ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᑐᕌᖅᑕᐅᒐᓱᐊᖅᑐᖅ ᒪᓕᑦᑕᐅᑎᑦᑎᓂᕐᒥᒃ ᐱᓕᕆᒋᐊᕐᓂᕐᒥᒃ ᒥᑭᓂᖅᓴᐅᓕᖅᑎᑦᑎᒍᑎᒋᔭᐅᒐᓱᐊᕐᒪᑦ ᐃᒥᐊᓗᒻᒨᖓᔪᓂᒃ ᐱᓂᓪᓗᑦᑐᖃᖃᑦᑕᕐᓂᖏᓐᓂᒃ
ᔮᓐᓄᐊᕆ 27, 2026 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᖓ ᐃᖃᓗᐃᑦ ᓄᓇᓕᓕᕆᔨᒃᑯᓐᓂ ᒪᓕᑦᑕᐅᑎᑦᑎᓂᕐᒧᑦ ᐱᓕᕆᕕᖓ, ᐱᓕᕆᖃᑎᖃᖅᑐᑎᒃ ᐸᓖᓯᒃᑯᓐᓂᒃ (RCMP), ᐅᐱᒍᓱᒻᒪᑕ ᑐᓴᖅᑕᐅᑎᑦᑎᒋᐊᔅᓴᖅ ᐱᒋᐊᖅᑎᑕᐅᓂᖓᓂᒃ ᓄᑖᑉ ᑲᔪᓯᒍᓐᓇᕐᒪᖔᑦ ᐱᓕᕆᐊᔅᓴᐅᑉ ᐱᐅᓂᖅᓴᐅᓕᖅᑎᑕᐅᖁᓪᓗᒋᑦ ᐃᓄᓕᒫᓂ ᐊᑦᑕᕐᓇᑕᐃᓕᒪᓂᖅ ᐊᒻᒪᓗ ᓄᓇᓕᐅᑉ ᖃᓄᐃᙱᑦᑎᐊᕐᓂᖓᓂᒃ ᓄᓇᓕᐸᐅᔭᑦᑎᓐᓂ.
ᑖᓐᓇ ᐱᓕᕆᖃᑎᒌᓐᓂᕐᒥᒃ ᐱᒋᐊᖅᑎᑦᑎᓂᖅ ᐱᓕᕆᐊᖃᓪᓗᐊᑕᓂᐊᕐᒪᑦ ᑲᑐᔾᔨᓂᕐᒥᒃ ᐃᒥᐊᓗᓕᕆᓂᕐᒥᒃ ᐊᒻᒪᓗ ᐃᖏᕐᕋᔪᓕᕆᓂᕐᒥᒃ ᒪᓕᑦᑕᐅᑎᑦᑎᓂᕐᒥᒃ ᐱᓕᕆᒐᓱᐊᕐᓂᕆᔭᐅᔪᓂᒃ ᐃᓗᓐᓇᓕᒫᖓᓂ ᐃᖃᓗᐃᑦ. ᑖᓐᓇ ᑐᕌᖅᑕᐅᒐᓱᐊᖅᑐᖅ ᐊᑐᕈᑎᒋᔭᐅᒐᓱᐊᕐᒪᑦ ᐊᒻᒪᓗ ᒥᑭᓂᖅᓴᐅᓕᖅᑎᑦᑎᒍᑎᒋᔭᐅᒐᓱᐊᕐᓗᓂ ᐃᓅᖃᑎᒋᓂ ᐋᖓᔮᕐᓂᕐᒥᒃ, ᐃᓅᖃᑎᒋᓂ ᐃᒥᖃᑦᑕᕐᓂᕐᒥᒃ ᐃᒥᐊᓗᒻᒥᒃ, ᐋᖓᔮᕐᓗᑎᒃ ᐊᖁᖃᑦᑕᖅᑐᓂᒃ, ᐊᒻᒪᓗ ᐊᓯᖏᓐᓂᒃ ᐃᖏᕐᕋᔪᓕᕆᓂᕐᒨᖓᔪᓂᒃ ᐱᕋᔭᓂᐅᔪᓂᒃ ᖁᔅᓴᓇᖅᓯᑎᑦᑎᔪᓂᒃ ᓄᓇᓕᒻᒥᐅᑕᕐᓂᒃ ᐊᒻᒪᓗ ᓂᐅᕐᕈᓯᒪᔪᓂᒃ ᐊᔾᔨᒌᑐᐃᓐᓇᖅᑐᒥᒃ.
ᐃᓚᒋᔭᐅᓗᓂ ᑖᔅᓱᒧᖓ ᐱᓕᕆᐊᔅᓴᒧᑦ, ᓄᓇᓕᒻᒥᐅᑕᐅᔪᑦ ᖃᐅᔨᖃᑦᑕᓂᐊᖅᑐᔅᓴᐅᓕᖅᑐᑦ ᐊᒥᓲᓂᖅᓴᐅᓕᕐᓂᖏᓐᓂᒃ ᐱᓱᓪᓗᑎᒃ ᖃᐅᔨᓴᖃᑦᑕᖅᑐᓂᒃ ᐊᒻᒪᓗ ᐸᓖᓯᒃᑯᑦ ᐱᓕᕆᓪᓚᕆᓪᓗᑎᒃ ᐱᓕᕆᐊᖃᖃᑦᑕᕐᓂᐊᓕᕐᒪᑕ ᐃᒻᒥᓂᖅᓱᑦᑐᓂᒃ ᐃᓗᐊᓂ ᓄᓇᓕᐸᐅᔭᐅᑉ. ᑕᒪᒃᑯᐊ ᑕᑯᔅᓴᐅᓗᑎᒃ ᐱᓕᕆᒐᓱᐊᕐᓂᕆᔭᐅᔪᑦ ᐱᓕᕆᒍᑎᒋᔭᐅᒐᓱᐊᕐᒪᑕ ᒪᓕᑦᑕᐅᑎᑦᑎᑐᐃᓐᓇᕋᓱᐊᕐᓇᑎᒃ ᐱᖁᔭᕐᒥᒃ ᑭᓯᐊᓂᓕᑦᑕᐅᖅ ᐊᑐᕈᑎᒋᔭᐅᒐᓱᐊᕐᒪᑕ ᐱᐅᓈᑦᑐᒥᒃ ᐃᓚᒋᔭᐅᓕᕐᓂᐅᔪᓂᒃ, ᐅᑉᐱᕈᓱᑦᑎᐊᓕᕈᓐᓇᖁᓪᓗᑕ, ᐊᒻᒪᓗ ᐊᑐᕐᓂᖅᓴᐅᓕᕐᓗᑕ ᑲᒪᑦᑎᐊᕐᓗᑕ ᐃᓕᖅᑯᓯᖃᕐᓂᕐᒥᒃ. ᐸᓖᓯᒃᑯᑦ ᐱᓱᖃᑦᑕᕐᓂᐊᓕᕐᒪᑕ, ᒪᓕᑦᑕᐅᑎᑦᑎᒐᓱᐊᓪᓚᕆᓪᓗᑎᒃ ᐃᒥᐊᓗᓕᕆᓂᕐᒧᑦ ᐱᖁᔭᕐᓂᒃ ᐊᒻᒪᓗ ᐃᖏᕐᕋᔾᔪᑎᓕᕆᓂᕐᒧᑦ ᒪᓕᑦᑕᐅᖁᔭᐅᔪᓂᒃ, ᐊᒻᒪᓗ ᐱᓕᕆᐊᖃᖅᐸᓪᓗᑎᒃ ᖃᓄᑐᐃᓐᓇᖅ ᐃᓱᒫᓗᑎᒋᔭᐅᔪᓂᒃ ᐱᓕᕆᐊᕆᔭᐅᒋᐊᖃᕐᓂᖏᑎᒍᑦ.
ᑖᓐᓇ ᐱᓕᕆᐊᔅᓴᖅ ᐅᖓᑖᓄᖓᒻᒪᑦ ᒪᓕᑦᑕᐅᑎᑦᑎᑐᐃᓐᓇᕐᓂᐅᑉ – ᐱᓕᕆᐊᖃᕐᒪᑦ ᓴᙱᓂᖅᓴᐅᓕᖅᑎᑕᐅᖁᓪᓗᒍ, ᐊᑦᑕᕐᓇᖅᑐᒦᑦᑐᖃᖁᓇᒍ ᓄᓇᓕᒻᒥᒃ ᑭᒃᑯᓕᒫᓂᒃ ᐃᓱᒫᓗᓐᓇᖅᑐᒦᑦᑐᖃᙱᓪᓗᓂ ᐊᒻᒪᓗ ᐃᑉᐱᒋᔭᐅᑦᑎᐊᕐᓗᑎᒃ. ᐃᖅᑲᓇᐃᔭᖃᑎᒌᓐᓂᒃᑯᑦ, ᒥᑭᓂᖅᓴᐅᓕᖅᑎᑦᑎᒍᓐᓇᕋᑦᑕ ᐱᕐᕈᓗᐊᕿᓂᕐᒥᒃ, ᐱᓂᓪᓗᑦᑐᖃᙱᑎᑦᑎᓗᑕ, ᐊᒻᒪᓗ ᐃᒪᓐᓇᐅᓪᓚᕆᖁᓪᓗᒍ ᐃᖃᓗᐃᑦ ᑐᙵᓇᐃᓇᖁᓪᓗᒍ ᓄᓇᖓ ᓄᓇᓕᒻᒥᐅᑕᕐᓄᑦ, ᓂᐅᕐᕈᔪᓄᑦ, ᐃᓚᒌᓐᓄᑦ, ᐊᒻᒪᓗ ᒪᒃᑯᑦᑐᓄᑦ.
ᐃᓕᔅᓯᓐᓄᑦ ᐃᑲᔪᖅᑕᐅᒍᒪᕗᒍᑦ ᐊᒻᒪᓗ ᐃᑲᔪᖅᓱᑦᑕᐅᓗᑎᒃ ᐃᖅᑲᓇᐃᔭᖅᑎᓪᓗᑕ ᐊᑦᑕᕐᓇᖅᑐᖃᙱᓐᓂᖅᓴᐅᓕᖅᑎᑦᑎᒐᓱᐊᖅᑎᓪᓗᑕ, ᐱᐅᓂᖅᓴᐅᓕᖅᑎᓪᓗᒍ ᐊᕙᑎᕗᑦ ᑭᒃᑯᑐᐃᓐᓇᓕᒫᓄᑦ ᐃᖃᓗᓐᓂ. ᑕᐃᒪᓕ ᑕᑯᒍᔅᓯ ᐸᓖᓯᓂᒃ ᓴᓂᓪᓕᖃᕈᔅᓯᓐᓃᑦᑐᓂᒃ, ᕼᐊᓘᑦᑕᐃᓕᒪᓂᐊᙱᓚᓯᐅᒃ ᐅᕝᕙᓘᓐᓃᑦ ᐊᐱᕆᓗᓯᒋᑦ ᐊᐱᖅᑯᑎᖃᕈᒪᑐᐊᕈᔅᓯ – ᑕᒫᓂᒻᒪᑕ ᐱᔨᑦᑎᕆᐊᖃᕐᓗᑎᒃ ᓴᐳᒻᒥᔅᓯᓪᓗᑎᓪᓗ.
ᓇᑯᒻᒦᒃ ᐃᑲᔪᕋᔅᓯ ᐅᕙᑦᑎᓐᓂᒃ ᐃᖃᓗᐃᑦ ᐊᑦᑕᕐᓇᖁᓇᒍ ᑭᒃᑯᑐᐃᓐᓇᓕᒫᓄᑦ.
ᑐᓴᕆᐊᒃᑲᓐᓂᕈᒪᒍᔅᓯ, ᐊᑏ ᐅᖃᕝᕕᒋᓚᐅᓯᐅᒃ ᓄᓇᓕᐸᐅᔭᖓ ᐃᖃᓗᐃᑦ ᓄᓇᓕᓕᕆᓂᕐᒥ ᒪᓕᑦᑕᐅᑎᑦᑎᓂᕐᒧᑦ ᐱᓕᕆᕕᒃ ᐅᕝᕙᓘᓐᓃᑦ ᐸᓖᓯᒃᑯᑦ.
ᐊᑦᑕᕐᓇᖅᑐᒦᑦᑕᐃᓕᒋᔅᓯ, ᑲᒪᑦᑎᐊᖏᓐᓇᕐᓗᓯᓗ, ᐊᒻᒪᓗ ᓴᙱᓂᖅᓴᒥᒃ ᓄᓇᓕᓕᐅᖃᑎᒌᓚᐅᑦᑕ ᑲᑐᑎᓗᑎᒍ.
##
ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:
ᓯᑎᕙᓐ ᐋᓚᓐ
ᐊᖏᔪᖅᑳᖅ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5674
