ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᐅᖃᐅᑎᑦᓴᖏᑦ ᒪᐃᔭ ᐱᐅᓪ
ᑲᓇᑕᐅᑉ ᐅᓪᓗᖓᓂ ᖁᕕᐊᓲᑎᖃᕐᓃᑦ
ᔪᓚᐃ 1, 2020 – ᐃᖃᓗᐃᑦ, ᓄᓇᕗᑦ
ᓇᒥᓕᒫᖅ ᓄᓇᕐᔪᐊᕐᒥ ᐊᒻᒪᓗ ᑕᒫᓂ ᓄᓇᕗᒥ, ᐊᒥᓱᐊᓗᓐᓂᑦ ᐱᔭᕆᐊᑐᔪᒃᑰᕈᑎᖃᖅᑐᐃᓐᓇᐅᒐᑦᑕ. ᐅᓪᓗᒥ ᖁᕕᐊᓲᑎᖃᕆᐊᖅᑐᒍᑦ ᐃᓅᓯᑦᑎᓐᓂᒃ ᐊᒻᒪᓗ ᐃᓱᒪᔅᓴᕐᓯᐅᕈᑎᖃᕐᓗᑕ ᖃᓄᖅ ᑐᑭᖃᕐᒪᖔᖅ ᑲᓇᑕᒥᐅᑕᐅᓂᖅ. ᖁᕕᐊᓱᖁᔨᓪᓚᕆᑉᐳᖓ ᐃᓕᔅᓯᓐᓂᒃ ᑲᓇᑕᐅᑉ ᐅᓪᓗᖓᓂ.
ᐅᓪᓗᒥ ᖁᕕᐊᓲᑎᖃᖅᑐᒍᑦ ᑲᓇᑕ ᓄᓇᒋᔭᐅᒻᒪᑦ ᑲᓇᑕᒥᐅᓕᒫᓄᑦ ᓇᑭᑐᐃᓐᓈᕐᓯᒪᔪᓄᑦ ᐃᓱᒪᕐᓲᑎᖃᑦᑎᐊᖅᑐᑎᒃ ᖃᓄᑐᐃᓐᓇᖅ ᓴᖅᑭᔮᕈᒪᒍᑎᒃ ᐊᒻᒪᓗ ᐃᑲᔫᑎᖃᕐᐸᑦᑐᓄᑦ ᓄᓇᖃᕐᕕᑎᓐᓄᑦ. ᐊᔾᔨᒌᙱᑐᒡᒍᑎᐅᓂᕗᑦ ᐃᒻᒧᐊᓃᒻᒪᑦ ᐃᓕᓴᕐᓇᕈᑎᑦᑕ ᐊᒻᒪᓗ ᑐᙵᕕᑦᑎᐊᕚᓘᓪᓗᓂ ᐱᔪᓐᓇᓂᑦᑎᓐᓄᑦ ᓴᖅᑭᔮᖅᑎᑦᑎᑎᓪᓗᑕ ᑕᒪᑐᒥᖓ ᓄᓇᕐᔪᐊᕐᒥᐅᖑᖃᑎᑦᑎᓐᓄᑦ ᖃᐅᑕᒫᑦ.
ᐊᓪᓛᑦ ᐅᖓᓯᓐᓂᕐᐹᖏᓐᓃᑦᑐᓄᑦ ᑕᒫᓂ ᓄᓇᖃᕐᕕᑎᓐᓂ, ᐃᖃᓗᒻᒥᐅᑦ ᓱᓕ ᐃᓚᒋᔭᐅᔪᓐᓇᖃᑦᑕᕐᖓᑕ ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᓯᒪᔪᖅ ᐳᕝᕕᕆᓇᖅᑐᖅ−ᖃᓂᒪᓇᖅᑐᖅ ᐱᔾᔪᑎᒋᓪᓗᒍ, ᐊᐅᖃᑎᒋᙱᑕᑦᑎᓐᓂᒃ−ᐊᑭᕋᖅᑐᖃᑦᑕᖁᔨᙱᓂᕐᒧᑦ ᖃᓄᖅᑑᕈᑕᐅᔪᒧᑦ, ᑕᒪᒃᑯᐊᓗ ᑕᐃᒪᐃᑦᑑᒐᓗᐊᖅᑎᓪᓗᒋᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᐊᑑᑎᓂᖏᓐᓂᒃ ᖃᐅᔨᕙᓪᓕᐊᖏᓐᓇᖅᑐᑎᒃ.
ᑕᐃᒪᐃᑦᑑᒐᓗᐊᖅᑎᓪᓗᒍ, ᑕᒪᒃᑯᐊ ᐱᔭᕆᐊᑐᔪᑦ ᓯᕘᕋᔾᔪᑎᒋᑐᐃᓐᓇᕆᐊᖃᙱᓇᑦᑎᒍ ᓯᕗᓂᔅᓴᕗᑦ ᖃᓄᐃᑦᑑᓂᐊᕐᒪᖔᖅ. ᑕᒪᓐᓇ ᐅᓚᕕᑕᐅᓯᒪᔾᔪᑎᕗᑦ ᐱᕕᖃᕈᑎᒋᓚᐅᕐᓚᕗᑦ ᐃᓱᒪᒋᔭᖃᕆᐊᕐᓂᕐᒥᒃ ᐊᑑᑎᖃᕐᓂᕐᐹᓂᑦ ᐅᕙᑦᑎᓐᓄᑦ ᐊᒻᒪᓗ ᖃᐅᔨᓇᓱᓪᓗᑕ ᖃᓄᖅ ᐊᔾᔨᒋᙱᑕᖏᓐᓂᒃ ᓂᕈᐊᒐᖃᕐᓂᐊᕐᒪᖔᑦᑕ. ᑕᖃᓇᖅᑐᐊᓘᒻᒪᑦ ᐃᖅᑲᓇᐃᔮᕆᓪᓗᒍ, ᑭᓯᐊᓂ ᓄᓇᓖᑦ ᑲᑎᒐᐃᒻᒪᑕ ᐃᑲᔪᖅᑎᒌᓯᓪᓗᑎᒃ, ᐊᓂᒍᐃᔪᓐᓇᖃᑦᑕᕋᑦᑕ ᐱᔭᕆᐊᑐᔪᓂᑦ.
ᑕᒫᓂ ᐊᕐᕌᒍᒥ ᐱᒋᐊᙵᕐᓂᖏᓐᓂ ᓄᓇᕐᔪᐊᓕᒫᒥ ᖃᓂᒪᓇᖅᑐᖅᑕᖃᓯᒻᒪᑦ ᐳᕝᕕᕆᓇᖅᑐᒥᒃ, ᓄᓇᕗᑦ ᖃᓄᖅᑑᕈᑎᖃᓯᑦᑕᐅᑎᒋᔪᒻᒪᑦ ᑐᑭᓯᓪᓗᑎᒃ ᖃᓄᑎᒋ ᐱᔭᕆᐊᑐᑎᒋᓂᖓᓂᒃ. ᓄᓇᓕᐸᐅᔭᓕᕆᔨᒃᑯᑦ ᐃᓕᓴᕐᓯᒍᒪᔪᑦ ᖁᔭᓐᓇᒦᕈᒪᓪᓗᑎᓪᓗ ᐊᔅᓱᕈᐊᖃᖅᑐᑎᒃ ᐃᖅᑲᓇᐃᔮᖃᕐᓯᒪᒻᒪᑕ ᐃᓱᒪᑕᖅ ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᓐᓄᑦ ᒪᐃᑯ ᐹᑐᓴᓐ, ᐋᓐᓂᐊᖅᑐᓕᕆᓂᕐᒧᑦ ᒥᓂᔅᑕ ᔪᐊᔾᔨ Hᐃᒃᔅ, ᓯᕗᓕᖅᑎ ᔫ ᓴᕕᑲᑖᖅ. ᓯᕗᓕᕐᓯᓂᔅᓯᓐᓄᑦ, ᐅᐱᒍᓱᓪᓗᑕ ᐅᖃᕈᓐᓇᖅᑐᒍᑦ ᓄᓇᕗᑦ ᓱᓕ ᐳᕝᕕᕆᓇᖅᑐᒥᒃ−ᖃᓂᒪᓇᖅᑐᖅᑕᖃᙱᒻᒪᑦ.
ᐃᖃᓗᒻᒥᐅᑦ ᑲᑐᔾᔨᓪᓗᑎᒃ ᐱᓇᓱᐊᕈᑎᖃᕐᓯᒪᒻᒪᑕ ᖃᓄᖅᑑᕈᑎᖃᖅᑐᑎᒃ ᓯᐊᒻᒪᖁᓇᒍ, ᖃᓂᒌᓗᐊᖅᑕᐃᓕᓪᓗᑕ ᐊᒻᒪᓗ ᐊᖏᕐᕋᓯᒪᖃᑦᑕᖅᑐᑕ. ᐃᑲᔪᖃᑦᑕᓚᐅᖅᑐᒍᑦ ᐱᖃᑎᑦᑎᓐᓂᒃ, ᓴᓂᓪᓕᑎᓐᓂᒃ ᐊᒻᒪᓗ ᐃᓐᓇᑎᓐᓂᒃ ᐊᓂᑦᑕᐃᓕᑎᓪᓗᒋᑦ. ᕿᑐᕐᖓᓖᑦ ᖃᓄᖅᑑᖃᑦᑕᓚᐅᖅᑐᑦ ᐊᖏᕐᕋᕐᓯᒪᓗᑎᒃ ᐃᖅᑲᓇᐃᔭᖃᑦᑕᓂᐊᕐᖓᑕ ᐊᒻᒪᓗ ᐃᓕᓐᓂᐊᑎᑦᑎᖃᑦᑕᓂᐊᕐᖓᑕ ᕿᑐᕐᖓᖏᓐᓂᒃ ᐃᓕᓐᓂᐊᕐᕕᓕᐊᖃᑦᑕᕈᓐᓇᓚᐅᙱᑦᑐᓂᑦ.
ᖃᓄᖅᑑᕋᓱᔅᓯᒪᔪᐃᓐᓇᐅᓪᓗᑕ ᐃᓕᑦᑐᕋᓱᑦᑐᑕ ᐊᓯᔾᔨᕐᓯᒪᔪᓄᑦ, ᖁᔭᓐᓇᒦᕈᒪᓗᐊᙳᐊᕐᒥᔭᒃᑲ ᓄᓇᓕᐸᐅᔭᓕᕆᔨᒃᑯᓐᓂ ᐃᖅᑲᓇᐃᔭᖅᑏᑦ. ᖁᔭᓐᓇᒦᒃ ᐱᙳᐊᖅᑐᓕᕆᔨᒃᑯᑦ ᐃᓕᑦᑐᕐᓴᕋᐃᒍᓐᓇᔪᒻᒪᑕ ᐊᒻᒪᓗ ᐊᐅᓪᓛᕐᓯᒍᓐᓇᔪᒻᒪᑕ ᐃᓅᓯᖃᑦᑎᐊᓂᕐᒨᖓᔪᓂᑦ ᐱᓕᕆᓂᐅᕙᑦᑐᓂᑦ ᖃᕋᓴᐅᔭᒃᑯᑦ ᐊᑐᖅᑕᐅᖃᑦᑕᓂᐊᕐᖓᑕ. ᖁᔭᓐᓇᒦᖅᑕᐃᓐᓇᕆᕙᕗᑦ ᓴᓇᔪᓕᕆᔩᑦ ᓱᓕ ᖃᐅᔨᒪᒋᐊᑦᑎᐊᖃᑦᑕᓚᐅᕐᖓᑕ ᓄᓇᓖᑦ ᓱᓕ ᐱᔨᑦᑎᕋᖅᑕᐅᑦᑎᐊᕋᓗᐊᕐᒪᖔᑕ ᐊᖏᕐᕋᕐᓯᒪᖃᑦᑕᓂᕐᓴᐅᒋᐊᖃᖅᑎᓪᓗᒋᑦ. ᖁᔭᓐᓇᒦᖅᑕᐃᓐᓇᕆᕙᕗᑦ ᐃᓄᓕᕆᓪᓗᐊᑕᕐᐸᑦᑐᑦ ᐊᒻᒪᓗ ᐋᓐᓂᐊᖅᑐᓕᕆᕙᑦᑐᑦ ᐃᖅᑲᓇᐃᔭᕆᐊᖏᓐᓇᖃᑦᑕᕐᖓᑕ ᑕᒪᓐᓇ ᓇᓗᓇᖅᑐᐊᓘᒐᓗᐊᖅᑎᓪᓗᒍ.
ᖁᔭᓐᓇᒦᕈᒪᒻᒥᔭᒃᑲ ᐊᔅᓱᕈᖅᑐᑎᒃ ᐃᖅᑲᓇᐃᔭᖃᑦᑕᓚᐅᖅᑐᑦ ᓄᓇᑦᑎᓐᓂ ᑎᒥᐅᔪᑦ, ᖁᔭᓐᓇᒦᕈᒪᓗᐊᙳᐊᕐᒥᔭᒃᑲ ᑐᑭᓯᒋᐊᕐᕕᒃ ᑲᑐᔾᔨᖃᑎᒌᑦ, ᐅᖂᑕᖅ ᐊᖑᑎᓄᑦ ᓇᔪᒐᖃᖅᑎᑦᑎᔪᑦ, YWCA ᐊᒡᕕᒃ ᐊᕐᓇᓄᑦ ᓇᔪᒐᖃᖅᑎᑦᑎᔪᑦ, ᖃᔪᖅᑐᕐᕕᒃ ᓄᓇᓕᓐᓄᑦ, ᐊᒻᒪᓗ ᐆᒪᔪᕐᓂᐊᑎᒃᑯᑦ ᑲᑐᔾᔨᖃᑎᒌᖏᑦ. ᑲᒪᒋᐊᒃᑲᓐᓂᙳᐊᑕᕐᓯᓐᓇᓚᐅᕋᔅᓯ, ᐃᑲᔪᖅᑐᓯ ᓄᓇᖅᑲᑎᑦᑎᓐᓂᒃ, ᐊᒻᒪᓗ ᐊᑐᕈᓐᓇᑕᔅᓯᓐᓂᒃ ᖃᓄᖅᑑᕈᑎᖃᖅᑐᓯ ᓴᖅᑭᔮᖅᑎᑎᑦᑎᐊᓚᐅᕋᔅᓯ.
ᑕᖅᑮᑦ ᐊᓂᒍᖅᑐᑦ ᑐᑭᓕᐅᔾᔭᔅᓴᐅᑦᑎᐊᕐᖓᑕ ᖃᓄᑎᒋ ᓄᓇᓕᕗᑦ ᐱᔪᓐᓇᖅᑎᒋᒻᒪᖔᑕ. ᐅᐱᒍᓱᒋᐊᖃᓪᓚᕆᑦᑐᒍᑦ ᐱᓇᓱᐊᕈᑎᒋᓯᒪᔭᑦᑎᓐᓂᒃ ᐊᒻᒪᓗ ᖁᕕᐊᓲᑎᖃᕐᓗᑕ ᓄᓇᓕᑦᑎᓐᓂᒃ ᐃᑲᔪᖅᑎᒌᒍᓐᓇᕐᓯᒪᓂᖏᓐᓄᑦ. ᐃᑲᔪᖃᑦᑕᕐᓂᖅ ᐊᓯᑦᑎᓐᓂᒃ ᓄᓇᑦᑎᓐᓂ ᐃᒫᒃ ᑐᑭᖃᕐᖓᑦ ᒪᑭᑕᑎᑦᑎᑎᐊᖅᑯᒍᑦ.
ᐃᖃᓗᐃᑦ ᐃᓪᓗᒐᓴᓕᕐᔪᐊᕈᕐᓯᒪᒻᒪᑦ 8 ᑕᐅᓴᖏᓐᓃᓕᖅᑐᑎᒃ ᐃᓄᖏᑦ ᓇᑭᑐᐃᓐᓈᕐᓯᒪᔪᑦ ᓄᓇᕗᒥ, ᑲᓇᑕᒥ, ᐊᓯᖏᓐᓂᓪᓗ. ᑲᑎᑦᑐᒋᑦ ᐱᓇᓱᐊᕈᑎᒋᓯᒪᔭᖏᑦ ᐊᒥᓱᑦ ᑭᖑᕚᕇᒡᒍᑏᑦ, ᐊᑐᖅᑕᐅᖃᑦᑕᕐᓯᒪᔪᑐᖃᐃᑦ ᐊᒻᒪᓗ ᓇᑭᙶᕐᓯᒪᓂᐅᔪᑦ ᓄᓇᕗᑦ ᐊᖏᔪᖅᑳᖃᕐᕕᐊᓂ ᐊᔾᔨᒋᔭᐅᙱᑦᑐᑯᓗᒻᒥᒃ ᓄᓇᖃᕐᕕᐅᑎᑦᑎᓕᕐᖓᑦ.
ᖁᔭᓐᓇᒦᒃ ᐱᓕᕆᙳᐊᑕᕐᓯᓐᓇᖃᑦᑕᕋᔅᓯ ᓄᓇᓕᐅᔪᓯ. ᐊᐅᔭᐅᓂᐊᓕᕐᒥᑎᓪᓗᒍ ᐊᒻᒪᓗ ᒪᑐᐃᖅᑕᐅᑲᓐᓂᕐᓂᐊᓕᕐᒥᑎᓪᓗᒋᑦ ᓂᕆᔭᖅᑐᕐᕕᐅᕙᑦᑐᑦ ᐱᓕᕆᕕᒐᓚᐃᓪᓗ, ᑎᓕᐅᖅᑲᔅᓯ ᐃᓚᒋᔭᐅᖃᑦᑕᖁᓪᓗᓯ ᓄᓇᑦᑎᓐᓂ ᐃᓕᖅᑯᓯᕐᒨᖓᔪᓂᑦ ᐊᒻᒪᓗ ᓄᓇᓕᓐᓅᖓᔪᓂᑦ ᑲᑎᑎᑦᑎᓂᐅᕙᑦᑐᓂᑦ. ᓯᓚᒥ ᐊᑐᕐᐸᑦᑕᕗᑦ ᐊᒻᒪᓗ ᑰᑦ ᓴᓗᒪᑎᓪᓗᒋᑦ. ᐃᓚᒋᔭᐅᖃᑦᑕᕐᓗᓯ ᐃᑉᐱᒍᓱᑦᑎᐊᓂᕐᒨᖓᔪᓂᑦ ᐊᒻᒪᓗ ᐊᑑᑎᓕᓐᓅᖓᔪᓂᑦ ᐅᖃᖃᑎᒌᒍᑎᖃᖃᑦᑕᓂᕐᒥᒃ ᑕᐃᒪᐃᒃᑯᐊᓯᓐᓄᑦ, ᐃᑲᔪᖃᑦᑕᕐᓗᓯ ᐊᑭᓕᕐᓱᑕᐅᙱᒃᑲᓗᐊᕐᓗᓯ ᐊᒻᒪᓗ ᐃᑲᔪᖃᑦᑕᕐᓗᒋᑦ ᓴᓂᓪᓕᓯ ᓄᓇᖅᑲᑎᓯ.
ᖃᓄᐃᙱᑦᑎᐊᖁᓇᖅᑯᓯ ᖁᕕᐊᓱᐊᑦᑎᐊᖁᓇᖅᑯᓯᓗ ᐅᓪᓗᒥ ᖁᕕᐊᓲᑎᖃᖅᑎᓪᓗᓯ ᑲᓇᑕᐅᑉ ᐅᓪᓗᖓᓂ ᖁᕕᐊᓲᑎᖃᕐᓂᐅᔪᓂᑦ.
ᓱᓕᓪᓗᓂ ᑎᑎᕋᖅᑐᖅ,
ᒪᐃᔪ ᕕᐊᓪ
ᐱᕙᓪᓕᐊᔪᓕᕆᔨᓄᑦ ᑐᕌᖓᔪᓄᑦ ᐊᐱᖅᑯᑎᓄᑦ , ᐅᓇ ᖃᐅᔨᒃᑲᕈᓐᓇᖅᑕᓯ:
ᓖᓴ ᒥᓗᓵᕝᔨᕕᒃ
ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᕐᓂᒥᑦ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-3216
