ᐃᒃᐱᒋᔭᐅᑦᑎᐊᕆᐊᓖᑦ ᐊᔪᕈᑎᓕᖕᓄᑦ ᓄᓇᒃᑰᕈᑎᓄᑦ ᓄᖅᑲᖕᒑᕐᕖᑦ – ᐊᑭᓕᒐᒃᓴᖅᑖᕈᓐᓇᖅᑐᑦ ᐊᑐᖅᑕᐅᒋᐊᖃᖖᒋᑦᑐᒦᑦᑐᑦ

ᑭᒃᑯᑐᐃᓐᓇᕐᓄᑦ ᑐᓴᒐᒃᓴᖅ
ᐃᒃᐱᒋᔭᐅᑦᑎᐊᕆᐊᓖᑦ ᐊᔪᕈᑎᓕᖕᓄᑦ ᓄᓇᒃᑰᕈᑎᓄᑦ ᓄᖅᑲᖕᒑᕐᕖᑦ – ᐊᑭᓕᒐᒃᓴᖅᑖᕈᓐᓇᖅᑐᑦ ᐊᑐᖅᑕᐅᒋᐊᖃᖖᒋᑦᑐᒦᑦᑐᑦ
ᔫᓂ 26, 2025 – ᐃᖃᓗᐃᑦ, ᓄᓇᕗᑦ

ᐃᖃᓗᖕᓂ ᓄᓇᓕᐸᐅᔭᒃᑯᑦ ᐃᖅᑲᐃᑎᑦᑎᔪᒪᔪᑦ ᓄᓇᖅᑲᑎᒌᓂᒃ ᐊᒻᒪᓗ ᓂᐅᕐᕈᓯᒪᔪᓂᒃ ᓄᓇᒃᑰᕈᑎᓄᑦ ᓄᖅᑲᖕᒑᕐᕕᐅᔪᑦ ᓴᓂᕐᕙᒃᑕᐅᓯᒪᔪᖃᕐᓂᖕᒐᓂᒃ ᐃᓄᖕᓄᑦ ᑎᒥᒥᒍᑦ ᐊᔪᕈᑎᓕᖕᓄᑦ ᑕᑯᒃᓴᐅᑎᑕᐅᔪᑦ ᐊᑐᖅᑕᐅᒋᐊᖃᖖᒋᑦᑐᓄᑦ ᑭᒃᑯᑐᐃᓐᓇᕐᓄᑦ. ᐱᔪᓐᓇᖅᑎᑕᐅᖖᒋᑦᑐᑦ ᐊᑐᖅᑕᐅᓂᖕᒋᑦ ᑖᒃᑯ ᐃᓂᐅᔪᑦ ᓈᒻᒪᖖᒋᑐᐃᓐᓇᖖᒋᓚᖅ, ᒪᓕᒐᕋᓛᒃᑯᑦ ᐱᕋᔭᖕᓂᐅᔪᑦ.

ᐃᖃᓗᐃᑦ ᓄᓇᓕᐸᐅᔭᖕᒐᑕ ᒪᓕᒐᕋᓛᖕᒐ ᓈᓴᐅᑎ 625: ᐃᖕᒋᕐᕋᔪᑦ, ᓄᓇᒃᑰᕈᑎᓄᑦ ᓄᖅᑲᖕᒑᕐᕖᑦ ᐊᒻᒪᓗ ᐱᓱᒡᕖᑦ ᐃᓚᖕᒐ 3.3(k):

“ᑭᓇᑐᐃᓐᓇᐅᑉ ᓄᓇᒃᑰᕈᑎᖕᒐ ᓄᖅᑲᖕᒑᕐᕕᖕᒦᒋᐊᖃᖖᒋᓚᖅ ᓇᓗᓇᐃᖅᓯᕕᐅᓯᒪᒃᐸᑦ ᑎᒥᒥᒍᑦ ᐊᔪᕈᑎᓕᓐᓄᑦ ᓄᖅᑲᖕᒐᕕᓐᓂᑦ ᓄᓇᕐᔪᐊᓕᒫᒥᑦ ᑎᒥᒥᒍᑦ ᐊᔪᕈᑎᓕᓐᓄᑦ ᓇᓗᓇᐃᒃᑯᑕᓂᑦ ᖁᓛᓂᑦ ᓇᓗᓇᐃᖅᓯᒪᔪᓂᑦ ᐅᕝᕙᓘᓐᓃᑦ ᐊᖅᑯᑎᑯᑖᑉ ᓴᓂᕌᓄᑦ, ᑭᓯᐊᓂ ᑕᐃᒃᑯᐊ ᓄᓇᒃᑰᕈᑎᐅᔪᑦ ᑎᒥᒥᒍᑦ ᐊᔪᕈᑎᓖᑦ.”

ᓯᖁᒥᑦᑎᔪᑦ ᐆᒧᖕᒐ ᐃᓚᖕᒐᓄᑦ ᐊᑭᓕᒐᒃᓴᖅᑖᖅᑎᑕᐅᑐᐃᓐᓇᕆᐊᓖᑦ $75.00-ᒥᑦ.

ᑕᐃᒎᓯᖅ “ᐊᖅᑯᑎᑯᑖᒃ” ᓇᓗᓇᐃᖅᑕᐅᓯᒪᔪᖅ ᓄᓇᓕᐸᐅᔭᒃᑯᑦ ᒪᓕᒐᕋᓛᖕᒐᓂ 625, ᐅᖃᐅᓯᖃᖅᑐᖅ ᑭᒃᑯᑐᐃᓐᓇᕐᓄᑦ ᐊᖅᑯᑎᑐᐃᓐᓇᐅᖖᒋᑦᑐᓂᑦ. ᐃᓚᖃᕐᒥᔪᖅ ᐃᓄᖕᓄᑦ ᐊᑐᖅᑕᐅᒐᔪᒃᑐᓂᒃ ᓄᓇᒃᑰᕈᑎᓄᑦ ᐅᕝᕙᓘᓐᓃᑦ ᓄᓇᒃᑰᕈᑎᓄᑦ ᓄᖅᑲᖕᒑᕐᕕᖕᓄᑦ, ᓲᕐᓗ ᓄᓇᒃᑰᕈᑎᓄᑦ ᓄᖅᑲᖕᒑᕐᕕᑦ, ᐃᓄᖕᓄᑦ ᐅᕝᕙᓘᓐᓃᑦ ᓇᖕᒥᓂᕆᔭᐅᔪᓄᑦ. ᑖᓐᓇ ᑐᑭᖃᖅᑐᖅ, ᐊᔪᕈᑎᓕᖕᓄᑦ ᓄᓇᒃᑰᕈᑎᓄᑦ ᓄᖅᑲᖕᒑᕐᕕᖕᓄᑦ ᒪᓕᒋᐊᖃᖅᑐᑦ ᓇᓂᓕᒫᑲᓴᒃ ᐃᓂᓂ, ᓄᓇᓕᐸᐅᔭᕐᓂᑐᐃᓐᓇᐅᖖᒋᑦᑐᖅ ᐊᖅᑯᑎᓂ.

ᐊᔪᕈᑎᓕᖕᓄᑦ ᓄᓇᒃᑰᕈᑎᓄᑦ ᓄᖅᑲᖕᒑᕐᕕᒃ ᐊᑦᑕᕐᓇᖖᒋᑎᑦᑎᕗᖅ ᐊᒻᒪᓗ ᐊᔾᔨᒌᒃᑎᑦᑎᓪᓗᓂ ᐊᑐᖅᑕᐅᔭᕆᐊᖃᓪᓚᕆᒃᑐᓂᒃ ᐱᔨᑦᑎᕋᐅᑎᓂᒃ ᐊᒻᒪᓗ ᑭᒃᑯᑐᐃᓐᓇᓄᑦ ᐃᓂᒋᔭᐅᔪᓐᓇᖅᑐᓂᒃ. ᐊᒥᓱᓄᑦ ᐃᓄᖕᓄᑦ ᑎᒥᒥᒍᑦ ᐊᔪᕈᑎᓕᖕᓄᑦ, ᑖᒃᑯᐊ ᐃᓂᐅᔪᑦ ᐊᑲᐅᓈᖅᓯᒪᖖᒋᒻᒪᑕ, ᐱᔭᕆᐊᖃᓪᓚᕆᖕᒪᑕ. ᐊᑐᕐᓂᕐᓗᖕᓂᖅ ᐱᔪᓐᓇᐅᑎᖃᖖᒋᑦᑐᓄᑦ ᐃᖕᒋᕐᕋᔾᔪᑎᓄᑦ ᐊᑐᕈᓐᓇᐃᓪᓕᑎᑦᑎᕙᒻᒪᑕ ᑕᐃᒃᑯᓄᖕᒐ ᑕᑎᖃᖅᑐᓄᑦ ᖃᐅᑕᒫᑦ ᐃᓅᓯᖕᒋᓐᓄᑦ.

ᐊᖁᑏᑦ ᐃᖅᑲᐃᒋᐊᖅᑎᑕᐅᔪᑦ ᐊᑐᖃᑦᑕᖁᔭᐅᓇᑎᒃ ᐊᑐᖅᑕᐅᔭᕆᐊᓕᖕᓄᑦ ᓄᓇᒃᑰᕈᑎᓄᑦ ᓄᖅᑲᖕᒑᕐᕕᖕᓂᒃ ᑭᓯᐊᓂ ᐊᑐᕈᓐᓇᖅᑐᒥᒃ ᐱᑎᑕᐅᓯᒪᔪᓂᑦ. ᓄᖅᑲᖕᒐᑲᐃᓐᓇᑐᐃᓐᓇᕋᓗᐊᕐᓗᓂ ᑖᒃᑯᓇᓂ ᐃᓂᓂ ᐱᔪᓐᓇᐅᑎᖃᖅᑎᑕᐅᖖᒋᑦᑐᑦ ᐊᔪᖅᑎᑕᐅᔪᑦ. ᐃᒃᐱᒋᔭᖃᑦᑎᐊᕐᓂᖅ ᐊᔪᕈᑎᓕᖕᓄᑦ ᓄᓇᒃᑰᕈᑎᒃᑯᑦ ᓄᖅᑲᖕᒑᕐᕕᖕᓂᒃ ᑲᒪᒋᔭᒃᓴᑦᑎᐊᕙᐅᔪᖅ ᐊᒻᒪᓗ ᐱᔭᕐᓂᖅᑐᒃᑯᑦ ᐃᑲᔪᕈᓐᓇᖅᐳᒍᑦ ᐃᖃᓗᐃᑦ ᐃᓚᓕᐅᔾᔨᓂᖅᓴᐅᓕᕐᓗᑎᒃ ᐃᑲᔪᖅᑐᐃᓂᖅᓴᐅᓗᑎᒡᓗ ᑭᒃᑯᓕᒫᓂᑦ.

##

ᑐᑭᓯᒋᐊᒃᑲᓐᓂᕈᒪᒍᕕᑦ ᑐᑭᓯᒋᐊᒃᑲᓐᓂᕈᓐᓇᖅᑐᑎᑦ:

ᔨᐊᕝ ᐹᕐᓂ
ᑐᓴᐅᒪᑎᑦᑎᓂᕐᒧᑦ ᐊᑭᓕᖅᓱᐃᕙᒃᑐᓄᓪᓗ ᐱᔨᑦᑎᕋᕐᕕᖃᕐᓂᕐᒧᑦ ᐊᐅᓚᑦᑎᔨ
ᐃᖃᓗᓐᓂ ᓄᓇᓕᐸᐅᔭ
867-979-5619 | G.Byrne@iqaluit.ca