ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᖃᓗᐃᑦ ᖃᑦᑎᕆᔨᒃᑯᖏᑦ ᐅᐸᖅᑲᐅᔪᑦ ᓇᔪᒐᕆᔭᒧᑦ ᐃᑭᑦᑐᒧᑦ
ᔪᓂ 19, 2020 – ᐃᖃᓗᐃᑦ, ᓄᓇᕗᑦ
ᐅᓪᓛᒃᑯᑦ 5−ᒨᖅᑎᓪᓗᒍ ᔪᓂ 19, 2020, ᐃᖃᓗᐃᑦ ᖃᑦᑎᕆᔨᒃᑯᖏᑦ ᐅᐸᖅᑲᐅᔪᑦ ᓇᔪᒐᕐᒧᑦ ᐊᒥᓱᓂᑦ ᓇᔪᒐᓕᒻᒦᑦᑐᒧᑦ ᓈᓴᐅᑎᓕᓐᓂ 300−ᓂᑦ. ᐃᖃᓗᐃᑦ ᖃᑦᑎᕆᔨᒃᑯᖏᑦ ᐅᐸᑦᑕᐅᑎᒋᖅᑲᐅᒐᒥᒃ ᓯᕗᓪᓕᐅᖅᑲᐅᔪᑦ ᐃᑯᐊᓚᔪᒥᑦ ᖃᒥᑦᓯᑦᑕᐅᑎᒋᔪᓐᓇᖅᑲᐅᔪᑦ ᐃᑯᐊᓚᔪᒥᑦ. ᐊᑕᐅᓯᖅ ᐃᓄᒃ ᓄᓇᒃᑰᔫᒃᑯᑦ ᑐᐊᕕᕐᓇᖅᑐᓄᑦ ᕿᑭᖅᑕᓂ ᐋᓐᓂᐊᕕᓕᐊᕈᔾᔭᐅᓂᖅᑲᐅᔪᖅ.
13−ᖑᖅᑲᐅᔪᑦ ᖃᑦᑎᕆᔩᑦ ᐅᐸᑦᑐᑦ ᐃᑯᐊᓚᔪᒧᑦ, ᓄᓇᒃᑰᕈᑎᐸᐅᔭᒥᑦ ᐊᑐᖅᑐᑎᒃ, ᓄᓇᒃᑰᕈᑎᐸᐅᔭᒥᑦ ᒪᔪᕋᐅᑎᓕᒻᒥᑦ, ᒪᕐᕉᒃ ᐋᓐᓂᐊᔪᓕᕆᔪᓐᓇᖅᑐᓂᑦ ᐅᓯᔫᒃ ᐊᒻᒪ ᒪᕐᕉᒃ ᐃᑲᔪᕐᓱᐃᔩᑦ ᓄᓇᒃᑰᔫᒃ ᐊᒻᒪ ᐊᑕᐅᓯᖅ ᐃᒥᖅᑕᐅᑎ ᓄᓇᒃᑰᔫᖅ. ᖃᑦᑎᕆᔨᒥᑦ ᐋᓐᓂᖅᑐᖃᖅᑲᐅᖏᑦᑐᖅ.
ᐃᑭᖅᑲᐅᔪᖅ ᖃᐅᔨᓴᖅᑕᐅᕙᓪᓕᐊᔪᖅ ᐃᑲᔪᖅᑕᐅᓗᑎᒃ ᐊᓪᓚᕝᕕᖏᓐᓂᑦ ᖃᑦᑎᕆᔨᒻᒪᕆᐅᑉ ᐱᓕᕆᖃᑎᖃᖅᑐᓂ ᐸᓖᓯᒃᑯᓐᓂᑦ ᐃᑭᖅᑲᐅᔪᒥᑦ ᖃᐅᔨᓴᖅᑐᓂᑦ.
ᐊᓯᖏᑦ ᓇᔪᒐᐃᑦ ᐳᔪᕐᒧᑦ ᐱᐅᖏᓕᒐᓚᖅᑲᐅᔪᑦ, ᐊᒻᒪ ᓈᒻᒪᓯᑉᐸᑦ ᐅᑎᖅᑎᑕᐅᓛᖅᑐᑦ ᐃᓪᓗᓕᕆᔨᒃᑯᓐᓄᑦ ᐸᓖᓯᒃᑯᓐᓂᑦ ᐱᔭᕇᖅᑕᐅᒍᓂ ᖃᐅᔨᓴᕐᓂᐅᔪᖅ.
ᐳᔪᕐᒧᑦ ᖁᖁᐊᓲᑦ ᖁᖁᐊᕈᑏᑦ ᓇᔪᒐᕐᓂ ᐱᔪᓐᓇᓂᕐᒪᑕ ᖃᐅᔨᒍᓐᓇᕐᓯᕈᓘᔭᖅᑐᒥᓃᑦ ᓇᔪᒐᓖᑦ ᐃᑯᐊᓚᔪᒥᑦ ᑕᕝᕙᓴᐃᓐᓇᖅ ᐊᒻᒪ ᐊᓂᒍᓐᓇᕐᓯᓪᓚᑐᖅᑐᒥᓂᐅᓗᑎᒃ ᖃᓄᐃᒐᑎᒃ. ᐃᖅᑲᐃᑎᑦᑎᔾᔪᑎᐅᔪᖅ ᑭᒃᑯᑐᐃᓐᓇᑦᑎᐊᓂᑦ ᖃᐅᔨᓴᖃᑦᑕᖁᔭᐅᓗᑎᒃ ᐹᑕᓖᖏᓐᓂᑦ ᖁᖁᐊᕈᑏᑦ ᐊᒻᒪ ᐊᐅᓚᑦᑎᔾᔪᑎᖏᓐᓂᑦ ᖁᖁᐊᕈᑏᑦ.
ᑐᑭᓯᒋᐊᕈᒪᔪᑦ ᐆᕕᖓ ᖃᐅᔨᒋᐊᖁᔪᑦ:
ᓖᓴ ᒥᓗᓵᕝᔨᕕᒃ
ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᕐᓂᒥᑦ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-3216
