ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᐃᓄᖕᓄᑦ ᑐᓴᕋᑦᓴᖅ
ᓯᓚ ᐱᓪᓗᒍ ᐊᓯᔾᔨᐸᓪᓕᐊᓂᖓ - ᑎᑎᕋᖅᑕᐅᒋᐊᖅᑐᑦ ᐱᓕᕆᔾᔪᑎᒍᑦ ᓄᓇᓕᐸᐅᔭᒃᑯᑦ ᐱᔨᑦᓯᕋᐅᑎᖏᑦ ᐱᓪᓗᒋᑦ ᓯᓚᑲᒻᒪᐅᑎᓪᓗᒍ ᐅᓪᓗᖏᓐᓂ
ᓅᕖᐱᕆ 12, 2025 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᑐᓴᐅᒪᖁᔨᓕᕆᕗᑦ ᓄᓇᓕᕐᒥᐅᑕᓂᒃ ᐱᒻᒪᕆᐅᔪᓂᒃ ᑎᑎᕋᖅᑕᐅᒋᐊᑲᓂᖅᑐᓂᒃ ᐱᔾᔪᑎᒋᓪᓗᒋᑦ ᖃᓄᖅ ᐊᐅᓚᑦᓯᕙᓐᓂᑎᓐᓄᑦ ᐊᒻᒪ ᑐᓴᐅᒪᑎᑦᓯᕙᓐᓂᑎᓐᓄᑦ ᓄᓇᓕᐸᐅᔭᒃᑯᑦ ᐱᔨᑦᓯᕋᐅᑎᖏᓐᓂᒃ ᐊᑦᓱᑲᓪᓚᐅᔪᖅ ᓯᓚᑲᒻᒪᐅᑎᓪᓗᒍ.
ᐊᕐᕌᒍᒐᓴᐅᓕᖅᑐᓂᒃ, ᓯᓚᐅᑉ ᖃᓄᐃᓐᓂᖓ ᐱᐅᖏᓕᒐᐃᒻᒪᑦ ᐊᒻᒪ ᓄᓇᓕᐸᐅᔭᒃᑯᑦ ᓴᓇᔪᓕᕆᔨᒃᑯᖏᑕ ᓄᓇᒃᑰᔫᖁᑎᖏᑦ ᐲᖅᑕᐅᒐᐃᒻᒪᑕ ᐊᑐᕆᐊᕐᓂᒃ, ᓄᓇᓕᐸᐅᔭᒃᑯᑦ ᓴᖅᑮᕙᓚᐅᖅᑐᑦ ᐃᒪᐃᑦᑐᒥᒃ “ᓄᓇᓕᐸᐅᔭᓕᒫᑉ ᐃᓗᐊ ᒪᑐᔪᖅ.” ᑕᒪᐅᓇ ᑐᑭᖃᖅᐸᓚᐅᖅᑐᖅ ᓄᓇᓕᐸᐅᔭᐅᑉ ᐃᖃᓗᐃᑦ ᐊᓪᓚᕝᕕᖏᑦ, ᐱᔨᑦᓯᕋᐅᑎᖏᑦ, ᐊᒻᒪ ᐊᑐᕆᐊᖏᑦ ᒪᑐᔭᐅᕙᓚᐅᖅᑐᑦ, ᐊᒻᒪ ᓄᓇᓕᐸᐅᔭᐅᑉ ᐃᓗᐊᓃᑦᑐᑦ ᒪᑐᔪᐃᓐᓇᐅᕙᑦᑐᑎᒃ ᐊᑦᑕᓇᕈᓐᓃᕋᓱᓐᓂᖓᓂ ᓯᓚᕗᑦ ᐱᓕᕆᕝᕕᒋᓂᐊᕐᓗᒍ.
ᓄᓇᓕᐸᐅᔭᒃᑯᑦ ᓱᓕ ᐊᑐᖅᐸᓂᐊᖅᑐᑦ ᐱᓕᕆᔾᔪᑎᓂᒃ ᐱᔨᑦᓯᕋᐅᑎᐅᔪᑦ ᐃᓚᖏᑦ ᒪᑐᔭᐅᕙᓪᓕᐊᕙᓪᓗᑎᒃ ᓯᓚᑲᒻᒪᐅᓗᐊᖅᑎᓪᓗᒍ. ᓄᓇᓕᐸᐅᔭᓕᒫᑉ ᐃᓗᐊ ᒪᑐᔪᖅ ᓱᓕ ᐊᑐᐃᓐᓇᐅᖏᓐᓇᓂᐊᖅᑐᖅ ᐱᓕᕆᔾᔪᑎᒍᑦ, ᑭᓯᐊᓂ ᐊᑐᖅᑕᐅᕙᓐᓂᐊᓕᖅᑐᖅ ᐊᐅᓚᑦᓯᔾᔪᑎᒍᑦ ᐱᒻᒪᕆᐅᔪᓂᒃ ᒪᑐᓯᔭᕆᐊᖃᓕᕐᓂᕈᑎᒃ. ᐊᑐᖅᑕᐅᔪᓐᓇᓂᐊᖅᑐᖅ ᖃᓐᓂᑐᒻᒪᕆᐅᓕᕐᓂᖅᐸᑦ ᐅᕝᕙᓘᓐᓃᑦ ᐊᑐᕆᐊᓕᕆᓗᐊᕆᐊᖏᓐᓄᑦ ᐊᒻᒪ ᐱᔨᑦᓯᕋᕆᐊᖏᓐᓄᑦ ᐅᓗᕆᐊᓇᓗᐊᓕᕐᓂᖅᐸᑦ.
ᐅᓇ ᐊᓯᔾᔨᐅᑎᐅᔪᖅ ᐃᑲᔪᕐᓱᐃᔾᔪᑎᐅᔪᖅ ᖃᓄᐃᓕᖓᒍᓐᓇᓂᕐᒥᒃ, ᐊᑦᑕᓇᔾᔭᐃᕐᓯᒪᓂᕐᒥᒃ, ᐊᒻᒪ ᑐᓴᐅᒪᑦᓯᐊᕐᓗᑎᒃ ᐊᑐᕈᓐᓇᕐᓂᖏᓐᓄᑦ ᐊᑕᐅᑦᓯᒃᑯᑦ ᐊᑐᕆᐊᕗᑦ ᐊᒻᒪ ᑐᓴᐅᒪᑎᑦᓯᔾᔪᑎᕗᑦ ᓇᓗᓇᐃᕐᓯᒪᑦᓯᐊᐸᓪᓗᒋᑦ ᐊᒻᒪ ᐊᔾᔨᒌᑦᑐᐃᓇᕐᓂᒃ ᐊᑐᖁᓪᓗᒋᑦ.
ᐃᓚᖏᓐᓂᒃ 2 ᐅᑯᐊ ᑐᓴᕋᑦᓴᐃᑦ ᑐᓴᕋᓱᓛᕆᕗᓯ ᖃᐅᑉᐸᑦ, ᓇᓗᓇᐃᔭᐃᓕᕈᑦᑕ ᓄᓇᓕᕐᒥᐅᑕᓄᑦ ᖃᓄᖅ ᑕᒪᓐᓇ ᑐᑭᖃᕐᓂᐊᕐᒪᖔᖅ ᐊᒻᒪ ᖃᓄᖅ ᑐᓴᐅᒪᓇᓱᒍᓐᓇᓂᐊᕐᒪᖔᑦᓯ ᓯᓚᑲᒻᒪᐅᓕᕋᐃᑉᐸᑦ.
ᑐᓴᐅᒪᐃᓐᓇᖁᓪᓗᓯ, ᐊᔭᐅᖅᑐᖅᐸᕗᑦ ᓄᓇᓕᕐᒥᐅᑕᐃᑦ ᒪᓕᑉᐸᖁᓪᓗᒋᑦ ᐆᕕᖓ ᓄᓇᓕᐸᐅᔭᒃᑯᑦ ᐃᖃᓗᐃᑦ ᕙᐃᔅᐳᒃᑯᑦ ᒪᑉᐱᒐᖓᓐᓂᒃ (City of Iqaluit Facebook Page) ᐊᒻᒪ ᖃᐅᔨᒋᐊᖅᐸᓪᓗᒍ ᐅᓇ ᐃᑭᐊᖅᑭᕕᒃᑯᑦ www.iqaluit.ca ᒫᓐᓇᓂᓴᕐᓂᒃ ᑐᓴᐅᒪᖃᑕᐅᕙᓐᓂᐊᕋᑦᓯ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᒃ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | G.Byrne@iqaluit.ca
