
ᑭᒃᑯᑐᐃᓐᓇᕐᓄᑦ ᑐᓴᕋᑦᓴ
ᐊᑦᑕᓇᔾᔭᐃᕐᓯᒪᒋᐊᖅᐸᓪᓗᓯ ᓄᓇᒃᑰᔫᕐᓂᐊᕈᑦᓯ ᐊᑐᕆᐊᑦ ᐃᓚᖏᑦ ᐊᐱᓯᒪᓂᖏᓐᓄᑦ ᐊᒻᒪ ᓂᓚᒻᒧᑦ ᖁᐊᓴᐅᒻᒪᑕ
ᓅᕖᐱᕆ 15, 2024 – ᐃᖃᓗᐃᑦ, ᓄᓇᕗᑦ
ᐊᐴᑏᓐᓇᐅᓕᕇᖅᑎᓪᓗᒋᑦ ᐊᒻᒪ ᓂᓚᐃᓐᓇᐅᓗᑎᒃ ᐃᓚᖏᑦ ᐃᖃᓗᐃᑦ ᐊᑐᕆᐊᖏᑦ, ᐊᒻᒪ ᐃᒃᑮᓇᐃᓐᓇᕈᔪᓐᓂᐊᓕᖅᑐᓂᓗ. ᓄᓇᓕᐸᐅᔭᒃᑯᑦ ᐃᖃᓗᓐᓂ ᐃᖅᑲᐃᑎᑦᓯᒍᒪᕗᑦ ᓄᓇᒃᑰᔫᖅᐸᑦᑐᓂᒃ ᐅᔾᔨᕈᓱᑦᓯᐊᖃᑦᑕᖁᔭᐅᓗᑎᒃ, ᐊᑐᕆᐊᑦ ᖁᐊᓴᐸᕈᓘᒍᓐᓇᕐᒪᑕ ᐃᓚᖏᑦ, ᐱᓇᓱᐊᕈᓯᓕᒫᖅ ᑕᐃᒪᐃᓐᓂᐊᐸᓪᓚᐃᓪᓗᑎᒃ.
ᐊᑦᑕᓇᔾᔭᐃᕐᓯᒪᓗᓯ ᓄᓇᒃᑰᔫᕐᓂᐊᕈᑦᓯ ᖁᐊᓴᐅᓗᐊᖅᑎᓪᓗᒍ, ᐃᖏᕐᕋᓯᕙᓪᓗᓯ ᐊᒻᒪ ᓄᖅᑲᐸᓪᓗᓯ ᓱᒃᑲᐃᑦᑐᑯᓘᓗᓯ ᐊᑦᓲᓗᐊᖏᑦᑐᖅ ᓇᕿᒻᒥᐸᓪᓗᒋᒃ ᐃᖏᕐᕋᓯᒋᐊᕈᑎᖏᑕ ᐊᒻᒪ ᓄᖅᑲᕆᐊᕈᑎᖏᑕ ᓇᕿᑦᑕᐅᑎᖏᒃ, ᑕᕝᕙᓴᐃᓐᓇᖅ ᐊᓯᔾᔨᑕᖅᑎᓪᓗᒋᑦ ᓄᖅᑲᕈᓐᓇᐃᓕᒐᔭᕋᕕᑦ. ᓯᕗᓂᓐᓂᑦᑐᖅ ᓄᓇᒃᑰᔫᖅ ᖃᓂᒋᓗᐊᖏᓪᓗᒍ ᓄᖅᑲᑲᓪᓚᒋᐊᖃᕐᓂᕈᑦᓯ ᐊᐳᑦᑕᖅᐱᐊᕋᕕᐅᒃ, ᓄᖅᑲᕐᓴᕋᐃᓐᓂᕐᓴᐅᒍᓐᓇᕋᔭᕋᕕᑦ ᐊᑐᕆᐊᖅ ᖁᐊᓴᐅᑎᓪᓗᒍ. ᓱᒃᑲᓗᐊᖏᓪᓗᑎᑦ ᐃᖏᕐᕋᕙᓪᓗᑎᑦ ᓂᓚᐅᓗᐊᖅᑎᓪᓗᒍ ᐊᑐᕆᐊᖅ ᐃᖏᕐᕋᕖᑦ, ᐊᒻᒪ ᒪᔪᖅᑲᒃᑰᓕᕋᐃᒍᕕᑦ ᐊᔪᕐᓇᖏᑉᐸᑦ ᓄᓇᒃᑰᔫᑉ ᓴᖑᒍᑎᖏᑦ ᓱᑲᖓᑎᓗᐊᖏᓪᓗᒋᑦ, ᖁᐊᓴᕆᖁᓇᓯ. ᓴᖑᒋᐊᖃᓕᕐᓂᕈᑦᓯ ᖃᐅᔨᓴᑦᓯᐊᐸᓪᓗᓯ ᐊᑑᑎᖃᑦᓯᐊᕐᒥᔪᖅ, ᓴᖑᑲᓪᓚᐸᓐᓂᐊᖏᓇᑦᓯ ᐊᑦᓱᑲᓪᓚᒃ. ᓄᓇᒃᑰᔫᑦ ᑎᓱᓯᑦᑕᓂᖅᐸᑦ, ᑐᕌᖅᐸᓪᓗᓯ ᓴᖑᕕᒋᕙᓪᓕᐊᔭᖓᓄᑦ ᓄᓇᒃᑰᔫᑉ ᐊᐅᓚᑦᓯᐊᕐᓂᐊᕋᕕᐅᒃ ᐃᖏᕐᕋᓂᖓ ᓇᒧᑦ.
ᓄᓇᓕᐸᐅᔭᒃᑯᑦ ᐊᑐᕆᐊᓕᕆᔨᖏᑦ ᐊᑐᕆᐊᓕᕆᕙᓪᓕᐊᔫᒐᓗᐊᑦ ᐊᐳᑕᐃᔭᐃᓗᑎᒃ ᐊᒻᒪ ᓯᐅᕋᓕᕐᓱᐃᓪᓗᑎᒃ. ᐊᑏ ᐱᓕᕆᐊᖃᑦᓯᐊᖁᓪᓗᒋᑦ ᐃᖏᖃᖅᑎᑕᐅᒋᐊᖅᐸᓪᓕᑦ, ᐊᒻᒪ ᐃᓘᓐᓇᑎᓐᓂᒃ ᐊᑦᑕᓇᔾᔭᐃᕐᓯᒪᓇᓱᑦᑕ ᓄᓇᒃᑰᔫᖅᐸᓪᓗᑕ ᐅᔾᔨᕈᓱᑦᓯᐊᕐᓗᑕ ᐃᖏᕐᕋᕕᑦᑎᓐᓂᒃ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ ᐅᓇ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | G.Byrne@iqaluit.ca