ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᑐᓂᖅ ᑕᐃᖑᑎᓪᓗᒍ ᓄᓇᓕᓐᓂ ᕿᑲᕐᓇᐅᑎᓪᓗᒍ ᐊᑐᕆᐊᓂ ᐊᑦᑕᓇᔾᔭᐃᕐᓯᒪᓂᕐᒥᑦ ᐱᓕᕆᐊᑦᓴᖅ
ᐃᐳᕈ 16, 2024 - ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖓᑕ ᓄᓇᓕᓐᓂ ᒪᓕᒐᕋᓛᓂᒃ ᐊᑐᓕᖅᑎᑦᓯᓇᓱᐊᖅᑎᖏᑕ ᐃᖅᑲᓇᐃᔭᖅᑎᖏᑦ, ᑲᑐᔾᔨᖃᑎᖃᖅᑐᑎᒃ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᒃ, ᐊᐅᓚᑦᓯᓚᐅᖅᑐᑦ ᑭᒃᑯᑐᐃᓐᓇᕐᓂᒃ ᖃᐅᔨᓴᖅᐸᑦᑐᑎᒃ ᓱᕐᕋᓯᒪᔪᖃᖏᒃᑲᓗᐊᕐᒪᖔᑕ ᐊᒻᒪ ᐊᑐᕆᐊᓂ ᐊᑦᑕᓇᔾᔭᐃᕐᓯᒪᒐᓗᐊᕐᒪᖔᑕ ᖃᐅᔨᓴᖅᐸᑦᑐᑎᒃ ᐊᒻᒪ ᓄᓇᒃᑰᔫᓂᒃ ᓄᖅᑲᑎᑦᓯᕙᑦᑐᑎᒃ ᓄᓇᓕᐸᐅᔭᐃᑦ ᐃᖃᓗᐃᑦ ᐃᓗᐊᓂ ᓱᑐᐃᓐᓇᕐᒥ ᐃᐳᕈ 5 ᐊᒻᒪ 6-ᖑᑎᓪᓗᒍ, ᑐᓂᖅ ᑕᐃ ᓇᓪᓕᐅᓂᕐᓯᐅᕈᑎᐅᑉ ᐱᓇᓱᐊᕈᓯᖓᑕ ᓄᖕᖑᑯᑖᖓᓂ.
200-ᓗᐊᓂᒃ ᓄᓇᒃᑰᔫᓂᒃ ᖃᐅᔨᓴᓚᐅᖅᑐᑦ ᐊᐅᓚᑦᓯᑎᓪᓗᒋᑦ ᐅᑯᐊ ᐱᓕᕆᐊᖑᓪᓗᑎᒃ
ᓱᕐᕋᓯᒪᖏᑦᑐᑦ ᒪᓕᒐᕐᓂᒃ ᓱᕋᐃᓯᒪᓚᐅᖅᑐᑦ
• ᑎᓴᒪᑦ (4) ᓄᓇᒃᑰᔫᑦ ᖃᐅᔨᔭᐅᓚᐅᖅᑐᑦ ᐊᐅᓚᑕᐅᓂᖏᓐᓂᒃ ᑎᑎᖅᑲᖁᑎᖃᕋᑎᒃ ᓄᓇᒃᑰᔫᒥ ᐱᓯᒪᒋᐊᓕᓐᓂᒃ ᐊᒻᒪ/ᐅᕝᕙᓘᓐᓃᑦ ᓄᑖᕈᖅᑎᒋᐊᓕᓐᓂᒃ ᓇᓗᓇᐃᔭᐃᑎᖃᖅᑐᓂᒃ.
• ᒪᕐᕉᒃ (2) ᐊᖁᑏᒃ ᐊᐅᓚᑦᓯᓐᓂᓚᐅᖅᑑᒃ ᓄᓇᒃᑰᔫᒥᒃ ᐱᓯᒪᑦᓯᒐᑎᒃ ᐊᖁᑦᑐᖅᓯᐅᑎᒥᓂᒃ ᓚᐃᓴᒥᒃ, ᒪᓕᒐᑎᒍᑦ ᐱᓯᒪᐃᓐᓇᕆᐊᓕᓐᓂᒃ.
• ᒪᕐᕉᒃ (2) ᐊᖁᑏᒃ ᐊᐅᓚᑦᓯᓐᓂᓚᐅᖅᑑᒃ ᓄᓇᒃᑰᔫᒥᒃ ᐊᑐᖅᑐᓂᒃ ᓇᓪᓕᐅᒃᑯᒫᖃᕋᑎᒃ.
• 7 ᐊᖁᑏᑦ ᖃᐅᔨᔭᐅᓚᐅᖅᑐᑦ ᓄᓇᒃᑰᔫᖏᑕ ᖃᐅᒪᖁᑎᖏᑦ ᐃᑭᒍᓐᓇᑎᓐᓇᒋᑦ ᐅᕝᕙᓘᓐᓃᑦ ᖃᐅᒪᖏᑦ ᐅᖓᑖᓃᑦᑐᑦ ᓄᓇᒃᑰᔫᑉ.
• ᒪᕐᕉᒃ (2) ᐊᖁᑏᒃ ᓄᓇᒃᑰᔫᓚᐅᖅᑑᒃ ᓱᒃᑲᓕᓗᐊᖅᑐᑎᒃ.
• ᒪᕐᕉᒃ (2) ᐊᖁᑏᒃ ᒪᓕᓚᐅᖏᑦᑑᒃ ᐊᑐᕆᐊᒃᑯᑦ ᐃᖏᕐᕋᔪᓄᑦ ᐊᐅᓚᑦᓯᔾᔪᑎᒥᒃ.
• ᐊᓯᖏᓐᓂᒃ ᐱᑎᑦᓯᕙᓚᐅᖅᑐᑦ ᐊᔾᔨᒌᖏᑦᑐᓂᒃ ᒪᓕᒐᕐᓂᒃ ᓱᕋᐃᓯᒪᓚᐅᖅᑐᓂᒃ.
ᑲᒪᔩᑦ ᑕᑯᓐᓇᖅᐸᓚᐅᖅᑐᑦ ᑕᒪᒃᑮᒃ ᐊᖁᑎᖓ ᐊᒻᒪ ᐃᑭᒪᔨᐊᖏᑦ ᓄᖅᑲᖅᑎᑦᓯᕕᒻᒨᓚᐅᕋᑎᒃ ᐊᑐᖅᑎᓐᓇᒋᑦ ᓄᓇᒃᑰᔫᒥ ᕿᓗᐊᕐᓂᒃ, ᐊᑐᐃᓐᓇᕆᐊᖃᖅᑎᓪᓗᒋᑦ ᒪᓕᑦᑐᒋᑦ ᓄᓇᕘᒥ ᐊᒻᒪ ᓄᓇᓕᓐᓂ ᒪᓕᒐᐃᑦ ᐊᒻᒪ ᐊᑭᓖᑎᑕᐅᔪᓐᓇᖅᑐᑎᒃ $125-ᓂᒃ.
ᓱᕐᕋᓯᒪᔪᑦ ᓱᕋᐃᕙᓚᐅᖅᑐᑦ ᒪᓕᒐᕐᓂᒃ
• 40-ᖑᓗᐊᓂᒃ ᐊᑐᕆᐊᑦ ᑭᓪᓕᖏᓐᓂ ᐃᒥᕐᓯᒪᔪᖃᖏᒃᑲᓗᐊᕐᒪᖔᖅ ᖃᐅᔨᓴᓚᐅᖅᑐᑦ:
o ᐊᑕᐅᓯᖅ (1) ᐊᖁᖅᑐᖅ ᐱᑎᑕᐅᓚᐅᖅᑐᖅ ᓄᖅᑲᖅᑎᑕᐅᓗᓂ ᓱᕐᕋᓇᖅᑐᒧᑦ ᐊᒻᒪ ᐃᒥᐊᓗᒻᒧᑦ ᓱᕐᕋᓯᒪᓚᐅᕐᓂᖓᓄᑦ.
o 9 ᐊᖁᑏᑦ ᐱᑎᑕᐅᓚᐅᖅᑐᑦ ᐊᑐᕆᐊᑦ ᑭᓪᓕᖏᓐᓂ ᓄᖅᑲᖅᑎᑕᐅᓗᑎᒃ ᐃᒥᐊᓗᒻᒧᑦ ᓱᕐᕋᓯᒪᓚᐅᕐᓂᖏᓐᓄᑦ, ᐊᑕᐅᓯᖅ ᐱᑎᑕᐅᓗᓂ ᐅᓪᓗᓄᑦ 30 ᓚᐃᓴᖓ ᐊᑐᕈᓐᓃᖅᑎᑕᐅᑲᐃᓐᓇᖅᑐᓂ ᐅᕙᑦᓯᐊᕈᕐᓂᓴᕐᒥᒃ ᓄᖅᑲᖅᑎᑕᐅᔾᔪᑎᖃᖅᑐᒥᒃ.
o ᐱᖓᓱᑦ (3) ᑎᒍᔭᐅᓚᐅᖅᑐᑦ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᒃ ᓱᕐᕋᓯᒪᓪᓗᑎᒃ ᓄᓇᒃᑰᔫᓚᐅᕐᓂᖏᓐᓄᑦ ᐊᒻᒪ ᐃᖅᑲᖅᑐᕋᑦᓴᕈᖅᑎᑕᐅᓗᑎᒃ ᐱᕋᔭᐅᓯᒃᑯᑦ.
• ᐊᑕᐅᓯᖅ (1) ᐊᖁᑦᑐᖅ ᐱᑎᑕᐅᓚᐅᖅᑐᖅ ᐊᑐᕆᐊᑦ ᑭᓪᓕᖏᓐᓂ ᓄᖅᑲᖅᑎᑕᐅᓗᓂ ᓱᕐᕋᓇᖅᑐᒧᑦ ᓱᕐᕋᓯᒪᓚᐅᕐᓂᖓᓄᑦ.
• ᐊᑕᐅᓯᖅ (1) ᐊᖁᑦᑐᖅ ᐱᑎᑕᐅᓚᐅᖅᑐᖅ ᐊᑐᕆᐊᑦ ᑭᓪᓕᖏᓐᓂ ᑕᖃᒪᓪᓗᓂ ᓄᓇᒃᑰᔫᕐᓂᕐᒪᑦ.
ᑕᓪᓕᒪᐃᑦ ᓄᓇᒃᑰᔫᑦ ᑎᒍᔭᐅᓚᐅᖅᑐᑦ ᐊᒻᒪ ᐱᓯᒪᔭᐅᓕᖅᑐᑎᒃ ᒪᓕᑦᑕᐅᓗᑎᒃ ᓄᓇᕘᒥ ᐊᒻᒪ ᓄᓇᓕᓐᓂ ᒪᓕᒐᐃᑦ, ᓱᕐᕋᓯᒪᓗᓂ ᐊᖁᓚᐅᕐᓂᖓᓄᑦ ᐊᒻᒪ ᐊᓯᖏᓐᓄᑦ ᐊᔾᔨᒌᖏᑦᑐᓂᒃ ᒪᓕᒐᕐᓂᒃ ᓱᕋᐃᓚᐅᕐᓂᖏᓐᓄᑦ.
ᓄᓇᓕᐸᐅᔭᐃᑦ ᐃᖃᓗᐃᑦ ᓄᓇᓕᓐᓂ ᒪᓕᒐᕋᓛᓂᒃ ᐊᑐᓕᖅᑎᑦᓯᓇᓱᐊᖅᑎᒃᑯᑦ ᖁᔭᓐᓇᒦᕈᒪᑦᓯᐊᖅᑐᑦ ᑭᒃᑯᑐᐃᓐᓇᑦᓯᐊᓂᒃ ᒪᓕᑉᐸᓐᓂᖏᓐᓄᑦ ᐊᖁᑦᑐᓂ ᐊᑦᑕᓇᔾᔭᐃᕐᓯᒪᐅᑎᓂᒃ.
ᑲᖐᓱᓐᓂᕈᕕᑦ ᓱᕐᕋᓯᒪᔪᒥᒃ ᐊᖁᑦᑐᖃᓕᕆᐊᖓ ᓄᓇᒃᑰᔫᒥᒃ, ᖃᐅᔨᒋᐊᖁᔭᐅᕗᑎᑦ ᐅᑯᓄᖓ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᒃ ᑕᕝᕙᓴᐃᓐᓇᖅ ᐅᕗᖓ ᐅᖄᓚᓗᑎᑦ 867-979-1111.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᓯᑏᕙᓐ ᐋᓚᓐ
ᐊᖏᔪᖅᑳᖓᑦ ᒪᓕᒐᕋᓛᓂᒃ ᐊᑐᓕᖅᑎᑦᓯᓇᓱᐊᖅᑏᑦ
867-979-5674
s.allen@iqaluit.ca
www.iqaluit.ca
