ᑐᑭᓯᐅᒪᓂᖅ ᑭᓱᓕᕆᕙᒻᒪᖔᑕ ᕼᐋᒻᒪᓚᒃᑯᑦ ᒐᕙᒪᖏᑦ ᓄᓇᕗᒻᒥ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᑐᑭᓯᐅᒪᓂᖅ ᑭᓱᓕᕆᕙᒻᒪᖔᑕ ᕼᐋᒻᒪᓚᒃᑯᑦ ᒐᕙᒪᖏᑦ ᓄᓇᕗᒻᒥ
ᐋᒡᒌᓯ 12, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᓐᓂ ᓄᓇᓕᒻᒥᐅᓂᒃ ᑐᑭᓯᖁᔨᔪᑦ ᖃᓄᖅ ᒐᕙᒪᓕᕆᓂᖅ ᐱᓕᕆᐊᖑᕙᒻᒪᖔᖅ ᓄᓇᕗᒻᒥ, ᐱᓗᐊᖅᑐᒥ, ᐱᔨᖅᑎᕋᕐᓂᐅᕙᑦᑐᑦ ᕼᐊᒻᒪᓚᒃᑯᓐᓄᑦ ᓲᕐᓗ ᐃᖃᓗᓐᓂ ᐊᒻᒪ ᐊᐅᓚᑕᐅᕙᑦᑐᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ.

ᓄᓇᕗᑦ ᒐᕙᒪᒃᑯᑦ ᐋᖅᑭᐅᒪᓂᖓ ᐊᔾᔨᐅᖏᑦᑐᖅ ᑲᓇᑕᒥ. ᐋᖅᑭᑦᑕᐅᓚᐅᖅᓯᒪᔪᖅ ᐃᓚᒋᓕᖅᑎᑕᐅᓪᓗᓂ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒧᑦ ᐊᒻᒪ ᐊᑦᑐᐊᓂᖃᖅᑐᓂ ᑕᒪᐃᓐᓄᑦ ᑲᓇᑕᒥ ᒪᓕᒐᕐᓂᒃ ᐊᒻᒪ ᐃᓄᐃᑦ ᐱᖅᑯᓯᖏᓐᓂ ᐊᖏᖃᑎᒌᓐᓂᕐᒧᑦ ᐊᒻᒪ ᑕᒪᐃᓐᓄᑦ ᓯᕗᓕᖅᑎᐅᖃᑎᒌᓐᓂᕐᒥᒃ. ᓄᓇᕗᑦ ᒐᕙᒪᖓ ᐊᑐᖅᐸᑦᑐᖅ ᐃᓚᒋᔭᐅᓂᖃᖏᑦᑐᒥ ᐱᓕᕆᔾᔪᓯᒥᒃ, ᒪᓕᒐᓕᐅᖅᑏᑦ (MLAs) ᒪᓕᒐᓕᐅᕐᕕᒻᒥ ᓂᕈᐊᖅᑕᐅᔭᕆᐊᖃᖅᑐᑦ ᐊᒻᒪ ᓂᕈᐊᖅᑕᐅᓕᖅᑐᓂ ᓯᕗᓕᖅᑎ ᐊᒻᒪ ᒥᓂᔅᑕᐃᑦ ᓂᓪᓕᐊᖃᑎᒌᓐᓂᒃᑯᑦ ᐊᒻᒪ ᖃᐅᔨᒪᔭᐅᓇᖏᑦᑐᒃᑯᑦ ᓂᕈᐊᖅᑐᑎᒃ. ᓄᓇᕗᑦ ᒐᕙᒪᖓ ᑲᒪᒋᔭᖃᕆᐊᖃᖅᑐᖅ ᐱᔨᖅᑎᕋᕈᑎᒃᓴᓂᑦ ᐊᑦᑐᐃᓂᖃᖅᑐᒥᒃ ᓄᓇᕗᓕᒫᒥᒃ, ᓲᕐᓗ ᐋᓐᓂᐊᖃᕐᓇᖏᑦᑐᓕᕆᓂᖅ, ᐃᓕᓐᓂᐊᖅᑐᓕᕆᓂᖅ, ᐃᖅᑲᖅᑐᐃᕕᓕᕆᓂᖅ, ᐊᒻᒪ ᐃᓪᓗᓕᕆᓂᖅ.

ᓄᓇᓕᓐᓂ, ᑲᑎᒪᔩᑦ ᐊᐅᓚᑦᑎᕙᑦᑐᑦ ᓄᓇᓕᖏᓐᓂ, ᐱᖃᑕᐅᓪᓗᓂ ᐃᖃᓗᐃᑦ, ᒪᓕᑦᑐᑎᒃ ᓄᓇᕗᑦ ᒪᓕᒐᖏᓐᓂ. ᐃᖃᓗᐃᑦ ᓄᓇᕗᒻᒥ ᓄᓇᓕᐸᐅᔭᑑᔪᖅ ᐊᒻᒪ ᐊᐅᓚᑕᐅᔪᖅ ᓄᓇᓕᐸᐅᔭᓕᐃᑦ, ᓄᓇᓖᑦ ᐊᒻᒪ ᓄᓇᓕᕋᓛᑦ ᐱᖁᔭᖓᒍᑦ. ᐊᓯᖏᑦ 24 ᓄᓇᓖᑦ ᕼᐊᒻᒪᓚᐅᔪᑦ, ᐊᐅᓚᑕᐅᓪᓗᑎᑦ ᕼᐊᒻᒪᓚᒃᑯᑦ ᐱᖁᔭᖏᓐᓄᑦ.

ᐅᑯᐊ ᒪᓕᒐᐃᑦ ᑐᓂᓯᕙᑦᑐᑦ ᑲᑎᒪᔨᓂᒃ ᐱᒻᒪᕆᐊᓗᓐᓂᒃ ᓄᓇᓕᓐᓂ ᐊᐅᓚᑦᑎᔾᔪᑎᒃᓴᓂᒃ ᐱᔨᖅᑎᕋᕈᑎᒃᓴᓄᑦ. ᐅᓇ ᐃᓚᖃᖅᑐᖅ ᐃᒥᖅᑕᕐᓂᖅ ᐊᒻᒪ ᐊᓇᖅᑕᕈᑎᒃᓴᓂᑦ, ᐊᑦᑕᐅᑎᓂᒃ ᐊᐃᔅᓯᖃᑦᑕᕐᓂᖅ ᐊᒻᒪ ᑲᒪᒋᔭᐅᓪᓗᑎᑦ ᐊᑦᑕᐅᑏᑦ, ᐋᖅᑭᒋᐊᖅᓯᕙᑦᑐᑎᒃ ᐊᑐᕆᐊᓂᒃ ᐊᒻᒪ ᐊᐳᑏᔭᐃᓂᕐᒥ, ᓄᓇᓕᓐᓂ ᐊᐅᓚᑕᐅᓪᓗᑎᑦ ᐱᙳᐊᖅᑐᓕᕆᓃᑦ ᐊᒻᒪ ᓄᓇᓕᓐᓂ ᐱᓕᕆᐊᒃᓴᑦ, ᐃᑭᑦᑐᖃᓕᕐᓂᖅᐸᑦ ᓴᐳᔾᔨᓂᕐᒥᒃ ᐊᒻᒪ ᑐᐊᕕᕐᓇᖅᑐᓕᕆᓪᓗᑎᓪᓗ. ᑲᑎᒪᔩᑦ ᑲᒪᒋᔭᖃᕆᐊᖃᕐᒥᔪᑦ ᓴᓇᔭᐅᓂᖏᓐᓂ ᐊᒻᒪ ᒪᓕᑦᑕᐅᓂᖏᓐᓂ ᓄᓇᓕᓐᓂ ᒪᓕᒐᕋᓛᑦ ᐊᒻᒪ ᐃᓱᒪᓕᐅᕆᕙᑦᑐᑎᒃ ᓄᓇᐃᑦ ᐊᑐᖅᑕᐅᓂᖏᑕ ᐊᒻᒪ ᐱᕙᓪᓕᐊᑎᑦᑎᓂᕐᒥᒃ ᓄᓇᓕᓐᓂ.

ᓄᓇᓕᐸᐅᔭᓂᖓ ᐱᔾᔪᑎᒋᓪᓗᒍ, ᐃᖃᓗᐃᑦ ᐊᖏᓂᖅᓴᒥᒃ ᐊᓪᓚᕝᕕᓕᕆᔨᖃᖅᑐᑦ, ᐊᖏᓂᖅᓴᒥᒃ ᑖᒃᓰᔭᐅᑎᖃᖅᑐᖅ ᐊᒻᒪ ᐱᔭᕆᐊᑐᓂᖅᓴᓂᒃ ᒪᑭᒪᔾᔪᑎᒃᓴᖃᖅᑐᑎᑦ ᓄᓇᓕᕋᓛᖑᓂᖅᓴᓂᒃ. ᐅᓇ ᐱᕕᖃᖅᑎᑦᑎᔪᖅ ᓄᓇᓕᐸᐅᔭᒃᑯᓐᓂ ᐊᖏᓂᖅᓴᓂᒃ ᐊᔾᔨᒌᖏᑦᑐᓂᒃ ᐱᓕᕆᐊᒃᓴᖃᕐᓂᕐᒥᒃ ᐊᒻᒪ ᐊᐅᓚᑦᑎᓪᓗᑎᑦ ᑲᒪᒋᔭᐅᔭᕆᐊᓕᓐᓂ ᓄᓇᓕᖓᓂ.

ᕼᐊᒻᒪᓚᒃᑯᑦ ᒐᕙᒪᖏᑦ ᑕᐅᑐᓐᓂᖅᓴᐅᕙᑦᑐᑦ ᐱᔨᖅᑎᕋᕐᓂᐅᕙᑦᑐᓂᒃ ᐃᓄᓐᓄᑦ ᐊᑐᖅᑕᐅᔭᕆᐊᖃᖅᑐᓂᒃ ᖃᐅᑕᒫᖅ. ᑲᒪᒋᔭᖃᕆᐊᖃᕐᒥᔪᑦ ᓄᓇᓕᓐᓂ ᐸᓐᓇᒍᑕᐅᕙᑦᑐᓂᒃ ᐊᒻᒪ ᑮᓇᐅᔭᖅᑐᕈᑎᒃᓴᓂᑦ, ᐊᒻᒪ ᓄᐊᑕᐅᔭᕆᐊᓕᓐᓂ ᐱᖁᑎᓄᑦ ᑖᒃᓯᓂᒃ ᐊᑭᓕᕈᑎᒃᓴᖏᓐᓂᓪᓗ. ᑭᓯᐊᓂᓕ, ᐊᑕᖏᐸᓗᑦᑐᓗᒋᑦ ᑮᓇᐅᔭᑦ ᐊᐅᓚᑎᔾᔪᑎᒃᓴᓅᖓᔪᑦ ᑐᓂᔭᐅᕙᑦᑐᑦ ᓄᓇᕗᑦ ᒐᕙᒪᒃᑯᓐᓂ, ᐅᑰᓇ ᐱᓕᕆᐊᓄᑦ ᑮᓇᐅᔭᖃᖅᑎᑦᑎᓂᕐᒥᒃ ᐊᒻᒪ ᐃᑲᔫᑎᓄᑦ. ᓄᓇᕗᑦ ᒐᕙᒪᖓ ᐱᑎᑦᑎᕙᒻᒥᔪᖅ ᐊᐅᓚᑦᑎᔾᔪᑎᒃᓴᓄᑦ ᐃᑲᔪᖅᑐᐃᓂᕐᒥᒃ ᓄᓇᓕᓐᓂ ᕼᐊᒻᒪᓚᐅᔪᓂᒃ ᐊᒻᒪ ᐊᔪᙱᓐᓂᖃᕐᒥᔪᑦ ᐱᓕᕆᐊᖃᕈᓐᓇᓂᕐᒥᒃ ᑕᐃᒪᐃᒋᐊᖃᖅᐸᑕ, ᓲᕐᓗ ᐃᑲᔪᕐᓗᑎᑦ ᐱᔨᖅᑎᕋᕈᑎᓂᒃ ᑐᐊᕕᕐᓇᖅᑐᖃᓕᖅᐸᑦ ᐅᕝᕙᓘᓐᓃᑦ ᐊᒃᓱᕈᕈᑕᐅᓪᓚᕆᑦᑐᓄᒃ.

ᐃᖃᓗᓐᓂ, ᑕᒪᒃᑭ ᓄᓇᕗᑦ ᐊᒻᒪ ᕼᐊᒻᒪᓚᒃᑯᑦ ᒐᕙᒪᖏᑦ ᐊᐅᓚᑦᑎᖃᑦᑕᖅᑐᑦ, ᐱᓕᕆᖃᑎᒌᓐᓂᒃᑯᑦ. ᓲᕐᓗ, ᐊᑭᓖᒋᐊᖅᑐᐸᒃᑲᕕᑦ ᐃᒥᕐᒧᑦ ᐊᑭᓕᔅᓴᓂᒃ ᓄᓇᓕᐸᐅᔭᒃᑯᓐᓄᑦ ᐃᖃᓗᓐᓂ, ᕿᑐᕐᖓᐃᑦ ᐃᓕᓐᓂᐊᕆᐊᖅᑎᐸᑦᑐᒍ ᓄᓇᕗᑦ ᒐᕙᒪᒃᑯᓐᓄᑦ ᐊᐅᓚᑕᐅᔪᒧᑦ, ᐊᒻᒪ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᒪᒋᔭᐅᖃᑦᑕᖅᑐᑎᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᐅᓚᑕᖓᓂ ᕿᑭᖅᑕᓂ ᐋᓐᓂᐊᕕᖓ, ᑕᕝᕙᓐᓂ ᐅᓪᓗᓴᐃᓐᓇᕐᒥᒃ.

ᓄᓇᕗᑦ ᒐᕙᒪᒃᑯᑦ ᐋᖅᑭᔅᓱᐃᖃᑦᑕᖅᑐᑦ ᐊᑐᐊᒐᕐᓂᒃ ᓄᓇᕗᓕᒫᒧᑦ, ᕼᐊᒻᒪᓚᒃᑯᑦ ᐱᔨᖅᑎᕋᖅᑎᓪᓚᕆᐅᓪᓗᑎᑦ. ᒪᕐᕉᒃ ᐊᔾᔨᒌᖏᑦᑑᒃ ᒐᕙᒫᒃ ᐱᓕᕆᖃᑎᒌᑉᐸᑦᑑᒃ ᓄᓇᕗᒻᒥᐅᑦ ᐊᑐᐃᓐᓇᖃᖁᓪᓗᒋᑦ ᐱᓕᕆᐊᒃᓴᓂᑦ, ᐃᑲᔪᖅᑐᐃᔾᔪᑎᒃᓴᓂᑦ, ᐊᒻᒪ ᒪᑭᒪᔾᔪᑎᒃᓴᓄᑦ ᐱᔭᐅᔭᕆᐊᓕᓐᓂᑦ.

ᓄᓇᓕᒻᒥᐅᑦ ᑎᓕᐅᖅᑕᐅᕗᑦ ᑐᑭᓯᒋᐊᒃᑲᓐᓂᖁᓪᓗᒋᑦ, ᑲᑎᒪᔩᑦ ᑲᑎᒪᓂᖏᓐᓅᖃᑦᑕᕐᓗᑎᑦ, ᐊᒻᒪ ᑐᓂᓯᓗᑎᓪᓗ ᐃᓱᒪᒋᔭᒥᓂᒃ ᓄᓇᓕᓐᓂ ᐃᓱᒪᒋᔭᐅᓯᒪᔪᑦ ᐊᒃᑐᖅᓯᔾᔪᑕᐅᕙᒻᒪᑕ ᑲᔪᓯᔾᔪᑎᒃᓴᓂᑦ ᐱᔨᑦᑎᕋᕐᓂᕆᔭᐅᕙᑦᑐᓄᑦ.

###

ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:
ᔩᐅᑉ ᕙᕐᓂ
ᐊᖏᔪᖅᑳᖅ ᑐᓴᐅᒪᔪᓕᕆᔨᒃᑯᓐᓄᑦ ᐊᒻᒪ ᐊᑭᓕᕐᓱᐃᔨᓄᑦ ᐱᔨᖅᑎᕋᐅᑎ
ᓄᓇᓕᐸᐅᔭᐃᑦ ᐃᖃᓗᐃᑦ 867-979-5619 | G.Byrne@iqaluit.ca