ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐅᓂᒃᑳᖅᓯᒪᔭᐃᑦ ᐃᑲᔪᕈᓐᓇᑐᐃᓐᓇᕆᐊᖃᕐᒪᑦ ᑮᓇᐅᔭᖃᖅᑎᑕᐅᒍᑎᒧᑦ ᐊᓐᓂᑭᑦᑐᕕᐅᑉ ᓴᓇᒋᐊᖅᑕᐅᒍᑎᖏᓐᓄᑦ
ᕕᕝᕗᐊᕆ 10, 2026 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᖓ ᐃᖃᓗᐃᑦ ᐅᐱᒍᓱᒻᒪᑦ ᑐᓴᖅᑕᐅᑎᑦᑎᒋᐊᔅᓴᖅ ᓂᕈᐊᒐᔅᓴᓕᐊᕆᒐᓱᐊᕋᑦᑎᒍ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᔾᔪᐊᕐᕕᐅᑉ ᐊᓐᓂᑭᑦᑐᕕᖓ ᐆᒧᖓ Kraft Hockeyville 2026−ᒧᑦ, ᑲᓇᑕᓕᒫᒥ ᑐᓂᓯᔭᐅᓂᕐᒧᑦ ᐱᓕᕆᔾᔪᑎᒧᑦ ᐆᒧᖓ ᐃᑲᔪᓲᒧᑦ ᓴᓇᒋᐊᖅᑕᐅᑎᑦᑎᓂᕐᒥᒃ ᓄᓇᓕᒻᒥ ᐊᓐᓂᑭᑦᑐᕕᓐᓂᒃ ᑲᓇᑕᓕᒫᒥ. ᓵᓚᔅᓴᐅᓯᐊᖅᑐᖅ ᓄᓇᓕᒃ ᐱᑎᑕᐅᒐᔭᕐᒪᑦ $250,000−ᓂᒃ ᑮᓇᐅᔭᖃᖅᑎᑦᑎᒍᑎᓂᒃ ᓴᓇᒋᐊᖅᑕᐅᒋᐊᖃᓪᓚᕆᑦᑐᓂᒃ ᐊᒻᒪᓗ ᐱᐅᓯᒋᐊᖅᑕᐅᒋᐊᖃᓪᓚᕆᑦᑐᓂᒃ, ᐊᒻᒪᓗ ᐃᓕᓐᓄᑦ ᐃᑲᔪᖅᑕᐅᒋᐊᖃᕋᑦᑕ ᑕᒪᓐᓇ ᐊᑐᕈᓐᓇᖅᓯᖁᓪᓗᒍ ᐅᕙᑦᑎᓐᓄᑦ.
ᑕᒪᓐᓇ ᐊᑕᐅᓯᐊᕐᓗᓂ ᐊᑐᕋᔭᕐᒪᑦ ᐱᕕᔅᓴᖃᑲᐃᓐᓇᖅᑎᑦᑎᓂᖓ ᑲᓇᑕᓕᒫᒧᑦ ᑐᓴᖅᑕᐅᖁᓪᓗᑕ ᐊᒻᒪᓗ ᐊᖏᔪᐊᓗᒻᒥᒃ ᐊᑐᕈᒫᓂᐊᖅᑐᓕᐅᕈᑎᒋᒍᓐᓇᕋᑦᑎᒍ ᐊᓐᓂᑭᑦᑐᕕᖁᑎᑦᑎᓐᓄᑦ. ᐃᓘᓐᓇᑎᒃ ᐅᓂᒃᑳᕆᔭᐅᔪᑦ, ᐊᔾᔨᙳᐊᑦ, ᐊᒻᒪᓗ ᑎᑎᕋᕐᓃᑦ ᐃᑲᔪᖅᓱᐃᒍᑎᒥᒃ ᓄᓇᓕᒻᒥᐅᑕᐅᔪᓂᒃ ᐃᑲᔪᕐᓂᖃᕋᔭᕐᒪᑕ ᐱᒍᓐᓇᖅᓯᒍᑎᒋᓗᑎᒍ ᑎᑎᖅᑖᕈᑎᓂᒃ ᐊᒻᒪᓗ ᓴᙵᓂᖅᓴᐅᓕᖅᑎᑦᑎᒐᔭᖅᑐᑎᒃ ᓵᓚᔅᓴᑐᐃᓐᓇᕆᐊᖃᕐᓂᑦᑎᓐᓂᒃ.
ᐃᑲᔪᖅᑕᐅᒍᒪᓕᕋᑦᑕ ᓄᓇᓕᒻᒥᐅᑕᐅᔪᓄᑦ ᖃᓄᑐᐃᓐᓇᖅ ᐅᑭᐅᖃᖅᑎᒋᒐᓗᐊᕈᔅᓯ ᐱᔭᐅᑎᑦᑎᖁᓪᓗᓯ ᐊᔾᔨᙳᐊᓂᒃ, ᐅᓂᒃᑳᕆᔭᔅᓯᓐᓂᒃ, ᐊᒻᒪᓗ ᐅᖃᖅᓯᒪᔪᓂᒃ ᐃᑲᔪᖅᓱᐅᓂᔅᓯᓐᓂᒃ ᑕᒪᑐᒥᖓ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᔾᔪᐊᕐᕕᐅᑉ ᐊᓐᓂᑭᑦᑐᕕᖓᓂᒃ ᑐᑭᖃᖅᑎᑦᑎᓂᔅᓯᓐᓂᒃ ᐱᒍᒥᓇᕐᓂᖓᓂᒃ. ᐃᒪᓐᓇᐅᓯᒪᒍᔅᓯᓘᓐᓃᑦ ᐊᓐᓂᑭᑦᑐᓚᐅᖅᓯᒪᓗᓯ ᑕᕝᕙᓂ, ᐃᑲᔪᖅᓱᐃᓗᓯ ᖃᐃᒐᓛᕈᑎᖃᖃᑦᑕᖅᓯᒪᒍᔅᓯ ᐃᓚᔅᓯᓐᓂᒃ ᑕᑯᕋᓐᓈᕐᕕᓐᓂᒃ, ᐅᕝᕙᓘᓐᓃᑦ ᐋᖅᑭᓱᐃᒍᔅᓯ ᐊᑯᓂ ᐱᖃᓐᓇᕇᓕᓂᐊᕐᓂᔅᓯᓐᓂᒃ ᕼᐊᑭᓐᓂᒃᑯᑦ, ᓂᐲᑦ ᐊᑑᑎᖃᕐᕕᔾᔪᐊᖅᐳᖅ.
ᖃᓄᖅ ᑐᑭᖃᖅᑎᒻᒪᖔᖅᑎᒍ ᐊᓐᓂᑭᑦᑐᕕᖓ ᓄᓇᓕᑦᑕ:
· ᕼᐊᑭᑦᑐᑦ ᐊᒻᒪᓗ ᐊᓐᓂᑭᑦᑐᖅᑎᑦ ᑲᑎᖃᑎᒌᑦᑎᑦᑎᓲᖑᒻᒪᑕ ᐃᖃᓗᒻᒥᐅᓂᒃ ᑲᑎᖃᑎᒌᑦᑎᑦᑎᓲᖑᒻᒪᑦ, ᓄᓇᓕᒻᒥᒃ ᖁᕕᐊᓱᖃᑎᒌᓕᖅᑎᑦᑎᓪᓗᓂ ᐊᒻᒪᓗ ᐃᑲᔪᖅᑕᐅᓪᓗᑎᒃ ᒪᒃᑯᑦᑐᐃᑦ, ᐃᓐᓇᐃᑦ, ᐊᒻᒪᓗ ᐃᓚᒌᑦᑐᑦ ᑕᐃᒫᓪᓗᐊᖃᑎᒋᓪᓗᑎᒃ, ᐱᓗᐊᙳᐊᖅᑐᒥᒃ ᐊᑯᓂᐊᓗᒃ ᐅᑭᐅᖑᖃᑦᑕᖅᑎᓪᓗᒍ.
· ᐊᓐᓂᑭᑦᑐᕕᐅᒻᒪᑦ ᐅᖓᑖᓂᒻᒪᑦ ᐃᓪᓗᑐᐃᓐᓇᐅᒐᓂ. ᑲᑎᖃᑦᑕᕐᕕᐅᒻᒪᑦ ᑲᓲᑎᖃᑎᒌᕕᐅᓪᓗᓂ, ᖃᓄᐃᖏᑦᑎᐊᕐᓂᕐᒧᑦ, ᐊᒻᒪᓗ ᐃᓚᒌᒍᑎᒋᔭᐅᓪᓗᓂ.
· ᐃᑲᔪᖅᓱᐃᓗᓂ ᖃᐃᒐᓛᑉᐸᓪᓗᓂ ᑐᓂᖅ ᑕᐃᖑᑎᓪᓗᒍ ᐱᙳᐊᕕᔾᔪᐊᕐᓂᕐᒥ ᑕᐅᑐᒋᐊᖅᑕᐅᓯᒪᑎᓪᓗᒋᑦ ᒪᒃᑯᑦᑐᑦ ᓵᓚᔅᓴᕋᓱᐊᖅᑎᓪᓗᒋᑦ ᐅᑭᐅᖅᑕᖅᑐᒥᒃ ᐅᑭᐅᒃᑯᑦ ᐱᙳᐊᕕᔾᔪᐊᕐᓂᐅᔪᓂ, ᐊᓐᓂᑭᑦᑐᕕᒃ ᑲᑎᖃᑎᒌᑦᑎᑦᑎᓲᖑᒻᒪᑦ ᑭᖑᕚᕆᓂᒃ ᐃᖃᓗᒻᒥᐅᓂᒃ ᑲᑎᖃᑎᒌᑦᑎᓪᓗᒋᑦ ᐱᓕᐅᑎᓂᒃᑯᑦ ᐊᒻᒪᓗ ᐱᕕᖃᑲᐃᓐᓇᕕᐅᓲᖑᓪᓗᓂ ᑲᑎᒻᒪᑲᐃᓐᓇᕐᓂᕐᒥᒃ.
· ᐱᓕᕆᖃᑎᒋᔭᐅᓂᕆᔭᐃᑦ ᐃᓚᓯᒐᔭᕐᒪᑦ ᑎᑎᖅᑖᕈᑎᓂᒃ ᓂᕈᐊᒐᔅᓴᐅᑎᑕᐅᒐᔭᕐᓂᑦᑎᓐᓄᑦ ᐊᒻᒪᓗ ᐃᑲᔪᖅᑐᓂ ᑕᑯᔅᓴᐅᑎᑦᑎᓂᖓ ᐆᒻᒪᑎᒥᒃ ᐊᒻᒪᓗ ᐱᓂᓪᓗᑕᐅᑕᐃᓕᒪᓂᑦᑎᓐᓂᒃ ᓄᓇᓕᑦᑎᓐᓂᒃ.
ᖃᓄᖅ ᐃᑲᔪᕈᓐᓇᖅᐲᑦ:
ᐱᔭᐅᑎᓪᓗᒍ ᐊᔾᔨᙳᐊᖁᑎᑎᑦ, ᓇᒻᒥᓂᖅ ᐅᓂᒃᑳᕆᔭᑎᑦ, ᐅᕝᕙᓘᓐᓃᑦ ᑎᑎᕋᕕᒋᓗᒋᑦ ᐃᑲᔪᕐᓂᕆᔭᓐᓂᒃ ᖃᕋᑕᐅᔭᒃᑯᑦ ᐅᕘᓇ: https://hockeyville.kraftheinz.com/community/11f0fc6984e1c6c0741ebf738d0...
ᐊᓪᓛᑦ ᐊᑕᐅᓯᐅᒐᓗᐊᒥᒃ ᐊᔾᔨᙳᐊᒥᒃ ᐅᕝᕙᓘᓐᓃᑦ ᖃᔅᓰᓐᓇᐅᒐᓗᐊᕐᓂᒃ ᐅᖃᐅᓯᖃᕈᕕᑦ ᐊᑐᓚᐅᖅᑕᓐᓂᒃ ᐊᔅᓱᐊᓗᒃ ᐱᕚᓪᓕᖅᑎᑦᑎᒍᓐᓇᕐᒪᑦ.
ᐃᑲᔪᖅᑕᐅᒋᐊᖃᖅᐲᑦ ᐱᔭᐅᑎᑦᑎᒐᓱᐊᖅᑎᓪᓗᑏᑦ? ᑕᑯᒋᐊᓚᐅᕈᒃ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᔾᔪᐊᕐᕕᐅᑉ ᐊᓐᓂᑭᑦᑐᕕᖓ ᐅᕝᕙᓘᓐᓃᑦ ᐅᖄᓚᓗᑎᑦ 867-979-5620−ᒧᑦ ᐊᒻᒪᓗ ᐃᑲᔪᕐᓂᐊᖅᐸᑦᑎᒋᑦ ᐱᔭᐅᑎᓗᑎᒍ ᐅᓂᒃᑳᑎᑦ.
ᐃᓱᓕᕝᕕᔅᓴᖓ ᐃᓚᒋᔭᐅᕕᔅᓴᐅᒍᓐᓃᕋᔭᕐᒪᑦ ᒫᔾᔨ 1, 2026, 11:59 ᐅᓐᓄᒃᑯᑦ ᑲᓇᓐᓇᕐᒥᒃ ᓯᕿᙳᔭᖓ.
ᑲᑎᖃᑎᒌᓚᐅᑦᑕ, ᓯᑯᒦᓪᓗᑕ ᐊᒻᒪᓗ ᓯᑯᒦᙱᓪᓗᑕ, ᑕᑯᔅᓴᐅᑎᓪᓗᑎᒍᓗ ᐅᐱᒍᓱᓐᓂᕗᑦ ᐃᖃᓗᐃᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᔾᔪᐊᕐᕕᖓᑕ ᐊᓐᓂᑭᑦᑐᕕᖓᓂ.
##
ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:
ᒪᑎᓪᑕ ᐱᓐᒃᓯᓐ
ᐊᔾᔨᐅᙱᑦᑐᓂᒃ ᖃᓄᐃᓘᓂᐅᔪᓂᒃ ᐱᓕᕆᒍᑎᓕᐅᖅᑎ
ᓄᓇᓕᐸᐅᔭᐃᑦ ᐃᖃᓗᐃᑦ
