᑦ ᑎᓕᒐᕆᔭᐅᕙᑦᑐᑦ ᓄᓇᓕᐸᐅᔭᒃᑯᑦ ᓄᓇᓕᓐᓂ ᒪᓕᒐᕋᓛᓕᕆᔨᒃᑯᓐᓂᒃ, ᓂᕈᐊᖅᑕᐅᓯᒪᖏᑦᑐᓄᑦ ᓯᕗᓕᖅᑎᓄᑦ.

ᒪᓕᒐᕋᓛᑦ ᐊᑦᑐᐊᓂᖃᕐᒥᔪᑦ ᖃᓄᖅ ᓄᓇᓕᐸᐅᔭᒃᑯᑦ ᐱᔨᑦᓯᕋᐅᑎᖏᓐᓂᒃ ᐱᔨᑦᓯᕋᐅᑎᖃᖅᐸᓐᓂᖏᓐᓄᑦ. ᒪᓕᒐᐃᑦ ᐱᔾᔪᑎᖃᐅᖅᑐᑦ ᐃᒥᕐᒥᒃ ᖃᓄᖅ ᐊᑐᕐᓂᕐᒥᒃ, ᓴᓂᓕᕆᓂᒃᑯᑦ, ᐊᑐᕆᐊᓕᕆᓂᒃᑯᑦ ᐊᑦᑕᓇᔾᔭᐃᒃᑯᑎᓂᒃ, ᐊᒻᒪ ᐱᖁᑎᓂᒃ ᒪᑭᒪᓇᓱᐊᖅᑎᑦᓯᓂᒃᑯᑦ ᐃᑲᔫᑎᖃᖅᐸᑦᑐᑦ ᐱᔨᑦᓯᕋᐅᑎᐅᔪᑦ ᓲᕐᓗ ᐃᒥᖅᑕᖅᑏᑦ, ᓴᓂᕐᓂᒃ ᓄᐊᑦᓯᔩᑦ, ᐊᒻᒪ ᐊᐳᑕᐃᔭᐃᔨᐅᔪᑦ ᐱᓕᕆᔪᓐᓇᖁᓪᓗᒋᑦ ᐊᑦᑕᓇᔾᔭᐃᕐᓯᒪᑦᓯᐊᕐᓗᑎᒃ ᐊᒻᒪ ᐊᔾᔨᒌᑎᑦᓯᓗᑎᒃ ᓄᓇᓕᕐᒥᐅᑕᓕᒫᓂᒃ.

ᑕᑯᓐᓂᕈᑦᓯ ᒪᓕᒐᕋᓛᓕᕆᔪᒥᒃ ᐱᔾᔪᑎᐅᔪᓇᖅᑐᒥᒃ, ᓲᕐᓗ ᓂᐱᖃᓗᐊᖅᑐᓂᒃ ᐅᓐᓄᐊᒃᑯᑦ ᐃᑲᕐᕋᓂ ᓂᐱᖃᓗᐊᕆᐊᖃᖅᑎᓐᓇᒍ, ᓱᒃᑲᓕᓗᐊᖅᑐᒥᒃ ᓄᓇᒃᑰᔫᖅᑐᒥᒃ, ᐅᕝᕙᓘᓐᓃᑦ ᓄᓇᒃᑰᔫᓄᑦ ᓄᖅᑲᖓᕕᓕᕆᔪᓂᒃ ᓄᖅᑲᖓᒋᐊᖃᕋᑎᒃ, ᐅᖃᐅᓯᕆᔪᓐᓇᖅᑕᓯ ᐅᖄᓚᕕᒋᓗᒋᑦ ᓄᓇᓕᐸᐅᔭᒃᑯᑦ ᖃᐅᑕᒫᑦ ᑭᐅᔨᖃᖅᐸᑦᑐᑦ ᐱᓕᕆᕝᕕᖓᑦ ᐅᕗᖓ 867 979 5650. ᑐᐊᕕᕐᓇᓗᐊᖏᑦᑐᑦ ᐅᖃᐅᓯᐅᒍᓐᓇᐸᒻᒥᔪᑦ ᑎᑎᕋᕐᕕᓴᒃᑯᑦ ᓄᓇᓕᐸᐅᔭᒃᑯᑦ ᐃᑭᐊᖅᑭᕕᖏᓐᓃᑦᑐᒃᑯᑦ.

ᐅᖃᐅᓯᐅᔪᖃᓚᐅᖅᑎᓪᓗᒍ, ᓄᓇᓕᓐᓂ ᒪᓕᒐᕋᓛᓂᒃ ᑲᒪᔨᐅᔪᑦ ᐱᓕᕆᒋᐊᓯᕙᑦᑐᑦ ᓈᒻᒪᑦᑐᓂᒃ ᖃᓄᐃᓕᐅᕈᑎᖃᖅᑐᑎᒃ. ᐱᒋᐊᖅᐸᑦᑐᑦ ᐃᓕᓐᓂᐊᕈᑎᓂᒃ ᐊᒻᒪ ᑐᑭᓯᒋᐊᕈᑎᑦᓴᓂᒃ ᐱᑎᑦᓯᕙᑦᑐᑎᒃ ᒪᓕᒐᕋᓛᓕᕆᔪᓂᒃ. ᐱᑕᖃᕆᐊᖃᕈᓂ, ᐃᓂᖅᑎᕆᔾᔪᑎᒥᒃ ᐱᑎᑦᓯᒐᔭᖅᑐᑦ, ᐊᑭᓖᑎᑦᓯᓗᑎᒃ, ᐅᕝᕙᓘᓐᓃᑦ ᐱᒻᒪᕆᐅᒍᓂ ᓱᕋᐃᔾᔪᑎᐅᔪᖅ, ᖃᓄᐃᓕᐅᕆᐊᕈᓐᓇᖅᑐᑦ ᓲᕐᓗ ᓄᓇᒃᑰᔫᒥᒃ ᑎᒍᓯᓗᑎᒃ ᓇᓗᓇᐃᕈᑎᖃᖏᑦᑐᒥᒃ ᐊᑐᖅᑕᐅᔪᒥᒃ. ᐃᖅᑲᖅᑐᐃᕕᒃᑰᖅᑎᑕᐅᕙᑦᑐᑦ ᑭᓯᐊᓂ ᐊᓯᖃᕈᓐᓃᕋᐃᒻᒪᑕ, ᐊᑐᖅᑕᐅᕙᑦᑐᑦ ᐊᓯᖏᑦ ᖃᓄᖅᑑᕈᑎᐅᔪᑦ ᒪᓕᑦᑎᑦᓯᓇᓱᐊᕈᑎᐅᔪᑦ ᒪᓕᑦᑕᐅᒐᓱᐊᖏᒃᑯᑎᒃ.

ᓄᓇᓕᓐᓂ ᒪᓕᒐᕋᓛᓂᒃ ᐊᑐᓕᖅᑎᑦᓯᓇᓱᐊᕐᓂᒃᑯᑦ ᑲᒪᔨᐅᔪᑦ ᐃᖃᓗᓐᓂ ᓇᓗᓇᐃᖅᑕᐅᓯᒪᔪᑦ ᓴᐃᓕᖓᑎᑦᓯᓂᒃᑯᑦ ᑲᒪᔩᑦ, ᑐᑭᖃᖅᑐᓂ ᐊᖏᓂᕐᓴᓂᒃ ᐃᑉᐱᒍᓲᑎᖃᕐᓂᖏᓐᓄᑦ ᒪᓕᒐᕋᓛᓕᕆᔨᑐᐃᓐᓇᕐᓂᒃ. ᐊᑐᖅᑎᑦᓯᓇᓱᐊᑐᐃᓐᓇᐸᖏᑦᑐᑦ ᓄᓇᓕᓐᓂ ᒪᓕᒐᕐᓂᒃ ᑭᓯᐊᓂᑦᑕᐅᖅ ᐱᓕᕆᐊᖃᖅᐸᒻᒥᔪᑦ ᑭᒃᑯᑐᐃᓐᓇᕐᓂᒃ ᐊᑦᑕᓇᖅᑐᒦᑎᑦᓯᑦᑕᐃᓕᒪᐅᑎᓂᒃ. ᑲᑐᔾᔨᖃᑎᖃᓚᐅᖅᐸᑦᑐᑦ ᑲᓇᑕᐅᑉ ᐸᓖᓯᒃᑯᖏᓐᓂᒃ (RCMP) ᑲᑐᔾᔨᓪᓗᑎᒃ ᒪᓕᑦᑎᑦᓯᓇᓱᐊᕐᓂᒃᑯᑦ ᐱᒋᐊᖅᑎᑕᐅᓯᒪᔪᓂᒃ, ᓲᕐᓗ ᓱᕐᕋᓯᒪᓪᓗᑎᒃ ᐃᒥᐊᓗᒻᒧᑦ ᓄᓇᒃᑰᔫᖅᐸᑦᑐᓂᒃ ᐅᔾᔨᕈᓱᒋᐊᕈᑎᓂᒃ ᐅᕝᕙᓘᓐᓃᑦ ᐊᑐᕆᐊᒃᑰᐸᑦᑐᓂᒃ ᐊᑦᑕᓇᑦᑕᐃᓕᒪᔪᓕᕆᓂᒃᑯᑦ ᖃᐅᔨᓴᖃᑎᒋᕙᑦᑐᒋᑦ.

ᐃᓚᖏᑦ ᐃᑉᐱᒋᔭᕆᐊᓕᐅᔪᑦ, ᓲᕐᓗ ᐱᕋᔭᑦᓯᒪᔪᓄᑦ ᒪᓕᒐᕐᓂᒃ ᒪᓕᑦᑎᑦᓯᓇᓱᐊᕐᓂᖅ ᐊᒻᒪ ᐃᖅᑲᖅᑐᐃᕕᒻᒥ ᐱᓕᕆᒋᐊᖃᖅᐸᑦᑐᑦ, ᐱᓕᕆᐊᖑᕙᑦᑐᑦ ᒐᕙᒪᒃᑯᓐᓄᑦ ᓄᓇᕘᒧᑦ (GN). ᓄᓇᓕᐸᐅᔭᒃᑯᑦ ᓇᖕᒥᓂᖅ ᐊᑐᓕᖅᑎᑦᓯᓇᓱᐊᖅᐸᒃᑲᓗᐊᖅᑐᑎᒃ ᒪᓕᒐᕋᓛᓕᐊᕆᓯᒪᔭᖏᓐᓂᒃ, ᑕᑎᒋᔭᖃᖅᐸᑦᑐᑦ ᖃᐅᑕᒫᕈᔪᒃ ᓄᓇᕘᑉ ᐱᓕᕆᔾᔪᑎᖏᓐᓂᒃ ᐊᒻᒪ ᐱᓕᕆᕝᕕᖏᓐᓂᒃ ᐃᑲᔪᕐᓱᐃᔾᔪᑎᐅᓗᑎᒃ ᐃᓘᓐᓇᖏᓐᓂᒃ ᐊᑐᓕᖅᑎᑦᓯᓇᓱᐊᖅᑎᑦᓯᓂᒃᑯᑦ, ᐱᓗᐊᖅᑐᒥ ᐱᔾᔪᑎᖃᓗᐊᖅᑐᓂᒃ ᐊᑭᓕᕆᐊᓕᓐᓂᒃ ᒪᓕᒐᕐᓂᒃ ᓱᕋᐃᔪᕕᓂᕐᓂᒃ ᓄᐊᑦᑎᓇᓱᐊᕐᓂᐅᔪᖅ ᐅᕝᕙᓘᓐᓃᑦ ᐃᖅᑲᖅᑐᐃᕕᒻᒨᕆᐊᓕᐅᔪᑦ ᐃᖅᑲᖅᑐᐃᕕᒻᒨᖅᑐᒥᓂᐅᑎᓐᓇᒋᑦ.

ᑕᐃᒫᑦᑕᐅᖅ ᐃᓘᓐᓇᖏᑎᒍᑦ ᓄᓇᓕᐸᐅᔭᒃᑯᑦ ᐱᔨᑦᓯᕋᐅᑎᖏᑦ ᐱᕙᒻᒪᑕ, ᒪᓕᒐᕋᓛᓂᒃ ᐊᑐᓕᖅᑎᑦᓯᓇᓱᐊᕐᓂᖅ ᑮᓇᐅᔭᖃᖅᑎᑕᐅᕙᑦᑐᑦ ᓄᓇᓕᓐᓂᒃ ᐊᐅᓚᑦᓯᔾᔪᑎᓂᒃ ᑮᓇᐅᔭᓂᒃ ᐊᑐᖅᑐᑦᓴᓂᒃ. ᐃᖅᑲᓇᐃᔭᖅᑎᐅᔪᑦ ᐊᒻᒪ ᐱᓕᕆᔨᐅᔪᑦ ᐋᖅᑭᑦᓱᖅᑕᐅᒋᐊᖃᖅᐸᑦᑐᑦ ᐱᓕᕆᔾᔪᑎᓄᑦ ᐊᑐᐃᓐᓇᐅᔪᓂᒃ ᐊᕐᕌᒍᓕᒫᒧᑦ ᐊᑐᖅᑐᑦᓴᓂᒃ, ᕿᒥᕐᕈᐊᖅᑕᐅᕙᑦᑐᓂᒃ ᐊᒻᒪ ᑲᔪᓯᑎᑕᐅᕙᑦᑐᓂᒃ ᑲᑎᒪᔨᓄᑦ ᐊᕐᕌᒍᑕᒫᕐᓯᐅᑎᒥᒃ ᑮᓇᐅᔭᒃᑯᑦ ᐊᑐᖅᑐᑦᓴᓕᕆᔾᔪᑎᒃᑯᑦ. ᑕᒪᐅᓇ ᑐᑭᖃᖅᐸᑦᑐᑦ ᓄᓇᓕᕐᒥᐅᑕᓄᑦ ᑖᒃᓰᔭᐃᔭᐅᑎᐅᕙᑦᑐᑦ ᐃᑲᔪᕐᓱᐃᔾᔪᑎᐅᕙᑦᑐᑦ ᒪᓕᒐᓕᕆᓂᕐᒥᒃ ᐊᒻᒪ ᐊᓯᖏᓐᓂᒃ ᐊᑐᖅᑕᐅᔭᕆᐊᖃᖅᐸᑦᑐᓂᒃ ᐱᔨᑦᓯᕋᐅᑎᓂᒃ.

ᒪᓕᒐᕋᓛᑦ ᓴᖅᑭᔮᖅᑎᑦᓯᔾᔪᑎᐅᕙᑦᑐᑦ ᐊᓐᓂᕆᔭᐅᔪᓂᒃ ᐊᒻᒪ ᓯᕗᓪᓕᐅᔾᔭᐅᖁᔭᐅᕙᑦᑐᓂᒃ ᓄᓇᓕᑦᑎᓐᓂ, ᓴᐳᔾᔨᓂᒃᑯᑦ ᑭᒃᑯᑐᐃᓐᓇᐃᑦ ᐊᑦᑕᓇᖅᑐᒦᖁᓇᒋᑦ ᐊᒻᒪ ᐊᕙᑎᕗᑦ ᐊᑐᖅᑎᑦᓯᓇᓱᐊᖅᐸᑦᑐᑕ ᓴᐃᓕᖓᔪᓂᒃ ᐊᒻᒪ ᐃᑉᐱᒍᓲᑎᑦᓯᐊᖅᑐᓂᒃ ᓇᔪᒐᒃᑯᑦ ᖃᓂᒌᓂᒃ. ᑐᑭᓯᐊᔭᐅᑦᓯᐊᕈᑎᒃ ᐊᒻᒪ ᒪᓕᑦᑕᐅᕙᒃᑯᑎᒃ ᑕᒪᑦᑯᐊ ᒪᓕᒐᐃᑦ ᐃᑲᔫᑎᖃᕈᓐᓇᕐᒪᑕ ᐃᖃᓗᐃᑦ ᓄᓇᓕᐸᐅᔭᖓᓂᒃ ᐃᓅᓇᓱᐊᕐᕕᑦᓯᐊᕙᐅᖏᓐᓇᖁᓪᓗᒍ ᑭᒃᑯᑐᐃᓐᓇᕐᓄᑦ.

ᓄᓇᓕᕐᒥᐅᑕᐃᑦ ᑐᓴᐅᒪᓇᓱᐊᖁᔭᐅᕙᑦᑐᑦ ᐊᒻᒪ ᐱᖃᑕᐅᖃᑦᑕᕐᓗᑎᒃ ᓄᓇᓕᑦᑎᓐᓂ ᐊᑐᖅᑕᐅᔪᑦᓴᓂᒃ ᐃᓱᒪᓕᐅᕆᔾᔪᑎᑦᓴᒃᑯᑦ. ᐅᐸᒍᓐᓇᐸᑦᑐᓯ ᑲᑎᒪᔩᑦ ᑲᑎᒪᑎᓪᓗᒋᑦ, ᕿᒥᕐᕈᐊᖃᑕᐅᕙᓪᓗᓯ ᒪᓕᒐᕋᓛᑦᓴᓂᒃ ᓱᓕ ᐊᓯᔾᔨᕈᓐᓇᐸᑦᑐᓂᒃ ᑎᑎᕋᕐᓯᒪᓂᖏᒍᑦ, ᐊᒻᒪ ᑭᒃᑯᑐᐃᓐᓇᕐᓂᒃ ᑐᑭᓯᐅᒪᖃᑦᑕᐅᑎᓕᕆᔪᓄᑦ. ᑕᒪᒃᑯᐊ ᐊᑐᖅᑕᐅᔪᓐᓇᐸᑦᑐᑦ ᑭᒃᑯᑐᐃᓐᓇᑦᓯᐊᓄᑦ ᐊᒻᒪ ᐃᑲᔫᑎᖃᖅᐸᑦᑐᑎᒃ ᐋᖅᑭᑦᓱᐃᓂᒃᑯᑦ ᓇᒧᑦ ᑐᑭᓕᐊᕐᓂᐊᕐᓂᖓᓄᑦ ᓄᓇᓕᐸᐅᔭᕗᑦ.

##

ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:

ᔭᕝ ᐴᕐᓐ

ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ

ᓄᓇᓕᐸᐅᔭᐃᑦ ᐃᖃᓗᐃᑦ

867-979-5619 | G.Byrne@iqaluit.ca