ᐱᔭᕇᖅᓯᕙᓪᓕᐊᓂᖅ ᐊᐅᔭᒃᑯᑦ ᓄᓇᓕᓐᓂ ᒐᕙᒪᐅᔪᖅ ᐱᓪᓗᒍ ᐃᓕᓐᓂᐊᖅᑎᑦᑎᒍᑎᑦᑎᓐᓂ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐱᔭᕇᖅᓯᕙᓪᓕᐊᓂᖅ ᐊᐅᔭᒃᑯᑦ ᓄᓇᓕᓐᓂ ᒐᕙᒪᐅᔪᖅ ᐱᓪᓗᒍ ᐃᓕᓐᓂᐊᖅᑎᑦᑎᒍᑎᑦᑎᓐᓂ
ᓯᑎᐱᕆ 9, 2025 − ᐃᖃᓗᐃᑦ, ᓄᓇᕗᑦ

ᑕᒫᓂ ᐊᐅᔭᕐᒥ, ᐃᖃᓗᐃᑦ ᓄᓇᓕᐸᐅᔭᖓ ᓴᖅᑮᓚᐅᖅᑐᑦ ᑭᒃᑯᑐᐃᓐᓇᕐᓄᑦ ᐃᓕᓐᓂᐊᕈᑎᓂᒃ ᑐᑭᓯᐅᒪᑎᑕᐅᑦᓯᐊᖁᓪᓗᒋᑦ ᐃᖃᓗᒻᒥᐅᑦ ᖃᓄᖅ ᓄᓇᓕᓐᓂ ᒐᕙᒪᖏᑦ ᐊᐅᓚᓂᖃᓲᖑᒻᒪᖔᑕ ᐊᒻᒪᓗ ᖃᓄᖅ ᐃᓚᐅᖃᑕᐅᔪᓐᓇᕐᒪᖔᑦ ᐋᖅᑮᓗᑎᑦ ᓄᓇᓕᑦᑎᓐᓂ.

ᐃᓕᓐᓂᐊᕈᑎᑎᒍᑦ, ᖃᐅᔨᓴᓚᐅᖅᑐᒍᑦ ᖃᓄᖅ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᐃᓱᒪᓕᐅᓲᖑᒻᒪᖔᑦ, ᖃᓄᖅ ᒪᓕᒐᕋᓛᑦ ᐋᖅᑭᑦᑕᐅᓲᖑᒻᒪᖔᑦ ᐊᒻᒪᓗ ᐊᑐᓕᖅᑎᑕᐅᓪᓗᑎᑦ ᓄᓇᓕᓐᓂ, ᖃᓄᖅ ᑮᓇᐅᔭᖅᑐᕈᑎᑦᓴᑦ ᐋᖅᑭᑦᓱᖅᑕᐅᓂᖃᓲᖑᒻᒪᖔᑕ, ᐊᒻᒪᓗ ᖃᓄᖅ ᑲᑎᒪᔩᑦ ᐊᒻᒪᓗ ᓄᓇᓕᐸᐅᔭᕐᓂ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᖃᑎᒌᓲᖑᒻᒪᖔᑦ ᐱᔨᑦᑎᕋᖁᓪᓗᒋᑦ. ᕿᒥᕐᕈᓚᐅᕐᒥᔪᒍᑦ ᐱᓕᕆᐊᑦᓴᕆᓲᖏᑦ ᓄᓇᓕᓐᓂ ᒐᕙᒪᐅᔫᑉ ᐊᒻᒪᓗ ᓄᓇᕗᒻᒥ ᒐᕙᒪᐅᔪᑉ, ᐱᒻᒪᕆᐅᓂᖏᑦ ᓄᓇᖅᑲᑎᒌᑦ ᐃᓚᐅᖃᑕᐅᓲᖑᓂᖏᑦ, ᐊᒻᒪᓗ ᐊᒥᓱᑎᒍᑦ ᐃᖃᓗᒻᒥᐅᑦ ᐃᓚᐅᖃᑕᐅᓲᖑᒻᒪᖔᑦ. ᑕᒪᒃᑯᐊ ᐱᖃᓯᐅᔾᔨᔪᑦ ᐃᓚᐅᖃᑕᐅᓗᑎᑦ ᓂᕈᐊᕐᓂᕐᒥᒃ, ᑲᑎᒪᖃᑕᐅᖃᑦᑕᕐᓗᑎᑦ, ᐃᓚᐅᓗᑎᑦ ᑲᑎᒪᔨᕋᓛᓄᑦ, ᐅᕝᕙᓘᓐᓃᑦ ᐅᖃᐅᓯᖃᕐᓗᑎᑦ ᐃᓱᒪᒋᔭᕐᒥᓂᒃ.

ᐃᖃᓗᐃᑦ ᐱᕈᖅᐸᓪᓕᐊᒻᒪᑦ ᐊᒻᒪᓗ ᐊᔾᔨᒌᙱᑦᑐᕈᓘᔭᐅᓪᓗᑎᑦ ᐃᓄᖏᑦ ᓄᓇᓕᐸᐅᔭᕐᒥ. ᐃᖃᓗᒻᒥᐅᑦ ᐊᒥᓱᕈᖅᐸᓪᓕᐊᑎᓪᓗᒋᑦ ᐊᒻᒪᓗ ᐱᔨᑦᑎᕋᕈᑎᕗᓪᓗ, ᐱᒻᒪᕆᐅᓛᖑᓕᖅᐳᖅ ᐃᖃᓗᒻᒥᐅᑦ ᑐᑭᓯᐅᒪᓗᑎᑦ ᖃᓄᖅ ᐃᓱᒪᓕᐅᖅᑐᖃᓲᖑᒻᒪᖔᑦ ᐊᒻᒪᓗ ᖃᓄᖅ ᓂᐱᖏᑦ ᐊᔭᐅᕆᔪᓐᓇᕐᒪᖔᖅ ᐋᖅᑭᑦᓯᒪᓂᖓᑕ ᓯᕗᓂᑦᓴᖏᑦ ᐃᓄᐃᑦ. ᑐᑭᓯᐅᒪᓂᖃᑦᓯᐊᕐᓂᖅ ᐱᐅᓛᖑᕗᖅ ᐃᑲᔪᖅᑐᐃᓗᓂ ᓴᙱᔪᒥᒃ, ᖃᓄᐃᓕᐅᕈᑎᖃᕆᐊᓲᕐᒥᒃ ᓄᓇᓕᖃᖁᓪᓗᑕ.

ᑭᒃᑯᓕᒫᑦ ᓇᑯᕐᒦᖅᐸᕗᑦ ᒪᓕᖃᑦᑕᓚᐅᖅᑐᑦ ᑕᒪᒃᑯᓂᖓ, ᑲᑐᔾᔨᓪᓗᑎᑦ ᐅᖃᐅᓯᑦᓴᒥᓂᒃ, ᑲᑎᒪᖃᑕᐅᔭᖅᑐᖃᑦᑕᖅᑐᑎᑦ, ᐅᕝᕙᓘᓐᓃᑦ ᐃᓕᓐᓂᐊᒃᑲᓐᓂᖃᑦᑕᓚᐅᖅᑐᑦ. ᐃᖃᓗᐃᑦ ᐊᖏᓪᓕᕙᓪᓕᐊᓕᖅᑎᓪᓗᒍ ᐊᒻᒪᓗ ᓱᖏᐅᑎᑎᓪᓗᒍ, ᑐᑭᓯᐅᒪᓂᖅ ᖃᓄᖅ ᓄᓇᓕᑦᑕ ᒐᕙᒪᖓ ᐊᐅᓚᓂᖃᓲᖑᒻᒪᖔᖅ ᐱᕐᔪᐊᕌᓘᕗᖅ ᓴᙱᔪᒥᒃ ᓄᓇᓕᖃᓕᖁᓪᓗᑕ ᐊᒻᒪᓗ ᓄᓇᓕᒻᒥᐅᖃᑕᐅᑦᑎᐊᓕᖁᓪᓗᒋᑦ ᐃᓚᐅᖃᑕᐅᓗᑎᑦ ᐃᖃᓗᒻᒥᐅᑦ.

ᐃᓕᓐᓂᐊᒃᑲᓐᓂᕈᒪᒍᕕᑦ ᐊᓯᖏᓐᓂᒃ ᓄᓇᓖᑦ ᒐᕙᒪᖓᑕ ᐊᐅᓚᔾᔪᓯᖏᓐᓂᒃ ᓲᕐᓗᒃ ᐱᖁᑎᕐᔪᐊᓕᐅᕐᓂᕐᒧᑦ ᐸᕐᓇᓐᓂᕐᒥᒃ, ᓂᕈᐊᕐᓂᕐᒥᒃ, ᐅᕝᕙᓘᓐᓃᑦ ᖃᓄᖅ ᓄᑖᕐᓂᒃ ᐊᑐᐊᒐᓕᐅᕈᒪᓲᖑᒻᒪᖔᑦᑕ, ᐅᕙᑦᑎᓐᓄᑦ ᐅᖃᕐᕕᖃᖁᕙᑦᑎᒋᑦ. ᑐᙵᓱᐊᑎᒻᒥᔭᕗᑦ ᐃᓱᒪᒋᔭᓯ ᓯᕗᓂᑦᓴᒥ ᐱᔾᔪᑎᐅᒐᔭᖅᑐᓂᒃ ᑲᒪᒋᓛᖅᑕᑦᑎᓐᓂᒃ.

ᑕᒪᐃᓐᓂ ᑭᒃᑯᑐᐃᓐᓇᕐᓄᑦ ᑐᓴᕋᑦᓴᐅᔪᑦ ᐃᓕᓐᓂᐊᕈᑎᓄᑦ ᐊᑐᐃᓐᓇᐅᒪᕗᑦ ᐃᓄᒃᑎᑐᑦ, ᖃᓪᓗᓈᑎᑐᑦ, ᐊᒻᒪᓗ ᐅᐃᕖᑎᑐᑦ ᐅᕙᓂ www.iqaluit.ca.

ᑕᒪᓐᓇ ᐅᖃᐅᓯᖃᕐᓂᕗᑦ ᑕᒪᒃᑯᓂᖓ ᐃᓱᓕᓐᓂᐊᙱᓚᖅ ᑕᒫᓂ ᐊᐅᔭᖅ. ᓄᓇᓕᓐᓂ ᒐᕙᒪᐅᔪᑦ ᑲᔪᓯᓂᖃᑦᑎᐊᓛᖑᓲᖅ ᐊᐅᓚᓂᖃᑦᑎᐊᖅᑐᒃᑯᑦ ᓄᓇᓕᒻᒥᐅᑦ ᑐᑭᓯᐅᒪᖃᑦᑕᕈᑎᑦ, ᐃᓚᐅᖃᑕᐅᖃᑦᑕᕈᑎᑦ, ᐊᒻᒪᓗ ᑐᓴᖅᑕᐅᖃᑦᑕᖅᑎᓪᓗᒋᑦ.

##

ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:

ᔩᐅᑉ ᕙᕐᓂ

ᐊᖏᔪᖅᑳᖅ ᑐᓴᐅᒪᔪᓕᕆᔨᒃᑯᓐᓄᑦ ᐊᒻᒪ ᐊᑭᓕᕐᓱᐃᔨᓄᑦ ᐱᔨᖅᑎᕋᐅᑎ

ᓄᓇᓕᐸᐅᔭᐃᑦ ᐃᖃᓗᐃᑦ

867-979-5619 | G.Byrne@iqaluit.ca