ᐊᐳᒻᒥᑦ ᐊᒻᒪ ᓂᓚᒃ ᓄᐊᓯᒪᑎᓪᓗᒋᑦ ᓄᓇᒃᑰᔫᓄᑦ

ᐃᓄᓐᓄᑦ ᑐᓴᕋᔅᓴᖅ

ᐊᐳᒻᒥᑦ ᐊᒻᒪ ᓂᓚᒃ ᓄᐊᓯᒪᑎᓪᓗᒋᑦ ᓄᓇᒃᑰᔫᓄᑦ

 

ᐋᑦᑑᐸ 5, 2022 − ᐃᖃᓗᐃᑦ, ᓄᓇᕗᑦ

 

ᓄᓇᓕᐸᐅᔭᐃᑦ ᐃᖃᓗᐃᑦ ᖃᐅᔨᒪᖁᔨᓕᕆᕗᑦ ᓄᓇᓕᕐᒥᐅᑕᓂᑦ ᐱᔾᔪᑎᖃᕐᓗᑎᒃ ᒪᓕᒐᕐᓂᑦ ᑎᑎᕋᕐᓯᒪᔪᓂᑦ ᓄᓇᓕᓐᓂ ᐊᑐᕆᐊᒃᑯᑦ ᐃᖏᕐᕋᕙᑦᑐᓄᑦ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᒪᓕᒐᕋᓛᕐᒥ 943, ᐊᒻᒪᑦᑕᐅᖅ ᓄᓇᕗᑦ ᐊᑐᕆᐊᒃᑯᑦ ᐃᖏᕐᕋᕙᑦᑐᓄᑦ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᒪᓕᒐᕐᒥᑦ ᐱᔾᔪᑎᒋᓪᓗᒋᑦ ᐲᔭᖅᑕᐅᒋᐊᖃᕐᓂᖏᓐᓂᑦ ᓄᐊᑦᓯᒪᔪᑦ ᐊᐳᑦ, ᓂᓚᐃᑦ ᐅᕝᕙᓘᓐᓃᑦ ᓱᓇᑐᐃᓐᓇᐃᑦ ᐊᕝᕕᐊᕈᑎᐅᔪᓐᓇᖅᑐᑦ ᐊᖁᑎᐅᑉ ᓇᒧᑦ ᑕᑯᔪᓐᓇᕐᓂᖏᓐᓂᑦ ᐅᕝᕙᓘᓐᓃᑦ ᐲᑐᐃᓐᓇᕆᐊᓖᑦ ᓇᑭᑐᐃᓐᓇᖅ ᓄᓇᒃᑰᔫᒥᑦ ᐃᖏᕐᕋᑎᓪᓗᒍ.

 

ᐅᑭᐅᖅᐸᓪᓕᐊᓕᖅᑎᓪᓗᒍ ᐊᐱᕙᓐᓂᐊᓕᕐᒪᑦ ᐊᒻᒪ ᓂᓚᕈᖅᐸᓕᕐᓗᑎᒃ, ᐲᔭᖃᑦᑕᕆᐊᖃᕐᓂᐊᓕᕐᒥᔪᓂᑦ ᐊᐅᓚᑎᓕᒻᒥᑦ ᓄᓇᒃᑰᔫᓐᓂᒃ ᐊᓯᑎᑦ ᓄᓇᒃᑰᔫᖅᑐᑦ ᐊᒻᒪ ᐱᓱᑉᐸᑦᑐᑦ ᐊᑦᑕᓇᖅᑐᒦᖁᓇᒋᑦ ᐊᑐᕆᐊᕐᒦᑦᑐᑦ.

 

ᐊᐳᑦ ᐊᒻᒪ ᓂᓚᒃ ᓄᐊᑦᓯᒪᑎᓪᓗᒍ ᐊᕝᕕᐊᕈᓐᓇᕐᒪᑕ ᓇᒧᑦ ᐊᖁᑎᐅᑉ ᑕᑯᔪᓐᓇᕐᓂᖏᓐᓂᑦ ᐅᕝᕙᓘᓐᓃᑦ ᐲᑲᓪᓚᒍᓐᓇᕐᒪᑕ ᑲᑕᓪᓗᑎᓪᓘᓐᓃᑦ ᓄᓇᒃᑰᔫᒥᑦ ᐊᓯᓐᓄᑦ ᓄᓇᒃᑰᔫᖅᑐᓄᑦ ᐱᓱᑦᑐᓄᓪᓘᓐᓃᑦ ᐅᓗᕆᐊᓇᕐᓯᓗᑎᒃ ᐊᑐᕆᐊᓃᑦᑐᓂᑦ.

 

ᒪᓕᑦᑐᒍ ᓄᓇᓕᐸᐅᔭᐃᑦ ᐃᖃᓗᐃᑦ ᐊᑐᕆᐊᒃᑯᑦ ᐃᖏᕐᕋᕙᑦᑐᓄᑦ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᒪᓕᒐᕋᓛᕐᒥ 943, ᑎᑎᕋᕐᓯᒪᕕᒻᒦᑦᑐᑦ 2.22 ᐊᖁᑎᐅᔪᑦ ᐲᔭᐃᒋᐊᖃᖅᐸᑦᑐᑦ ᐊᐳᒻᒥᑦ, ᓂᓚᒻᒥᑦ ᐊᒻᒪ ᐊᓯᖏᓐᓂᑦ ᐊᕝᕕᐊᕈᑎᔪᓂᑦ ᐊᖁᑎᐅᑉ ᓇᒧᑦ ᑕᑯᔪᓐᓇᕐᓂᖏᓐᓂᑦ ᐅᕝᕙᓘᓐᓃᑦ ᐲᑲᓪᓚᒍᓐᓇᖅᑐᓄᑦ ᓄᓇᒃᑰᔫᓂᑦ ᐃᖏᕐᕋᒍᑎᐅᑎᓪᓗᒋᑦ, ᐲᔭᐃᓯᒪᕙᖕᖏᒃᑯᑎᒃ ᐊᑭᓖᑎᑕᐅᔪᓐᓇᖅᑐᑦ $250-ᓂᑦ.

ᑖᒃᑯᐊᓕᒫᑦ ᒪᓕᒐᐃᑦ ᒪᓕᑦᑕᐅᒋᐊᓖᑦ ᐊᑦᑕᓇᖅᑐᒦᖁᓇᒋᑦ ᓄᓇᒃᑰᔫᒦᑦᑐᑦ ᐊᒻᒪ ᑕᐃᒃᑯᐊ ᐊᑐᕆᐊᓃᑦᑐᑦ ᐃᖃᓗᑦ ᓄᓇᓕᖓᓂ.

##

 

ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:

ᓯᑏᕙᓐ ᐋᓚᓐ

ᒪᓕᒐᕋᓛᓕᕆᔨᓄᑦ ᐊᖏᔪᖅᑳᖑᑲᐃᓐᓇᖅᑐᖅ

ᓄᓇᓕᐸᐅᔭᐃᑦ ᐃᖃᓗᐃᑦ

867-979-5674 | s.allen@iqaluit.ca