ᐃᖃᓗᐃᑦ ᐊᖅᑯᑎᓕᐅᖅᐳᑦ ᓴᓇᕙᓪᓕᐊᒍᑎᑦᓴᓂᑦ ᓯᕗᓂᑦᑎᓐᓂ ᑲᓇᑕᐅᓛᖅᑐᒧᑦ

ᐃᖃᓗᐃᑦ ᐊᖅᑯᑎᓕᐅᖅᐳᑦ ᓴᓇᕙᓪᓕᐊᒍᑎᑦᓴᓂᑦ ᓯᕗᓂᑦᑎᓐᓂ ᑲᓇᑕᐅᓛᖅᑐᒧᑦ
ᔪᓂ 8, 2018 (ᐃᖃᓗᐃᑦ, ᓄᓇᕗᑦ) - ᐊᒥᓲᓂᖅᐹᖑᓚᐅᖅᑐᓂ ᐊᒻᒪ ᑐᖕᖓᓱᑦᑎᑦᓯᔨᐅᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂ ᒐᕙᒪᓕᕆᔨᓄᑦ ᓯᕗᓕᖅᑎᓄᑦ, ᑲᑐᔾᔨᖃᑎᒌᖓᑦ ᑲᓇᑕᒥ ᓄᓇᓖᑦ (ᐃᐊᕝᓰᐃᐊᒻ) ᐊᕐᕌᒍᑕᒫᕐᓯᐅᑎᒥᓂᒃ ᑲᑎᒪᕕᔾᔪᐊᑎᑦᓯᑎᓪᓗᒋᑦ ᒪᑐᓯᓚᐅᖅᑐᑦ ᓄᑖᒥᒃ ᐊᑐᖅᑎᑦᓯᓚᐅᖅᑐᑦ ᓄᓇᓕᓐᓂᑦ ᐱᖃᑕᐅᑎᑦᓯᓪᓗᑎᒃ ᑲᓇᑕᒥ. ᑲᑎᒪᕕᔾᔪᐊᕐᓂᐅᔪᖅ ᒪᑐᔭᐅᓚᐅᕐᒥᔪᖅ ᓄᑖᓂᒃ ᓂᕈᐊᖅᑐᑎᒃ ᑲᑎᒪᔨᑦᓴᓂᒃ, ᐃᖃᓗᐃᑦ ᒪᐃᔭᖓᑦ ᓂᕈᐊᖅᑕᐅᕕᒋᓚᐅᖅᑕᖏᓐᓄᑦ.
“2,000 ᐅᖓᑖᓃᑦᑐᑦ ᓄᓇᓕᓐᓂ ᓯᕗᓕᖅᑎᐅᔪᑦ ᐊᐅᓪᓚᓚᐅᖅᑐᑦ ᕼᐋᓕᕚᒃᔅᒥᑦ ᑐᑭᓯᓯᒪᓂᕐᓴᐅᓕᖅᑐᑎᒃ ᑲᓇᑕᒥᐅᑕᐃᑦ ᓄᓇᓕᖏ-ᑲᓇᑕᐅᑉ ᒐᕙᒪᒃᑯᖏᒃ ᑲᑐᔾᔨᖃᑎᒌᓕᖅᐸᓪᓕᐊᑐᐃᓐᓇᕐᓂᖏᓐᓂᒃ ᐊᒻᒪ ᐊᑦᓱᕉᑎᐅᓂᐊᖅᑐᒥᒃ ᑕᑯᓐᓇᖕᖑᐊᕋᓱᑦᑐᒋᑦ ᐱᓕᕆᔾᔪᑎᑦᓴᐅᒋᐊᖃᕐᓂᐊᖅᑐᑦ ᓴᓇᕙᓪᓕᐊᒍᑎᐅᒋᐊᖃᕐᓂᐊᖅᑐᑦ ᓯᕗᓂᑦᑎᓐᓂ ᑲᓇᑕᐅᓛᖅᑯᒧᑦ,” ᐅᖃᖅᑐᖅ ᒪᐃᔭ ᕆᐊᑦᕘᕐᓐ. “ᑐᓵᓗᒋᑦ ᐊᑐᓂ ᑲᓇᑕᐅᑉ ᒐᕙᒪᒃᑯᖏᓐᓃᖔᕐᓯᒪᔪᓂᒃ ᓯᕗᓕᖅᑎᓂᒃ ᐅᖃᐅᓯᕆᓚᐅᖅᑕᖏᑦ, ᑲᑎᒪᕕᔾᔪᐊᖃᑕᐅᔪᑦ ᑕᑯᓐᓇᓚᐅᖅᑐᑦ ᖃᓄᖅ ᐊᑐᖅᑐᒻᒪᕆᐅᓂᖏᓐᓂᑦ ᓄᓇᓕᐅᔪᑦ ᑲᓇᑕᒥ ᐱᓕᕆᐊᖑᒪᔪᑦ ᐱᓪᓗᒋᑦ ᐊᒻᒪ ᖃᓄᖅ ᐊᑑᑎᖃᖅᑐᒻᒪᕆᐅᓂᐊᕐᒪᖔᑕ ᓄᓇᓕᓐᓂ ᒐᕙᒪᓕᕆᔨᐅᔪᑦ ᓴᓇᕙᓪᓕᐊᑎᓪᓗᑕ ᑲᓇᑕᐅᑉ ᓯᕗᓂᑦᓴᖓᓄᑦ.”
ᐃᓚᒋᔭᐅᓗᓂ ᐃᐊᕝᓰᐃᐊᒻᑯᑦ ᑲᑎᒪᔨᖏᓐᓄᑦ, ᒪᐃᔭ ᕆᐊᑦᕘᕐᓐ ᐃᑲᔪᕋᔭᖅᑐᖅ ᑐᑭᓕᐅᕈᑎᒍᑦ ᑲᑐᔾᔨᖃᑎᒌᓄᑦ ᐊᓯᔾᔩᕙᓪᓕᐊᑦᓯᐊᖅᑐᐊᓗᓐᓄᑦ ᖃᓄᖅ ᐊᑑᑎᖃᖅᐸᓐᓂᖏᓐᓂᑦ ᓄᓇᓕᓐᓂ ᒐᕙᒪᓕᕆᔨᐅᔪᑦ ᑲᓇᑕᐅᑉ ᐃᓗᐊᓂ. ᐃᓚᖏᑦ ᐊᑦᓱᕉᑎᐅᕙᑦᑐᑦ ᓵᖕᖓᔭᐅᕙᑦᑐᑦ ᐃᖃᓗᓐᓂ ᑲᓇᑕᓕᒫᒥᑦᑕᐅᖅ ᐊᑦᓱᕉᑎᐅᕙᑦᑐᑦ - ᐃᖅᑲᓇᐃᔭᐅᑎᐅᒐᓗᐊᖅᐸᑕ, ᐱᕈᖅᐸᓪᓕᐊᓂᕐᒨᖓᒐᓗᐊᖅᐸᑕ ᐅᕝᕙᓘᓐᓃᑦ ᓯᓚᐅᑉ ᐊᓯᔾᔨᐸᓐᓂᐊᓂᖓᓅᖓᒐᓗᐊᖅᐸᑕ. ᓄᑖᑦ ᑲᑎᒪᔨᐅᓂᐊᓕᖅᑐᑦ, ᐃᓚᒋᔭᐅᓗᑎᒃ ᓄᓇᓕᓐᓂ ᓂᕈᐊᖅᑕᐅᓯᒪᔪᑦ ᓯᕗᓕᖅᑏᑦ ᐊᒻᒪ ᐃᓚᒋᔭᐅᔪᑦ ᓇᑭᑐᐃᓐᓈᕐᓯᒪᔪᑦ ᓄᓇᓕᓐᓂᒃ ᐊᒻᒪ ᐊᔾᔨᒌᖏᑦᑐᓂᒃ ᐊᖏᓂᖏᒍᑦ ᓄᓇᓕᓐᓂᒃ ᑲᓇᑕᐅᑉ ᐃᓗᐊᓂᑦ, ᓄᓇᓕᓐᓂ ᐊᑐᕐᓯᒪᔭᓂ ᐃᐊᕝᓰᐃᐊᒻᑯᑦ ᓵᖏᓐᓅᕆᕙᓐᓂᐊᖅᑐᑦ; ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᐅᓚᔾᔭᐃᒋᐊᖁᔨᔾᔪᑎᑦᓴᓂᒃ ᐃᓅᓯᕆᔭᐅᕙᑦᑐᓂᒃ ᐊᖏᕐᕋᒥ ᐱᐅᓯᑎᒋᐊᕈᑎᑦᓴᓂᒃ ᐊᒻᒪ ᓇᒥᑐᐃᓐᓇᖅ ᑲᓇᑕᒥ.
ᑭᖑᓪᓕᖅᐹᖓᓂ ᐅᓪᓗᕐᒥ ᑲᑎᒪᕕᔾᔪᐊᕐᓂᕐᒥ, ᕕᑭ-ᒪᐃ ᕼᐋᒻ ᓂᕈᐊᖅᑕᐅᓚᐅᖅᑐᖅ ᐃᐊᕝᓰᐃᐊᒻᑯᓐᓄᑦ ᐊᖏᔪᖅᑳᖑᓂᐊᓕᖅᑐᓂ, ᐊᓂᕙᓪᓕᐊᔪᒥᒃ ᑎᒍᓪᓗᒍ ᐊᖏᔪᖅᑳᖑᓚᐅᖅᑐᒥᒃ ᔭᓂ ᒎᐸᓯᒥᑦ. ᐊᕐᕌᒍᓄᑦ 12-ᓄᑦ ᓄᓇᓕᓐᓂ ᒐᕙᒪᓕᕆᔨᐅᓯᒪᓪᓗᓂ, ᕼᐋᒻ ᒪᐃᔭᒋᔭᖓᑦ ᒪᒑᒡ, ᑭᐅᐸᒥᐅᑕᖅ ᐊᒻᒪ ᐃᐊᕝᓰᐃᐊᒻᑯᓐᓄᑦ ᑲᑎᒪᔨᐅᖃᑕᐅᓯᒪᓪᓗᓂ.
“ᓄᓇᓕᓐᓂ ᓯᕗᓕᖅᑏᑦ ᐊᐅᓪᓚᓚᐅᖅᑐᑦ ᕼᐊᓕᕚᒃᔅᒥᒃ ᐆᒻᒪᑦᓯᐊᕆᓕᖅᑐᑎᒃ ᐊᒻᒪ ᐱᓕᕆᔪᒪᑦᓯᐊᓕᖅᑐᑎᒃ ᓴᖅᑮᓇᓱᓐᓂᒃᑯᑦ ᓴᖏᓂᖃᕐᓂᕐᓴᐅᓕᕐᓗᑎᒃ ᓄᓇᓕᓐᓂ ᐊᒻᒪ ᑕᑯᓐᓇᖕᖑᐊᕈᓐᓇᓕᕐᓗᑎᒃ ᓄᑖᓂᒃ ᖃᓄᐃᑦᑐᓂᒃ ᐱᓕᕆᔾᔪᑎᖃᕆᐊᖃᕐᓂᐊᕐᒪᖔᑕ ᑕᒪᓐᓇ ᐱᓪᓗᒍ. ᐱᓕᕆᔪᒪᑦᓯᐊᕐᓂᕗᑦ ᐅᕙᒍᑎᒍᑦ ᓇᓗᓇᐃᔭᐃᑎᑦᓯᐊᕙᐅᕗᖅ ᔭᓂᐅᑉ ᕿᒪᑦᑕᖏᓐᓂᒃ ᐊᖏᔪᖅᑳᖑᓪᓗᓂ ᓴᖅᑭᓚᐅᖅᑐᓂᒃ”, ᐅᖃᖅᑐᖅ ᓄᑖᖅ ᓂᕈᐊᖅᑕᐅᔪᖅ ᐃᐊᕝᓰᐃᐊᒻᑯᓐᓄᑦ ᐊᖏᔪᖅᑳᖑᓂᐊᓕᖅᑐᖅ ᕼᐋᒻ.
ᑲᑎᒪᕕᔾᔪᐊᕆᐊᕐᓯᒪᓚᐅᖅᑐᑦ ᐃᐊᕝᓰᐃᐊᒻᑯᑦ 2018-ᒥ ᐊᕐᕌᒍᑕᒫᕐᓯᐅᑎᖓᓐᓄᑦ ᐱᖃᑕᐅᑎᑦᓯᓚᐅᖅᑐᖅ ᑲᓇᑕᐅᑉ ᒐᕙᒪᒃᑯᖏᑕ ᓯᕗᓕᖅᑎᒻᒪᕆᖓᓂᑦ ᐊᒻᒪ ᐃᓘᓐᓇᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᑭᕋᖏᓐᓂᒃ ᐅᓪᓗᓄᑦ ᑎᓴᒪᓄᑦ ᑲᑎᒪᕕᔾᔪᐊᑎᓪᓗᒋᑦ. ᐅᖓᑖᓃᑦᑐᑦ 2,000 ᒪᐃᔭᐃᑦ, ᑲᑎᒪᔩᑦ ᐊᒻᒪ ᐊᓯᖏᑦ ᓄᓇᓕᓐᓂ ᒐᕙᒪᓕᕆᔨᓄᑦ ᑭᒡᒐᖅᑐᐃᔨᐅᔪᑦ ᐱᖃᑕᐅᕙᓚᐅᖅᑐᑦ ᑲᑎᒪᑎᓪᓗᒋᑦ ᖃᓄᑐᐃᓐᓇᑦᓯᐊᖅ ᐊᑐᐊᒐᓕᕆᔪᓂᒃ, ᓴᓇᕕᓕᕆᓂᕐᒥᑦ ᑲᑎᒪᐅᑎᖃᖅᑎᓪᓗᒋᑦ ᐊᒻᒪ ᓇᒻᒥᓂᖃᖅᑎᐅᔪᑦ ᑕᑯᑦᓴᐅᑎᑦᓯᑎᓪᓗᒋᑦ.
ᑲᑐᔾᔨᖃᑎᒌᖏᑦ ᑲᓇᑕᒥ ᓄᓇᓕᓐᓄᑦ ᑲᓇᑕᒥ ᓂᐱᒋᔭᐅᕗᑦ ᓄᓇᓕᓐᓂ ᒐᕙᒪᓕᕆᔨᓄᑦ, 2,000-ᐸᓗᓐᓂᒃ ᐃᓚᒋᔭᐅᔪᖃᖅᑐᑎᒃ ᑭᒡᒐᖅᑐᐃᕙᑦᑐᓂᒃ 90 ᐳᓴᖏᓐᓂᒃ ᑲᓇᑕᒥᐅᑕᐃᑦ. ᐃᐊᕝᓰᐃᐊᒻᑯᑦ ᑭᖑᓪᓕᕐᒥ ᐊᕐᕌᒍᑕᒫᕐᓯᐅᑎᖃᓛᓕᕐᒥᔪᑦ ᔪᓂ 2019 ᓄᓇᓕᐸᐅᔭᐃᑦ ᑭᐅᐸᒻᒥ.
-30-
ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᕈᓐᓇᖅᑐᑦ:
ᐋᓐᑐᕆᐊ ᓯᐱᑦᔪᕐ
ᑐᓴᐅᒪᑎᑦᓯᓕᕆᓂᕐᒥᑦ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
ᐃᕐᖐᓇᖅᑕᐅᑎᖓ: A.Spitzer@city.iqaluit.nu.ca