ᖃᓄᖅ ᐃᓚᒋᔭᐅᖃᑕᐅᕕᔅᓴᐅᓂᕐᒧᑦ ᓄᓇᓕᒻᒥᑦ ᒐᕙᒪᒧᑦ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᖃᓄᖅ ᐃᓚᒋᔭᐅᖃᑕᐅᕕᔅᓴᐅᓂᕐᒧᑦ ᓄᓇᓕᒻᒥᑦ ᒐᕙᒪᒧᑦ
ᐋᒡᒌᓯ 27, 2025 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᖓᑦ ᐃᖃᓗᐃᑦ ᖃᐅᔨᒃᑲᕈᒪᔭᖏᑦ ᓄᓇᓕᒻᒥᐅᑕᐃᑦ ᐱᔾᔪᑎᖃᖅᑐᓂᑦ ᐊᒥᓱᓂᑦ ᐃᓚᒋᔭᐅᖃᑕᐅᔪᓐᓇᕐᓂᖏᓐᓄᑦ ᓄᓇᓕᒻᒥᑦ ᒐᕙᒪᒥᑦ ᐊᒻᒪ ᐃᑲᔪᕐᓗᑎ ᐃᓱᒪᓕᐅᖅᑕᐅᔪᓂᑦ ᐊᑦᑐᐊᐃᓂᖃᖅᑐᓂᑦ ᓄᓇᓕᑦᑎᓐᓂ.

ᐃᓚᒋᔭᖓ ᐱᒻᒪᕆᐅᓛᖑᔪᖅ ᖃᓄᑦ ᐃᓚᒋᔭᐅᖃᑕᐅᔪᓐᓇᓂᕐᒧᑦ ᓂᕈᐊᕐᓗᑎ ᓄᓇᓕᒻᒧᑦ ᓂᕈᐊᓂᕐᒧᑦ. ᓂᕈᐊᖃᑕᐅᓗᓂ ᐃᖃᓗᐃᑦ ᓄᓇᓕᒻᒥ ᓂᕈᐊᕐᓂᐅᔪᓂᑦ, ᓄᓇᓕᒻᒥᐅᑕᐃᑦ ᑲᓇᑕᒥᐅᑕᐅᔭᕆᐊᓖᑦ, 18−ᓂ ᐊᕐᕌᒍᖃᕐᓗᑎ ᓂᕈᐊᓂᕐᒧᑦ ᐅᓪᓗᖓᓂ, ᐊᒻᒪ ᓄᓇᕗᒻᒥᐅᑕᐅᓯᒪᓗᓂ ᐊᑕᐅᓯᕐᒥᑦ ᐊᕐᕌᒍᒥᑦ. ᓂᕈᐊᖅᑐᑦ ᐃᖃᓗᒻᒥᐅᑕᐅᔭᕆᐊᖃᕐᒥᔪᑦ. ᓂᕈᐊᕐᓂᖃᖃᑦᑕᖅᑐᑦ ᑎᓴᒪᓂᑦ ᐊᕐᕌᒍᓂᑕᒫᑦ, ᐊᒻᒪ ᓄᓇᓕᒻᒥᐅᑕᐃᑦ ᐊᑎᓕᐅᕈᓐᓇᖅᑐᑦ ᓂᕈᐊᕐᕕᒻᒥ ᓂᕈᐊᕐᓇᒥ ᐅᓪᓗᖓᓂ ᐱᑕᖃᖅᑎᑦᑎᓗᑎ ᓈᒻᒪᑦᑐᓂᑦ ᓇᓗᓇᐃᖅᓯᒍᑎᓂᑦ.

ᓄᓇᓕᒻᒥᐅᑕᐃᑦ ᑲᔪᖏᖅᓴᑕᐅᒻᒥᔪᑦ ᐅᐸᖃᑕᐅᓗᑎ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᑲᑎᒪᓂᖏᓐᓄᑦ. ᑖᒃᑯᐊ ᑲᑎᒪᓂᐅᔪᑦ ᒪᑐᐃᖓᔪᑦ ᑭᒃᑐᐃᓐᓇᕐᓄᑦ ᐊᒻᒪ ᑐᓴᕐᕕᖃᑦᑎᑦᑎᕕᔅᓴᐅᔪᓐᓇᖅᑐᖅ ᐱᔾᔪᑎᖃᖅᑐᓂᑦ ᐃᓱᒪᓕᐅᖅᑕᐅᔪᓂᑦ. ᐅᖃᖃᑎᖃᕈᒪᒍᕕᑦ ᑲᑎᒪᔨᓄᑦᑕᐅᑎᒋ ᐅᖃᐅᓯᐅᔪᒥᑦ ᐅᕝᕙᓘᓐᓃᑦ ᐃᓱᒫᓘᑕᐅᔪᒥᑦ, ᐊᐱᕆᔭᕆᐊᖃᖅᑐᑎᑦ ᐃᓚᓕᐅᔾᔭᐅᓗᑎᑦ ᑲᑎᒪᓂᐅᔪᒧᑦ ᑲᑎᒪᔾᔪᑎᔅᓴᓂᑦ ᑲᑎᒪᔭᖃᑕᐅᔭᑐᖅᓯᒪᓗᑎᑦ. ᑕᐃᒪᐃᓐᓂᐊᕐᓗᓂ, ᖃᐅᔨᒋᐊᕐᕕᒋᔭᕆᐊᖃᖅᑕᐃᑦ ᓄᓇᓕᐸᐅᔭᒃᑯᑦ ᐊᓪᓚᑦᑎᖓ ᐊᓪᓚᕕᖓ ᒪᕐᕉᓐᓂ ᐱᓇᓱᐊᕈᓰᓐᓂ ᑲᑎᒪᓂᖃᓚᐅᖅᑎᓐᓇᒋᑦ. ᑖᓐᓇ ᐱᕕᔅᓴᖃᖅᑎᑦᑎᔪᓐᓇᖅᑐᖅ ᐃᕝᕕᑦ ᑐᔅᓯᕋᐅᑎᖓᓂ ᕿᒥᕐᕈᔭᐅᓗᓂ ᐊᒻᒪ ᑲᑎᒪᔾᔪᑎᔅᓴᐃᑦ ᐋᖅᑭᒋᐊᖅᑕᐅᓗᑎ ᐊᒻᒪ ᐊᖏᖅᑕᐅᓗᑎ.

ᐊᓯᒎᕐᕕᓴᐅᒻᒥᔪᖅ ᐃᓚᒋᔭᐅᖃᑕᐅᓗᓂ ᐃᓚᒋᔭᐅᓕᕐᓗᓂ ᓄᓇᓕᒻᒧᑦ ᑲᑎᒪᔨᕋᓛᓂᑦ ᐅᕝᕙᓘᓐᓃᑦ ᑲᑎᒪᔨᓂᑦ. ᐊᒥᓱᒐᓚᐃᑦ ᓄᓇᓕᐸᐅᔭᒃᑯᓐᓄᑦ ᑲᑎᒪᔨᕋᓛᑦ ᑐᓐᖓᓱᑎᑦᑎᔪᑦ ᑭᒃᑯᑐᐃᓐᓇᕐᓂᑦ ᐃᓄᓐᓂᑦ, ᑕᐃᔭᐅᒻᒥᔪᖅ “ᓂᕈᐊᕈᓐᓇᖏᑦᑐᖅ ᐃᓚᒋᔭᐅᔪᖅ”. ᑖᒃᑯᐊ ᑲᑎᒪᔨᕋᓛᑦ ᐱᓕᕿᐊᓪᓗᐊᑕᖃᖅᑐᑦ ᓲᕐᓗ ᐱᓐᖑᐊᖅᑐᓕᕆᓂᕐᒧᑦ, ᑖᒃᓯᓄᑦ ᒪᓕᑦᑕᐅᔭᕆᐊᓖᑦ, ᐊᒻᒪ ᐱᕙᓪᓕᐊᑎᑦᑎᓂᕐᒧᑦ ᐅᕐᓂᓪᓗᒍᑎᓂᑦ. ᐃᓚᒋᔭᐅᖃᑕᐅᓂᕐᒧᑦ ᑲᑎᒪᔨᕋᓛᓂᑦ ᒥᔅᓯᖃᑦᑎᐊᖅᑐᖅ ᓄᓇᓕᒻᒥᐅᑕᓄᑦ ᑐᓂᓯᓗᑎ ᖃᐅᔨᒪᔭᖏᓐᓂ ᐊᒻᒪ ᐃᑲᔪᕐᓗᑎ ᐋᖅᑭᑦᑕᐅᓂᖏᓐᓄᑦ ᐊᑐᐊᒐᐃᑦ ᐊᒻᒪ ᐱᓕᕆᐊᑦ.

ᓄᓇᓕᒻᒥᐅᑕᐃᑦ ᐊᑐᕈᓐᓇᕐᒥᔪᑦ ᐊᑎᓕᐅᖅᑎᑦᑎᓂᕐᒥᑦ ᓇᓗᓴᐃᖅᓯᓗᑎ ᑕᑯᓐᓇᖅᑕᖏᓐᓂ ᐅᕝᕙᓘᓐᓃᑦ ᐊᔾᔩᔪᒪᓗᑎ ᓄᓇᓕᐸᐅᔭᒃᑯᑦ ᒪᓕᒐᕋᓛᖏᓐᓂ. ᒪᕐᕈᐃᖑᔪᐃᑦ ᖃᓄᐃᑦᑑᓂᖏᑦ ᐊᑎᓕᐅᖅᑎᑦᑎᓂᕐᒧᑦ: 

ᐃᓕᓴᕆᔭᐅᓯᒪᔪᑦ ᐊᒻᒪ ᐃᓕᓴᕆᔭᐅᓯᒪᖏᑦᑐᑦ. ᐃᓕᓴᕆᔭᐅᓯᒪᔪᑦ ᐊᑎᓕᐅᖅᑎᑕᐅᓯᒪᔪᑦ ᑎᑭᑦᑎᔪᑦ ᒪᓕᒐᖏᓐᓂ ᓂᕈᐊᕐᓂᖃᖅᑎᑦᑎᔪᓐᓇᖅᑐᑦ ᑕᐃᔭᐅᔪᖅ ᓄᓇᓕᓕᒫᒥ ᓂᕈᐊᖅᑐᑦ. ᑭᓯᐊᓂᓕ, ᑖᓐᓇ ᐱᕙᓕᐊᓂᖓ ᐱᑕᖃᕆᐊᖃᖅᑎᑦᑎᔪᑦ ᐃᑲᔪᖅᑕᐅᓂᕐᒧᑦ 20 ᐳᓴᓐᑎᓄᑦ ᓂᕈᐊᕈᓐᓇᖅᑐᓂᑦ ᓄᓇᓕᒻᒥᑦ. ᐃᓕᓴᕆᔭᐅᓯᒪᖏᑦᑐᑦ ᐊᑎᓕᐅᖅᑎᑕᐅᔪᑦ, ᓲᕐᓗ ᑲᑐᑎᔭᐅᔪᑦ ᐃᕐᖏᓐᓈᕈᑎᒃᑯᑦ, ᐃᑲᔪᕈᓐᓇᖅᑐᑦ ᐅᔾᔨᕈᓱᓕᖅᑎᑦᑎᓗᑎ ᐊᒻᒪ ᑕᑯᔅᓴᐅᑎᑦᑎᓗᑎ ᐃᓄᓐᓄᑦ ᐱᔪᒪᓂᕆᔭᐅᔪᓂᑦ, ᑭᓯᐊᓂ ᒪᓕᒐᖅᑎᒍᑦ ᐱᔪᓐᓇᐅᑎᖃᖏᑦᑐᑦ ᐊᒻᒪ ᑲᑎᒪᔨᓄᑦ ᖃᓄᐃᓕᓯᒋᐊᕈᑕᐅᔪᓐᓇᖏᑦᑐᑦ.
ᓄᓇᓕᒻᒥᐅᑕᐃᑦ ᑲᔪᖏᖅᓴᑕᐅᔪᑦ ᐃᓚᒋᔭᐅᖃᑕᓴᐃᓪᓗᑎ ᒪᓕᒐᓕᐅᓂᕐᒥᑦ ᐱᕙᓪᓕᐊᓂᖓᓄᑦ. ᐊᒥᓲᓂᖅᓴᐃᑦ ᒪᓕᒐᕋᓛᑦ ᐱᖓᓱᐊᑎᖅᑕᐅᔭᕆᐊᓖᑦ ᐅᖃᓕᒫᖅᑕᐅᓗᑎ ᑲᑎᒪᔨᓂᑦ ᒪᓕᒐᕈᒪᐅᖅᑎᓐᓇᒋᑦ. ᓯᕗᓪᓕᖅᐹᖓᓂ ᐅᖃᓕᒫᖅᑕᐅᔪᑦ ᐊᑐᖅᑕᐅᔭᕆᐊᓕᒃ ᐅᖃᐅᓯᕆᔭᐅᖏᓪᓗᓂ, ᑐᖏᓕᖓ ᐅᖃᓕᒫᖅᑕᐅᓂᖓ ᕿᒥᕐᕈᓚᑦᑎᑦᑎᔪᑦ ᐊᒻᒪ ᑲᑎᒪᔾᔪᑕᐅᓗᓂ, ᐊᒻᒪ ᐱᖓᔪᐊᓐᓂ ᐅᖃᓕᒫᖅᑕᐅᓂᖓ ᑭᖑᓪᓕᖅᐹᖑᔪᖅ ᐊᖏᖅᑕᐅᓚᐅᖅᑎᓐᓇᒍ. ᑐᖏᓕᖓ ᐅᖃᓕᒫᖅᑕᐅᓂᖓ ᐱᒻᒪᕆᐅᓛᖑᒐᔪᑦᑐᖅ ᓇᒦᓕᕐᓂᖓᐊ ᐃᓄᐃᑦ ᑐᓴᖅᑎᑦᑎᓂᖃᕐᒃᓗᑎ. ᑐᓂᓯᓂᖅ ᐃᕝᕕᑦ ᑕᑯᓐᓇᖅᑕᖏᓐᓂ ᑕᕝᕙᓂᐅᔪᒥᑦ ᐃᑲᔪᕈᓐᓇᖅᑐᑦ ᐊᖅᑭᔅᓯᓗᓂ ᖃᓄᐃᓐᓂᕆᔭᖓᓂ ᐃᓱᒪᓕᐅᖅᑕᐅᔪᑦ ᑭᖑᓪᓕᖅᐹᒥ ᐋᖅᑭᑦᑕᐅᓚᐅᖅᑎᓐᓇᒋᑦ.

ᐃᓚᖏᓐᓂ, ᑲᑎᒪᔨᐅᔪᖅ ᓄᖅᑲᕐᓂᕈᓂ ᐊᑯᓂᐅᕕᔅᓴᖓ ᐱᔭᕇᓚᐅᖅᑎᓐᓇᒍ, ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᑎᒃᑯᐊᖅᓯᔪᓐᓇᖅᑐᑦ ᓄᑖᒥ ᑲᑎᒪᔨᒥᑦ ᓂᕈᐊᕐᓂᖃᖅᑎᑦᑎᖏᖔᕐᓗᑎ. ᑖᓐᓇ ᐊᑐᖅᑕᐅᓂᖓ ᐃᑲᔪᖅᑐᖅ ᑲᔪᓰᓐᓇᕐᓂᖏᓐᓄᑦ ᐊᒻᒪ ᑭᖑᕙᖅᑎᑎᖏᓪᓗᑎ ᐅᕝᕙᓘᓐᓃᑦ ᐃᓚᒍᒍᑕᖃᖏᓪᓗᑎ ᐊᑭᖏᓐᓂ. ᑖᓐᓇ ᑐᑭᖃᕋᓗᐊᖅᑎᓪᓗᒍ ᑲᑎᒪᔨᓕᒫᖑᖏᑦᑐᑦ ᓂᕈᐊᖅᑕᐅᖏᒍᓐᓇᖅᑐᑦ, ᐱᕙᓪᓕᐊᓂᖓ ᓇᓗᓇᐃᖅᓯᔪᖅ ᑖᒃᑯᐊ ᑲᑎᒪᔩᑦ ᐱᔨᑦᑎᑦᑎᐊᕈᓐᓇᕐᓗᑎ ᓄᓇᓕᒻᒥᑦ.

ᐃᓚᒋᔭᐅᖃᑕᐅᓂᖅ ᓄᓇᓕᒻᒥ ᒐᕙᒪᒥᑦ ᐃᑲᔪᖅᑐᑦ ᑖᒃᑯᐊ ᐃᓱᒪᓕᐅᖅᑕᐅᔪᑦ ᑕᑯᔅᓴᐅᑎᑦᑎᓗᑎ ᐱᔭᕆᐊᖃᖅᑕᖏᓐᓂ ᐊᒻᒪ ᐱᒻᒪᕆᒋᔭᖏᓐᓂ ᐅᕙᒍᑦ ᓄᓇᓕᖓᓄᑦ. ᓄᓇᓕᐸᐅᔭᒃᑯᑦ ᐃᖃᓗᐃᑦ ᑲᔪᖏᖅᓴᐃᔪᑦ ᓄᓇᓕᒻᒥᐅᑕᓕᒫᓂᑦ ᖃᐅᔨᒪᑎᑕᐅᖏᓐᓇᕐᓗᑎ ᐊᒻᒪ ᐃᓚᒋᔭᐅᖃᑕᐅᓗᑎᑦ.

##

ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:
ᔩᐅᑉ ᕙᕐᓂ
ᐊᖏᔪᖅᑳᖅ ᑐᓴᐅᒪᔪᓕᕆᔨᒃᑯᓐᓄᑦ ᐊᒻᒪ ᐊᑭᓕᕐᓱᐃᔨᓄᑦ ᐱᔨᖅᑎᕋᐅᑎ
ᓄᓇᓕᐸᐅᔭᐃᑦ ᐃᖃᓗᐃᑦ 867-979-5619 | G.Byrne@iqaluit.ca