ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᐃᓄᖕᓄᑦ ᑐᓴᕋᑦᓴᖅ
ᐱᔭᑦᓴᓕᐅᕐᓂᖅ: ᖃᓄᖅ ᓄᓇᓕᐸᐅᔭᒃᑯᑦ ᑲᑎᒪᔨᖏᑕ ᑲᑎᒪᓂᖏᑦ ᐱᓕᕆᐊᖑᕙᓐᓂᖏᑦ
ᔪᓚᐃ 15, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᐊᔭᐅᖅᑐᐃᔪᑦ ᓄᓇᓕᕐᒥᐅᑕᓂᒃ ᖃᐅᔨᒪᓕᕆᐊᖁᔭᐅᓗᑎᒃ ᖃᓄᖅ ᓄᓇᓕᐸᐅᔭᒃᑯᑦ ᑲᑎᒪᔨᖏᑕ ᑲᑎᒪᓂᕆᕙᑦᑕᖏᑦ ᐱᓕᕆᐊᖑᕙᒻᒪᖔᑕ ᐊᒻᒪ ᖃᓄᖅ ᐱᔭᑦᓴᓕᐅᖅᐸᒻᒪᖔᑕ ᐊᑦᑐᐃᕙᑦᑐᓂᒃ ᓄᓇᓕᑦᑎᓐᓂᒃ. ᑕᒪᒃᑯᐊ ᑲᑎᒪᓂᐅᕙᑦᑐᑦ ᒪᓕᑉᐸᑦᑐᑦ ᒪᓕᒐᕐᓂᒃ ᐋᖅᑭᑦᑕᐅᕙᑦᑐᓂᒃ ᐅᑯᓄᖓ ᓄᓇᓕᐸᐅᔭᐃᑦ ᑕᐅᓐᖑᔪᑦ ᐊᒻᒪ ᕕᓕᔾᔨᓄᑦ ᒪᓕᒐᕐᒥᒃ ᐊᒻᒪ ᓄᓇᓕᐸᐅᔭᒃᑯᑦ ᑲᑎᒪᔨᖏᑕ ᐱᓕᕆᔾᔪᑎᖏᓐᓄᑦ ᒪᓕᒐᕋᓛᕐᒥᒃ. ᑕᒪᒃᑯᐊ ᒪᓕᒐᐃᑦ ᓇᓗᓇᐃᔭᐃᑎᐅᕙᑦᑐᑦ ᐱᔭᑦᓴᓕᐅᕈᑎᐅᕙᑦᑐᑦ ᐱᓕᕆᐊᖑᖁᔭᐅᓗᑎᒃ ᒪᑐᐃᖓᑦᓯᐊᕐᓗᑎᒃ ᐊᒻᒪ ᐊᔾᔨᒌᑎᑦᓯᕙᓪᓗᑎᒃ ᑭᒃᑯᑐᐃᓐᓇᕐᓂᒃ.
ᑲᑎᒪᔩᑦ ᑲᑎᒪᕙᑦᑐᑦ ᖃᐅᑕᒫᖅ, ᒪᕐᕈᐊᑎᓗᐊᖅᐸᑦᑐᑎᒃ ᑕᖅᑭᐅᑉ ᐃᓗᐊᓂ, ᐊᒻᒪ ᑭᒃᑯᑐᐃᓐᓇᕐᓄᑦ ᒪᑐᐃᖓᕙᑦᑐᑎᒃ. ᐅᓪᓗᕐᓯᐅᑎᖏᑦ ᐊᒻᒪ ᑲᑎᒪᔾᔪᑎᑦᓴᐃᑦ ᐊᑐᓂ ᑲᑎᒪᓂᕐᓄᑦ ᐅᖃᐅᓯᐅᕙᑦᑐᑦ ᓯᕗᓂᐊᒍᑦ ᓄᓇᓕᐸᐅᔭᒃᑯᑦ ᐃᑭᐊᖅᑭᕕᖏᓐᓂ ᐊᒻᒪ ᑭᒃᑯᑐᐃᓐᓇᕐᓄᑦ ᐅᐸᑦᑕᐅᓗᐊᖅᐸᑦᑐᓄᑦ ᓴᖅᑭᖅᑕᐅᕙᑦᑐᑎᒃ ᑎᑎᖅᑲᑦᑕᖏᑦ. ᐃᑲᔫᑎᐅᕙᑦᑐᑦ ᓄᓇᓕᕐᒥᐅᑕᓄᑦ ᖃᐅᔨᒪᒍᒪᓂᖏᓐᓄᑦ ᖃᖓᒃᑯᑦ ᑲᑎᒪᓂᐊᖅᑎᓪᓗᒋᑦ ᐊᒻᒪ ᓱᓇᐅᓂᖏᓐᓄᑦ ᐅᖃᐅᓯᐅᓂᐊᖅᑐᑦ ᑲᑎᒪᓕᖅᐸᑕ.
ᑲᑎᒪᔨᓄᑦ ᐅᖃᓕᒪᒍᒪᓐᓂᕈᑦᓯ ᐱᔾᔪᑎᖃᕐᓗᓯ ᓱᓇᓂᒃ ᐅᕝᕙᓘᓐᓃᑦ ᐃᓱᒫᓘᑎᒋᔭᕐᓂᒃ, ᐊᐱᕆᒋᐊᓕᒃ ᓯᕗᓂᐊᒍᑦ ᐃᓚᓕᐅᔾᔭᐅᒍᓐᓇᕐᒪᖔᖅᐱᑦ ᑲᑎᒪᔾᔪᑎᑦᓴᓄᑦ ᐃᒪᐃᑦᑑᓗᑎᑦ “ᐅᖃᕆᐊᖅᑐᖅᓯᒪᔪᖅ”. ᑕᐃᒪᐃᒍᒪᒍᕕᑦ, ᖃᐅᔨᒋᐊᕆᐊᖃᖅᑕᐃᑦ ᓄᓇᓕᐸᐅᔭᒃᑯᑦ ᐊᓪᓚᑦᑎᖓᑕ ᐊᓪᓚᕝᕕᖓ ᐱᓇᓱᐊᕈᓰᒃ ᒪᕐᕉᒃ ᓯᕗᓂᐊᒍᑦ. ᑐᑦᓯᕋᐅᑎᒋᔭᐃᑦ ᕿᒥᕐᕈᐊᖅᑕᐅᒍᓐᓇᕐᓯᖁᓪᓗᒍ ᐊᒻᒪ ᑲᑎᒪᔾᔪᑎᑦᓴᑦ ᑎᑎᕋᖅᑕᐅᒋᐊᕆᐊᖃᕋᔭᕐᒥᒻᒪᑕ ᐊᒻᒪ ᐊᖏᖅᑕᐅᓗᑎᒃ ᑲᑎᒪᓂᐅᓂᐊᖅᑐᖅ ᑎᑭᓚᐅᖏᓐᓂᖓᓂ. ᐅᖃᕆᐊᖅᑐᕐᓯᒪᓂᐊᖅᑐᑦ ᕿᓚᒥᐅᔪᒃᑯᑦ ᑲᑎᒪᓂᕐᓂ ᐅᖃᓕᒪᒍᓐᓇᖅᑎᑕᐅᕙᑦᑐᑦ, ᑲᑎᒪᔨᐅᔪᑦ ᐋᔩᕈᑎᖃᓚᐅᖏᓐᓂᖏᓐᓂ ᐅᕝᕙᓘᓐᓃᑦ ᑲᔪᓯᑎᑦᓯᒋᐊᓚᐅᖅᑎᓐᓇᒋᑦ ᓂᕈᐊᕈᑎᖃᕐᓂᒃᑯᑦ ᐱᔭᑦᓴᓂᒃ. ᑕᒪᓐᓇ ᐱᓕᕆᔾᔪᑎᒍᑦ ᐱᕕᖃᐅᑎᐅᑎᑕᐅᔪᖅ ᓄᓇᓕᕐᒥᐅᑕᐃᑦ ᐊᒻᒪ ᓄᓇᓕᓐᓂ ᑲᑎᖕᖓᕙᑦᑐᑦ ᐃᓱᒪᒋᔭᕐᒥᓂᒃ ᐅᖃᖃᑎᖃᕈᓐᓇᖅᑎᑕᐅᕙᑦᑐᑦ ᑲᑎᒪᔨᓂᒃ.
ᐱᒻᒪᕆᐅᔪᖅ ᖃᐅᔨᒪᓂᐊᕐᓗᓂ ᑲᑎᒪᔨᐅᔪᑦ ᐱᓕᕆᐊᖃᓕᕋᐃᒻᒪᑕ ᑭᖑᓪᓕᐹᕐᓯᐅᑎᖏᓐᓂᒃ ᒪᓕᒐᕋᓛᓕᐊᑦ ᑕᐃᔭᐅᔪᒥᒃ ᐱᖓᔪᐊᓂ ᐅᖃᓕᒫᖅᑕᐅᓂᖏᓐᓄᑦ ᑭᒃᑯᑐᐃᓐᓇᐃᑦ ᐅᖃᐅᑎᑦᓴᖃᕈᓐᓇᐃᓕᑎᑕᐅᕙᑦᑐᑦ ᑲᑎᒪᑎᓪᓗᒋᑦ ᐱᖓᔪᐊᓂ ᐅᖃᓕᒫᖅᑕᐅᕕᖓᓂ. ᑕᒪᓐᓇ ᐱᔾᔪᑎᐅᓗᓂ, ᓄᓇᓕᕐᒥᐅᑕᐃᑦ ᐊᔭᐅᖅᑐᖅᑕᐅᕙᑦᑐᑦ ᐃᓱᒪᒋᔭᖏᓐᓂᒃ ᐅᖃᖁᔭᐅᓗᑎᒃ ᕿᓚᒥᐅᔫᒥᔪᖅ ᐱᖓᔪᐊᓂ ᐅᖃᓕᒫᖅᑕᐅᖏᓐᓂᖓᓂ ᑲᑎᒪᔨᓄᑦ ᓱᓕ ᐃᓱᒪᕐᓴᕐᓯᐅᕈᑎᐅᑎᓪᓗᒍ ᐱᔾᔪᑎᐅᔪᖅ.
ᐃᑲᔪᕐᓱᐃᔾᔪᑎᐅᓗᑎᒃ ᒪᑐᐃᖓᓂᕐᒥᒃ, ᓄᓇᓕᐸᐅᔭᒃᑯᑦ ᓇᓗᓇᐃᔭᐃᕙᑦᑐᑦ ᑲᑎᒪᔨᓄᑦ ᑲᑎᒪᔾᔪᑎᑦᓴᓂᒃ, ᑎᑎᕋᖅᑕᐅᓯᒪᕙᑦᑐᑎᒃ ᑲᑎᒪᔨᓄᑦ ᐱᖁᔨᕗᖔᓕᐊᖑᔪᑦ, ᑲᑎᒪᔨᓄᑦ ᑲᑎᒪᔾᔪᑎᒥᓂᐅᔪᑦ, ᐊᒻᒪ ᓂᐱᓕᐅᖅᑕᐅᕙᑦᑐᑎᒃ ᐃᑭᐊᖅᑭᕕᖏᓐᓄᑦ. ᑕᒪᒃᑯᐊ ᓂᐱᓕᐅᕐᓯᒪᕙᒃᑲᓗᐊᖅᑐᑎᒃ ᐊᑐᓂ ᑲᑎᒪᓂᐅᔪᓂᒃ, ᕿᓂᓗᐊᕋᑦᓴᐅᖏᑦᑐᑦ, ᑕᐃᒪᐃᓐᓂᖏᓐᓄᑦ ᕿᓂᖅᑐᑦ ᐱᓪᓗᐊᑕᐅᔪᓂᒃ ᐅᖃᐅᓯᐅᔪᕕᓂᕐᓂᒃ ᑕᕝᕙᓴᐃᓐᓇᖅ ᓇᓂᔭᐅᔪᓐᓇᔾᔮᖏᑦᑐᑦ. ᓄᓇᓕᐸᐅᔭᒃᑯᑦ ᐱᐅᓯᑎᑦᓯᒋᐊᕋᓱᑦᑑᒐᓗᐊᑦ ᑕᒪᑦᓱᒥᖓ ᑕᑯᒋᐊᖅᑕᐅᒍᓐᓇᖁᓪᓗᒋᑦ ᑲᑎᒪᔾᔪᑎᒥᓂᐅᔪᑦ ᓄᓇᓕᕐᒥᐅᑕᐃᑦ ᑐᓴᐅᒪᑦᓯᐊᕈᓐᓇᖁᓪᓗᒋᑦ ᑐᓴᐅᒪᒍᒪᔭᖏᓐᓂᒃ.
ᐊᔭᐅᖅᑐᖅᑕᕗᑦ ᓄᓇᓕᕐᒥᐅᑕᐃᑦ ᐃᓚᒋᔭᐅᖃᑦᑕᖁᓪᓗᒋᑦ ᓄᓇᓕᖏᓐᓂ ᒐᕙᒪᓕᕆᔨᖏᓐᓂᒃ ᐅᐸᑉᐸᓪᓗᑎᒃ ᑲᑎᒪᓂᕐᓄᑦ, ᑐᓴᐅᒪᒐᓱᑉᐸᓂᕐᒥᒃ, ᐊᒻᒪ ᖃᐅᔨᒋᐊᖅᐸᓂᕐᒥᒃ ᑲᑎᒪᔨᖁᑎᖏᓐᓂᒃ ᐊᐱᖅᑯᑎᖃᕐᓂᕈᑎᒃ ᐅᕝᕙᓘᓐᓃᑦ ᖃᓄᑐᐃᓐᓇᖅ ᐅᖃᐅᑎᑦᓴᖃᕐᓂᕈᑎᒃ.
###
ᑐᑭᓯᒋᐊᒃᑲᓐᓂᕐᕕᑦᓴᖅ ᐅᓇ ᖃᐅᔨᒋᐊᕐᓗᒍ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | G.Byrne@iqaluit.ca
