ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᓚᒋᔭᐅᖁᔨᔾᔪᑎ ᐊᖏᕐᕋᖃᖏᑦᑐᓕᕆᓂᕐᒥᑦ ᐅᖃᐅᔾᔪᐃᔩᑦ ᑲᑎᒪᔨᖏᓐᓄᑦ
ᐋᒃᑑᐸ 26, 2026 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᐊᖏᕐᕋᖃᖏᑦᑐᓕᕆᓂᕐᒥᑦ ᐅᖃᐅᔾᔪᐃᔩᑦ ᑲᑎᒪᔨᖏᑦ (HAB) ᑐᖕᖓᓱᑦᑎᑦᓯᓕᕆᕗᑦ ᓄᓇᓕᕐᒥᐅᑕᓂᒃ ᐅᕙᑦᓯᐊᕈ ᐊᖏᕐᕋᖃᖏᓯᒪᔪᓂᒃ ᐃᓚᒋᔭᐅᒐᔭᖅᑐᓂᒃ ᑲᑎᒪᔨᓄᑦ. ᖃᐅᔨᒪᓂᕆᔭᐃᑦ ᐊᒻᒪ ᐃᓱᒪᒋᔭᓯ ᑕᒪᓐᓇ ᐱᓪᓗᒍ ᐃᑲᔫᑎᖃᕋᔭᒻᒪᕆᒻᒪᑕ ᑲᑎᒪᔨᐅᔪᓄᑦ (HAB) ᑐᑭᓯᑎᑕᐅᓂᖏᒍᑦ ᓄᓇᓕᓐᓂ ᓱᓇᐅᓗᐊᕐᓂᖏᓐᓂᒃ ᑭᖕᖒᒪᑦᓯᓗᐊᖅᐸᒻᒪᖔᑕ ᐊᒻᒪ ᐃᓱᒪᑦᓴᕐᓯᐅᕈᑎᓂᒃ ᐱᓕᕆᖃᑕᐅᕙᓪᓗᓂ ᐊᔾᔨᖃᖅᑐᓂᒃ ᐊᑐᖅᓯᒪᔭᖏᑦ ᐃᓱᒪᒋᔭᐅᓗᑎᒃ ᐊᖏᕐᕋᖃᕐᓯᒪᖏᑦᑐᑦ ᐅᕝᕙᓘᓐᓃᑦ ᐊᖏᕐᕋᑎᒍᑦ ᐊᑲᐅᖏᓕᐅᕈᑎᖃᖅᐸᑦᑐᑦ ᐃᖃᓗᓐᓂ.
ᓱᓇᐅᒻᒪᑕ ᑎᑭᓐᓂᖅ ᐊᖏᕐᕋᒧᑦ (Reaching Home)?
ᑎᑭᓐᓂᖅ ᐊᖏᕐᕋᒧᑦ (Reaching Home): ᑲᓇᑕᒥ ᐊᖏᕐᕋᖃᖏᑦᑐᓕᕆᓂᕐᒨᖓᔪᓂᒃ ᐸᕐᓇᒍᑎᒍᑦ ᐸᕐᓇᐅᑎᓕᐅᕐᓂᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᓕᕆᐊᑦᓴᓕᐊᖑᓯᒪᔪᖅ ᐃᑲᔪᕐᓱᐃᔾᔪᑎᐅᕙᑦᑐᓂ ᓄᓇᓕᓐᓂ ᖃᓄᖅᑑᕈᑎᐅᕙᓐᓂᖏᓐᓂᒃ ᐱᑕᖃᖁᔨᒐᑎᒃ ᐊᖏᕐᕋᖃᖏᑦᑐᓂᒃ ᐊᒻᒪ ᖃᑦᓰᓐᓇᕈᕆᐊᕈᑎᑦᓴᐅᔪᓐᓇᖅᑐᓂᒃ ᐊᖏᕐᕋᖃᖏᑦᑐᓂᒃ. ᓄᓇᓕᐸᐅᔭᒃᑯᑦ ᐃᖃᓗᓐᓂ ᓄᓇᓕᓐᓂ ᑎᒥᖁᑎᖃᖅᑐᑦ ᐱᓕᕆᔨᐅᔪᓂᒃ ᑮᓇᐅᔭᖁᑎᓂᒃ ᑐᕌᖓᑎᑕᐅᓯᒪᔪᓂᒃ ᓄᓇᕘᒥ ᐊᖏᕐᕋᖃᖏᑦᑐᓕᕆᓂᕐᒨᖓᔪᓂᕐ ᑮᓇᐅᔭᓂᒃ ᐃᖃᓗᓐᓂ. (HAB)-ᑯᑦ ᐱᓕᕆᖃᑎᖃᖅᐸᑦᑐᑦ ᓄᓇᓕᐸᐅᔭᒃᑯᑦ ᐃᖃᓗᓐᓂ ᐱᓕᕆᔨᖏᓐᓂᒃ ᖃᓄᖅ ᐊᑐᖅᑕᐅᒋᐊᖃᕐᓂᖏᓐᓄᑦ ᐱᓕᕆᔾᔪᑎᐅᔪᑦ ᐱᓕᕆᐊᑦᓴᑎᒍᑦ.
ᖃᓄᖅ ᑕᒪᓐᓇ ᐱᓕᕆᐊᖑᕙᑦᑐᖅ ᐅᑯᓄᖓ HAB ᖃᓄᐃᓕᐅᕈᑎᐅᕙᒻᒪᑦ? ᐊᑐᖁᔨᔾᔪᑎᓕᐅᖅᐸᑦᑐᑦ ᓯᕗᓪᓕᐅᑎᑕᐅᒋᐊᓕᓐᓂᒃ ᐅᑯᐊ ᐱᓪᓗᒋᑦ ᑎᑭᓐᓂᖅ ᐊᖏᕐᕋᒧᑦ (Reaching Home) ᑮᓇᐅᔭᖁᑎᐅᔪᑦ ᐊᒻᒪ ᕿᒥᕐᕈᐊᐸᑦᑐᑎᒃ ᐱᓕᕆᐊᑦᓴᐅᒍᒪᔪᓂᒃ ᑮᓇᐅᔭᓂᒃ ᑐᑦᓯᕋᐅᑎᐅᔪᓂᒃ;
ᐃᑲᔪᖅᐸᑦᑐᑦ ᐱᕙᓪᓕᐊᑎᑦᓯᓂᒃᑯᑦ ᐊᒻᒪ ᑲᔪᓯᑎᑦᓯᕙᑦᑐᑎᒃ ᓄᓇᓕᓐᓄᑦ ᐸᕐᓇᐅᑎᓂᒃ ᐊᒻᒪ ᐊᕐᕌᒍᑕᒫᕐᓯᐅᑎᒍᑦ ᐊᖏᕐᕋᖃᖏᑦᑐᓕᕆᓂᖅ ᐱᓪᓗᒍ ᐅᓂᒃᑳᓕᐊᖑᓯᒪᔪᓂᒃ;
ᑲᑎᒪᑎᑦᓯᕙᑦᑐᑦ ᓄᓇᓕᓐᓂ ᑲᑐᔾᔨᖃᑎᒌᓂᒃ, ᐃᓄᖕᓄᑦ ᑲᑐᔾᔨᖃᑎᒌᓂᒃ, ᒐᕙᒪᓕᕆᔨᓂᒃ, ᐱᔨᑦᓯᕋᕈᑎᓕᕆᔨᓂᒃ, ᐊᒻᒪ ᑭᒃᑯᑐᐃᓐᓇᕐᓂᒃ ᐊᖏᕐᕋᖃᖏᓂᕐᒥᒃ ᐊᑐᕐᓯᒪᔪᓂᒃ;
ᐃᑲᔪᕐᓱᐃᔨᐅᔪᑦ ᑐᑭᒧᐊᑦᑎᑦᓯᓯᒪᔪᓂᒃ ᑕᑯᔪᓐᓇᐅᑎᓂᒃ ᐱᓕᕆᔾᔪᑎᓂᒃ, ᐱᓕᕆᔾᔪᑎᓕᕆᓂᒃᑯᑦ, ᑲᖕᖑᓇᖅᑐᓕᕆᓂᒃᑯᑦ, ᐊᒻᒪ ᐊᑐᖅᑕᐅᕙᓐᓂᖏᓐᓄᑦ ᖃᓄᖅ ᓄᓇᓕᓐᓅᖓᔪᑦ ᑐᑭᓯᒋᐊᕈᑎᐅᕙᑦᑐᑦ ᐱᐅᓯᑎᒋᐊᕈᑎᐅᒍᓐᓇᖅᑐᑦ ᐱᔨᑦᓯᕋᕈᑎᒥᒃ; ᐊᒻᒪ
ᓇᓗᓇᐃᔭᐃᕙᑦᑐᑦ ᓄᓇᓕᓐᓂ ᐊᑦᓱᕉᑎᐅᔪᓂᒃ ᐱᓕᕆᐊᖑᓗᐊᕆᐊᓕᓐᓂᒃ ᐊᒻᒪ ᐱᕕᖃᐅᑎᐅᒍᓐᓇᖅᑐᓂᒃ ᐊᑐᖅᑕᐅᖁᓇᒍ ᐊᖏᕐᕋᖃᖏᓐᓂᐅᔪᖅ ᐊᒻᒪ ᐊᒥᓲᓗᐊᖁᓇᒋᑦ ᐊᖏᕐᕋᖃᖏᑦᑐᑦ.
ᖃᓄᖅ ᐊᑑᑎᖃᕋᔭᕋᑦᓯ ᐱᓕᕆᔾᔪᑎᒍᑦ?
ᓂᕈᐊᖅᑎᐅᓗᓯ ᐃᓚᒋᔭᐅᓗᓯ ᑲᑎᒪᔨᓄᑦ (HAB), ᐅᐸᖃᑦᑕᕋᔭᖅᑐᓯ ᐊᒻᒪ ᐱᖃᑕᐅᕙᓪᓗᓯ ᑲᑎᒪᔪᓄᑦ, ᐃᓱᒪᒋᔭᓯ ᐅᖃᐅᓯᕆᕙᓪᓗᒋᑦ, ᓇᓗᓇᐃᔭᐃᖃᑕᐅᕙᓪᓗᓯ ᓄᓇᓕᓐᓂ ᓯᕗᓪᓕᐅᑎᒋᐊᓕᓐᓂᒃ, ᐸᕐᓇᐅᑎᓂᒃ ᕿᒥᕐᕈᐊᖃᑕᐅᕙᓪᓗᓯ ᐊᒻᒪ ᐊᑐᖁᔨᔾᔪᑎᓕᐅᖅᐸᓪᓗᓯ, ᐊᒻᒪ ᐃᓱᒪᑦᓴᕐᓯᐅᐸᓪᓗᓯ ᖃᓄᖅ ᐊᑲᐅᓂᖅᐹᒃᑯᑦ ᓱᓇᑐᐃᓐᓇᐃᑦ ᐊᑐᖅᑕᐅᒍᓐᓇᕐᒪᖔᑕ ᓄᓇᓕᓐᓂ.
ᑲᑎᒪᔨᐅᔪᑦ (HAB) ᑲᑎᒪᕙᑦᑐᑦ ᑎᓴᒪᐃᕋᖅᑐᑎᒃ ᐊᕐᕌᒎᑉ ᐃᓗᐊᓂ ᐊᔪᕐᓇᖏᑐᐊᕐᒪᑦ. ᐃᓚᒋᔭᐅᔪᑦ ᑲᑎᒪᔨᓄᑦ ᐃᑉᐱᒍᓱᖃᑦᑕᕆᐊᖃᖅᐸᑦᑐᑦ ᑲᖕᖑᓇᖅᑐᓕᕆᓂᕐᒥᑦ, ᒪᓕᑉᐸᓪᓄᑎᒃ ᑲᑎᒪᔨᐅᔪᑦ (HAB) ᒪᓕᒐᖏᓐᓂᒃ ᑲᑎᒪᔨᐅᓂᒃᑯᑦ, ᐊᒻᒪ ᐅᖃᐅᓯᖃᖅᐸᓪᓗᑎᒃ ᐱᓕᕆᔾᔪᑎᒧᑦ ᓇᓪᓕᐊᓐᓄᑐᐃᓐᓇᖅ ᐊᑦᑐᐊᓂᖃᕐᓂᕈᑎᒃ ᐱᓕᕆᔾᔪᑎᒍᑦ. ᐱᖃᑕᐅᓚᐅᖏᓂᕐᓯᓐᓂ ᖃᐅᔨᑎᑕᐅᒐᔭᖅᑐᓯ ᖃᓄᐃᓕᐅᕆᐊᖃᖅᐸᓂᐊᕐᒪᖔᑦᓯ, ᐊᒻᒪ ᓄᓇᓕᐸᐅᔭᒃᑯᑦ ᐃᓕᑦᓯᓐᓂᒃ ᐱᓕᕆᖃᑎᖃᖅᐸᓪᓗᑎᒃ ᓇᓗᓇᐃᔭᐃᖃᑎᖃᕐᓂᒃᑯᑦ ᓈᒻᒪᑦᑐᓂᒃ ᐃᑲᔪᕐᓱᐃᔾᔪᑎᑦᓴᐅᒍᓐᓇᖅᑐᓂᒃ ᐱᖃᑕᐅᑦᓯᐊᖁᓪᓗᓯ ᐱᓕᕆᔾᔪᑎᒍᑦ.
ᑐᓴᒃᑲᓐᓂᕈᒪᕕᓯ ᑕᒪᓐᓇ ᐱᓪᓗᒍ?
ᐱᖃᑕᐅᓕᖅᑐᓂ ᐅᑯᓄᖓ (HAB)-ᑯᓐᓄᑦ ᐋᖅᑭᑦᓱᐃᖃᑕᐅᕙᑦᑐᑦ ᐊᖏᕐᕋᖃᖏᑦᑐᓕᕆᓂᕐᒧᑦ ᐸᕐᓇᐅᑎᓕᐅᖅᑐᓄᑦ ᐊᒻᒪ ᑮᓇᐅᔭᓕᕆᔾᔪᑎᒍᑦ ᐃᓱᒪᓕᐅᕆᔾᔪᑎᐅᒋᐊᓕᓐᓂᒃ ᐱᓕᕆᖃᑕᐅᕙᑦᑐᓂ ᐃᖃᓗᓐᓂ ᐊᑐᖅᑕᐅᔪᑦᓴᓂᒃ. ᐱᖃᑕᐅᒍᒪᓐᓂᕈᑦᓯ, ᐅᕝᕙᓘᓐᓃᑦ ᐅᖃᖃᑎᖃᕈᒪᓐᓂᕈᑦᓯ ᐋᖅᑮᓚᐅᖏᓂᕐᓯᓐᓂ ᖃᓄᐃᓕᖓᒍᒪᓂᐊᕐᓂᒃᑯᑦ, ᖃᐅᔨᒋᐊᖁᔪᖅ ᐅᓇ ᒍᕼᐋᒻ ᕼᐊᐃᔅᑎ (Graham Hastie) ᓯᕗᓂᐊᒍᑦ ᑏᓰᐱᕆ 15 ᑐᓴᕆᐊᒃᑲᓐᓂᕈᒪᓐᓂᕈᑦᓯ.
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ ᐅᓇ: ᒍᕼᐋᒻ ᕼᐊᐃᔅᑎ
ᑎᑭᓐᓂᖅ ᐊᖏᕐᕋᒧᑦ (Reaching Home) ᑐᑭᒧᐊᑦᑎᑦᓯᔨᖓᑦ grahamhastie@nasaijit.com
