ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – ᐱᕙᓪᓕᐊᔪᓂᑦ ᑐᓴᕋᑦᓴᖅ
ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᐃᓪᓗᓕᕆᓂᕐᒥᑦ ᐱᓕᕆᔩᑦ
ᔪᓂ 1, 2020 (ᐃᖃᓗᐃᑦ, ᓄᓇᕗᑦ)
ᐅᓪᓗᒥ ᒪᐃᔭ ᐱᐅᓪ ᐅᖃᐅᓯᖃᖅᑐᖅ ᐱᒋᐊᖅᑎᑦᑎᓂᕐᒥᓂᒃ ᒪᐃᔭᐅᑉ ᐱᓕᕆᔨᖏᓐᓂᑦ ᐱᔾᔪᑎᖃᕐᓂᐊᖅᑐᓂᑦ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᐃᓪᓗᓕᕆᓂᕐᒥᑦ ᐃᓚᒋᓗᒋᑦ ᐱᒋᐊᖅᑎᑦᑎᖃᑕᐅᓚᐅᖅᑐᑦ ᑐᓪᓕᐊ ᒪᐃᔭᐅᑉ ᐳᕉᔅᑐ, ᓗᐊᕆᐅᓪ ᒪᒃᑯᐊᕆᔅᑕᓐ ᐊᖏᔪᖅᑳᖓᑦ ᐅᖂᑕᖅ ᓱᓴᐃᔭᑎᒃᑯᑦ ᐊᒻᒪ ᒪᓕᒐᓕᐅᖅᑎ ᐋᑕᒻ ᐋᕆᐊᒃ ᓚᐃᑦᓯᑑᓐ.
ᕿᓂᕐᓂᐊᖅᑐᒍᑦ ᐱᓇᓱᐊᕈᓯᐅᓂᐊᖅᑐᓂ ᓯᕗᓂᑦᑎᓐᓂ ᐃᓚᒋᔭᐅᔪᒪᒐᔭᖅᑐᓂᑦ ᒐᕙᒪᒃᑯᖏᓐᓂᑦ ᑲᓇᑕᐅᑉ, ᑲᓇᑕᒥ ᐃᓪᓗᓕᕆᓂᕐᒥᑦ ᐊᒻᒪ ᐊᑐᖅᑐᐊᑎᑦᑎᓂᕐᒥᑦ ᑯᐊᐳᕇᓴᒃᑯᓐᓂᑦ, ᒐᕙᒪᒃᑯᖏᓐᓂᑦ ᓄᓇᕗᑦ, ᓄᓇᕗᑦ ᐃᓪᓗᓕᕆᔨᕐᔪᐊᒃᑯᖏᓐᓂᑦ, ᐃᖃᓗᐃᑦ ᐃᓪᓗᓕᕆᔨᒃᑯᖏᓐᓂᑦ, ᓄᓇᕗᑦ ᑐᖕᖓᕕᒃᑯᓐᓂᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᑦ ᐊᒻᒪ ᐊᓯᖏᓐᓂᑦ ᓄᓇᓕᕐᒥᐅᑕᓂᑦ ᐃᓚᒋᔭᐅᔪᒪᒐᔭᖅᑐᓂᑦ.
ᒪᐃᔭ ᐱᐅᓪ ᐅᖃᖅᑐᖅ
“ᐅᑉᐱᕈᓱᒃᑲᒪ ᐃᓪᓗᓕᕆᓂᖅ ᐊᖏᓂᖅᐹᖑᖃᑕᐅᒻᒪᑦ ᐱᔾᔪᑎᐅᔪᓂ ᐊᒻᒪ ᒪᐃᔭᕈᕋᓱᓚᕿᓚᐅᕐᓯᒪᔪᖓ ᐊᓯᔾᔩᖁᔨᓪᓗᖓ, ᕿᑐᕐᕆᒍᓐᓇᑦᑕᕈᑎᒍᓪᓘᓐᓃᑦ ᐃᓪᓗᓕᕆᓂᒃᑯᑦ ᐱᔾᔪᑎᒋᕙᑦᑕᕗᑦ ᓴᖕᖓᑦᑎᒋᐊᕈᓐᓇᕋᑦᑕ ᐊᒻᒪ ᓯᕗᒧᐊᑦᑎᐊᓕᕐᓗᑕ ᑲᔪᓯᔾᔪᑎᐅᓯᒪᑦᑎᐊᖅᑐᒧᑦ ᓯᕗᓂᕐᒧᑦ.”
ᑐᓪᓕᐊ ᒪᐃᔭᐅᑉ ᐳᕉᔅᑐ ᐅᖃᖅᑐᖅ
“ᐱᓕᕆᖃᑎᒋᔪᒪᑦᑎᐊᕐᓂᐊᑕᒃᑲ ᒪᐃᔭ ᐱᐅᓪ ᐊᒻᒪ ᐱᓕᕆᔨᐅᓂᐊᖅᑐᑦ ᐃᓪᓗᓕᕆᓂᕐᒥᑦ ᐱᕙᓪᓕᐊᑎᑦᑎᓂᒃᑯᑦ ᐊᒻᒪ ᐱᒋᐊᖅᑎᑦᑎᓂᒃᑯᑦ ᑐᑭᖃᑦᑎᐊᖅᑐᓂᑦ ᐊᐅᓚᔾᔭᒋᐊᕈᑎᐅᓯᒪᔪᓂᑦ ᖃᓄᐃᓕᐅᕆᐊᕈᑎᑦᓴᓂᑦ ᐃᓪᓗᓕᑦᓴᕐᓂᐅᕙᑦᑐᒥᑦ ᐃᖃᓗᓐᓂ, ᐊᑐᐊᒐᖃᕐᓗᖓ ᐊᑐᕐᓯᒪᔭᓐᓂᒃ ᓇᖕᒥᓂᖃᖅᑎᐅᓗᖓ ᐊᖏᕐᕋᓐᓂᒃ ᐊᒻᒪ ᐊᑭᓕᕐᓱᖅᑕᐅᓇᖓ ᐃᑲᔫᑎᒋᕙᑦᑕᓐᓂᒃ ᑐᕌᖓᔪᓂᑦ ᐃᓪᓗᓕᕆᓂᕐᒥᑦ ᐅᓗᕆᐊᓇᖅᑐᒦᑉᐸᑦᑐᓄᑦ ᐃᖃᓗᒻᒥᐅᑕᓄᑦ, ᐊᒻᒪᑦᑕᐅᖅ 2019-ᒥ ᐃᓄᐃᑦ ᓄᓇᖓᑦ ᐃᓪᓗᓕᕆᓂᕐᒥᑦ ᐸᕐᓇᒍᑎᓕᐅᕈᑎᐅᓚᐅᖅᑐᑦ ᐃᓄᖕᓄᑦ-ᑯᐃᓐᒧᑦ ᑭᒡᒐᖅᑐᐃᔨᖏᓐᓄᑦ ᑲᑐᔾᔨᖃᑎᒌᓐᓂᒃᑯᑦ ᑲᑎᒪᔨᕋᓛᓄᑦ.”
ᓗᐊᕆᐅᓪ ᒪᒃᑯᐊᕆᔅᑕᓐ ᐅᖃᖅᑐᖅ
“ᓯᑎᒃᑯᑦ ᐃᓕᓯᒪᑦᑎᐊᖅᑐᑦ ᐱᓕᕆᐊᖃᕈᓐᓇᓂᒃᑯᑦ ᐃᓪᓗᓕᕆᓂᕐᒥᑦ ᐱᔾᔪᑎᐅᔪᓂᑦ ᐱᓪᓗᐊᑕᐅᔪᓂᑦ ᐃᖃᓗᓐᓄᑦ, ᐱᓕᕆᔨᐅᓂᐊᕐᓗᑎᒃ ᐊᑯᓂᑲᓪᓚᐅᔪᒧᑦ ᐊᑐᖅᑕᐅᔪᓐᓇᖅᑐᓂᑦ ᐊᓯᔾᔨᐅᑎᓂᑦ ᐊᒻᒪ ᐃᓘᓐᓇᖏᓐᓂᑦ ᑲᑐᔾᔨᖃᑎᒌᑦᑐᓂᑦ ᑲᑎᑎᑦᑎᔪᓐᓇᖅᑐᑎᒃ, ᐅᐱᒋᔪᒪᕙᕋ ᒪᐃᔭ ᑕᒪᑦᓱᒥᖓ ᐱᓕᕆᔪᒪᓂᖓᓂᑦ ᐊᒻᒪ ᐅᐱᒍᓱᑦᑎᐊᖅᑐᖓ ᐃᓚᒋᔭᐅᔪᓐᓇᓚᐅᕐᓂᕐᓄᑦ ᐱᒋᐊᖅᑎᑦᑎᖃᑕᐅᔪᓄᑦ.”
ᐋᑕᒻ ᐋᕆᐊᒃ-ᓚᐃᑦᓯᑑᓐ, ᒪᓕᒐᓕᐅᖅᑎ ᐅᖃᖅᑐᖅ
ᖁᔭᓐᓇᒦᕈᒪᕙᕋ ᒪᐃᔭ ᐱᐅᓪ ᓯᕗᓕᖅᑎᐅᓚᐅᕐᓂᖓᓂᑦ ᐊᒻᒪ ᓴᖅᑮᓂᖓᓂᑦ ᒪᐃᔭᐅᑉ ᐱᓕᕆᔨᑦᓴᖏᓐᓂᑦ ᐊᑭᓕᕐᓱᖅᑕᐅᔪᓐᓇᓯᐊᖅᑐᓂᑦ ᐃᓪᓗᓕᕆᓂᕐᒥᑦ. ᐱᒻᒪᕆᐅᒻᒪᑦ ᐃᓘᓐᓇᑦᓯᐊᑎᒃ ᐱᓕᕆᖃᑕᐅᕙᑦᑐᑦ ᑲᑎᑦᑎᑕᐅᑎᓪᓗᒋᑦ ᑲᑐᔾᔨᖃᑎᒌᓐᓂᒃᑯᑦ ᐱᓕᕆᐊᖑᓂᐊᖁᓪᓗᒍ ᐃᓪᓗᑭᑦᓴᓐᓂᕆᕙᑦᑕᕗᑦ, ᐊᒻᒪ ᐱᐅᓯᑎᒋᐊᖁᓪᓗᒋᑦ ᖃᓄᐃᓕᖓᓂᕆᕙᑦᑕᖏᑦ ᐃᓅᓯᖏᒍᑦ ᐃᖃᓗᒻᒥᐅᑕᐃᑦ. ᐱᓕᕆᖃᑎᒋᔪᒪᓂᐊᖅᑕᒃᑲ ᐊᑐᓂ ᐱᓕᕆᔨᐅᖃᑕᐅᓂᐊᖅᑐᑦ ᐱᕙᓪᓕᐊᑎᑦᑎᓂᒃᑯᑦ ᓄᑖᓂᑦ ᐸᕐᓇᒍᑎᑦᓴᓂᑦ ᐱᓕᕆᔾᔪᑎᐅᔪᓐᓇᖅᑐᓂᑦ ᐊᔾᔨᐅᖏᑦᑐᒥᑦ ᐃᓪᓗᓕᕆᓂᒃᑯᑦ ᐱᔭᐅᔭᕆᐊᓕᓐᓂᑦ ᐃᖃᓗᓐᓂ.
ᑐᑭᓯᒋᐊᕈᒪᔪᑦ ᐆᕕᖓ ᖃᐅᔨᒋᐊᖁᔪᑦ:
ᓖᓴ ᒥᓗᓵᕝᔨᕕᒃ
ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᕐᓂᒥᑦ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-3216