ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑲᓇᑕᒥ ᕆᑦ ᑯᕌᔅ (Canadian Red Cross) ᑰᕕᑦ-19ᒧᑦ ᓄᕙᕐᔪᐊᕐᓇᒥ ᑐᐊᕕᕐᓇᕐᑐᖃᕐᑎᓪᓗᒍ ᐃᑲᔪᕐᑏᑦ
ᑲᓇᑕᒥ ᕆᑦ ᑯᕌᔅ ᐃᑲᔪᕐᑏᑦ ᑎᑭᓚᐅᕐᑐᑦ ᐃᖃᓗᓐᓄᑦ ᒪᐃ 14ᖑᑎᓪᓗᒍ ᐃᑲᔪᕆᐊᕐᑐᑎᖕ ᐃᖅᑲᓇᐃᔭᕐᑎᓂᑦ ᐱᔨᑦᓯᕆᐊᖃᓪᓚᕆᑦᑐᓂᑦ ᑐᑦᓯᕌᖑᓚᐅᕋᒥ ᓄᓇᓕᐸᐅᔭᒃᑯᓐᓄᑦ ᑐᐊᕕᕐᓇᕐᑐᓕᕆᔨᖏᑕ ᐊᐅᓚᑦᑎᔨᖏᓐᓄᑦ ᑐᖅᑲᑕᕐᕕᖓᓃᑦᑐᑦ ᐃᑲᔪᕐᑕᐅᖁᓪᓗᒋᑦ ᐃᖃᓗᓐᓂ ᑐᐊᕕᕐᓇᕐᑐᒧᑦ ᒪᑐᓯᒪᐅᕐᑎᓪᓗᒋᑦ.
ᑐᐊᕕᕐᓇᕐᑐᖃᕐᑎᓪᓗᒍ ᐊᐅᓚᑦᑎᔩᑦ ᑐᖅᑲᑕᕐᕕᖓᓃᑦᑐᑦ ᓇᓗᓇᐃᕐᑐᐃᓚᐅᕐᑐᑦ ᑭᓱᓕᕆᒋᐊᖃᕐᒪᖔᑕ ᕆᑦ ᑯᕌᔅᑯᑦ ᐃᑲᔪᕐᑎᖏᑦ, ᐃᓇᖐᓯᒪᑲᐃᓐᓇᖁᓪᓗᒋᑦ ᐅᖂᑕᖅ ᐊᖑᑎᓄᑦ ᐊᖏᕐᕋᖃᓐᖏᑦᑐᒃᑯᕕᖓᓂ ᐃᖅᑲᓇᐃᔭᕐᑎᓂᑦ ᐊᒻᒪ ᓇᓗᓇᐃᕐᑐᐃᓂᐊᕐᖓᑕ ᖃᐅᔨᓴᓚᐅᕐᓗᑎᖕ ᐃᖅᑲᓇᐃᔭᕐᕖᑦ ᐊᑐᕆᐊᖃᓗᐊᓐᖑᐊᕐᑐᑦ ᓇᓪᓕᐊᖑᒻᒪᖔᑕ ᐃᖃᓗᓐᓂ.
ᐃᖃᓗᓐᓄᑦ ᑎᑭᓚᐅᖅᑳᕋᑎᖕ, ᕆᑦ ᑯᕌᔅ ᐃᑲᔪᕐᑏᑦ ᖃᐅᔨᓴᓚᐅᕐᑐᑦ ᖃᕆᓴᐅᔭᒃᑯᑦ ᑕᑯᓐᓇᓐᖑᐊᕈᓐᓇᕐᓯᓗᒍ ᓄᓇᑦᑎᓂ ᐃᖅᑲᓇᐃᔭᕐᕕᓂᖕ ᐊᑐᕆᐊᖃᓗᐊᓐᖑᐊᕐᑐᓂᑦ ᐊᐅᓚᐃᓐᓇᕆᐊᓕᓐᓂᑦ, ᐊᑐᓕᖁᔨᔾᔪᑎᓂᑦ ᓇᓗᓇᐃᕐᑐᐃᓪᓗᑎᖕ ᖃᓄᖅ ᐅᓗᕆᐊᓇᓗᐊᖏᓂᕐᓴᐅᓂᐊᕐᒪᖔᑦ ᐃᓪᓗᖓ, ᐃᓱᒪᖅᓴᖅᓯᐅᕈᑎᑦᓴᓪᓗ ᖃᓄᒃᑲᓐᓂᖅ ᐃᓄᐃᑦ ᓇᔪᕐᐸᑦᑐᑦ ᖃᓂᒌᓗᐊᑦᑕᐃᓕᒍᓐᓇᕐᒪᖔᑕ, ᐊᑐᑦᓯᐊᕆᐊᖃᕐᓂᖏᑦ ᐊᐃᑦᑐᓗᖃᑕᐅᑎᑦᑕᐃᓕᓂᖕᒧᑦ ᐊᑐᕆᐊᓕᓐᓂᑦ ᐊᒻᒪ ᖃᓄᐃᑦᑐᓂᑦ ᓴᓗᒻᒪᕐᓴᐃᑎᖃᕆᐊᖃᕐᒪᖔᑕ.
ᕆᑦ ᑯᕌᔅ ᐃᑲᔪᕐᑏᑦ ᑲᔪᓯᓂᐊᕐᑐᑦ ᓯᐊᒻᒪᑦᑕᐃᓕᒪᑎᑦᓯᓗᑎᖕ ᐊᖏᕐᕋᖃᓐᖏᑦᑐᒃᑯᕕᒻᒥ ᐊᒻᒪ ᐊᐅᓚᑕᐅᒋᐊᓖᑦ ᑐᐊᕕᕐᓇᕐᑐᓕᕆᓂᖕᒧᑦ (EPC) ᐱᔭᑦᓴᖏᑦ ᐱᔭᕇᕋᓱᓐᓂᖏᓐᓂ ᐱᓇᓱᐊᕈᓯᐅᓛᕐᑑᑉ ᓄᓐᖑᐊᓄᑦ ᑎᑭᓪᓗᒍ ᓄᓇᑦᑎᓂ ᐃᓪᓗᐃᑦ ᓇᓗᓇᐃᕐᑕᐅᓯᒪᔪᑦ ᑲᑐᔾᔨᖃᑎᒋᔭᖏᑦ ᓄᓇᓕᐸᐅᔭᒃᑯᑦ ᐱᓇᓱᐊᖃᑎᒋᓗᒋᑦ.
ᓱᓕᒃᑲᓐᓂᖅ, ᕆᑦ ᑯᕌᔅ ᐃᑲᔪᕐᑏᑦ ᐅᐸᓗᖓᐃᔭᐃᒻᒥᔪᑦ ᐃᓅᓕᓴᐃᓂᖕᒧᑦ ᐃᑲᔪᕆᐅᕐᓴᓂᖕᒥᑦ ᐃᓕᓐᓂᐊᕋᑦᓴᓂᑦ ᐊᒻᒪ ᐃᑲᔪᖃᑦᑕᓂᐊᕐᑐᑎᖕ ᐋᓐᓂᐊᕐᑐᓕᕆᓂᖕᒧᑦ ᖃᓂᒻᒪᑦᑕᐃᓕᒪᑎᑦᓯᓂᖕᒧᓪᓗ ᐃᑲᔪᕐᑎᐅᕙᑦᑐᓂᑦ ᓄᓇᑦᑎᓂ ᑲᑐᔾᔨᖃᑎᒌᓂ.
ᕆᑦ ᑯᕌᔅ ᐃᑲᔪᕐᑏᑦ ᖃᕆᓴᐅᔭᒃᑯᑦ ᑕᑯᓐᓇᓐᖑᐊᕋᑦᓴᓂᑦ ᖃᐅᔨᓴᐃᓐᓇᓂᐊᕐᑐᑦ ᐊᒻᒪ ᐃᑲᔪᐃᓐᓇᕐᓂᐊᕐᑐᑎᖕ ᐊᐅᓪᓚᕐᓯᒪᓕᕋᓗᐊᕐᓗᑎᖕ.
ᒪᐃᔭ ᑭᐊᓂ ᐱᐅᓪ ᐅᖃᓚᐅᕐᑐᖅ:
“ᑭᒡᒐᑐᖅᑐᒋᑦ ᐃᖃᓗᐃᑦ ᓄᓇᓕᐸᐅᔭᖓᑦ ᑲᑐᔾᔨᖃᑎᒋᕙᑦᑕᕗᓪᓗ, ᐃᓚᒋᔭᐅᔪᓪᓗ ᓄᓇᑦᑎᓂ ᑐᐊᕕᕐᓇᕐᑐᓄᑦ ᑲᑎᒪᔨᕋᓛᑦ ᑐᑭᒧᐊᕐᑎᑦᓯᔨᖏᑦ ᐊᒻᒪ ᐅᖁᒪᐃᓐᓂᓂᐊᕐᕕᒃᑯᑦ ᐊᖏᔪᖅᑳᖓᑦ, ᖁᔭᓕᒍᒪᓪᓚᕆᑉᐳᖓ ᕆᑦ ᑯᕌᔅ ᐃᑲᔪᕐᑎᖏᓐᓂᑦ ᐃᑲᔪᓐᖑᐊᑕᕐᓯᓐᓇᕐᖓᑕ ᐊᑦᓱᕈᕐᓇᖅᑐᒃᑰᑎᓪᓗᑕ.
ᐊᑑᑎᖃᓪᓚᕆᑦᑐᑦ ᓄᓇᑦᑎᓂ ᑲᑐᔾᔨᖃᑎᒌᑦ ᐃᖅᑲᓇᐃᔭᕐᑎᑭᑦᓴᕐᓯᒪᒻᒪᑕ ᑐᐊᕕᕐᓇᕐᑐᒦᓂᑎᓐᓂ ᒪᑐᓯᒪᐅᒧᑦ, ᐊᓪᓛᑦ ᐊᑦᓱᕈᓗᐊᒧᑦ ᒪᑐᑲᓴᒻᒪᕆᑉᐸᓕᕐᑐᑎᖕ ᐃᓂᑦᓴᖃᓐᖏᑦᑐᓄᑦ ᓇᒧᓐᖓᕕᑦᓴᐃᒍᑎᑲᓴᑦᑐᑎᖕ. ᒫᓐᓇᓕ, ᐊᑑᑎᖃᕆᐊᓪᓚᓕᕐᒪᑕ, ᐱᔨᑦᓯᕐᑎᒋᕙᑦᑕᕗᑦ ᐃᓅᓕᑦᓯᓂᖕᒧᑦ ᑐᖁᒧᓪᓘᓐᓃᑦ ᐃᑉᐱᓇᓪᓚᕆᓕᕐᑎᓪᓗᒍ.
ᑕᑯᓯᒪᑦᓯᐊᒻᒪᕆᑦᑐᒋᑦ ᓱᒃᑲᓕᔪᐊᓗᖕᒥᑦ ᑐᑭᒧᐊᑦᓯᐊᕐᑐᑎᓪᓗ ᑐᐊᕕᐅᔾᔨᓪᓗᑎᖕ ᐱᒋᐊᑲᐅᕐᑐᓚᐅᕐᖓᑕ ᕆᑦ ᑯᕌᔅᑯᑦ ᓴᖅᑭᔮᕐᑎᑦᓯᓕᕐᑐᑎᖕ ᖃᓄᑎᒋ ᐱᒻᒪᕆᐅᑎᒋᒻᒪᖔᑦ ᐃᑲᔪᕐᑎᐅᖃᑎᒌᓐᓂᖅ ᓵᓐᖓᑦᓯᑎᓪᓗᑕ ᑰᕕᑦ−19ᒥᖕ ᓄᕙᕐᔪᐊᕐᓇᐅᑎᓪᓗᒍ ᓄᓇᑦᑎᓂ.”
ᑐᓴᕋᑦᓴᐃᑦ ᒥᑦᓵᓄᑦ ᐊᐱᖅᑯᑎᑦᓴᖃᕈᑦᓯ, ᖃᐅᔨᒋᐊᕈᓐᓇᕐᑐᓯ ᐆᒧᖓ:
ᓖᓴ ᒥᓗᓵᕝᔨᕕᒃ
ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᕐᓂᒥᑦ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5607
