ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᓯᑎᒃᑯᑦ ᑲᑎᒪᔨᖏᑦ ᑲᔪᓯᑎᑦᑎᔪᑦ 2021−ᒥ ᑮᓇᐅᔭᓂᑦ ᐊᑐᖅᑐᑦᓴᒫᓂᑦ
ᓅᕖᐱᕆ 25, 2020 – ᐃᖃᓗᐃᑦ, ᓄᓇᕗᑦ
ᐃᖃᓗᐃᑦ ᓯᑎᒃᑯᖏᑕ ᑲᑎᒪᔨᖏ ᑲᔪᓯᑎᑦᑎᓚᐅᖅᑐᑦ 2021−ᒥ ᑮᓇᐅᔭᓂᑦ ᐊᑐᖅᑐᑦᓴᒫᓕᐊᖑᓯᒪᔪᓂᑦ ᑲᑎᒪᔩᑦ ᑲᑎᒪᓂᖃᖅᑎᓪᓗᒋᑦ ᓅᕖᐱᕆ 24, 2020.
ᑲᑎᒪᔨ ᓴᐳᕐᑦ, ᐃᑦᓯᕙᐅᑕᖓᑦ ᑮᓇᐅᔭᓕᕆᓂᕐᒥᑦ ᑲᑎᒪᔨᕋᓛᓄᑦ ᐅᖃᖅᑐᖅ, "2021 ᑮᓇᐅᔭᓂᑦ ᐊᑐᖅᑐᑦᓴᒫᑦ ᐃᑲᔫᑎᖃᕋᔭᖅᑐᑦ ᓯᑎᒃᑯᓐᓂᑦ ᓴᖕᖏᑎᑦᑎᒋᐊᕐᓂᒃᑯᑦ ᐃᖅᑲᓇᐃᔭᕐᕕᒻᒥ ᐱᓕᕆᔾᔪᑎᐅᔪᓂᑦ ᐱᐅᔪᐊᓗᓐᓂᑦ ᐱᔨᑦᓯᕋᐅᑎᖃᖅᑎᑕᐅᕙᓪᓗᑎᒃ ᓄᓇᓕᕐᒥᐅᑕᓄᑦ ᐊᒻᒪ ᐱᐅᓯᑎᑦᑎᒋᐅᕈᑎᐅᓗᑎᒃ ᐃᖅᑲᓇᐃᔭᖅᑎᓄᑦ ᐃᓂᒋᔭᐅᕙᑦᑐᓂᑦ ᓇᓗᓇᐃᕐᓯᒪᖁᓪᓗᒋᑦ ᐃᖅᑲᓇᐃᔭᖅᑎᖁᑎᕗᑦ ᐃᖅᑲᓇᐃᔭᖃᑦᑕᖁᓪᓗᒋᑦ ᖃᓄᐃᓐᓇᖏᑦᑎᐊᖅᑐᒥᑦ ᐊᕙᑎᖃᖅᐸᓪᓗᑎᒃ ᐱᓕᕆᔾᔪᑎᖃᖅᐸᓪᓗᑎᒃ ᐱᓕᕆᔾᔪᑎᒋᔭᕆᐊᓕᒻᒥᓂᒃ."
ᓯᑎᒃᑯᑦ ᓵᖕᖓᓂᐊᕐᒪᑕ ᐊᑦᓱᕉᑎᐅᔪᓂᑦ ᐊᕐᕌᒍᓂ ᐊᒡᒋᖅᑐᓂ ᐊᒥᓲᔪᑦᓴᐅᖏᑦᑑᒐᓗᐊᓂᑦ. ᐃᓚᖓᑦ ᐱᔾᔪᑎᒻᒪᕆᐅᕙᑦᑐᖅ ᓯᑎᒃᑯᓐᓄᑦ ᒪᑭᒪᑎᑦᑎᔾᔪᑎᓂᑦ ᐊᑭᓕᑦᓴᖃᐅᑎᐅᔪᑦ. ᓯᑎᒃᑯᑦ ᐱᓕᕆᕝᕕᖏᑦ ᐊᒻᒪ ᓄᓇᒃᑰᔫᖁᑎᖏᑦ ᐱᑐᖃᕈᖅᐸᓪᓕᐊᑐᐃᓐᓇᕐᒪᑕ ᐊᑑᑎᒋᔭᒻᒪᕆᒻᒥᓂᒃ ᐃᓱᓕᑦᓯᕙᓪᓕᐊᒻᒪᑕ. ᐱᓕᕆᕝᕕᑖᕆᐊᓖᑦ ᑭᖑᕝᕕᐅᑎᑦᓴᓂᑦ ᓯᑎᒃᑯᑦ ᓴᓂᕐᕙᐃᔭᐃᕕᑦᓴᖓᓂᑦ ᓱᓇᒃᑯᑖᓂᑦ, ᓴᓇᕕᒻᒥᑦ ᐊᒻᒪ ᐱᓕᕆᔾᔪᑎᓂᑦ ᓈᓴᕐᓯᒪᔪᓂᑦ ᐊᑐᕋᑦᓴᐅᔪᓐᓃᖅᑐᓄᑦ, ᐊᒻᒪᑦᑕᐅᖅ ᐃᓂᑖᕆᐊᖃᓪᓚᕆᑦᑐᑎᓪᓗ ᐊᐅᓚᑦᓯᔾᔪᑎᓂᑦ ᐱᓕᕆᔾᔪᑎᓂᑦ ᐃᖅᑲᓇᐃᔭᖅᑎᐅᔪᑦ. ᓯᑎᒃᑯᑦ ᐱᓕᕆᕝᕕᖏᑦ ᓴᓇᒋᐊᕆᐊᖃᒻᒪᕆᓕᖅᑐᑦ ᒪᓕᓐᓂᐊᖁᓪᓗᒋᑦ ᐃᓗᓯᓕᕆᓂᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒧᑦ ᒪᓕᒋᐊᓕᓐᓂᑦ ᒪᓕᒐᕐᓂᑦ, ᐊᒻᒪ ᓯᑎᒃᑯᑦ ᐸᕐᓇᐅᑎᓕᐅᓛᓕᖅᑐᑦ ᓄᑖᓄᑦ ᐱᓕᕆᕝᕕᑦᓴᓂᑦ ᓲᕐᓗ ᖃᑦᑎᕆᔨᓄᑦ ᐊᒻᒪ ᕿᒻᒥᓕᕆᔨᓄᑦ.
ᐊᒥᓱᑲᓪᓚᐅᒻᒪᑕ ᐊᑭᑐᔫᑎᓂᑦ ᐱᓕᕆᐊᑦᓴᓂᑦ ᐊᑐᖅᑐᒻᒪᕆᐅᔪᓂᑦ ᐃᖃᓗᓐᓂ ᓄᓇᓕᕐᒥᐅᑕᓄᑦ ᐊᒻᒪ ᓯᕗᓂᑦᑎᓐᓂ ᓴᓇᔭᐅᒋᐊᓕᓐᓄᑦ. ᑭᓯᐊᓂᓕ, ᐱᑕᖃᖕᖏᒃᑯᑎᒃ ᐊᑯᓂᐅᔪᒧᑦ ᐃᒥᖃᖅᑎᑦᑎᔾᔪᑎᓂᑦ ᐊᒻᒪ ᑭᓈᓗᓕᕆᔾᔪᑎᓂᑦ ᓴᓇᒋᐊᖅᐸᖏᒃᑯᑦᑕ, ᓯᑎᒃᑯᑦ ᐃᑲᔪᕐᓱᐃᔾᔪᑎᖃᕈᓐᓇᔾᔮᖏᑦᑐᑦ ᐊᓯᖏᓐᓄᑦ ᓴᓇᔭᐅᔪᒪᕙᓐᓂᐊᖅᑐᓄᑦ ᐅᕝᕙᓘᓐᓃᑦ ᒪᓕᒍᓐᓇᖏᓪᓗᑎᒃ ᐊᑐᖅᑕᐅᒋᐊᓕᓐᓂᑦ ᐃᓪᓗᓕᕆᔾᔪᑎᓂᑦ ᒪᓕᒋᐊᓕᓐᓂᑦ ᒪᓕᒐᕐᓂᑦ. ᑕᒪᒃᑯᐊ ᐃᓱᒪᒋᓪᓗᒋᑦ, ᐃᒥᖅ ᓯᑎᒃᑯᑦ ᓯᕗᓪᓕᐸᐅᔾᔨᐅᔭᐃᓐᓇᕐᓂᐊᖅᑕᖓᑦ.
ᓯᕗᓪᓕᐅᔾᔭᐅᒋᐊᖃᕐᒥᔪᑦ 2021-ᒧᑦ ᐱᖃᓯᐅᔾᔭᐅᔪᑦ ᓴᓇᔭᐅᓂᖏᑦ ᓄᑖᒃ ᓱᓇᓕᒫᓂᑦ ᐸᕐᓇᐅᑎᐅᑉ ᐊᒻᒪ ᓄᓇᖁᑎᓄᑦ ᑭᓪᓕᓕᐅᕈᑎᐅᔫᒃ ᒪᓕᒐᕋᓛᑦᓵᒃ, ᓴᓇᔾᔪᑎᑦᓴᑦ ᓂᐊᖁᖕᖒᑎᓂ ᐃᑳᕈᑎᒥᑦ, ᒥᓪᓗᐊᑎᑦᑎᓂᕐᒥᑦ ᐃᒥᕐᒥᒃ ᐱᓕᕆᐊᑦᓴᖅ ᐃᑲᔫᑎᑦᓴᒥᑦ ᐃᒥᒃᑯᑦ ᐃᒥᖅᑕᕕᒻᒦᑦᑐᒧᑦ, ᓂᐅᕕᐊᖑᒋᐊᓕᒃ ᓴᓕᒎᑎ ᖃᓗᕋᐅᑎᓕᒃ ᐱᓕᕆᔾᔪᑎᑦᓴᐅᒐᔭᖅᑐᖅ ᒪᑭᒪᔾᔪᑎᓂᑦ ᐱᓕᕆᕝᕕᓐᓂᑦ ᓴᓇᒋᐊᖃᓕᕋᐃᑉᐸᑕ, ᓄᑖᖅ ᓯᑎᒃᑯᑦ ᐃᑭᐊᖅᑭᕕᑦᓴᖓᑦ, ᐊᐅᔭᒃᑯᑦ ᓴᓗᒻᒪᕐᓴᐃᔨᑦᓴᓂᑦ ᐊᒻᒪ ᐃᖅᑲᓇᐃᔭᖅᑎᑖᒃᑲᓐᓂᕐᓗᑎᒃ ᓄᓇᓕᓐᓂ ᒪᓕᒐᕋᓛᓕᕆᓂᕐᒥᑦ ᐃᖅᑲᓇᐃᔭᖅᑏᑦ.
"ᐅᑯᐊ ᑮᓇᐅᔭᐃᑦ ᐊᑐᖅᑐᑦᓴᒫᑦ ᑕᑯᑦᓴᐅᑎᑦᑎᔾᔪᑎᐅᔪᑦ ᓯᑎᒃᑯᑦ ᐊᑐᕈᒪᔭᖏᓐᓂᑦ ᓴᖅᑮᒍᒪᓪᓗᑎᒃ ᐊᒥᓱᕈᖅᐸᓪᓕᐊᔪᓄᑦ ᑭᖕᖑᒪᔭᐅᕙᑦᑐᓂᑦ ᓄᓇᓕᕐᒥᐅᑕᓄᑦ ᐊᒻᒪ ᐱᐅᓯᑎᒋᐊᖁᓪᓗᒋᑦ ᐊᑐᖅᑐᒻᒪᕆᐅᔪᑦ ᐱᔨᑦᓯᕋᐅᑎᐅᔪᑦ ᐊᒻᒪ ᒪᑭᒪᑎᑦᑎᔾᔪᑎᐅᔪᑦ ᐱᓕᕆᕝᕕᓐᓂᑦ ᐃᓘᓐᓇᑦᑎᐊᖏᓐᓄᑦ ᓄᓇᓕᕐᒥᐅᑕᓄᑦ", ᐅᖃᖅᑐᖅ ᒪᐃᔭ ᐱᐅᓪ.
2021-ᒧᑦ ᑮᓇᐅᔭᐃᑦ ᐊᑐᖅᑐᑦᓴᒫᓂ ᐱᓪᓗᐊᑕᐅᓂᖏᑦ ᐅᑯᓂᖓ ᐱᖃᓯᐅᔾᔨᔪᑦ:
- ᐱᐅᓯᒋᐊᖅᑕᐅᓗᑎᒃ ᓯᑎᒃᑯᑦ ᐃᒥᓕᕆᓂᒃᑯᑦ ᐱᓕᕆᔾᔪᑎᖏᑦ ᐊᒻᒪ ᐱᔨᑦᓯᕋᐅᑎᖏᑦ ᓄᓇᓕᕐᒥᐅᑕᓄᑦ, ᐊᒻᒪ ᐸᕐᓇᐅᑎᓕᐅᕐᓗᑎᒃ ᐊᒻᒪ ᐱᒋᐊᖅᑎᑦᑎᒐᔭᕐᓗᑎᒃ ᐊᑯᓂᐅᔪᓄᑦ ᐃᒥᖃᖅᑎᑦᑎᔾᔪᑎᑦᓴᒥᑦ ᐊᒻᒪ ᓴᓂᕐᕙᐃᓯᒪᕕᑦᓴᒥᑦ ᕿᓂᕐᓗᑎᒃ.
- ᐱᐅᓯᒋᐊᕐᓗᑎᒃ ᓴᓂᓕᕆᔾᔪᑎᑦᓴᓂᑦ ᑲᔪᓗᑎᒃ ᓴᓇᔭᐅᓂᖓᓂᑦ ᓄᑖᑉ ᓴᓂᓕᕆᕝᕕᑦᓴᐅᑉ ᐊᒻᒪ ᐊᓯᕕᑦᓴᐅᑉ
- ᐃᒥᕐᒧᑦ ᐊᑭᓕᐅᑎᐅᕙᑦᑐᑦ ᑕᕝᕙᓂ ᐊᕐᕌᒍᒥ ᖁᕝᕙᒋᐊᖅᑕᐅᔾᔮᖏᑦᑐᑦ, ᐱᔾᔪᑎᒋᓪᓗᒋᑦ ᒥᑭᓪᓕᒋᐊᕐᓯᒪᓂᖏᑦ ᐃᒥᕐᒧᑦ ᐊᑭᓕᐅᑎᓂᑦ ᐃᑲᔫᑎᐅᕙᑦᑐᑦ ᐊᕐᕌᒎᓐᓂ ᒪᕐᕉᓐᓂ ᖄᖏᖅᑑᓐᓂᒃ.
- ᐊᑭᓕᖅᑕᐅᕙᑦᑐᑦ ᐃᒻᒪᑦᑕᐅᒍᒪᔪᓄᑦ ᐊᒻᒪ ᑭᓈᓗᖃᐅᑎᖏᓐᓂᑦ ᒥᓪᓗᐊᑎᑦᑎᖁᔨᕙᑦᑐᑦ ᐅᖄᓚᕙᑦᑐᓂᑦ ᖁᕝᕙᒋᐊᕐᓂᐊᖅᑐᑦ $250-ᓂᑦ $350-ᓄᑦ ᐊᒻᒪ $450-ᓄᑦ ᑮᓇᐅᔭᓕᐅᖅᑎᓄᑦ ᑕᑯᓐᓇᖅᑐᒋᑦ ᓯᑎᒃᑯᑦ ᐊᑭᓕᕆᐊᖃᖅᐸᑦᑕᖏᑕ ᖁᕝᕙᐸᓪᓕᐊᓂᖏᑦ.
- ᖁᕝᕙᒋᐊᖅᑕᐅᓗᑎᒃ ᓴᓂᓕᕆᔾᔪᑎᓂᑦ ᑮᓇᐅᔭᐃᑦ 3%−ᐳᓴᓂᑦ ᐃᓱᒪᒋᓪᓗᒋᑦ ᐊᒥᒐᕐᓯᓗᐊᕈᑎᐅᕙᑦᑐᑦ ᓴᓂᓕᕆᔾᔪᑎᒍᑦ ᐊᒻᒪ ᐅᐸᓗᖓᐃᔭᖅᐸᓪᓕᐊᓂᐊᕐᒪᑕ ᓄᑖᒧᑦ ᓴᓂᓕᕆᕝᕕᑦᓴᒧᑦ ᐊᒻᒪ ᐊᑦᓯᕕᑦᓴᒧᑦ.
- ᖁᕝᕙᒋᐊᕐᓗᑎᒃ ᐱᖁᑎᓄᑦ ᑖᒃᓰᔭᐃᔭᐅᑎᐅᕙᑦᑐᑦ 1%−ᐳᓴᒥᑦ ᑮᓇᐅᔭᓂᑦ ᐃᓯᕐᓯᔾᔪᑎᐅᓇᓱᐊᖁᓪᓗᒋᑦ ᓱᓇᓕᒫᓂᑦ ᐱᓕᕆᔾᔪᑎᐅᔪᓄᑦ ᐃᑲᔫᑎᑦᓴᐅᒐᔭᖅᑐᓂᑦ ᖁᕝᕙᒋᐊᕐᓂᐊᖅᑐᓄᑦ ᑮᓇᐅᔭᐃᔭᐅᑎᑦᓴᓂᑦ ᐊᑐᖅᑕᐅᒋᐊᓕᓐᓄᑦ ᐱᔨᑦᓯᕋᐅᑎᓄᑦ (ᐊᑐᕆᐊᓄᑦ, ᑐᐊᕕᕐᓇᖅᑐᓕᕆᔾᔪᑎᓄᑦ, ᓄᓇᓕᓐᓂ ᒪᓕᒐᕋᓛᓕᕆᓂᕐᒧᑦ, ᑯᐊᐳᕇᓴᐅᑉ ᐱᔨᑦᓯᕋᐅᑎᖏᓐᓄᑦ, ᐊᓪᓚᕝᕕᒻᒥᐅᑕᓄᑦ, ᐱᖕᖑᐊᖅᑐᓕᕆᓂᕐᒧᑦ) ᐊᒻᒪ ᑮᓇᐅᔭᓂᑦ ᓴᓂᕐᕙᐃᕕᓐᓅᕋᑦᓴᓂᑦ ᓯᕗᓂᕐᒥ ᑮᓇᐅᔭᐃᔭᐅᑎᑦᓴᓂᑦ ᐃᑲᔫᑎᑦᓴᓂᑦ (ᖃᑦᑎᕆᔾᔪᑎᓄᑦ ᓄᓇᒃᑰᔫᓄᑦ, ᐃᓪᓗᓄᑦ, ᓱᓇᒃᑯᑖᓄᑦ ᐅᖁᒪᐃᑦᑐᓄᑦ ᐊᓯᖏᓐᓄᓪᓗ).
ᓄᑖᑦ ᑮᓇᐅᔭᐃᑦ ᐊᑐᖅᑐᑦᓴᒫᑦ ᐊᑐᓕᕆᐊᕋᔭᖅᑐᑦ ᔮᓐᓄᐊᕆ 1, 2021.
ᑐᑭᓯᒋᐊᕈᒪᔪᑦ ᐆᕕᖓ ᖃᐅᔨᒋᐊᖁᔪᑦ:
ᓖᓴ ᒥᓗᓵᕝᔨᕕᒃ
ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᕐᓂᒥᑦ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ
L.Milosavljevic@iqaluit.ca
867-979-5607
