ᐃᖃᓗᓐᓂᑦ ᑕᑯᒥᓇᓕᖅᑎᑦᓯᔾᔪᑎᐅᓇᓱᐊᖅᑐᑦ ᔪᓂ 2015

ᑐᓴᕋᑦᓴᖅ

ᓄᓇᓕᐸᐅᔭᐃᑦ ᐃᖃᓗᐃᑦ ᐃᖃᓗᒻᒥᐅᓄᑦ ᕿᓄᓕᕆᕗᑦ ᑲᑐᔾᔨᖃᑎᒌᓐᓂᒃᑯᑦ ᓴᓗᒻᒪᕐᓴᐃᖁᔨᓪᓗᑎᒃ ᓄᓇᑦᑎᓐᓂᑦ

ᔪᓂ 9, 2015 (ᐃᖃᓗᐃᑦ, ᓄᓇᕗᑦ) - ᓄᓇᓕᐸᐅᔭᐃᑦ ᐃᖃᓗᐃᑦ ᕿᓄᓕᕐᒥᔪᑦ ᐃᖃᓗᒻᒥᐅᑕᓄᑦ (ᐃᓄᖏᓐᓂᑦ ᐊᒻᒪᓗ ᑎᒥᐅᔪᓂᑦ) ᐃᓚᒋᔭᐅᖁᔨᓪᓗᑎᒃ ᐃᖃᓗᓐᓂᑦ ᑕᑯᒥᓇᓕᖅᑎᑦᓯᔾᔪᑎᐅᓇᓱᓐᓂᐊᖅᑐᒥ.

1. ᐊᕐᕌᒍᑕᒫᕐᓯᐅᑎ ᐅᐱᕐᖔᒥ ᓴᓗᒻᒪᕐᓴᐃᓂᖅ: ᔪᓂ 19, 2015 ᐅᓪᓛᓂᑦ 9-ᒥᓂᑦ ᖁᓛᓄᓄᑦ 12-ᒧᑦ
   ᐃᖃᓗᓐᓂᒥᐅᑕᓕᒫᑦ ᐊᒻᒪᓗ ᐃᖅᑲᓇᐃᔭᕐᕕᐅᕙᑦᑐᑦ ᐊᔭᐅᖅᑕᐅᕗᑦ ᐅᓪᓛᖑᓛᖅᑐᒥ ᓴᓗᒻᒪᕐᓴᐃᓛᖁᔭᐅᓗᑎᒃ ᓄᓇᑦᑕ ᐃᓗᐊᓂ.  ᓴᓗᒻᒪᕐᓴᐃᔾᔪᑎᑦᓴᓂᑦ ᐊᑐᐃᓐᓇᕋᓛᖅᑐᑦ (ᐊᒡᒑᓂᑦ, ᓴᓂᒃᑯᕕᑦᓴᓂᑦ, ᐅᕕᓂᕈᕐᓂᓪᓗ) ᐅᓂᒃᑳᕐᕕᒃ ᐳᓚᕋᑦᑐᓕᕆᕝᕕᒻᒥ ᐱᒋᐊᕐᓗᑎᒃ ᐅᓪᓛᒃᑯᑦ 9-ᒨᖅᐸᑦ. ᓯᕋᓯᒪᔪᓂᑦ ᓂᕆᑎᑕᐅᓛᖅᑐᑦ ᐱᔭᕇᖅᐸᑕ ᖁᓛᓂ ᐅᓪᓗᒃᑯᑦ; ᓇᑦᓴᕆᐊᓖᑦ ᐸᓂᑲᐃᑦ/ᐃᕐᖑᓰᑦ.
    
2. ᐊᖏᔫᑏᑦ ᓴᓃᑦ ᓄᐊᑕᐅᓂᖏᑦ: ᔪᓂ 22-ᒥᑦ ᔪᓚᐃ 6-ᒧᑦ, 2015
   ᓄᓇᓕᐸᐅᔭᐃᑦ ᐃᖃᓗᐃᑦ ᐊᔭᐅᕐᓱᐃᕗᑦ ᓄᓇᓕᒻᒥᐅᑕᓂᑦ ᐃᒋᐅᖅᑲᐃᖁᔭᐅᓗᑎᒃ ᓴᓗᒻᒪᕐᓴᐃᓗᑎᒃ ᐊᖏᔫᑎᓂᑦ ᓴᓂᕐᒥᓂᒃ ᓄᐊᑦᓯᓕᖅᐸᑕ ᓴᓂᐸᐅᔭᓂᑦ.

   ᐃᖅᑲᓇᐃᔭᖅᑎᖏᑦ ᓴᓇᔪᓕᕆᔨᒃᑯᑦ ᓄᐊᑦᓯᓛᖅᑐᑦ ᓴᓂᐸᐅᔭᓂᑦ ᓇᔪᒐᐃᑦ ᓴᓂᖏᓐᓂᑦ ᐱᓇᓱᐊᕈᓰᓐᓂ ᒪᕐᕉᓐᓂ ᑭᓯᐊᓂ, ᐱᒋᐊᕐᓗᑎᒃ ᔪᓂ 22 - ᔪᓚᐃ 6-ᒧᑦ.  ᑖᓐᓇ ᐅᓪᓗᕐᓯᐅᑦ ᐊᓂᒍᖅᐸᑦ, ᓇᖕᒥᓂᖅ ᓄᓇᓕᒻᒥᐅᑕᐃᑦ ᓴᓂᐸᐅᔭᒥᓂᒃ ᐊᑦᓯᕕᒻᒨᕆᒋᐊᖃᓛᖅᑐᑦ.

   ᓯᕗᓂᑐᖃᖓᒍᑦ ᐅᐸᓗᖓᐃᔭᕈᑦᓯ ᐱᐅᓂᕐᓴᖅ.  ᓄᐊᑦᓯᒪᑦᓯᐊᐸᓪᓗᒋᑦ ᓄᓇᓯᐅᑎᖃᕐᕕᐅᑉ ᐃᓱᐊᓂ; ᑲᑎᓪᓗᒋᑦ ᕿᔪᐃᑦ, ᐅᐊᔭᒨᖅᑐᒥᓃᑦ, ᐃᓪᓗᓂ ᓱᓇᒃᑯᑖᒥᓃᑦ ᐅᐊᔭᒨᖅᑐᑦ, ᐊᒻᒪᓗ ᐃᓪᓗᓯᐅᑎᑦ.  ᐊᑦᑕᓇᖅᑐᒦᖁᓚᒋᑦ ᓯᑎᒃᑯᑦ ᐃᖅᑲᓇᐃᔭᖅᑎᖏᑦ, ᓄᐊᑕᐅᓛᖏᑦᑐᑦ ᐊᑦᓴᓗᐊᒥᓃᑦ ᐊᒻᒪᓗ ᐅᓗᕆᐊᓇᖅᑐᑦ ᓱᓇᑐᐃᓐᓇᐃᑦ (ᐹᑕᓖᒥᓃᑦ, ᐊᒥᐊᕈᑎᑦ); ᓄᓇᓕᒻᒥᐅᑕᐃᑦ ᓇᖕᒥᓂᖅ ᐊᑦᓯᕕᒻᒨᕈᔾᔨᒋᐊᖃᖃᑦᑕᓂᐊᖅᑐᑦ.

   ᓄᓇᓕᐸᐅᔭᒃᑯᑦ ᓄᓇᓕᓐᓂ ᒪᓕᒐᕋᓛᓕᕆᔨᖏᑦ ᐊᑐᓕᖅᑎᑦᓯᕙᓪᓕᐊᓕᕐᒪᑕ ᒪᓕᒐᕋᓛᒥᑦ ᑐᕌᖓᔪᒥᑦ ᑕᑯᒥᓇᖕᖏᓗᐊᖅᑐᓄᑦ ᓄᓇᓄᑦ; ᓄᓇᓕᒻᒥᐅᑕᐃᑦ ᐊᑐᕈᓐᓇᓂᐊᖅᑐᑦ ᐊᖏᔫᑎᓂᑦ ᓴᓂᕐᓂᒃ ᓄᐊᑦᓯᓂᐅᓂᐊᖅᑐᓂᑦ ᒪᓕᒐᕋᓛᒥᑦ ᓱᕋᐃᖃᑕᐅᔪᒪᓂᐊᖏᒃᑯᑎᒃ.
    

3. ᐊᐅᔭᒥ ᓴᓂᕐᓂᒃ ᓄᐊᑦᓯᓂᖅ: ᔪᓂ - ᓰᑏᐱᕆ, 2015
   ᐊᐅᔭᐅᓂᐊᖅᑐᖅ, ᓄᓇᓕᐸᐅᔭᒃᑯᑦ ᐃᖅᑲᓇᐃᔭᖅᑎᑖᕐᓯᒪᓂᐊᖅᑐᑦ ᑎᓴᒪᓂᑦ ᐃᓕᓐᓂᐊᖅᑎᓂᑦ ᐊᒻᒪᓗ ᐅᓪᓘᑉ ᐃᓚᐃᓐᓇᖓᓂᑦ ᐃᖅᑲᓇᐃᔭᖅᑎᑦᓴᓂᑦ ᑎᒥᒃᑯᑦ ᐱᒡᒐᐅᑎᖃᕐᓂᕋᖅᑕᐅᔪᓂᑦ ᐃᓚᒋᔭᐅᓂᐊᖅᑐᒥᑦ “ᓴᓗᒪᔪᖅ ᐃᖃᓗᐃᑦ”, ᐱᓕᕆᐊᑦᓴᓕᐊᖑᓚᐅᖅᑐᖅ ᓴᓂᕐᓂᒃ ᓄᐊᑦᓯᔾᔪᑎᐅᖁᓪᓗᒍ ᐊᒻᒪᓗ ᑕᒪᐅᖓᑐᐃᓐᓇᖅ ᓴᓂᕐᓂᒃ ᐃᒋᑦᓯᑦᑕᐃᓕᒪᑎᑦᓯᓂᕐᒧᑦ.  ᖁᔭᓐᓇᒦᒃ ᓄᐊᕐᒫᓕᕆᔨᒃᑯᑦ ᓂᐅᕕᕐᕕᒃᑯᑦ ᐃᑲᔫᓯᐊᖅᑎᑦᓯᓚᐅᕐᒪᑕ ᐱᓕᕆᐊᑦᓴᒧᑦ ᐊᑐᖅᑐᑦᓴᓂᑦ.
    
4. ᓄᓇᑦᓯᐊᕙᓕᕆᔨᒃᑯᑦ  (ᓄᓇᓕᒻᒥᐅᑕᐃᑦ ᐱᓕᕆᔨᐅᔪᑦ ᑕᑯᒥᓇᓕᖅᑎᑦᓯᓂᕐᒨᖓᔪᓂᑦ)
   ᐊᐅᔭᐅᓂᐊᖅᑐᖅ, ᓄᓇᑦᓯᐊᕙᓕᕆᔨᒃᑯᑦ  (ᓄᓇᓕᒻᒥᐅᑕᐃᑦ ᐱᓕᕆᔨᐅᔪᑦ ᑕᑯᒥᓇᓕᖅᑎᑦᓯᓂᕐᒨᖓᔪᓂᑦ) ᐸᕐᓇᐃᕙᓪᓕᐊᒻᒪᑕ ᐃᓕᑕᖅᑎᑦᓯᔾᔪᑎᑦᓴᓂᑦ ᐱᐅᔪᒃᑯᑦ ᑕᑯᒥᓇᓕᖅᑎᑦᓯᓂᕐᒨᖓᔪᓂᑦ ᓴᖅᑮᕙᓐᓂᐊᖅᑐᓂᑦ ᓄᓇᓕᒻᒥᐅᑕᓂᑦ ᐊᒻᒪᓗ ᓇᖕᒥᓂᖃᖅᑎᓂᑦ.

ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:

ᒫᑎᐅ ᕼᐋᒻᑉ
ᐊᖏᖅᑳᖓᑦ ᓴᓇᔪᓕᕆᔨᒃᑯᑦ
ᓄᓇᓕᐸᐅᔭᐃᑦ ᐃᖃᓗᐃᑦ
ᖄᓚᐅᑎᖓ: (867) 222-2965
ᖃᕋᑕᐅᔭᒃᑯᑦ ᑎᑎᖅᑲᖃᐅᑎᖓ:  
m.hamp@city.iqaluit.nu.ca