ᑲᓇᑕᒥ ᓴᖖᒋᒃᑎᒋᐊᖅᑎᑦᑎᓂᖅ ᑮᓇᐅᔭᖃᖅᑎᑦᑎᓂᒃᑯᑦ ᐃᒥᕐᒧᑦ ᑭᓈᓗᖃᕐᕕᖕᒧᓪᓗ ᐊᐅᓚᔪᓐᓇᐅᑎᓄᑦ ᐃᑲᔪᖅᓱᐃᓂᕐᒧᑦ ᐃᒡᓗᓕᕆᓂᕐᒧᑦ ᐃᖃᓗᖕᓂ

07/04/2026

ᑐᓴᒐᔅᓴᐃᑦ ᓴᖅᑭᑎᑕᐅᔪᑦ

ᑲᓇᑕᒥ ᓴᖖᒋᒃᑎᒋᐊᖅᑎᑦᑎᓂᖅ ᑮᓇᐅᔭᖃᖅᑎᑦᑎᓂᒃᑯᑦ ᐃᒥᕐᒧᑦ ᑭᓈᓗᖃᕐᕕᖕᒧᓪᓗ ᐊᐅᓚᔪᓐᓇᐅᑎᓄᑦ ᐃᑲᔪᖅᓱᐃᓂᕐᒧᑦ ᐃᒡᓗᓕᕆᓂᕐᒧᑦ ᐃᖃᓗᖕᓂ
ᐄᐳᓗ 7, 2026 – ᐃᖃᓗᐃᑦ, ᓄᓇᕗᑦ

ᓴᖖᒋᔪᒥᒃ ᑲᓇᑕᖃᕐᓂᖅ ᐱᒋᐊᕐᕕᖃᖅᑐᖅ ᑮᓇᐅᔭᖃᖅᑎᑦᑎᓂᕐᒥᒃ ᓄᓇᓖᑦ ᐊᑐᖅᐸᒃᑕᖕᒋᑦ ᐊᐅᓚᔪᓐᓇᖁᓪᓗᒋᑦ ᐊᔪᕈᓐᓃᖅᑎᑦᑎᔪᒥᒃ ᐊᒥᓱᕈᕆᐊᖅᑎᑦᑎᓂᕐᒥᒃ ᐃᒡᓗᖃᖅᑎᑦᑎᓂᕐᒥᒃ ᓴᖖᒋᓂᖅᑖᖅᑎᑦᑎᓂᕐᒥᓪᓗ ᓄᓇᓕᖕᓂ. ᐅᕙᓂ ᑮᓇᐅᔭᑦ ᐊᐅᖅᑐᒃᓴᑦ 2025, ᑲᓇᑕᐅᑉ ᒐᕙᒪᒃᑯᖕᒋᑦ ᑐᓴᖅᑎᑦᑎᔪᑦ ᐱᕈᖅᓴᐃᓂᖅ ᓄᓇᓕᖕᓂ ᓴᖕᒋᔪᓂᒃ ᑮᓇᐅᔭᓂᒃ, ᐱᒋᐊᕈᑕᐅᓪᓗᐊᑕᖅᑐᖅ ᒪᑭᒪᑎᑦᑎᓂᐊᕐᓗᓂ ᑲᓇᑕᒥᐅᑦ ᐊᑐᖅᐸᒃᑕᖕᒋᓐᓂᒃ ᖃᐅᑕᒫᑦ.

ᑖᓐᓇ ᑮᓇᐅᔭᖅ ᓱᒃᑲᓕᒋᐊᖅᑎᑦᑎᓂᖅᑐᖅ ᓴᓇᔭᐅᓂᖕᒋᓐᓄᑦ ᐋᓐᓂᐊᕖᑦ, ᑭᐱᖖᒍᐃᔭᕐᕖᑦ, ᓯᓚᑦᑐᖅᓴᕐᕕᒡᔪᐊᑦ, ᐊᒻᒪᓗ ᓯᓚᑦᑐᖅᓴᕐᕖᑦ ᐱᔨᑦᑎᕋᖅᐸᒃᑐᓄᑦ ᓄᓇᓕᒃᑎᓐᓄᑦ; ᐃᑳᕈᑎᐅᔪᑦ ᓅᑎᑦᑎᕙᒃᑐᑦ ᐱᐅᔪᓄᑦ; ᐊᒻᒪᓗ ᐃᒪᖅ ᐊᒻᒪᓗ ᐃᖕᒋᕐᕋᔾᔪᑎᓄᑦ ᐊᑐᖅᑕᐅᕙᒃᑐᑦ ᐃᖕᒋᕐᕋᑎᑦᑎᕙᒃᑐᑦ ᓄᓇᓕᑦᑎᓐᓂ ᓄᓇᓕᐸᐅᔭᑦᑎᓐᓂᓗ.

ᐅᓪᓗᒥ, ᑲᓇᑕᐅᑉ ᐊᖕᒐᔪᖅᑳᕐᔪᐊᖕᒐ, ᒫᒃ ᑳᓂ, ᓴᖅᑭᑦᑎᔪᖅ ᐱᕈᖅᓴᐃᓂᖅ ᓄᓇᓕᖕᓂ ᓴᖖᒋᔪᓂᒃ ᑮᓇᐅᔭᓂᒃ. ᑖᒃᑯᐊ ᓄᑖᑦ ᑮᓇᐅᔭᑦ ᐊᑐᐃᓐᓇᐅᑎᑦᑎᓂᐊᖅᑐᑦ $51 ᐱᓕᐊᓐ ᐅᑭᐅᖅ ᖁᓕᑦ ᐅᖕᒐᑖᓄᑦ ᐱᖕᒐᓱᐃᓕᖅᑲᖕᒐᔪᒃᑯᑦ ᐃᑲᔪᖅᑐᐃᔾᔪᑕᐅᓗᑎᒃ ᐊᔾᔨᒌᖖᒋᑦᑐᓄᑦ ᐊᐅᓚᔪᓐᓇᐅᑎᓄᑦ ᐱᓕᕆᐊᓄᑦ ᐃᑲᔪᖅᑐᐃᔪᓂᒃ ᑮᓇᐅᔭᓕᐅᕋᓱᖕᓂᕐᒧᑦ ᐱᕚᓪᓕᕈᑎᒃᓴᓂᒃ, ᐃᒡᓗᓕᕆᓂᕐᒥᒃ, ᐱᖖᒍᐊᖅᑐᓕᕆᓂᕐᒥᒃ, ᐃᓕᓐᓂᐊᕐᓂᓕᕆᓂᕐᒥᒃ, ᐋᓐᓂᐊᖃᕐᓇᖖᒋᑦᑐᓕᕆᓂᕐᒥᒃ, ᓄᒃᑕᕐᓂᕐᒥᒃ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖕᒐᓄᑦ ᓱᖖᒋᐅᑎᕙᓪᓕᐊᓂᕐᒥᒃ ᑲᓇᑕᓕᒫᒥ.

ᐱᕈᖅᑎᑦᑎᕙᓪᓕᐊᓂᖅ ᓄᓇᓕᖕᓂ ᓴᖖᒋᔪᓂᒃ ᑮᓇᐅᔭᖁᑎᒋᔭᐅᔪᑦ ᓴᖖᒋᒃᑎᒋᐊᖅᑎᑦᑎᓪᓚᕆᖕᓂᐊᖅᑐᖅ ᒪᑭᒪᔾᔪᑎᐅᔪᓄᑦ – ᑮᓇᐅᔭᖃᖅᑎᑕᐅᓗᑎᒃ $17 ᐱᓕᐊᓐ ᖃᓂᒋᔮᓂ ᑲᓇᑕᒥ ᐊᕕᒃᑐᖅᓯᒪᔪᓂᒃ, ᐊᒻᒪᓗ ᐱᓕᐊᓐ-ᑲᓐᓂᕐᓂᒃ ᐱᔭᐅᔪᓂᒃ ᕼᐋᒻᒪᓚᒃᑯᓐᓂ ᐊᒻᒪᓗ ᓄᓇᕘᒥ ᑲᑐᔾᔨᖃᑎᒌᖕᓂᒃᑯᑦ ᐊᒻᒪᓗᑦᑕᐅᖅ ᐃᓛᒃᑰᖅᑐᑦ ᐊᑭᑐᔫᑎᓄᑦ. ᑲᑎᒃᑐᒋᑦ ᑲᓇᑕᒥ ᐊᕕᒃᑐᓯᒪᔪᑦ ᓇᓕᒧᒌᒃᑎᑕᐅᓂᖕᒋᑦ, ᐱᓕᕆᐊᒃᓴᐃᑦ ᑕᕝᕘᓇ ᑮᓇᐅᔭᑎᒍᑦ ᐃᑲᔪᖅᑐᐃᓂᐊᖅᑐᑦ 42,000-ᓂᒃ ᐃᖅᑲᓇᐃᔮᓂᒃ ᐊᕐᕌᒍᑕᒫᑦ. ᑖᓐᓇ ᑮᓇᐅᔭᖅ ᐊᒥᓱᕈᕆᐊᖅᑎᑦᑎᓂᐊᕆᕗᖅ ᑲᓇᑕᐅᑉ (GDP) ᐊᕐᕌᒎᑉ ᐃᓗᐊᓂ ᓴᖅᑭᑎᑕᐅᕙᒃᑐᑦ ᑲᑎᓕᒫᕐᓗᒋᑦ $95 ᐱᓕᐊᓐ-ᓂᒃ ᐊᕐᕌᒍᓂ ᖁᓕᓂ ᐊᒡᒋᖅᑐᓂ. ᑖᓐᓇ ᑐᑭᖃᖅᑐᖅ $12-ᐱᓕᐊᓐ ᖃᓂᒋᔮᓂ ᓄᓇᓖᑦ ᐊᑐᖅᐸᒃᑕᖕᒋᑦ ᐊᐅᓚᔪᓐᓇᖁᓪᓗᒋᑦ ᐱᕈᖅᑎᑦᑎᓇᓱᖕᓂᕐᒧᑦ ᐊᕐᕌᒍᑕᒫᑦ ᐊᕐᕌᒍᓄᑦ 8-ᓄᑦ ᐊᒡᒋᖅᑐᓄᑦ – ᒪᕐᕈᐃᖅᓱᓪᓗᐊᑲᓴᒃᑐᓂ ᐊᕐᕌᒍᓂ 8-ᓂ ᐊᓂᒍᖅᑐᓂ.

ᓇᓗᓇᐃᕐᓗᒍ ᓴᖅᑭᑕᐅᓂᖕᒐ, ᑲᓇᑕᐅᑉ ᒐᕙᒪᒃᑯᖕᒋᑦ ᑐᓴᖅᑎᑦᑎᔪᑦ ᓯᕗᓪᓕᖅᐹᑦ ᐱᓕᕆᐊᒃᓴᑦ ᑮᓇᐅᔭᖃᖅᑎᑕᐅᓂᐊᕐᓂᖕᒋᓐᓂᒃ ᐱᓕᕆᐊᖕᒍᓯᑲᐅᑎᒋᔪᓄᑦ ᓄᓇᓕᖕᓂ ᓴᖖᒋᔪᓂᒃ ᑮᓇᐅᔭᓂᒃ ᐱᕈᖅᓯᓂᕐᒧᑦ. ᑲᓇᑕᓕᒫᒥ, 13 ᐱᓕᕆᐊᒃᓴᑦ ᑮᓇᐅᔭᖅᑖᖅᑎᑕᐅᓂᐊᖅᑐᑦ ᐱᕈᖅᓴᐃᓂᖅ ᓄᓇᓕᖕᓂ ᓴᖖᒋᔪᓂᒃ ᑮᓇᐅᔭᓂᒃ ᑕᒪᑐᒪᓂ ᐱᓇᓱᐊᕈᓯᕐᒥ, ᑲᑎᒃᑐᒋᑦ $300 ᒥᓕᐊᓐ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᔪᑦ, ᐊᒻᒪᓗ ᐊᒥᓱᒃᑲᓐᓂᕐᓂᒃ ᓴᖅᑭᑦᑐᖃᕐᓂᐊᖅᑐᖅ ᐱᓇᓱᐊᕈᓯᕐᓂ ᐊᒡᒋᖅᑐᓂ. ᑖᒃᑯᐊ ᐱᓕᕆᐊᒃᓴᐃᑦ ᐱᕐᔪᐊᖕᒍᓂᐊᖅᑐᑦ ᓄᓇᓕᖕᓄᑦ ᐱᔨᑦᑎᕋᖅᑕᒥᓄᑦ.

ᐅᓪᓗᒥ, ᓘᕆ ᐃᑦᓚᐅᑦ, ᒪᓕᒐᓕᐅᖅᑎᕐᔪᐊᖅ ᓄᓇᕗᒻᒧᑦ, ᑐᓴᖅᑎᑦᑎᔪᖅ ᒐᕙᒪᑐᖃᒃᑯᓐᓂ ᑮᓇᐅᔭᓕᐅᕈᑕᐅᓇᓱᒃᑐᓂᒃ $108 ᒥᓕᐊᓐ ᐅᖕᒐᑖᓃᑦᑐᓂᒃ ᐃᑲᔪᖅᑐᐃᔾᔪᑎᒃᓴᓂᒃ ᐃᒥᕐᒧᑦ ᑭᓈᓗᖃᕐᕕᖕᒧᓪᓗ ᐊᐅᓚᔪᓐᓇᐅᑎᓄᑦ ᐱᐅᓯᒋᐊᕈᑎᒃᓴᓄᑦ ᐱᓕᕆᐊᒧᑦ ᐊᔪᖖᒋᔾᔪᑕᐅᓂᐊᖅᑐᒥᒃ ᓄᑖᓂᒃ ᐃᒡᓗᓕᐅᕈᑎᒃᓴᓂᒃ ᐃᖃᓗᖕᓂ.

ᑖᓐᓇ ᑮᓇᐅᔭᓕᐅᕈᑕᐅᓇᓱᒃᑐᖅ ᐃᑲᔪᖅᑐᐃᓂᐊᖅᑐᖅ ᐱᐅᓯᒋᐊᖅᑎᑦᑎᓂᕐᒥᒃ ᐃᖃᓗᖕᓂ ᐃᒥᕐᒧᑦ ᑭᓈᓗᖃᕐᕕᖕᒧᓪᓗ ᐊᐅᓚᔪᓐᓇᐅᑎᓄᑦ ᐊᖕᒍᒻᒪᑎᔪᒪᓂᕐᒧᑦ ᐊᒥᓱᕈᕆᐊᖅᑐᓂᒃ ᐃᒡᓗᖃᕆᐊᖃᕐᓂᕐᒥᒃ ᐃᓂᖃᖅᑎᑦᑎᓗᓂᓗ ᐃᓄᒋᐊᒃᓯᕙᓪᓕᐊᓂᕆᔭᐅᔪᒥᒃ. ᑖᓐᓇ ᐱᓕᕆᐊᖕᒍᔪᖅ ᐃᓚᖃᖅᑐᖅ ᓄᑖᖖᒍᕆᐊᖅᑎᑦᑎᓂᕐᒥᒃ ᓄᓇᒃᑰᕈᑎᒃᑯᑦ ᐃᒥᖅᑕᐅᑎᒃᑯᑦ ᒥᓪᓗᐊᖅᑕᐅᓂᒃᑯᓪᓗ ᐱᔨᑦᑎᕋᕐᓂᕆᔭᐅᕙᒃᑐᓄᑦ (ᐃᖕᒋᕐᕋᔾᔪᑎᓄᑦ ᐃᓂᒋᔭᐅᔪᓄᓪᓗ), ᐊᒻᒪᓗᑦᑕᐅᖅ ᐱᐅᓯᕚᓪᓕᖅᑎᑦᑎᓂᕐᓂᑦ ᐊᖕᒋᓪᓕᒋᐊᖅᑎᑦᑎᓂᕐᓗ ᐱᑕᖃᕇᖅᑐᓂᑦ ᓱᓪᓗᓕᖕᓂᑦ ᒪᑭᒪᐅᑎᓂᑦ, ᐃᑲᔪᖅᑐᕈᒪᓪᓗᒋᑦ ᐃᓄᒋᐊᖕᓂᖅᓴᐃᑦ ᐊᖕᒋᕐᕋᕆᔭᐅᔪᓂᒃ ᐱᕙᓪᓕᐊᑎᑦᑎᓂᕐᒥᒃ. ᑖᒃᑯᐊ ᐱᐅᓯᒋᐊᕈᑎᑦ ᐃᒡᓗᓕᐅᕈᑕᐅᓂᐊᖅᑐᑦ 2,000-ᓂᑦ 2,500-ᓄᑦ ᑎᑭᓪᓗᒍ ᓄᑖᓂᒃ ᐃᒡᓗᓂᒃ 2031-ᖕᒍᓕᖅᐸᑦ, ᓴᖖᒋᒃᑎᒋᐊᕐᓗᒍ ᑕᑎᒋᔭᐅᔪᓐᓇᕐᓂᖕᒐ ᐱᔭᕆᐊᖃᓪᓚᕆᒃᑐᑦ ᕼᐋᒻᒪᓚᒃᑯᓐᓂ ᐊᐅᓚᔪᓐᓇᐅᑎᓄᑦ ᐱᔨᑦᑎᕋᐅᑎᑦ, ᐃᑲᔪᖅᑐᐃᓗᑎᓪᓗ ᑲᔪᓰᓐᓇᕈᓐᓇᖅᑐᒥᒃ ᐊᖕᒋᓪᓕᕙᓪᓕᐊᓂᕐᒥᒃ ᑕᐃᒪᐃᓕᐅᕐᓂᕐᒥᓂᓗ ᐱᐅᓯᒋᐊᖅᑎᑦᑎᓗᑎᒃ ᐃᓅᓯᕆᔭᐅᔪᓂᒃ ᓄᓇᓕᖕᒥᐅᓄᑦ.

ᐊᖅᑯᑎᑦ ᑕᑕᓗᐊᓕᕌᖕᒐᑕ, ᐃᒪᖃᐅᑎᖕᒋᑦ ᐊᒃᓱᕈᓕᓲᖕᒍᒻᒪᑕ, ᓄᓇᓖᓪᓗ ᐱᕈᖅᐸᓪᓕᐊᔪᓐᓇᐃᓪᓕᓪᓗᑎᒃ, ᓴᓇᕙᓪᓕᐊᓂᐅᔪᖅ ᑲᑕᒃᐹᓪᓕᖅᑐᓂ ᐊᑭᑦᑐᕆᐊᓲᖕᒍᒻᒪᑕ. ᑖᒃᑯᐊ ᑮᓇᐅᔭᓕᐅᕈᑕᐅᓇᓱᒃᑐᑦ ᐱᕚᓪᓕᖅᑎᑦᑎᓂᐊᖅᑐᑦ ᑮᓇᐅᔭᓕᐅᕋᓱᖕᓂᕐᒧᑦ ᐱᓕᕆᐊᖕᒍᔪᓂᒃ, ᓴᖅᑭᑦᑎᓗᑎᒃ ᐊᑭᓕᖅᓱᖅᑕᐅᑦᑎᐊᖅᑐᓂᒃ ᐃᖅᑲᓇᐃᔮᒃᓴᓂᒃ, ᐊᒻᒪᓗ ᑐᓂᓯᓗᑎᒃ ᓇᖕᒥᓂᕆᔭᐅᔪᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᖅᑎᓂᒃ ᓇᓗᖅᑯᑎᖖᒋᓪᓗᑎᒃ ᐱᕈᖅᑎᑦᑎᕙᓪᓕᐊᓂᕐᒥᒃ. ᓈᒻᒪᒃᑐᒃᑯᑦ ᓄᓇᓖᑦ ᒪᑭᒪᔾᔪᑎᖕᒋᑦ ᐊᐅᓚᔪᓐᓇᖁᓪᓗᒋᑦ ᐱᔭᕆᐊᖃᒻᒪᕆᒃᑐᑦ ᒪᒃᐱᖅᓯᒃᑲᓐᓂᓂᕐᒧᑦ ᐊᒥᓲᓂᖅᓴᓂᒃ ᐃᒡᓗᓂᒃ, ᐃᑲᔪᖅᑐᐃᓗᓂ ᐊᑭᑐᓗᐊᖖᒋᑦᑐᓂᒃ, ᓴᖖᒋᔪᓂᓪᓗ ᓄᓇᓕᖕᓂ ᐱᕈᖅᑎᑦᑎᕙᓪᓕᐊᓂᕐᒥᒃ. ᓄᓇᓖᑦ ᓴᖖᒋᔫᖁᓪᓗᒋᑦ ᑮᓇᐅᔭᑦ ᑐᖖᒐᕕᒋᔭᐅᔪᑦ ᑲᓇᑕᐅᑉ ᒐᕙᒪᒃᑯᖕᒋᑦᑕ ᐸᕐᓇᐅᑖᓄᑦ ᒪᑭᒪᐅᑎᒃᓴᓂᑦ ᐱᕈᖅᓴᐃᓂᐊᕐᓗᑎᒃ ᑲᓇᑕᒥᑦ ᓴᖖᒋᔪᒥᑦ – ᐅᓪᓗᒥ ᑭᖕᒍᕚᕆᓂᐊᖅᑕᑦᑎᓐᓄᓪᓗ.

ᐅᖃᐅᓰᑦ

“ᓴᖖᒋᔪᒥᒃ ᑲᓇᑕᓕᐅᕐᓂᖅ ᐱᒋᐊᕐᕕᖃᖅᐳᖅ ᓴᖖᒋᔪᓂᒃ ᓄᓇᓕᓕᐅᕐᓂᕐᒥᒃ. ᓄᑖᒥᑦ ᐱᕈᖅᓴᐃᓂᖅ ᓄᓇᓕᖕᓂ ᓴᖖᒋᔪᒥᑦ ᑮᓇᐅᔭᖁᑎᓂᑦ, ᑮᓇᐅᔭᖃᖅᑎᑦᑎᕗᒍᑦ ᓴᓇᔪᒪᓪᓗᑕ ᐊᑐᖅᑕᐅᑦᑎᐊᕈᓐᓇᖅᑐᓂᒃ ᓇᑉᐸᖅᑎᖅᑕᐅᓯᒪᔪᓂᒃ ᓱᒃᑲᓕᔪᒥᒃ ᐊᖕᒋᑎᒋᔪᒥᓪᓗ ᑕᑯᓴᐅᓚᐅᖅᓯᒪᖖᒋᑦᑐᒥᒃ ᐊᕐᕌᒍᒐᓴᖕᓄᑦ – ᐊᖅᑯᑎᑦ, ᐋᓐᓂᐊᕐᕖᑦ, ᐃᓕᓐᓂᐊᕐᕖᑦ, ᐊᒻᒪᓗ ᐃᒥᖅᑕᕐᕖᑦ ᐃᑲᔪᖅᑐᐃᔪᑦ ᐃᓄᖕᓂᒃ, ᐃᖅᑲᓇᐃᔮᒃᓴᓂᒃ ᓴᖅᑭᑦᑎᓲᑦ, ᐊᒻᒪᓗ ᑲᑎᖖᒐᖃᑎᒌᒃᑐᓂᒃ ᓄᓇᓕᖕᓂ.”

ᒪᓕᒐᓕᐅᖅᑎ ᒍᕆᒍᕆ ᕌᐳᑦᓴᓐ, ᒥᓂᔅᑕ ᐃᒡᓗᓕᕆᓂᕐᒧᑦ ᒪᑭᒪᔾᔪᑎᓄᓪᓗ ᐊᒻᒪᓗ ᒥᓂᔅᑕ ᑲᒪᒋᔭᓕᒃ ᐸᓯᕕᒃ ᐱᕙᓪᓕᐊᔪᓕᕆᔨᒃᑯᓐᓄᑦ ᑲᓇᑕᒥ

“ᓄᑖᖅ ᐱᕈᖅᓴᐃᓂᖅ ᓄᓇᓕᖕᓂ ᓴᖖᒋᔪᒥᒃ ᑮᓇᐅᔭᖃᖅᑎᑕᐅᔾᔪᑎ ᐃᑲᔪᕐᓂᐊᖅᑐᖅ ᓄᓇᓕᖕᓂᒃ ᑲᓇᑕᓕᒫᒥ. ᑮᓇᐅᔭᖃᖅᑎᑦᑎᓂᒃᑯᑦ ᐃᒥᕐᒧᑦ ᑭᓈᓗᖃᕐᕕᖕᒧᓪᓗ ᐊᐅᓚᔪᓐᓇᐅᑎᓄᑦ ᐃᖃᓗᖕᓂ, ᐱᕈᖅᑎᑦᑎᕙᓪᓕᐊᕗᒍᑦ ᓄᓇᓕᖕᓂ ᑲᓇᑕᒥᓗ ᓴᖖᒋᔪᒥᒃ ᐊᑕᐅᑦᑎᒃᑯᑦ.”

ᓘᕆ ᐃᑦᓚᐅᑦ, ᒪᓕᒐᓕᐅᖅᑎᕐᔪᐊᖅ ᓄᓇᕗᒻᒧᑦ

“ᐃᖃᓗᖕᓂ ᓄᓇᓕᐸᐅᔭᒃᑯᑦ ᖁᔭᓕᔪᑦ ᑲᓇᑕᐅᑉ ᒐᕙᒪᒃᑯᖕᒋᓐᓂᒃ ᑕᒪᑐᒧᖕᒐ ᐱᒻᒪᕆᐊᓗᖕᒧᑦ ᑮᓇᐅᔭᖃᖅᑎᑕᐅᔪᒧᑦ. ᐱᓕᕆᖃᑎᖃᕐᓂᒃᑯᑦ ᐊᒻᒪᓗ ᐱᓕᕆᖃᑎᒋᓪᓗᒋᑦ ᕼᐋᒻᒪᓚᐅᔪᓂᒃ, ᓴᖅᑭᑦᑎᕙᓪᓕᐊᕗᒍᑦ ᒪᑭᒪᔾᔪᑎᓂᒃ ᐱᔭᐅᔭᕆᐊᓕᖕᓂᒃ ᐃᑲᔪᖅᑐᐃᔪᒪᓂᕐᒧᑦ ᐊᑭᑐᓗᐊᖖᒋᑦᑐᓂᒃ ᐊᖕᒋᕐᕋᕆᔭᐅᔪᓂᒃ ᐊᒥᓱᕈᕆᐊᖅᑎᑦᑎᔪᒪᓂᕐᒧᓪᓗ ᓇᖕᒥᓂᖅ ᐃᒡᓗᖃᕐᓂᕐᒧᑦ ᐱᕕᒃᓴᐅᔪᓐᓇᖅᑐᓂᒃ ᐃᖃᓗᖕᒥᐅᓄᑦ ᐃᓄᖕᓄᓪᓗ, ᓴᖖᒋᒃᑎᒋᐊᖅᑎᑦᑎᓯᓐᓈᑦ ᓄᓇᓕᑦᑎᓐᓂ ᓯᕗᓂᒃᓴᑦᑎᓐᓄᑦ.”

ᒪᐃᔭ ᓵᓚᒪᓐ ᐊᕙ, ᐃᖃᓗᐃᑦ ᓄᓇᓕᐸᐅᔭᒃᑯᓐᓄᑦ

ᓱᓕᔪᑦ

ᒐᕙᒪᑐᖃᒃᑯᑦ ᐊᑐᕐᓂᐊᖅᑐᑦ $108,721,940-ᓂᒃ ᑖᔅᓱᒧᖕᒐ ᐱᓕᕆᐊᒃᓴᒧᑦ ᐊᑐᖅᑎᑦᑎᑲᐅᑎᒋᓂᒃᑯᑦ ᐱᕈᖅᓴᐃᓂᕐᒧᑦ ᓄᓇᓕᖕᓂ ᓴᖖᒋᔪᓂᒃ ᑮᓇᐅᔭᓂᒃ.

· ᐱᒋᐊᕐᓗᓂ 2026-27-ᒥ, ᐱᕈᖅᓴᐃᓂᖅ ᓄᓇᓕᖕᓂ ᓴᖖᒋᔪᓂᒃ ᑮᓇᐅᔭᖁᑎᒋᔭᐅᔪᑦ ᐱᑎᑦᑎᓂᐊᖅᑐᖅ:

$17.2 ᐱᓕᐊᓐ ᐅᑭᐅᓄᑦ ᖁᓕᑦ ᐅᖕᒐᑖᓄᑦ ᑲᓇᑕᒥ ᐊᒻᒪᓗ ᓄᓇᕘᒥ ᐊᕕᒃᑐᖅᓯᒪᔪᓄᑦ, ᐃᓚᖃᖅᑐᓂ $5 ᐱᓕᐊᓐ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᒪᑭᒪᔾᔪᑎᓄᑦ ᑮᓇᐅᔭᖁᑎᒋᔭᐅᔪᓂᒃ ᑕᒪᓐᓇᓗ ᑲᔪᓯᑎᑕᐅᓂᐊᖅᑐᓂ ᐊᕐᕌᒍᓂ ᐱᖕᒐᓱᓂ;
$6 ᐱᓕᐊᓐ ᐅᑭᐅᑦ ᖁᓕᑦ ᐅᖕᒐᑖᓄᑦ ᑐᓂᓯᑦᑕᐅᑎᒋᓂᒃᑯᑦ, ᐊᒻᒪᓗ,
$27.8 ᐱᓕᐊᓐ ᐅᑭᐅᑦ ᖁᓕᑦ ᐅᖕᒐᑖᓄᑦ ᐊᒻᒪᓗ, $3 ᐱᓕᐊᓐ ᐊᕐᕌᒍᑕᒫᑦ ᑲᔪᓰᓐᓇᕐᓗᓂ 2%-ᒦᒃᑐᓂ, ᐸᕐᓇᒃᑕᐅᓯᒪᓪᓗᓂ, ᐊᖅᑯᑎᒋᓗᒍ ᓄᓇᓕᖕᓂ ᑐᕌᖕᒐᔪᑦ (ᑲᓇᑕᒥ ᓄᓇᓕᖕᓂ ᐱᕈᖅᓴᐃᓂᕐᒧᑦ ᑮᓇᐅᔭᑦ).
ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᐊᒻᒪᓗ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ ᐱᓕᕆᐊᖕᒍᔪᓂ, ᑲᓇᑕᒥ ᐊᕕᒃᑐᖅᓯᒪᔪᑦ ᐊᑭᖕᒋᓐᓂᒃ ᓇᓕᒧᓕᖅᑎᑦᑎᔭᕆᐊᖃᕐᓂᐊᖅᑐᑦ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᔾᔪᑎᓂᒃ. ᒐᕙᒪᑐᖃᒃᑯᓐᓂᑦ ᑮᓇᐅᔭᖃᖅᑎᑕᐅᓂᖅ ᒪᓕᖕᓂᐊᖅᑐᖅ ᐊᑎᓕᐅᖅᑕᐅᓂᖕᒐᓄᑦ ᑮᓇᐅᔭᖃᑎᑕᐅᓂᕐᒧᑦ ᐊᖕᒋᕈᑎᓂᑦ.
ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᐊᒻᒪᓗ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ ᐱᓕᕆᐊᖕᒍᔪᓂ, ᖃᔅᓰᓐᓇᐅᓛᖕᒐ 20% ᐊᑕᖕᒋᕐᓗᒍ ᑮᓇᐅᔭᖃᖅᑎᑕᐅᔾᔪᑎ ᓴᓂᕐᕙᒃᑕᐅᔪᖅ ᑐᕌᖕᒐᓂᐊᖅᑐᖅ ᐱᓕᕆᐊᒃᓴᓄᑦ ᓄᓇᓕᕋᓛᖕᒍᓂᖅᓴᓂ, ᐅᑭᐅᖅᑕᖅᑐᒥ, ᓄᓇᖃᖅᑳᖅᓯᒪᔪᓪᓗ ᓄᓇᓕᖕᒋᓐᓂ. ᑕᐃᑰᓇ ᑐᓂᓯᑲᐅᑎᒋᓂᒃᑯᑦ, ᐃᒻᒪᖄ 10% ᑮᓇᐅᔭᑦ ᑐᕌᖕᒐᓂᐊᖅᑐᑦ ᑮᓇᐅᔭᖃᖅᑎᑕᐅᔪᓄᑦ ᓄᓇᖃᖅᑳᖅᓯᒪᔪᑦ ᓄᓇᓕᖕᒋᓐᓄᑦ.
ᑕᒪᑐᒪᓂ ᐱᓇᓱᐊᕈᓯᕐᒥ, ᒐᕙᒪᑐᖃᒃᑯᑦ ᑐᓴᖅᑎᑦᑎᔪᑦ 13-ᓂᒃ ᐱᓕᕆᐊᒃᓴᓂᒃ ᑮᓇᐅᔭᖃᖅᑎᑕᐅᔪᓂᒃ ᑕᐃᑰᓇ ᑲᔪᓯᑎᑦᑎᓯᑲᐅᑎᒋᓂᕐᒧᑦ ᐊᑐᕐᓂᐊᖅᑐᓄᑦ. ᐊᔪᖅᑎᑕᐅᖖᒋᑦᑐᑦ ᐱᓕᕆᐊᒃᓴᒧᑦ ᐱᓇᓱᒃᑐᑦ ᓇᓂᓯᔪᓐᓇᖅᑐᑦ ᑐᓴᖅᑕᐅᔪᒃᓴᒃᑲᓐᓂᕐᓂᒃ ᖃᓄᖅ ᓇᒃᓯᐅᔾᔨᔪᓐᓇᕐᒪᖕᒑᑕ ᓯᕗᓪᓕᕐᒥ ᐱᔪᒪᓂᕆᔭᒥᓂᒃ ᐱᔭᐅᑦᑕᐅᑎᒋᔪᓐᓇᖅᑐᒃᑯᑦ ᐱᓕᕆᐊᖕᒍᔪᓄᑦ ᐅᕘᓇ ᐱᕈᖅᓯᐊᓂᖅ ᓄᓇᓕᖕᓂ ᓴᖖᒋᔪᒥᒃ ᑮᓇᐅᔭᖃᖅᑎᑕᐅᓂᖅ Build Communities Strong Fund ᐃᑭᐊᖅᑭᕕᒃᑯᑦ.
- ᐱᓕᕆᐊᒧᑦ ᑮᓇᐅᔭᖃᖅᑎᑕᐅᓂᖅ ᒪᓕᖕᓂᐊᖅᑐᖅ ᐊᑎᓕᐅᖅᑕᐅᓂᖕᒐᓄᑦ ᐃᑲᔫᑎ ᐊᖕᒋᖃᑎᒌᒍᑎ ᑲᓇᑕᐅᑉ ᒐᕙᒪᒃᑯᖕᒋᓐᓄᑦ ᑐᓂᔭᐅᔪᒧᓪᓗ.

o ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᖅ ᒪᓕᖕᓂᐊᖅᑐᖅ ᑲᔪᓯᑎᑦᑎᓂᕐᒥᒃ ᑕᒪᐃᓐᓂᑦᑎᐊᖅ ᐊᑐᖅᑕᐅᔭᕆᐊᓕᖕᓂᒃ ᐊᒃᑐᐊᓂᓕᖕᓂᒃ ᐅᖃᖃᑎᖃᕐᓂᕐᒧᑦ ᓄᓇᖃᖅᑳᖅᑐᓂᒃ ᐊᕙᑎᒥᒡᓗ ᖃᐅᔨᓴᕐᓂᕐᒧᑦ ᐱᓕᕆᐊᖕᒍᔭᕆᐊᖃᐸᒃᑐᓂᒃ.

· ᑲᓇᑕᒥ ᓂᐅᕕᕐᓂᖅ ᐊᑐᐊᒐᖅ ᐊᑐᕐᓂᐊᖅᑐᖅ ᓄᓇᓖᑦ ᐊᑐᖅᐸᒃᑕᖕᒋᑦ ᐊᐅᓚᔪᓐᓇᖁᓪᓗᒋᑦ ᑮᓇᐅᔭᖅᑐᕈᑕᐅᔪᓄᑦ ᑐᕌᖕᒐᑦᑎᐊᕋᓗᐊᕐᒪᖕᒑᑕ ᐊᒥᓲᓂᖅᓴᓄᑦ ᑭᒃᑯᑐᐃᓐᓇᓄᑦ ᑮᓇᐅᔭᖁᑎᒋᔭᐅᔪᓂᒃ ᑲᓇᑕᒥᐅᓄᑦ ᑮᓇᐅᔭᓕᐅᕋᓱᒃᐸᖕᓂᕐᒧᑦ – ᓴᖅᑭᑦᑎᓂᖅ ᑲᓇᑕᒥᐅᓄᑦ ᐃᖅᑲᓇᐃᔮᒃᓴᓂᒃ, ᐊᑐᕐᓗᑎᑦ ᑲᓇᑕᒥᐅᓂᒃ ᐊᑐᖅᑕᐅᔪᓐᓇᖅᑐᓂᒃ, ᐱᕚᓪᓕᖅᑎᑦᑎᓂᕐᓗ ᑲᓇᑕᒥᐅᑦ ᓄᓇᓕᖕᒋᓐᓂᒃ.

ᐊᒃᑐᐊᓂᓖᑦ ᐊᑦᑕᑕᕐᕕᐅᔪᓐᓇᖅᑐᑦ

· ᐱᕈᖅᓴᐃᓂᖅ ᓄᓇᓕᖕᓂ ᓴᖖᒋᔪᒥᒃ ᑮᓇᐅᔭᖃᖅᑎᑕᐅᓂᖅ Build Communities Strong Fund

· ᐱᕈᖅᓴᐃᓂᖅ ᓄᓇᓖᑦ ᓴᖖᒋᓂᖕᒋᓐᓂᒃ ᑐᕌᓐᑐᒥ Building Stronger Communities in Toronto

· ᑲᓇᑕᐅᑉ ᐊᖕᒐᔪᖅᑳᕐᔪᐊᖕᒐ ᑳᕐᓂ ᐅᖃᐅᓯᖃᖅᑐᖅ ᑮᓇᐅᔭᖅᑐᕈᑎᒃᓴᓄᑦ 2025-ᒧᑦ ᐸᕐᓇᐅᑎᒥᒃ ᓄᓇᓖᑦ ᓴᖖᒋᒃᑎᑉᐸᓪᓕᐊᖁᓪᓗᒋᑦ Prime Minister Carney shares Budget 2025 plan to build communities strong

· ᑮᓇᐅᔭᑦ ᐊᐅᖅᑐᒃᓴᑦ 2025 Budget 2025

ᖃᐅᔨᒋᐊᕐᕕᒃᓴᑦ

ᑐᑭᓯᒋᐊᒃᑲᓐᓂᕈᒪᒍᕕᑦ (ᐱᕙᓪᓕᐊᔪᓕᕆᔨᓄᑐᐊᖅ), ᖃᐅᔨᒋᐊᕐᕕᒋᓗᒍ:

ᕆᓃ ᓚᑉᓛᓐᑦ ᐳᕌᒃᑐ

ᑐᓴᒐᒃᓴᓕᕆᔨᓄᑦ ᐅᖃᐅᔾᔪᐃᔨᒻᒪᕆᒃ ᐱᕙᓪᓕᐊᔪᓄᓪᓗ ᑎᑎᕋᖅᑎ

ᐊᓪᓚᕝᕕᖕᒐ ᒥᓂᔅᑕ ᐃᒡᓗᓕᕆᓂᕐᒧᑦ ᒪᑭᒪᑎᑦᑎᓂᕐᒧᓪᓗ ᒥᓂᔅᑕ ᑲᑎᒋᔭᒃᓴᖃᖅᑕᐅᓪᓗᓂ ᐸᓯᕕᒃ ᐱᕙᓪᓕᐊᔪᓕᕆᔨᓄᑦ ᑲᓇᑕᒥ

Renee.Proctor@infc.gc.ca

ᑐᓴᒐᒃᓴᓕᕆᔨ