ᑲᓇᑕᐅᑉ ᐅᓪᓗᖓᓂ ᓇᓪᓕᐅᓂᕐᓯᐅᕐᓂᖅ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᑲᓇᑕᐅᑉ ᐅᓪᓗᖓᓂ ᓇᓪᓕᐅᓂᕐᓯᐅᕐᓂᖅ
ᔪᓂ 27, 2022 - ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᐃᑦ ᐃᖃᓗᐃᑦ ᖃᐅᔨᒪᖁᔨᓕᕆᕗᑦ ᐃᖃᓗᒻᒥᐅᑕᓂᑦ ᐊᕐᕌᒍᑦᑎᓐᓂ ᑲᓇᑕᐅᑉ ᐅᓪᓗᖓᓂ

ᖃᓄᐃᓕᐅᕈᑎᐅᓛᖅᑐᓂᑦ ᑕᓪᓕᒥᕐᒥ, ᔪᓚᐃ 1, 2022:

• 9:00 ᐅᓪᓛᒃᑯᑦ 10:30-ᒧᑦ ᐅᓪᓗᒃᑯᑦ: ᐊᑭᑲᖕᖏᑦᑐᓂᑦ ᓵᑦᑐᔮᓂᑦ ᐸᓚᐅᒑᓂᑦ ᐅᓪᓛᕈᒻᒥᑕᐅᓲᓂᑦ ᓂᕆᓛᖅᑐᑦ ᐱᖕᖑᐊᕐᕕᐊᓗᒻᒥ (ᐊᑕᐅᓯᕐᒥᑦ ᐸᓕᐊᒥᑦ/ᓵᒥᑦ ᐱᑎᑕᐅᒐᔭᖅᑐᖅ ᐊᑕᐅᓯᖅ ᐃᓄᒃ).
• 10:00 ᐅᓪᓛᒃᑯᑦ 11:00-ᒧᑦ ᐅᓪᓗᒃᑯᑦ: ᓱᕈᓰᑦ ᑐᒃᑲᕆᐊᓕᖏᓐᓂᑦ/ᐱᓲᑎᖏᓐᓂᑦ ᑕᑯᒥᓇᓕᕐᓱᐃᓂᖏᑦ ᐊᑐᖅᑕᐅᓛᖅᑐᖅ ᐱᖕᖑᐊᕐᕕᐊᓘᑉ ᓄᓇᓯᐅᑎᓄᑦ ᓄᖅᑲᖓᕕᖓᓂ. ᐱᖃᑕᐅᔪᑦ ᑕᑯᑦᓴᐅᑎᑦᓯᔪᓐᓇᖅᑎᑕᐅᓛᖅᑐᑦ ᓴᓇᐅᒐᖏᓐᓂᑦ ᐱᔾᔪᓯᐊᕋᓱᓪᓗᑎᒃ.
• 12:00 ᐅᓪᓗᒃᑯᑦ: ᐊᕐᕌᒍᑕᒫᕐᓯᐅᑎ ᔪᓚᐃ 1-ᒥ ᐊᑐᕆᐊᒃᑯᑦ ᒪᓕᑦᑎᒌᓛᖅᑐᑦ ᐱᒋᐊᕐᓗᑎᒃ ᐱᖕᖑᐊᕐᕕᐊᓘᑉ ᓴᓂᐊᓂᑦ ᐅᓪᓗᒃᑯᑦ 12-ᒨᖅᐸᑦ ᐊᒻᒪ ᓄᖅᑲᕐᓗᑎᒃ ᓴᓂᐊᓂ ᓇᑲᓱᒃ ᐃᓕᓐᓂᐊᕐᕕᐅᑉ 1-ᒨᓪᓗᐊᖅᐸᑦ ᐅᓐᓄᓴᒃᑯᑦ. ᑕᑯᒥᓇᓕᖅᑎᑦᓯᓯᒪᔪᑦ ᐱᖃᑕᐅᔪᒪᓛᖅᑐᑦ ᐊᑎᓕᐅᕈᓐᓇᖅᑐᑦ ᖃᐅᔨᒋᐊᕐᓗᒍ ᐱᓕ ᐋᓐᑐᓴᓐ ᐅᕗᖓ ᐅᖄᓚᕕᒋᓗᒍ 979-5620 ᐅᕝᕙᓘᓐᓃᑦ ᐅᕗᖓ ᑎᑎᕋᕐᕕᒋᓗᒍ b.andersen@iqaluit.ca ᐱᖓᑦᓯᕐᒧᑦ, ᔪᓂ 29. ᑕᑯᒥᓇᓕᖅᑎᑦᓯᓯᒪᔪᑦ ᐱᐅᒋᔭᐅᓛᖑᔪᑦ ᐱᔾᔪᓯᐊᖅᑎᑕᐅᓛᖅᑐᑦ.
• 1:00-ᒥᑦ ᐅᓐᓄᓴᒃᑯᑦ 4:00-ᒧᓄᑦ ᐅᓐᓄᓴᒃᑯᑦ: ᔪᓚᐃ 1-ᒥ ᓂᔾᔭᐅᓯᔭᓛᖅᑐᑦ ᓇᑲᓱᒃ ᐃᓕᓐᓂᐊᕐᕕᐅᑉ ᓴᓂᐊᓂ. ᓂᔾᔭᐅᓯᔭᕐᓂᖏᓐᓂ ᐃᓅᓯᓕᕆᓛᕐᒥᔪᑦ ᓇᓪᓕᐅᓂᕐᓯᐅᕈᑎᒥᑦ ᐱᒋᐊᕐᓗᑎᒃ 1:25 ᐅᓐᓄᓴᒃᑯᑦ. ᑕᐃᒃᑯᐊ ᐱᔭᕇᕈᒪᔪᑦ ᐊᖏᕈᑎᒥᓂᒃ ᑲᓇᑕᒥᐅᑕᕈᕐᓂᕐᒥᑦ ᑕᐃᒪᐃᒍᓐᓇᕐᓯᑎᑕᐅᓛᕐᒥᔪᑦ ᐅᓐᓄᓴᒃᑯᑦ 2:30-ᐸᑦ ᓂᔾᔭᐅᓯᔭᖅᑐᑦ ᑕᖃᐃᕐᓯᑎᑕᐅᓂᖏᓐᓂ.

• 1:00-ᒥᑦ ᐅᓐᓄᓴᒃᑯᑦ 4:00-ᒧᓄᑦ ᐅᓐᓄᓴᒃᑯᑦ: ᐱᖕᖑᐊᖅᑐᓕᕆᔨᒃᑯᑦ ᐱᓕᕆᐊᖃᓛᕐᒥᔪᑦ ᓂᕆᐅᓇᖕᖏᓪᓗᑎᒃ ᐃᓄᑦᓯᐅᑎᓂᑦ ᓂᕿᓂᑦ ᑐᓂᐅᖅᑲᐃᖃᑦᑕᓛᕐᒥᔪᑦ ᓇᒥᑐᐃᓐᓇᖅ ᐃᖃᓗᐃᑦ ᐃᓗᐊᓂ ᐅᓐᓄᓴᒃᑯᑦ 1-ᒥᓂᒃ 4-ᒧᓄᑦ ᐅᕝᕙᓘᓐᓃᑦ ᓂᖀᑦ ᓄᖑᒐᓱᓐᓂᖏᓐᓂ.
• 1:15 ᐅᓐᓄᓴᒃᑯᑦ ᐱᔭᑦᓴᑦ ᓄᖑᒐᓱᓐᓂᖏᓐᓂ: ᐃᖃᓗᐃᑦ ᖃᑦᑎᕆᔨᒃᑯᖏᑦ ᐆᓇᖅᑐᓂᑦ ᓯᓕᑐᖅᑎᑦᓯᓛᕐᒥᔪᑦ ᐲᓂᓯᓂᑦ ᐆᓯᒪᔪᓂᑦ ᐃᖃᓗᐃᑦ ᐊᓃᕐᕕᖓᓂ.
• 9:00-ᒥᓂᒃ ᐅᓪᓛᒃᑯᑦ ᐱᔭᕇᕋᓱᓐᓂᖏᓐᓂ: ᔨᒥ ᕿᓚᕝᐸᖅ ᐃᓱᒪᒋᓪᓗᒍ ᐅᓪᓚᓐᓂᖅ. ᐊᑭᓖᒋᐊᓕᒃ $25-ᓂᑦ ᐅᓪᓚᖃᑕᐅᔪᒪᓂᐊᕈᕕᑦ. ᑮᓇᐅᔭᐃᑦ ᓄᐊᑕᐅᔪᑦ ᑐᓂᔭᐅᓛᖅᑐᑦ ᔨᒥ ᕿᓚᕝᐸᖅ ᐃᓱᒪᒋᓪᓗᒍ ᑐᖕᖓᕕᒻᒧᑦ. ᐊᕝᕙᖓ ᐅᓪᓚᓐᓂᐅᑉ ᐱᒋᐊᓛᖅᑐᖅ 9-ᒥ ᐅᓪᓛᒃᑯᑦ, 10 ᑭᓛᒥᑕᓂᑦ ᐊᒻᒪ 5 ᑭᓛᒥᑕᓂᑦ ᐅᓪᓚᒋᐊᓛᖅᑐᑦ 11:30-ᐸᑦ ᐅᓪᓗᒃᑯᑦ. ᐊᑎᓕᐅᕈᒪᔪᑦ ᐱᕕᖃᖅᑎᑕᐅᔪᑦ ᔪᓂ 30-ᒧᑦ. ᐅᓇ ᐊᑎᓕᐅᕈᓐᓇᐅᑎᓕᐅᕈᑎ ᑕᐃᔭᐅᔪᖅ (Activenet) ᐊᒻᒪ ᐊᑎᓕᐅᕐᕕᒃ ᐅᕙᓃᑦᑐᑦ: https://anc.ca.apm.activecommnities.com/iqaluitrecreation/home
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ ᕼᐊᐃᓐᓇᓕ ᑎ ᒐᔾᒪᓐ ᐅᕗᖓ H.DeGuzman@iqaluit.ca

ᓄᓇᓕᓐᓂ ᑐᓴᕋᑦᓴᓕᕆᔨᓂᑦ ᖃᐅᔨᒋᐊᖃᑦᑕᕆᑦᓯ ᑐᓴᕋᑦᓴᓂᑦ ᐊᒻᒪ ᒪᓕᓪᓗᒋᑦ ᓄᓇᓕᐸᐅᔭᐃᑦ ᐃᖃᓗᐃᑦ ᐱᖕᖑᐊᖅᑐᓕᕆᔨᒃᑯᑦ ᕙᐃᔅᐳᒃᑯᑦ ᒪᑉᐱᒐᖓᑦ ᑲᓇᑕᐅᑉ ᐅᓪᓗᖓᓂ ᖃᓄᐃᓕᐅᖅᑐᖃᓛᕐᒪᖔᖅ.

ᖃᓄᐃᓕᐅᕈᑎᕈᓘᔭᐃᑦ ᐊᑭᓕᕐᓱᖅᑕᐅᓯᒪᔪᑦ ᑲᓇᑕᒥ ᐃᑦᑕᕐᓂᓴᓕᕆᔨᒃᑯᓐᓂᑦ ᐊᒻᒪ ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖏᓐᓂᑦ.

###

ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
 

ᐱᐅᓪ ᐋᓐᑐᓴᓐ
ᐱᖕᖑᐊᖅᑐᓕᕆᔨᒃᑯᑦ ᐱᓕᕆᐊᑦᓴᓕᕆᔨᖓᑦ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5680 | b.andersen@iqaluit.ca