ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᒥᖅᓯᒪᔪᓂᑦ ᐊᖁᑦᑐᓂᑦ ᐊᒻᒪ ᐊᑐᕆᐊᕐᒥ ᐊᑦᑕᕐᓇᐃᖅᓯᒪᓂᕐᒧᑦ ᐊᔭᐅᖅᓯᒋᐊᕐᓂᖅ
ᑎᓯᐱᕆ 22, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᖓᑦ ᐃᖃᓗᐃᑦ ᓄᓇᓕᒻᒥ ᒪᓕᒐᕋᓛᓕᕆᔨᒃᑯᑦ, ᐱᓕᕆᖃᑎᖃᖅᑐᑎᒃ ᐃᖃᓗᓐᓂ ᐸᓖᓯᒃᑯᑦ, ᑕᒪᐅᓇᑐᐃᓐᓇᖅ ᐃᒥᐊᓗᔅᓯᒪᙱᑦᑐᓂᑦ ᐊᒻᒪ ᐊᑐᕆᐊᒃᑯᑦ ᐊᑦᑕᕐᓇᐃᖅᓯᒪᓂᕐᒧᑦ ᓄᖅᑲᑎᑦᑎᖃᑦᑕᓚᐅᖅᑐᑦ ᖃᐅᔨᓴᖅᑐᑎ, ᐃᓚᒋᓪᓗᒋᑦ ᐃᖏᕐᕋᓪᓗᑎᒃ ᐅᐊᑦᑎᔪᑦ, ᐃᖃᓗᓐᓂ ᐱᓇᓱᐊᕈᓯᐅᑉ ᓄᙳᖏᓐᓂ ᑎᓯᐱᕆ 12−ᒥᑦ 13−ᒧᑦ ᐊᒻᒪ 19−ᒥᑦ 20−ᒧᑦ.
ᐊᒥᓲᓂᖅᓴᐃᑦ ᐊᖁᑏᑦ ᒪᓕᓐᓂᖃᓚᐅᖅᑐᑦ, ᐱᓯᒪᑦᑎᓪᓗᑎᒃ ᐱᑕᖃᕆᐊᖃᖅᑐᓂᑦ ᑎᑎᕋᖅᓯᒪᔪᓂᑦ ᐊᒻᒪ ᐊᐅᓚᑦᑎᓂᕐᒧᑦ ᓄᓇᓯᐅᑎᓂᑦ ᐃᒥᐊᓗᔅᓯᒪᓐᓇᑎᒃ. ᑭᓯᐊᓂᓕ, ᐊᒥᓱᑦ ᐊᖁᑏᑦ ᐊᒻᒪ ᐃᑭᒪᔪᑦ ᖃᐅᔨᔭᐅᓚᐅᖅᑐᑦ ᐃᔅᓯᕙᐅᑕᖓᓄᑦ ᕿᓗᐊᖅᓯᒪᓐᓇᑎᒃ, ᐱᑕᖃᕆᐊᖃᖅᑎᑕᐅᔪᓂᑦ ᑕᒪᒃᑭᓐᓂ ᓄᓇᕗᒻᒥ ᐊᒻᒪ ᓄᓇᓕᒻᒥ ᒪᓕᒐᖏᓐᓂ. ᐃᔅᓯᕙᐅᑕᕐᒧᑦ ᕿᓗᐊᖅᓯᒪᓂᕐᒧᑦ ᓯᖁᒥᑦᑎᔪᑦ $125 ᐊᑭᓖᑎᑕᐅᔪᓐᓇᖅᑐᑦ.
ᐊᔭᐅᖅᓯᒋᐊᓂᕐᒧᑦ ᐱᖃᓯᐅᔾᔨᓚᖅᑐᑦ:
· ᑎᓴᒪᐅᔪᖅᑐᑦ (8) 24 ᐃᑲᕐᕋᓂᑦ ᐊᑐᕆᐊᒃᑯᑦ ᓄᖅᑲᖅᑎᑕᐅᔪᑦ ᐃᒥᐊᓗᔅᓯᒪᓪᓗᑎᒃ ᐊᖁᓐᓂᖏᓐᓄᑦ
· ᑕᓪᓕᒪᑦ (5) 30 ᐅᓪᓗᓂᑦ ᐊᑐᕆᐊᒃᑯᑦ ᓄᖅᑲᖅᑎᑕᐅᔪᑦ
· ᒪᕐᕉᒃ (2) ᐃᖅᑲᖅᑐᕋᔅᓴᖑᖅᑎᑕᐅᔪᑦ ᐃᒥᐊᓗᔅᓯᒪᓪᓗᑎᒃ ᐊᖁᓐᓂᖏᓐᓄᑦ
· ᐊᑕᐅᓯᖅ (1) ᐃᖅᑲᖅᑐᕋᔅᓴᖑᖅᑎᑕᐅᔪᖅ ᐋᒡᒐᕐᓂᖓᓄᑦ ᖃᐅᔨᓴᖅᑕᐅᔪᒪᓐᓇᓂ ᐊᓂᖅᓵᕕᒻᒧᑦ ᖃᐅᔨᓴᐅᑎᒧᑦ
ᐃᓚᒍᑕᒃᑲᓐᓂᖏᑦ ᐃᖏᕐᕋᖃᑦᑕᖅᑐᓄᑦ ᓯᖁᒥᑦᑎᔪᑦ ᐱᓕᕆᐊᖑᓚᐅᖅᑐᑦ ᐱᖃᓯᐅᔾᔨᔪᑦ:
· ᐱᖓᓱᑦ (3) ᐊᖁᑏᑦ ᒪᓕᓐᓂᖃᙱᑦᑐᑦ ᐃᖏᕐᕋᔪᓄᑦ ᐊᐅᓚᑕᐅᓂᖏᓐᓄᑦ ᐊᐅᓚᔾᔪᑎᓄᑦ
· ᑕᓪᓕᒪᑦ (5) ᐊᖁᑏᑦ ᖃᐅᔨᔭᐅᓚᐅᖅᑐᑦ ᐃᖏᕐᕋᔮᓗᐊᕐᓂᖏᓐᓄᑦ: ᑎᓴᒪᑦ ᐊᑯᓐᓂᖏᓐᓂ 17−ᒥᑦ 29−ᒧᑦ km/h ᐅᖓᑖᓅᖅᑐᑦ ᑭᓪᓕᖏᓐᓂ, ᐊᒻᒪ ᐊᑕᐅᓯᖅ ᐊᑯᓐᓂᖏᓐᓂ 30−ᒥᑦ 40−ᒧᑦ km/h ᐅᖓᑖᓄᑦ
· ᐊᑕᐅᓯᖅ (1) ᐊᖁᑎ ᓄᖅᑲᓚᐅᙱᑦᑐᖅ ᑐᕕᕐᓇᑐᖅᓯᐅᑎᒧᑦ ᓄᓇᓯᐅᑎᒧᑦ ᐊᒻᒪ ᕿᒫᓪᓗᓂ
· ᐊᒥᓱᒐᓚᐃᑦ ᓄᓇᓯᐅᑏᑦ ᐊᐅᓚᓂᖃᓚᐅᖅᑐᑦ ᖃᐅᔨᒪᖏᑦ ᐱᔪᓐᓇᕐᓇᑎᒃ ᐅᕝᕙᓘᓐᓃᑦ ᓴᖑᔾᔪᑎᖏᑦ
· ᒪᕐᕉᒃ (2) ᐊᖁᑏᒃ ᐊᐅᓚᑦᑎᓂᖃᓚᐅᖅᑐᑦ ᓈᒻᒪᙱᑦᑐᓂ ᐊᑎᓕᐅᖅᓯᒪᓂᕐᒧᑦ ᐅᕝᕙᓘᓐᓃᑦ ᓇᓪᓕᐅᒃᑯᒫᖃᙱᓐᓂᕐᒧᑦ ᐊᒻᒪ ᐊᑐᑲᒻᒪᔅᓯᒪᓪᓗᑎᒃ ᓇᓗᓇᐃᖅᓯᒍᑎᓂᑦ ᓂᐱᑎᒐᕐᓂᑦ
· ᒪᕐᕉᒃ (2) ᐊᖁᑏᒃ ᖃᐅᔨᔭᐅᓚᐅᖅᑐᑦ ᓈᒻᒪᑦᑐᓂᑦ ᐊᖁᑦᑐᖅᓯᐅᑎᖃᕐᓇᑎᒃ ᓚᐃᓴᓐᓯᒥᑦ
· ᑎᓴᒪᑦ (4) ᓄᓇᓯᐅᑏᑦ ᐱᔭᐅᓚᐅᖅᑐᑦ ᐊᒻᒪ ᓄᓇᓯᐅᑎᖃᕐᕕᒨᖅᑕᐅᓪᓗᑎᒃ ᐊᑦᑐᐊᓂᓕᓐᓄᑦ ᒪᓕᒐᕐᓂ ᓯᖁᒥᑦᑎᓂᕐᒧᑦ
ᐃᓚᒋᐊᕐᓗᒍ, ᐸᐃᐱᑎ ᐱᖓᓲᔪᖅᑐᓪᓗ (56) ᑖᒃᓰᑦ ᐊᒻᒪ ᐱᓕᕆᕝᕕᓐᓄᑦ ᓄᓇᓯᐅᑏᑦ ᖃᐅᔨᓴᖅᑕᐅᓚᐅᖅᑐᑦ ᐱᓕᕆᐊᖃᖅᑎᓪᓗᒋᑦ. ᒪᕐᕉᒃ (2) ᖃᐅᔨᔭᐅᓚᐅᖅᑐᑦ ᐃᒥᐊᓗᖃᖅᑐᑎᒃ ᓄᓇᓯᐅᑎᒥᑦ ᐱᑕᖃᕆᐊᖃᖅᑎᑕᐅᙱᑦᑐᓂᑦ ᓄᓇᕗᒻᒥ ᐊᒻᒪ ᓄᓇᓕᒻᒥ ᒪᓕᒐᖏᓐᓂ. ᐃᒥᐊᓗᒃ ᐱᔭᐅᓚᐅᖅᑐᖅ ᐊᒻᒪ ᑕᒪᒃᑭᒃ ᐃᖅᑲᖅᑐᕋᔅᓴᖑᖅᑎᑕᐅᓪᓗᑎᒃ ᐱᑕᖃᕆᐊᖃᖅᑎᑕᐅᙱᑦᑐᒥᑦ.
ᓄᓇᓕᐸᐅᔭᖓᑦ ᐃᖃᓗᐃᑦ ᖁᔭᓐᓇᒦᖅᑕᖏᑦ ᓄᓇᓕᒻᒥᐅᑕᐃᑦ ᐱᓕᕆᖃᑎᖃᕐᓂᖏᓐᓄᑦ ᐊᒻᒪ ᐃᖅᑲᐃᑎᑦᑐᒋᑦ ᑭᒃᑯᑐᐃᓐᓇᐃᑦ ᐃᓄᐃᑦ ᐃᒪᐃᓪᓗᑎᒃ:
· ᐊᑐᐃᓐᓇᖃᑦᑕᕐᓗᒋᑦ ᐃᔅᓯᕙᐅᑕᕐᒧᑦ ᕿᓗᐊᑦ
· ᒪᓕᓪᓗᒋᑦ ᐃᖏᕐᕋᔪᓄᑦ ᒪᓕᒐᖏᑦ
· ᐊᖁᓚᐅᖅᓯᒪᙱᓪᓗᑎᒃ ᐃᒥᐊᓗᔅᓯᒪᓗᑎᒃ ᐅᕝᕙᓘᓐᓃᑦ ᐋᖓᔮᓇᑐᖅᑐᖅᓯᒪᓗᑎᒃ
ᑐᓴᖅᑎᑦᑎᒍᑎᖃᕐᓗᓂ ᐃᒥᐊᓗᔅᓯᒪᔪᒥᑦ ᐊᖁᑦᑐᒥᑦ, ᖃᐅᔨᒋᐊᕐᕕᒋᓗᒋᑦ ᐸᓖᓯᒃᑯᑦ ᐅᕙᓂ 867-979-1111.
ᐃᖅᑲᓇᐃᔭᖃᑎᒌᑦᑕ ᑕᒪᑐᒪᓂ ᖁᕕᐊᓱᕝᕕᒻᒥ ᐃᖃᓗᐃᑦ ᐊᑐᕆᐊᖏᑦ ᐊᑦᑕᕐᓇᙱᑎᓪᓗᒋᑦ.
##
ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:
ᓯᑎᕙᓐ ᐋᓚᓐ
ᐊᖏᔪᖅᑳᖅ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5674
