ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᓕᓐᓂᐊᓕᕋᑖᑦᑐᓄᑦ ᐃᓕᓐᓂᐊᑦᑎᓄᑦ ᐃᓕᓐᓂᐊᖃᑕᐅᓗᑎᒃ ᑐᒃᑲᕆᐊᓕᓂᒻᒥ ᐊᑦᑕᓇᑦᑕᐃᓕᒪᓂᒻᒧᑦ ᐃᓕᓐᓂᐊᑦᑎᑦᑎᒍᑎᒥᒃ
ᔫᓂ 24, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᐃᑦ ᐅᐱᒍᓱᑦᑐᖅ ᑐᓴᑦᑎᑦᑎᒋᐊᔅᓴᖅ ᑲᔪᓯᑦᑎᐊᓪᓗᓂ ᐱᔭᕇᑦᑕᐅᓪᓗᓂ ᑖᔅᓱᒪ ᐊᕐᕌᒍᑉ ᑐᒃᑲᕆᐊᓕᓂᒻᒥ ᐊᑦᑕᓇᑦᑕᐃᓕᒪᓂᒻᒧᑦ ᐃᓕᓐᓂᐊᑦᑎᑦᑎᒍᑎᖓ, ᐃᓕᓐᓂᐊᑦᑎᑦᑎᒍᑎᒋᔭᐅᓗᓂ ᐱᓕᕆᖃᑎᒌᓪᓗᑎᒃ ᐃᓕᓐᓂᐊᓕᕋᑖᑦᑐᑦ ᐃᓕᓐᓂᐊᕕᒻᒥ ᐊᒻᒪᓗ ᐸᓖᓯᒃᑯᑦ. ᐊᑐᓚᐅᑦᑐᒥ ᐊᓂᒍᑦᑐᒥ ᐱᓇᓱᐊᕈᓯᒻᒥ, ᐅᖓᑖᓂᑦᑐᓂᒃ 350 ᐃᓕᓐᓂᐊᑦᑎᓂᒃ ᐅᑯᓇᙶᑦᑐᓂᒃ ᓇᑲᓱᒃ, ᓇᓄᖅ, ᐱᖓᓱᑦ ᓯᕿᓃᑦ ᐊᒻᒪᓗ ᔫᒥ ᐃᓕᓐᓂᐊᕕᖏᓐᓃᙵᑦᑐᓂᒃ ᑐᒃᑲᕆᐊᓕᒋᐅᔅᓴᔪᖃᓚᐅᒻᒪᑦ ᐊᑐᑦᑕᐅᒋᐊᖃᓪᓚᕆᑦᑐᒥᒃ ᐊᑦᑕᓇᑦᑕᐃᓕᒪᓂᒻᒥᒃ ᐱᒋᐊᑦᑎᑦᑎᒍᑎᒥᒃ.
ᐱᓕᕆᐊᖃᓪᓗᐊᑕᓪᓗᑎᒃ ᐃᓕᓐᓂᐊᑦᑎᓂᒃ ᐃᓕᓐᓂᐊᓕᕋᑖᑦᑐᓂᒃ ᑎᑭᓪᓗᒋ ᖁᕝᕙᓯᓐᓂᓖᑦ 3−ᒥᒃ, ᐃᓕᓐᓂᐊᑦᑎᑦᑎᒍᑎ ᐱᔭᕇᑦᑕᐅᑎᑦᑎᓚᐅᒻᒪᑕ ᐱᓕᕆᖃᑎᒋᔭᐅᓗᑎᒃ ᑲᑎᒪᓯᓐᓈᖃᑎᖃᓂᒃᑯᑦ ᐊᒻᒪᓗ ᐱᓕᕆᐊᕆᓚᕆᓪᓗᒋᑦ ᐃᓕᓴᑎᑦᑎᒍᑏᑦ ᐃᓕᓐᓂᐊᑦᑎᑦᑎᒍᑎᖃᓪᓗᑎᒃ ᐊᑑᑎᖃᓐᓂᑉᐹᓂᒃ ᐅᖃᐅᑎᒋᔭᐅᔪᓂᒃ ᓲᓪᓗ ᒪᑯᓂᖓ ᐊᑐᑦᑕᐅᖃᑦᑕᕆᐊᓕᓐᓂᒃ ᓂᐊᖁᐊᔾᔭᐃᑯᓂᒃ ᐊᑐᖃᑦᑕᓪᓗᑎᒃ, ᐊᑐᑦᑕᐅᖃᑦᑕᓪᓗᐊᑕᓲᓂᒃ ᐃᖏᕐᕋᔪᓄᑦ ᒪᓕᑦᑕᐅᒋᐊᓕᓐᓂᒃ, ᐊᒡᒐᒻᒧᑦ ᖃᐅᔨᒪᑎᑦᑎᒍᑎᓂᒃ, ᐊᒻᒪᓗ ᑕᒪᐃᑎᒍᑦ ᐊᑐᕆᐊᒃᑰᓪᓗᓂ ᐊᑦᑕᓇᑦᑕᐃᓕᒪᒍᑎᓂᒃ ᖃᐅᔨᒪᔭᐅᒋᐊᓕᓐᓂᒃ. ᐃᑲᔪᑦᑕᐅᓗᑎᒃ ᐃᓕᓐᓂᐊᕕᒻᒥ ᐃᖅᑲᓇᐃᔭᑦᑎᓄᑦ ᐊᒻᒪᓗ ᓄᓇᓕᒻᒥ ᐃᑲᔪᕈᒪᓯᒪᔪᓄᑦ, ᐃᓕᓐᓂᐊᑦᑎᑦ ᐃᓕᑦᑎᓚᐅᒻᒪᑕ ᖃᓄᖅ ᖁᓚᓂᖃᖏᑦᑎᐊᓂᔅᓴᐅᓕᕈᓐᓇᓐᓂᒻᒥᒃ, ᑲᒪᑦᑎᐊᓪᓗᑎᒃ, ᐊᒻᒪᓗ ᑕᑯᔅᓴᐅᓗᑎᒃ ᑐᒃᑲᕆᐊᓕᑎᐊᓂᔅᓴᐅᒍᓐᓇᓂᒻᒥᒃ.
ᐊᑐᓂ ᐃᓕᓐᓂᐊᖃᑎᒋᔭᐅᔪᑦ ᐃᓕᓐᓂᐊᑦᑎᑦ ᐱᑎᑕᐅᓚᐅᒻᒪᑕ ᐃᓕᓐᓂᐊᕈᑎᓂᒃ ᖃᓄᐃᓘᕆᐊᖃᓐᓂᒻᒨᖓᔪᓂᒃ ᐅᖃᓕᒫᒐᓐᓂᒃ ᐊᒻᒪᓗ ᑕᔅᓴᐅᓯᓲᓂᒃ ᐊᑦᑕᓇᑦᑕᐅᓕᒪᓗᓂ ᐊᑐᑕᐅᒍᓐᓇᑦᑐᓂᒃ, ᐊᒻᒪᓗ ᐃᓚᖏᑦ ᐃᓕᓐᓂᐊᑦᑎᑦ ᐱᑖᑦᑎᑕᐅᓚᐅᒻᒥᔪᑦ ᓄᑖᓂᒃ ᑐᒃᑲᕆᐊᓕᓐᓂᒃ ᓇᑯᒻᒦᒍᔪᑦ ᑕᐃᒃᑯᐊ ᓄᓇᓕᒻᒥ ᐃᑲᔪᖃᑦᑕᑦᑐᖅ. ᑕᒪᒃᑯᐊ ᑭᓱᑲᑦᑎᑦᑎᒍᑎᑦ ᓴᖅᑭᔮᑦᑎᑦᑎᒻᒪᑕ ᓄᓇᓕᐸᐅᔭᒃᑯᑦ ᑲᔪᓯᓂᖏᓐᓂᒃ ᐱᓕᕆᒍᒪᑦᑎᐊᑦᑐᑎᒃ ᒪᒃᑯᑦᑐᑦ ᐊᑦᑕᓇᑦᑕᐅᓕᒪᓂᖏᓐᓂᒃ ᐊᒻᒪᓗ ᐱᒍᓐᓇᑦᑎᑕᐅᓂᖏᓐᓂᒃ.
ᓄᓇᓕᐸᐅᔭᒃᑯᑦ ᐃᖃᓗᐃᑦ ᓇᑯᔅᓴᒪᕆᑦᑐᑎᒃ ᓇᓗᓇᐃᔅᓯᒍᒪᒻᒪᑕ ᐃᑲᔪᕈᒪᑦᑎᐊᓪᓗᑎᒃ ᐃᑲᔪᓐᓂᖏᓐᓂᒃ ᐱᓕᕆᖃᑎᒋᔭᑦᑕ ᐊᒻᒪᓗ ᑮᓇᐅᔭᖃᑦᑎᑦᑎᔨᒋᔭᕗᑦ, ᐃᓚᒋᔭᐅᓪᓗᑎᒃ ᓄᓇᕗᑦ ᒐᕙᒪᒃᑯᓐᓂ ᒪᓕᒐᓕᕆᔨᒃᑯᑦ (ᓄᓇᓕᓐᓂ ᒪᓕᒐᓕᕆᓂᕐᒧᑦ ᐃᒻᒥᒃᑰᖓᓂᖓ), ᐋᑎᒃ ᕙᓐᓱᔅ ᐊᑐᐃᓐᓇᐅᑎᑦᑎᕕᒃ, NorthMart, ᐊᒻᒪᓗ Nunavut Excavating. ᑕᐃᒃᑯᐊ ᐃᑲᔪᓐᓂᕆᔭᖓᑦ ᐱᒐᔅᓴᐅᓕᑦᑎᑦᑎᓚᐅᒻᒪᑦ ᑖᔅᓱᒥᖓ ᐃᓕᓐᓂᐊᑦᑎᑦᑎᒍᑎᒥᒃ ᐱᒐᔅᓴᐅᓕᑦᑎᑦᑎᒍᑎᒋᔭᐅᓚᐅᒻᒪᑦ ᐊᒻᒪᓗ ᐱᒐᔅᓴᐅᓕᑦᑎᑦᑎᓪᓗᓂ ᐊᒥᓱᓄᑦ ᐱᒍᒥᓇᑦᑐᐊᓗᒥᒃ ᐊᑦᑕᓇᑦᑕᐃᓕᒪᒍᑎᒋᒐᔅᓴᐅᔪᒥᒃ ᐃᖃᓗᐃᑦ ᒪᒃᑯᑦᑐᖏᓐᓄᑦ.
ᐃᖅᑲᐃᑎᑦᑎᒍᑎ ᑕᒪᒃᑭᖏᓐᓄᒃ ᑐᒃᑲᕆᐊᓕᑦᑐᓄᑦ ᐊᒻᒪᓗ ᐊᖁᑎᐅᔪᓄᑦ, ᐊᑐᑦᑕᐅᑎᓪᓗᒋᑦ ᐊᒻᒪᓗ ᐃᓕᓴᕆᒍᓐᓇᓪᓗᒋᑦ ᐊᑐᑦᑕᐅᓪᓗᐊᑕᓲᑦ ᑐᒃᑲᕆᐊᓕᑦᑐᓄᑦ ᐊᒡᒐᒻᒧᑦ ᖃᐅᔨᒪᑎᑦᑎᒍᑎᑦ ᐱᒻᒪᕆᐊᓘᒻᒪᑕ ᑭᒃᑯᓕᒫᓄᑦ ᐊᑦᑕᓇᑦᑕᐃᓕᒪᒍᑎᒋᔭᐅᓂᖏᓐᓄᑦ ᐊᑐᕆᐊᒃᑰᓪᓗᓂ:
ᓴᐅᒥᒻᒧᑦ ᓴᖑᓂᐊᑦᑐᖅ: ᓴᐅᒦᑦ ᑐᑭᓕᐊᓪᓗᓂ ᑎᒃᑯᐊᖓᓪᓗᐊᑦᑎᓪᓗᒍ ᑕᐅᕗᖓᓕᒫᒃ
ᑕᓕᑉᐱᒻᒧᑦ ᓴᖑᓂᐊᑦᑐᖅ: ᓴᐅᒦᑦ ᑕᓖᑦ ᐱᕆᓯᒪᓗᓂ ᖁᒻᒧᖓᓗᓂ ᐃᑯᓯᒃᑯᑦ, ᐅᕝᕙᓘᓐᓃᑦ ᑕᓕᑉᐲᑦ ᑕᓖᑦ ᖁᒻᒧᖓᓪᓗᐊᑦᑎᓪᓗᒍ
ᓄᖅᑲᑦᑐᖅ ᐅᕝᕙᓘᓐᓃᑦ ᓱᑲᐃᓕᒋᐊᑦᑐᖅ: ᓴᐅᒦᑦ ᑕᓖᑦ ᐱᕆᓯᒪᓗᓂ ᐊᒻᒧᑦ ᓂᕕᒐᓗᓂ ᐃᑯᓯᒃᑯᑦ
ᐊᖅᑯᑏᑦ ᑲᔪᖏᔅᓴᑦᑕᐅᕗᑦ ᐅᔾᔨᑦᑐᑦᑎᐊᖁᔭᐅᓪᓗᑎᒃ, ᓱᒃᑲᐃᓕᒋᐊᖃᑦᑕᖁᔭᐅᓪᓗᑎᒃ ᓴᓂᖅᑯᑦᑎᒋᐊᖃᓕᕌᖓᑕ ᓱᕈᓯᓐᓂᒃ ᑐᒃᑲᕆᐊᓕᑦᑐᓂᒃ, ᐊᒻᒪᓗ ᐃᑉᐱᒋᔭᐅᔅᓯᐊᓪᓗᑎᒃ ᑕᒪᒃᑯᐊ ᑕᑯᔅᓴᐅᑎᑦᑎᒍᑎᑦ ᖃᓄᐃᓘᖁᔨᒍᑎᒋᔭᐅᔪᑦ.
ᐃᓚᒌᑦ ᑲᔪᖏᔅᓴᑦᑕᐅᕗᑦ ᑲᔪᓯᖁᔭᐅᓪᓗᑎᒃ ᐱᓕᒻᒪᔅᓴᖃᑦᑕᓪᓗᒋᑦ ᑐᒃᑲᕆᐊᓕᒻᒧᑦ ᐊᑦᑕᓐᓇᕇᒃᑯᑏᑦ ᐊᖏᕐᕋᒻᒥᓐᓂᒃ ᐊᑐᑦᑕᐅᑎᑦᑎᖃᑦᑕᓪᓗᑎᒃ ᓂᐊᖅᑯᐊᔾᔭᐃᒃᑯᑎᓂᒃ, ᒪᓕᑦᑎᐊᓪᓗᒋᑦ ᐃᖏᕐᕋᔪᓄᑦ ᒪᓕᑦᑕᐅᖁᔭᐅᔪᑦ, ᐊᒻᒪᓗ ᖃᐅᔨᓴᖃᑦᑕᓪᓗᒋᑦ ᑐᒃᑲᕆᐊᓖᑦ ᐊᑐᑦᑎᐊᕋᓗᐊᒻᒪᖔᑕ ᐊᐅᓚᒍᑎᓕᒫᖏᑦ. ᐋᑐᓕᓐᓂᖅ ᐱᐅᔪᓂᒃ ᐃᓕᖅᑯᓯᖃᓂᐅᔪᓂᒃ ᒪᒃᑯᑦᑑᓂᖏᓐᓂ ᐅᑭᐅᖃᑦᑎᓪᓗᒋᑦ ᐃᑲᔪᓲᖑᒻᒪᑦ ᓱᕈᓯᓂᒃ ᐊᑦᑕᓇᑦᑕᐃᓕᒪᒍᓐᓇᓐᓂᖏᓐᓂᒃ ᐊᒻᒪᓗ ᐱᓕᕆᑦᑎᐊᕈᓐᓇᐃᓐᓇᓂᖏᓐᓂᒃ ᐳᕈᑉᐸᓪᓕᐊᑎᓪᓗᒋᑦ.
ᓄᓇᓕᐸᐅᔭᒃᑯᑦ ᐃᖃᓗᐃᑦ ᖁᕕᐊᓱᑦᑐᑦ ᓇᓗᓇᐃᓯᒋᐊᔅᓴᖅ ᑐᒃᑲᕆᐊᓕᓂᒻᒥ ᐊᑦᑕᓇᑦᑕᐃᓕᒪᓂᒻᒧᑦ ᐃᓕᓐᓂᐊᕈᑎ ᐅᑎᓛᓂᖓᓂᒃ 2026−ᒥ. ᐱᓕᕆᒍᒪᐃᓐᓇᕋᑦᑕ ᐃᑲᔪᕈᒪᓪᓗᑎᒍ ᖃᓄᐃᖏᑦᑎᐊᓪᓗᑎᒃ ᐃᓅᓯᖃᑦᑎᐊᕋᓱᐊᓐᓂᕆᔭᐅᔪᑦ ᐊᒻᒪᓗ ᐊᑐᑦᑕᐅᑎᑦᑎᓗᑎᒃ ᐃᓕᖅᑯᓯᒻᒧᑦ ᐊᑦᑕᓇᖏᑦᑐᒥᒃ, ᖁᓚᖏᑦᑎᐊᓪᓗᑎᒃ ᑐᒃᑲᕆᐊᓕᖃᑦᑕᖁᓪᓗᒋᑦ ᒪᒃᑯᑑᓂᑉᐸᖁᑎᒋᔭᕗᑦ ᓄᓇᓕᒻᒥᐅᑕᐅᔪᑦ.
###
ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:
ᔩᐅᑉ ᕙᕐᓂ
ᑐᓴᐅᒪᖃᑎᒋᓐᓂᕐᒧᑦ ᐊᒻᒪᓗ ᐱᔨᔅᓯᖅᑕᐅᕙᒃᑐᓄᑦ ᐱᔨᔅᓯᕈᑎᒥ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ ᐅᖄᓚᐅᑎ: 979-5619 | ᐃᕐᖐᓐᓈᖅᑕᐅᑎ: g.byrne@iqaluit.ca
