ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᐃᖃᓗᓐᓂ ᓄᓇᓕᐸᐅᔭᓕᕆᔩᑦ ᑲᑎᒪᔨᖏᑦ ᐊᖏᖅᑐᑦ ᐃᓕᓯᕕᐅᓂᐊᕐᓂᖏᓐᓂᒃ ᑎᑭᐅᑎᑎᑦᑎᓂᕐᒧᑦ ᐊᖏᕐᕋᖃᕐᓂᕐᒧᑦ ᑮᓇᐅᔭᓂᑦ ᐊᕐᕌᒍᒥ 2021-2022
ᐃᖃᓗᓐᓂ ᓄᓇᓕᐸᐅᔭᓕᕆᔩᑦ ᑲᑎᒪᔨᖏᑦ ᐊᖏᕐᓯᔪᑦ ᐃᓕᓯᕕᐅᓂᐊᕐᓂᖏᓐᓂᒃ ᐅᖓᑖᓃᑦᑐᓂᑦ 1 ᒥᓕᐊᓐ ᑮᓇᐅᔭᑦ ᑲᓇᑕᐅᑉ ᒐᕙᒪᒃᑯᖏᓐᓂ ᓄᓇᓕᓐᓂᑦ ᑎᒥᐅᔪᓄᑦ ᐃᑲᔫᑎᖃᕐᐸᑦᑐᓄᑦ ᐃᓱᒫᓗᓇᕐᓂᕐᓴᓂᑦ ᐊᒻᒪᓗ ᐃᓱᒫᓗᓇᖅᑐᒦᑦᑐᓄᑦ ᐃᖃᓗᒻᒥᐅᓂᑦ.
ᓄᓇᓕᐸᐅᔭᓕᕆᔨᒃᑯᑦ ᑐᓂᓯᔭᐅᕗᑦ $1,182,126ᓂᑦ ᑮᓇᐅᔭᓂᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑖᓐᓇ ᐊᖅᑯᑎᒋᓪᓗᒍ ᑎᑭᐅᑎᑎᑦᑎᓂᕐᒧᑦ ᐊᖏᕐᕋᖃᕐᓂᕐᒧᑦ ᓄᓇᓕᓐᓂᑦ ᐱᓕᕆᐊᖑᓂᐊᖅᑐᒧᑦ ᑐᕌᒐᖃᖅᑐᑎᒃ ᐊᖏᕐᕋᖃᙱᑐᖅᑕᖃᖃᑦᑕᖁᓇᒍ ᐊᒻᒪᓗ ᐃᓅᓴᓪᓕᒋᐊᒃᑲᓐᓂᖁᓪᓗᒋᑦ ᐊᖏᕐᕋᖃᖃᑦᑕᖏᑦᑐᑦ, ᑖᒃᑯᐊ ᐊᑐᖅᑕᐅᔭᕆᐊᓖᑦ ᐊᕐᕌᒍᒥ 2021-2022 ᑮᓇᐅᔭᓄᑦ ᐊᐅᓚᕕᖓᓐᓂ.
ᔫᓂ 22, 2021ᒥ, ᑲᑎᒪᔩᑦ ᐊᖏᕐᓯᔪᔪᑦ 2021-2022 ᑮᓇᐅᔭᓂᑦ ᐃᓕᔭᐅᓂᐊᖅᑐᓂᑦ ᐅᑯᐊ ᒪᓕᑦᑐᒋᑦ:
- ᐊᖏᖃᑎᒌᒍᑎᖃᕐᓗᑎᒃ ᓄᑖᕐᒥᒃ ᐃᑲᔫᑎᓄᑦ ᐊᖏᖃᑎᒌᒍᑎᓂᑦ ᐅᖂᑕᖅ ᑲᑐᔾᔨᖃᑎᒌᒃᑯᓐᓄᑦ ᐊᕐᕌᒍᓕᒫᒧᑦ ᑮᓇᐅᔭᖃᖅᑎᑕᐅᓂᐊᕐᖓᑕ ᐃᒪᓐᓇᓂᑦ ᐊᒥᓲᓂᓕᓐᓂᑦ $410,000.00 ᐃᑲᔫᑎᐅᓗᑎᒃ ᓇᔪᕋᔅᓴᖃᖅᑎᑦᑎᖃᑦᑕᕐᓂᖏᓐᓄᑦ ᐊᖏᕐᕋᖃᙱᑦᑐᓄᑦ ᐊᖑᑎᓄᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐊᖑᑕᐅᒐᓗᐊᖅᑲᑦ ᐊᕐᓇᐅᒐᓗᐊᖅᑲᑦ ᓱᕐᕋᓯᒪᔪᓄᑦ ᓇᔪᕋᔅᓴᖃᖅᑎᑦᑎᖃᑦᑕᓂᕐᒧᑦ ᐃᓪᓗᒥᒃ.
- ᐊᖏᖃᑎᒌᒍᑎᖃᕐᓗᑎᒃ ᓄᑖᕐᒥᒃ ᐃᑲᔫᑎᓄᑦ ᐊᖏᖃᑎᒌᒍᑎᓂᑦ ᑐᑭᓯᒋᐊᕐᕕᒃ ᑲᑐᔾᔨᖃᑎᒌᒃᑯᓐᓄᑦ ᐊᕐᕌᒍᓕᒫᒧᑦ ᑮᓇᐅᔭᖃᖅᑎᑕᐅᓂᐊᕐᖓᑕ ᐃᒪᓐᓇᓂᑦ ᐊᒥᓲᓂᓕᓐᓂᑦ $272,000.00 ᐃᑲᔫᑎᐅᓗᑎᒃ ᐃᓄᑐᖃᕐᓄᑦ ᐊᒻᒪᓗ ᐃᓱᒫᓗᓇᖅᑐᒦᓐᓂᕐᓴᓄᑦ ᓄᓇᓕᐅᔪᓄᑦ ᓂᕿᑖᖅᑎᑦᑎᖃᑦᑕᕐᓂᖏᓐᓄᑦ, ᐃᓅᓯᓕᕆᖃᑦᑕᕐᓂᖏᓐᓄᑦ ᐊᒻᒪᓗ ᐊᓐᓄᕌᓂᑦ ᐅᐊᓴᕐᕕᖃᖅᑎᑦᑎᖃᑦᑕᓂᕐᒧᑦ ᐸᕐᓇᐃᓴᐃᕕᖃᖅᑎᑦᑎᖃᑦᑕᓂᕐᒧᓪᓗ.
- ᐊᖏᖃᑎᒌᒍᑎᖃᕐᓗᑎᒃ ᓄᑖᕐᒥᒃ ᐃᑲᔫᑎᓄᑦ ᐊᖏᖃᑎᒌᒍᑎᓂᑦ ᖃᔪᖅᑐᕐᕕᒻᒧᑦ ᓄᓇᓕᓐᓂᑦ ᑕᒫᓂ ᐊᕐᕌᒍᑕᓕᒫᒧᑦ ᑮᓇᐅᔭᖃᖅᑎᑕᐅᓂᐊᕐᖓᑕ ᐃᒪᓐᓇᓂᑦ ᐊᒥᓲᓂᓕᓐᓂᑦ $85,000.00ᐃᑲᔫᑎᐅᓪᓗᑎᒃ ᓂᕆᑎᑦᑎᖃᑦᑕᕐᓂᖏᓐᓄᑦ ᐊᒻᒪᓗ ᐸᔪᑦᑎᕆᖃᑦᑕᕐᓂᖏᓐᓄᑦ ᐃᓱᒫᓗᓇᖅᑐᒦᓐᓂᕐᓴᓄᑦ ᓄᓇᓕᐅᔪᓄᑦ
- ᐊᖏᖃᑎᒌᒍᑎᖃᕐᓗᑎᒃ ᓄᑖᕐᒥᒃ ᐃᑲᔫᑎᓄᑦ ᐊᖏᖃᑎᒌᒍᑎᓂᑦ YWCA ᐊᒡᕕᒃ ᑲᑐᔾᔨᖃᑎᒌᒃᑯᓐᓄᑦ ᐊᕐᕌᒍᓕᒫᒧᑦ ᑮᓇᐅᔭᖃᖅᑎᑕᐅᓂᐊᕐᖓᑕ ᐃᒪᓐᓇᓂᑦ ᐊᒥᓲᓂᓕᓐᓂᑦ $297,000 ᐃᑲᔫᑎᐅᓗᑎᒃ ᐃᑲᔪᖃᑦᑕᕐᓂᖏᓐᓄᑦ ᐊᖏᕐᕋᖃᙱᑦᑐᓂᑦ ᐊᕐᓇᓂᑦ ᕿᑐᕐᖓᖏᓐᓂᓪᓗ ᐊᒻᒪᓗ ᕿᒫᕙᑦᑐᓂᑦ ᓂᖓᖅᑕᐅᕙᑐᓂᑦ.
ᓄᓇᓕᐸᐅᔭᓕᕆᔨᒃᑯᑦ ᑕᓪᓕᒪᓂᑦ−ᐊᕐᕌᒍᓄᑦ ᐊᖏᖃᑎᒌᒍᑎᖃᕐᖓᑕ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᒋᐊᕐᓯᒪᓪᓗᑎᒃ ᐄᐳᓗ 2019ᒥ ᒫᑦᓯ 2024ᒨᖓᓪᓗᑎᒃ. ᑖᓐᓇ ᐊᕐᕌᒍ ᐱᖓᔪᒋᓕᕐᖓᒍ ᑖᒃᑯᓄᖓ ᐊᖏᖃᑎᒌᒍᑕᐅᓯᒪᔪᓄᑦ, ᒪᕐᕉᓐᓂᒃ ᓱᓕ ᐊᕐᕌᒎᓐᓂᒃ ᐊᑐᕈᒫᕐᓂᐊᕐᖓᑕ ᐊᕐᕌᒍᑕᒫᑦ ᑮᓇᐅᔭᖃᖅᑎᑦᑎᒍᑕᐅᖃᑦᑕᓂᐊᕐᓯᒪᔪᑦ. $2,000,000 ᑖᒃᑯᓇᙵᑦ ᑎᑭᐅᑎᑎᑦᑎᓂᕐᒧᑦ ᐊᖏᕐᕋᖃᕐᓂᕐᒧᑦ ᑮᓇᐅᔭᑦ ᑐᓂᐅᖅᑲᖅᑕᐅᓯᒪᔪᑦ ᐅᓪᓗᒥᒧᑦ−ᑎᑭᑦᑐᒍ.
“ᐃᑲᔪᕈᓐᓇᕐᓯᒪᔪᒍᑦ ᓄᓇᖅᑲᑎᑦᑎᓐᓂᒃ ᖃᓄᖅᑑᕈᑎᖃᖅᑎᓪᓗᑕ ᓄᕙᕐᔪᐊᓇᖅᑐᒧᑦ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ ᖁᔭᓐᓇᒦᖅᑲᕗᑦ ᑖᒃᑯᐊ ᑎᑭᐅᑎᑎᑦᑎᓂᕐᒧᑦ ᐊᖏᕐᕋᖃᕐᓂᕐᒧᑦ ᐃᑲᔫᑏᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ,” ᐅᖃᖅᑐᖅ ᒪᐃᔭ ᑭᐊᓂ ᕕᐅᓪ. “ᐱᔾᔪᑎᒋᓪᓗᒋᑦ ᓄᓇᓕᐸᐅᔭᓕᕆᔩᑦ ᑲᑎᒪᔨᖏᑦ, ᖁᔭᓐᓇᒦᖅᑲᕗᑦ ᑎᒥᐅᔪᑦ ᐃᓚᒋᔭᐅᔪᑦ ᐊᑦᑕᓇᙱᑦᑐᒦᑎᑦᑎᓂᕐᒧᑦ ᐃᑲᔫᑎᖃᕐᐸᑦᑐᑦ ᓄᓇᓕᐅᔪᓄᑦ ᑕᒫᓂ ᓄᓇᑦᑎᓐᓂ ᒫᓐᓇ ᐊᑐᖅᑐᓂᒃ, ᐅᕝᕙᓘᓐᓃᑦ ᐃᓱᒫᓗᓇᖅᑐᒦᒍᑎᖃᖅᑐᓂᑦ, ᐊᖏᕐᕋᖃᙱᓂᕐᒥᒃ.”
ᑐᑭᓯᐊᒃᑲᓐᓂᕈᒪᒍᕕᑦ:
ᓖᓴ ᒥᓗᓴᕝᔨᕕᒃ
ᑐᓴᐅᒪᖃᑎᒋᓐᓂᕐᒧᑦ ᐊᒻᒪᓗ ᐱᔨᔅᓯᖅᑕᐅᕙᒃᑐᓄᑦ ᐱᔨᔅᓯᕈᑎᒥ ᐊᐅᓚᑦᑎᔨ
L.Milosavljevic@iqaluit.ca | 867-979-5607
