ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᑲᔪᓯᑎᑦᑎᔪᑦ 2023 ᑮᓇᐅᔭᐃᑦ ᐊᑐᖅᑐᑦᓴᓂᑦ
ᓅᕖᐱᕆ 9, 2022 - ᐃᖃᓗᐃᑦ, ᓄᓇᕗᑦ
ᓇᒡᒋᔾᔭᐅᓕᖅᑭᕐᒥ, ᐋᑦᑑᐸ 25, ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᑲᔪᓯᑎᑦᑎᓚᐅᖅᑐᑦ 2023 ᑮᓇᐅᔭᓂᑦ ᐊᑐᖅᑐᑦᓴᓂᑦ.
- ᒪᐃᔭᐅᑉ ᑐᓪᓕᐊ ᓴᐳᕐᑦ, ᑮᓇᐅᔭᓕᕆᓂᕐᒥᑦ ᑲᑎᒪᔨᕋᓛᑦ ᐃᑦᓯᕙᐅᑕᖓᑦ
“ᐊᐅᓚᑦᑎᔾᔪᑎᓄᑦ ᐊᑭᓕᕆᐊᖃᖅᐸᑦᑐᑦ ᖁᕝᕙᒋᐊᕐᓯᒪᒐᓗᐊᖅᑎᓪᓗᒋᑦ, ᑲᑎᒪᔩᑦ ᖁᕝᕙᒋᐊᕆᕙᓐᓂᕐᒥᑦ ᐊᑭᓕᕆᐊᖃᖅᐸᑦᑕᖏᓐᓂᑦ ᓄᓇᓕᕐᒥᐅᑕᐃᑦ ᐊᒻᒪ ᓇᖕᒥᓂᖃᖅᑎᐅᔪᑦ ᐊᖏᓗᐊᖁᔭᐅᕙᒐᑎᒃ. ᓄᓇᓕᕐᒥᐅᑕᐃᑦ ᐊᒻᒪ ᓇᖕᒥᓂᖃᖅᑎᐅᔪᑦ ᐊᑦᑐᐃᔾᔪᑎᖏᓐᓂᑦ ᐃᑉᐱᒍᓱᑦᑎᐊᓕᕐᒪᑕ ᓱᓇᑐᐃᓐᓇᐃᑦ ᐊᑭᑦᑐᐸᓪᓕᐊᖏᓐᓇᕐᓂᖏᓐᓄᑦ ᐃᓅᓯᑦᑎᓐᓂ ᖃᐅᑕᒫᑦ ᐊᒻᒪ ᖃᓄᖅᑑᕋᓱᓚᐅᕋᓗᐊᖅᑐᒍᑦ ᐊᖏᓗᐊᖁᓇᒍ ᐊᑦᑐᐃᔾᔪᑎᐅᔪᖅ. ᐊᒻᒪᑦᑕᐅᖅ, ᐊᑭᑐᔪᓄᑦ ᑮᓇᐅᔭᐃᑦ ᐊᑐᖅᑐᑦᓴᑦ ᑐᖕᖓᕕᒋᒐᑦᑎᒍᑦᑕᐅᖅ ᑲᔪᓯᑦᑎᐊᖁᓪᓗᒋᑦ ᐱᓕᕆᔾᔪᑎᒍᑦ ᒪᑭᒪᐅᑎᕗᑦ ᐊᒻᒪ ᑮᓇᐅᔭᓕᐊᕈᓱᐊᕈᑎᓕᕆᓂᕐᒥᑦ ᐱᕙᓪᓕᐊᔪᓕᕆᓂᐅᔪᖅ.”
- ᐊᐃᒥ ᐃᐅᓪᒎᕐᔅᒪ, ᑎᒥᐅᔪᒥᑦ ᐊᐅᓚᑦᑎᔨᒻᒪᕆᒃ
“ᐊᕐᕌᒍᑦᑎᓐᓂ ᑮᓇᐅᔭᐃᑦ ᐊᑐᖅᑐᑦᓴᑎᒍᑦ ᐃᓗᓕᖃᖅᑐᑦ ᐊᑐᖅᑕᐅᔪᓂᑦ ᖁᕝᕙᒋᐊᕈᑎᐅᓯᒪᔪᓂᑦ ᐆᒻᒪᖅᑯᑎᓄᑦ ᐊᒻᒪ ᐅᕐᓱᐊᓗᓐᓄᑦ ᐊᑭᓕᕆᐊᖃᖅᑕᖏᓐᓂᑦ ᓄᓇᓕᐸᐅᔭᒃᑯᑦ. ᑲᔪᓯᐊᖃᖅᐸᓪᓕᐊᔪᒍᑦ ᐱᓕᕆᐊᖃᕐᓂᒃᑯᑦ ᐱᓕᕆᐊᖑᓚᐅᖅᑐᓂᑦ ᒥᑭᓪᓕᒋᐊᕆᓇᓱᐊᖅᐸᓂᒃᑯᑦ ᐆᒻᒪᖅᑯᑎᓂᑦ ᐊᑐᖅᑕᐅᒋᐊᓕᒻᒥᑦ, ᑭᓯᐊᓂ ᐊᑦᑐᐃᔾᔪᑎᐅᔪᑦ ᐊᖏᔪᐊᓘᒻᒪᑕ ᐊᒻᒪ ᖁᕝᕙᐃᒋᐊᕆᐊᖃᓕᓚᐅᕋᑦᑕ ᑖᒃᓰᔭᐃᔭᐅᑎᓄᑦ ᐊᑭᓕᕆᐊᖃᖅᐸᑦᑐᓂᑦ ᐊᒻᒪ ᐃᒥᕐᒧᑦ/ᑭᓈᓗᓕᕆᔾᔪᑎᓄᑦ ᐊᑭᓕᕆᐊᓕᓐᓂᑦ ᑕᐃᒃᑯᓂᖓ ᖁᕝᕙᒋᐊᕈᑎᐅᓯᒪᔪᓄᑦ ᐊᑭᓕᐅᑎᑦᓴᑎᓐᓂᑦ. ᐊᓯᐊ ᑮᓇᐅᔭᑎᒍᑦ ᐊᑐᖅᑐᑦᓴᑎᒍᑦ ᐱᓪᓗᐊᑕᐅᔪᑦ ᓴᓂᕐᕙᐃᔭᐃᕙᓐᓂᖅ ᑮᓇᐅᔭᖁᑎᑦᓴᓂᑦ ᐊᑐᖅᑐᒻᒪᕆᓐᓄᑦ ᒪᑭᒪᑎᑦᓯᔾᔪᑎᓄᑦ ᐱᓕᕆᐊᑦᓴᓂᑦ ᐃᑲᔫᑎᐅᒋᐊᓕᓐᓂᑦ ᓄᑖᓂᑦ ᐃᓪᓗᓕᕆᓂᕐᒧᑦ ᐱᕙᓪᓕᐊᒍᑎᑦᓴᓂᑦ, ᐱᒻᒪᕆᐅᔪᒧᑦ ᓯᕗᓪᓕᐅᑎᒍᒪᔭᖏᓐᓄᑦ ᓄᓇᓕᐸᐅᔭᒃᑯᑦ”.
2023 ᑮᓇᐅᔭᑎᒍᑦ ᐊᑐᖅᑐᑦᓴᑦ ᐱᓪᓗᐊᑕᖏᑦ ᐅᑯᓂᖓ ᐱᖃᓯᐅᔾᔨᔪᑦ:
• 2%-ᐳᓴᓂᑦ ᖁᕝᕙᒋᐊᕈᑎᐅᔪᑦ ᓴᓂᓕᕆᓂᕐᒧᑦ ᐊᑭᓕᐅᑎᓂᑦ
• 5%-ᐳᓴᓂᑦ ᖁᕝᕙᒋᐊᕈᑎᐅᔪᑦ ᐱᔨᑦᓯᕋᖅᑕᐅᕙᑦᑐᓄᑦ ᓈᒪᔪᒃᑯᑦ ᑮᓇᐅᔭᓕᐅᖅᑎᓄᑦ (ᒐᕙᒪᓕᕆᔩᑦ) ᐃᒥᕐᒧᑦ ᐊᒻᒪ ᐃᒥᕈᔪᓐᓄᑦ ᐃᒋᑕᑦᓴᓄᑦ ᐊᑭᓕᕆᐊᓖᑦ ᐊᒻᒪ 1%-ᐳᒥᑦ ᖁᕝᕙᒋᐊᕐᓗᑎᒃ ᐊᓯᖏᑦ ᐱᔨᑦᓯᕋᖅᑕᐅᕙᑦᑐᑦ ᑲᔪᓯᑎᑕᐅᓚᐅᖅᑐᑦ ᐊᑭᓕᐅᑎᑦᓴᐅᖁᓪᓗᒋᑦ ᖁᕝᕙᒋᐊᕐᓯᒪᔪᓄᑦ ᐊᑭᓕᕆᐊᓕᓐᓂᑦ ᐊᐅᓚᑦᑎᔾᔪᑎᓂᑦ.
• ᑲᑎᒪᔩᑦ ᖁᕝᕙᐃᒋᐊᓚᐅᖅᑐᑦ ᐱᖁᑎᓄᑦ ᑖᒃᓰᔭᐃᔭᐅᑎᓂᑦ; ᐃᓗᓕᖃᖅᑐᑦ 2%-ᐳᓴᓂᑦ ᖁᕝᕙᒋᐊᕈᑎᓂᑦ ᒐᕙᒪᓕᕆᔨᓄᑦ/ᐃᓄᒋᐊᓄᑦ ᐱᓕᕆᕝᕕᓐᓄᑦ ᐃᓘᓐᓇᑎᒃ ᐊᓯᖏᑦ ᐊᑭᓖᕙᑦᑐᑦ ᖁᕝᕙᒋᐊᖅᑐᑎᒃ 1%-ᐳᓴᒥᑦ.
• ᖁᕝᕙᒋᐊᕈᑎᐅᔪᑦ ᐊᑐᖅᑕᐅᓂᐊᖅᑐᑦ ᐊᐅᓚᑦᑎᔾᔪᑎᓄᑦ ᑮᓇᐅᔭᐃᔭᐅᑎᓄᑦ ᐱᔾᔪᑎᒋᓪᓗᒍ ᐆᒻᒪᖅᑯᑎᓄᑦ ᐊᒻᒪ ᐅᕐᓱᐊᓗᓐᓄᑦ ᐊᑭᓕᕆᐊᖃᓕᖅᑕᖏᓐᓄᑦ ᓄᓇᓕᐸᐅᔭᒃᑯᑦ.
• ᖁᕝᕙᒋᐊᖅᑐᑦ $50,000 ᑮᓇᐅᔭᓕᐅᕋᓱᐊᕈᑎᓕᕆᓂᕐᒥᑦ ᐱᕙᓪᓕᐊᔪᓕᕆᓂᕐᒧᑦ ᐊᑐᖅᑐᑦᓴᓄᑦ ᓇᓕᒧᒋᐊᖁᓪᓗᒋᑦ ᓄᓇᕘᒃᑯᓐᓂᑦ ᐅᕝᕙᓘᓐᓃᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐱᕙᑦᑕᖏᓐᓂᑦ.
• ᐊᑭᑐᔪᓄᑦ ᐊᑐᖅᑐᑦᓴᑦ ᐱᖃᓯᐅᔾᔨᔪᑦ ᑮᓇᐅᔭᓂᑦ ᐊᕐᕌᒍᒐᓴᓄᑦ ᐊᖏᔫᑎᓄᑦ ᓴᓇᔭᐅᔪᑦᓴᓄᑦ ᐱᖃᓯᐅᔾᔭᐅᓗᑎᒃ ᓄᑖᖅ ᐊᐅᓚᑦᑎᕕᑦᓴᖅ ᑐᖕᖓᕕᒃ, ᓄᑖᖅ ᐊᑦᓯᕕᑦᓴᖅ ᐊᒻᒪ ᓴᓂᓕᕆᕝᕕᑦᓴᖅ.
• ᐊᑭᑐᔪᓄᑦ ᐊᑐᖅᑐᑦᓴᑦ ᓇᓗᓇᐃᔭᐃᓯᒪᔪᑦ ᑮᓇᐅᔭᑦᓴᓂᑦ ᐃᑲᔪᕐᓱᐃᔾᔪᑎᑦᓴᓂᑦ ᐃᓪᓗᓕᕆᓂᕐᒧᑦ ᐱᕙᓪᓕᐊᑎᑕᐅᔪᓂᑦ ᐱᖃᓯᐅᔾᔭᐅᓗᑎᒃ ᓱᓇᑐᐃᓐᓇᐃᑦ ᐋᖅᑭᓱᕐᓯᒪᑦᑎᐊᕆᐊᖃᕐᓂᖏᓐᓂᑦ ᖃᐅᔨᓴᐅᑎᑦᓴᓄᑦ ᓄᑖᓂᑦ ᐃᓪᓗᖃᕐᕕᑦᓴᓕᐅᕐᕕᑦᓴᓂᑦ ᐊᒻᒪ ᐱᐅᓯᑎᒋᐊᕈᑎᑦᓴᓂᑦ ᐊᑐᖅᑐᒻᒪᕆᐅᔪᓄᑦ ᒪᑭᒪᑎᑦᓯᔾᔪᑎᓄᑦ ᓲᕐᓗ ᐃᒥᕐᒧᑦ ᐊᒻᒪ ᐃᒥᕈᔪᓐᓄᑦ ᐃᒋᑕᑦᓴᓄᑦ ᐱᓕᕆᕝᕕᑦᓴᓂᑦ.
• ᐊᑯᓂᐅᔪᒧᑦ ᐃᒥᖃᖅᑎᑦᑎᓂᕐᒥᑦ ᐱᓕᕆᐊᑦᓴᐃᑦ ᑮᓇᐅᔭᖃᖅᑎᑕᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐱᕐᕈᓗᐊᕿᓂᒃᑯᑦ ᐱᓗᐊᔾᔭᐃᒃᑯᑎᑦᓴᓂᑦ ᐊᒻᒪ ᐃᓕᖅᑑᑎᑦᓴᓕᕆᓂᕐᒥᑦ ᐱᓕᕆᔾᔪᑎᑦᓴᓂᑦ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᔭᕗᕆ ᐴᕐᓐ
ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᓂᕐᒥᑦ ᐊᐅᓚᑦᑎᔨᐅᑲᐃᓐᓇᖅᑐᖅ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | g.byrne@iqaluit.ca
