ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ –
ᐱᕙᓪᓕᐊᔪᓂᑦ ᑐᓴᕋᑦᓴᖅ
ᓄᓇᓕᐸᐅᔭᒃᑯᑦ ᓇᓗᓇᐃᕐᓯᕗᑦ ᖁᓕᓂᑦ (10) ᓄᓇᖁᑎᑖᑦᓴᓂᑦ ᓂᐊᖁᖕᖒᑎᓂ
ᓰᑏᐱᕆ 7, 2016 (ᐃᖃᓗᐃᑦ, ᓄᓇᕗᑦ) ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖏᑦ ᓇᓗᓇᐃᕐᓯᓯᒪᓕᕐᒥᔪᑦ ᖁᓕᓂᑦ (10) ᓇᔪᒐᓕᐅᕐᕕᑦᓴᓂᑦ ᓄᓇᖁᑎᑕᖃᕐᒪᑦ ᓄᓇᖁᑎᑖᑦᓴᐅᓛᖅᑐᓂᑦ ᓂᐊᖁᖕᖒᑎᓂ ᐊᑎᕐᓂᑦ ᐊᒧᓯᖃᑦᑕᕐᓗᑎᒃ ᓄᓇᖁᑎᑖᕋᓱᑦᑐᓂᑦ ᐅᓐᓄᒃᑯᑦ 6-ᒨᖅᐸᑦ ᓰᑏᐱᕆ 22, 2016, ᓄᓇᓕᐸᐅᔭᐃᑦ ᐊᓪᓚᕝᕕᖃᕐᕕᖓᓂ. ᑕᕝᕘᓇ ᓂᕈᐊᕐᓂᐅᓛᖅᑐᖅ ᓄᓇᖁᑎᑖᕈᒪᔪᓂᑦ ᒪᓕᑦᑐᑦ ᓄᓇᓕᐸᐅᔭᒃᑯᑦ ᓄᓇᓕᕆᔾᔪᑎᓄᑦ ᒪᓕᒐᕋᓛᑉ 365 ᑎᑎᕋᕐᓯᒪᓂᖏᓐᓂᑦ.
“ᖁᕕᐊᒋᓪᓗᒋᑦ ᐊᑐᐃᓐᓇᕈᖅᑎᑦᓯᕗᒍᑦ ᓄᓇᓕᓐᓂᒥᐅᑕᓄᑦ ᓇᒻᒥᓂᑦᓴᒥᓂᒃ ᐃᓪᓗᓕᐅᕈᓐᓇᖁᓪᓗᒋᑦ ᐊᒻᒪ ᐃᓚᓐᓈᖏᓐᓄᑦ ᑖᒃᑯᓇᓂ ᓄᓇᓂ ᐊᑐᖅᑐᐊᒐᑦᓴᓂ,” ᐅᖃᖅᑐᖅ ᒪᐃᔭ ᒫᑦᓕᓐ ᕆᐊᑦᕘᕐᓐ.
ᑐᑭᓯᒋᐊᕈᑎᑦᓴᐃᑦ ᓄᓇᖁᑏᑦ ᐱᓪᓗᒋᑦ ᐊᑐᓂ, ᐃᓚᖃᖅᑐᑦ ᓴᒃᑯᐃᓯᔾᔪᑎᓂᑦ ᒪᓕᒐᕐᓂᑦ, ᓄᓇᓕᓐᓂ ᓄᓇᖁᑏᑦ ᓇᒦᒻᒪᖔᑕ ᐊᒻᒪ ᓄᓇᖁᑏᑦ ᖃᓄᖅ ᓴᓇᓯᒪᒻᒪᖔᑕ, ᐊᐃᔭᐅᔪᓐᓇᖅᑐᑦ ᐸᕐᓇᐅᑎᓕᕆᓂᕐᒥᑦ ᐊᒻᒪ ᐱᕙᓪᓕᐊᑎᑦᓯᓂᕐᒥᑦ ᓴᓇᓂᒃᑯᑦ ᐃᖅᑲᓇᐃᔭᖅᑎᖏᓐᓂᑦ, ᐃᓪᓗᒦᑦᑐᑦ 2425, ᐅᓪᓗᒃᑯᑦ 9-ᒥᑦ 12-ᒨᕋᓱᓐᓂᖓᓂ ᐊᒻᒪ 1-ᒥᑦ 5-ᒨᕋᓱᓐᓂᖓᓂ, ᓇᒡᒋᔾᔭᐅᒥᑦ ᑕᓪᓕᒥᕐᒧᑦ.
“ᐅᓇ ᐊᖏᔫᖏᑦᑐᖅ ᐃᓪᓗᖃᕐᕕᑦᓴᖅ ᐊᔾᔨᒌᖏᑦᑐᓂᑦ ᓇᓖᕌᕈᑎᖃᖅᑎᑦᓯᓛᖅᑐᖅ, ᐊᒻᒪ ᖃᓄᐃᓪᓗᐊᕐᓂᖏᓐᓂᑦ ᓄᓇᖁᑏᑦ ᐊᔾᔨᒌᒐᑎᒃ, ᐊᒻᒪ ᓄᓇᖁᑏᑦ ᓵᖕᖓᔪᑦ ᓂᐊᖁᖕᖒᑎᐅᑉ ᐅᖓᑖᓄᑦ,” ᐅᖃᖅᑐᖅ ᒥᓗᑎ ᓯᒫᕐ, ᐊᖏᔪᖅᑳᖓᑦ ᐸᕐᓇᐅᑎᓕᕆᔨᒃᑯᑦ ᐊᒻᒪ ᓄᓇᓕᕆᓂᒃᑯᑦ ᐱᕙᓪᓕᐊᑎᑦᓯᔩᑦ ᐃᖅᑲᓇᐃᔭᖅᑎᖏᑕ.
ᓄᓇᓕᐸᐅᔭᒃᑯᑦ ᐊᑐᐊᒐᖏᑦ ᐊᒻᒪ ᐱᓕᕆᔾᔪᑎᖏᑦ ᐊᑑᑎᖃᖅᑐᑦ ᓄᓇᖁᑎᓄᑦ ᐊᑐᓂ ᑕᑯᔭᐅᔪᓐᓇᖅᑐᑦ ᐃᖃᓗᓐᓂ ᓄᓇᖁᑎᓄᑦ ᑭᓪᓕᓕᐅᕈᑎᒥ ᒪᓕᒐᕋᓛᕐᒥ, ᓈᓴᐅᑎᓕᒃ 704, ᐅᕝᕙᓘᓐᓃᑦ ᖃᐅᔨᒋᐊᕐᓗᒍ ᐳᕋᐃᐊᓐ ᑕᑦᑐᐃᓂ 979-6363, ᓇᕿᓪᓗᒋᑦ 234 ᓯᕙᓂᓕᖅᐸᑦ, ᐅᕝᕙᓘᓐᓃᑦ ᐃᕐᖐᓇᖅᑕᐅᑎᖓᓄᑦ B.Tattuinee@city.iqaluit.nu.ca.
ᐊᑎᖃᖃᑕᐅᔪᒪᓂᐊᖅᑐᑦ ᐊᑎᕐᓂᑦ ᐊᒧᓯᖃᑦᑕᓂᕐᒥ, ᑐᑦᓯᕋᐅᑎᓕᐅᕈᓐᓇᖅᑐᑦ ᐊᒻᒪ ᐅᑎᖅᑎᑕᐅᔪᓐᓇᖅᑐᑎᒃ ᓯᕗᓂᐊᒍᑦ ᓯᕿᖕᖑᔭᒃᑯᑦ 4ᑉ ᐅᓐᓄᓴᒃᑯᑦ, ᑎᓴᒻᒥᕐᒧᑦ, ᓰᑏᐱᕆ 15, 2016 ᐸᕐᓇᐅᑎᓕᕆᔨᒃᑯᑦ ᐊᒻᒪ ᓄᓇᓕᕆᓂᒃᑯᑦ ᐱᕙᓪᓕᐊᑎᑦᓯᔩᑦ ᐃᖅᑲᓇᐃᔭᖅᑎᖏᓐᓅᕈᑎᓗᒍ ᐃᓪᓗᒧᑦ 2425.
ᐊᑎᖏᑦ ᐊᒧᔭᐅᖏᑦᑐᑦ ᒪᓕᑦᑐᑦ ᒪᓕᒋᐊᓕᓐᓂᑦ ᑐᖅᑯᖅᑕᐅᓯᒪᓂᐊᖅᑐᑦ ᐊᕐᕌᒍᒧᑦ ᐊᑕᐅᓯᕐᒧᑦ, ᐊᒻᒪ ᐊᒧᓯᖃᑦᑕᓕᕐᒥᑉᐸᑕ ᐊᑎᖏᑦ ᐃᓚᓕᐅᔾᔭᐅᒐᔭᕐᓗᑎᒃ ᓄᓇᖁᑎᓂᑦ ᐊᑐᐃᓐᓇᕈᖅᑐᖃᕐᓂᖅᐸᑕ ᐊᔾᔨᐸᓗᖏᓐᓂᑦ ᓄᓇᖁᑎᐅᓚᐅᖅᑐᐃᑦ. ᐊᒻᒪᐃᓛᒃ, ᐊᑎᖏᑦ ᐊᒧᔭᐅᓚᐅᖏᑦᑐᑦ ᒫᕐᓯ 10-ᒥ ᐊᒧᓯᖃᑦᑕᑎᓪᓗᒋᑦ ᑕᕝᕙᓂ ᐊᒧᓯᖃᑦᑕᓂᕐᒧᑦ ᐃᓚᓕᐅᔾᔭᐅᓛᕐᒥᔪᑦ ᑐᖅᑯᖅᑕᐅᓯᒪᔪᕕᓃᑦ.
ᖃᐅᔨᒪᔭᐅᔭᕆᐊᓖᑦ ᓄᓇᓕᐸᐅᔭᒃᑯᑦ ᐱᔪᓐᓇᐅᑎᖃᑦᓯᐊᕐᒪᑕ ᑭᖑᕙᕆᐊᕆᐊᖃᕐᓂᖅᐸᑦ ᓴᓇᓂᐅᔪᖅ ᐱᖓᓱᕈᓚᐅᖏᓐᓂᖏᓐᓂ ᓄᓇᖁᑎᑖᕋᓱᑦᑐᑦ ᐊᑐᖅᑐᐊᒐᑦᓴᓂᑦ.
-30-
